໙. ຉຕ຺ຕຸປາຫນວຄ຺ໂຄ

໑-໒. ຉຕ຺ຕຸປາຫນາທິສິກ຺ຂາປທວຓ຺ຓນາ

ວຸຕ຺ຕລກ຺ຂຓໍ ຉຕ຺ຕນ຺ຕິ ‘‘ຉຕ຺ຕໍ ນາມ ຕີຓິ ຉຕ຺ຕານິ – ເສຕຈ຺ຉຕ຺ຕໍ, ກິລຎ຺ຊຈ຺ຉຕ຺ຕໍ, ປຓ຺ຓຈ຺ຉຕ຺ຕໍ ມຓ຺ຑລພທ຺ຘໍ, ສລາກພທ຺ຘ’’ນ຺ຕິ (ປາຈິ. ໑໑໘໑) ເອວໍ ປທຠາຊເນ ວຸຕ຺ຕລກ຺ຂຓໍ ຉຕ຺ຕໍ. ຕາທິສໍ ຐານໍ ປຕ຺ວາຕິ ຄຈ຺ຉກທ຺ທມາທີສຸ ຕໍ ຕໍ ຐານໍ ປຕ຺ວາ.

ຉຕ຺ຕສ຺ເສວາຕິ ກທ຺ທມາທີນິ ປຕ຺ວາ ອຸປາຫນາ ໂອມຸຎ຺ຈິຕ຺ວາ ຉຕ຺ຕສ຺ເສວ ຘາຣຓໍ. ອຸປາຫນານໍເຍວ ວາຕິ ຄຈ຺ຉາທີນິ ທິສ຺ວາ ຉຕ຺ຕໍ ອປນາເມຕ຺ວາ ອຸປາຫນານໍເຍວ ຘາຣຓໍ.

ທຸຕິຍໍ ອຸຕ຺ຕານຕ຺ຖເມວ.

ຉຕ຺ຕຸປາຫນາທິສິກ຺ຂາປທວຓ຺ຓນາ ນິຏ຺ຐິຕາ.

໓-໕. ສງ຺ຆາຓິອາທິສິກ຺ຂາປທວຓ຺ຓນາ

ສງ຺ຆາຓິນ຺ຕິ ກຏິຍໍ ອນຸຠວິຕພ຺ພໍ ອາຠຣຓໍ. ເຕນາຫ ‘‘ຍໍ ກິຎ຺ຈິ ກຏູປຄ’’ນ຺ຕິ.

ຈຕຸຕ຺ຖປຎ຺ຈມານິ ອຸຕ຺ຕານຕ຺ຖາເນວ.

ສງ຺ຆາຓິອາທິສິກ຺ຂາປທວຓ຺ຓນາ ນິຏ຺ຐິຕາ.

໖. ວາສິຕກສິກ຺ຂາປທວຓ຺ຓນາ

ຄນ຺ຘວາສິຕເກນາຕິ ຄນ຺ຘປຣິຠາວິເຕນ.

ວາສິຕກສິກ຺ຂາປທວຓ຺ຓນາ ນິຏ຺ຐິຕາ.

໗-໑໐. ຠິກ຺ຂຸນິອຸມ຺ມທ຺ທາປນາທິສິກ຺ຂາປທວຓ຺ຓນາ

ຄິລານາຍາຕິ (ປາຈິ. ອຏ຺ຐ. ໑໒໐໘) ອນ຺ຕມໂສ ມຄ຺ຄຄມນປຣິສ຺ສເມນາປິ ອາພາຘິກາຍ. ອາປທາສູຕິ ໂຈຣຠຍາທິນາ ສຣີຣກມ຺ປນາທີສຸ.

ອຏ຺ຐມນວມທສເມສຸ ກິຎ຺ຈິ ວຕ຺ຕພ຺ພໍ ນຕ຺ຖິ.

ຠິກ຺ຂຸນິອຸມ຺ມທ຺ທາປນາທິສິກ຺ຂາປທວຓ຺ຓນາ ນິຏ຺ຐິຕາ.

໑໑. ອນາປຸຈ຺ຉາສິກ຺ຂາປທວຓ຺ຓນາ

ອຸປຈາຣໍ ສນ຺ຘາຍາຕິ ສມນ຺ຕາ ທ຺ວາທສຫຕ຺ຖູປຈາຣໍ ສນ຺ຘາຍ.

ອນາປຸຈ຺ຉາສິກ຺ຂາປທວຓ຺ຓນາ ນິຏ຺ຐິຕາ.

໑໒. ປຎ຺ຫາປຸຈ຺ຉນສິກ຺ຂາປທວຓ຺ຓນາ

ອໂນທິສ຺ສາຕິ ‘‘ອມຸກສ຺ມິໍ ນາມ ຐາເນ ປຸຈ຺ຉາມີ’’ຕິ ເອວໍ ອນິຍເມຕ຺ວາ ເກວລໍ ‘‘ປຸຈ຺ຉິຕພ຺ພໍ ອຕ຺ຖິ, ປຸຈ຺ຉາມິ, ອຍ຺ຍາ’’ຕິ ເອວໍ ວຕ຺ວາ.

ປຎ຺ຫາປຸຈ຺ຉນສິກ຺ຂາປທວຓ຺ຓນາ ນິຏ຺ຐິຕາ.

໑໓. ອສໍກຈ຺ຈິກສິກ຺ຂາປທວຓ຺ຓນາ

ປຣິກ຺ຂິຕ຺ຕສ຺ສ ຄາມສ຺ສ ປຣິກ຺ເຂປໍ, ອປຣິກ຺ຂິຕ຺ຕສ຺ສ ອຸປຈາຣໍ ອຕິກ຺ກມນ຺ຕິຍາ ວາ ໂອກ຺ກມນ຺ຕິຍາ ວາຕິ ເອຕ຺ຖ ປຣິກ຺ຂິຕ຺ຕສ຺ສ ຄາມສ຺ສ ປຣິກ຺ເຂປໍ ອຕິກ຺ກມນ຺ຕິຍາ ວາ ອປຣິກ຺ຂິຕ຺ຕສ຺ສ ຄາມສ຺ສ ອຸປຈາຣໍ ໂອກ຺ກມນ຺ຕິຍາ ວາຕິ ຍຖາກ຺ກມໍ ສມ຺ພນ຺ໂຘ ເວທິຕພ຺ໂພ. ອາປທາສູຕິ ມຫຄ຺ຆໍ ສໍກຈ຺ຈິກໍ ປາຣຸປິຕ຺ວາ ຄຈ຺ຉນ຺ຕິຍາ ອຸປທ຺ທໂວ ອຸປ຺ປຊ຺ຊຕິ, ເອວຣູປາສຸ ອາປທາສຸ.

ອສໍກຈ຺ຈິກສິກ຺ຂາປທວຓ຺ຓນາ ນິຏ຺ຐິຕາ.

ຉຕ຺ຕຸປາຫນວຄ຺ໂຄ ນວໂມ.

ອິຕິ ກງ຺ຂາວິຕຣຓິຍາ ປາຕິໂມກ຺ຂວຓ຺ຓນາຍ

ວິນຍຕ຺ຖມຎ຺ຊູສາຍໍ ລີນຕ຺ຖປ຺ປກາສນິຍໍ

ຠິກ຺ຂຸນິປາຕິໂມກ຺ເຂ ປາຈິຕ຺ຕິຍວຓ຺ຓນາ ນິຏ຺ຐິຕາ.

ອສາຘາຣຓສມຸຏ຺ຐານວຓ຺ຓນາ

ອຈິຕ຺ຕການີຕິ (ສາຣຕ຺ຖ. ຏີ. ປາຈິຕ຺ຕິຍ ໓.໑໒໑໔) ‘‘ນຈ຺ຈ’’ນ຺ຕິອາທິນາ ອຊານິຕ຺ວາ ທສ຺ສນາທິໍ ກໂຣນ຺ຕິຍາ ອາປຕ຺ຕິສມ຺ຠວໂຕ ວຕ຺ຖຸອຊານນຈິຕ຺ເຕນ ອຈິຕ຺ຕການິ. ໂລກວຊ຺ຊານີຕິ ‘‘ນຈ຺ຈ’’ນ຺ຕິອາທິນາ ຊານິຕ຺ວາ ທສ຺ສນາທິໍ ກໂຣນ຺ຕິຍາ ອກຸສເລເນວ ອາປຊ຺ຊນໂຕ ໂລກວຊ຺ຊານິ. ເຕນາຫ ‘‘ອຍໍ ປເນຕ຺ຖ ອຘິປ຺ປາໂຍ’’ຕິອາທິ ສຈິຕ຺ຕການີຕິ ‘‘ໂຈຣີ’’ຕິອາທິນາ ວຕ຺ຖຸໍ ຊານິຕ຺ວາ ກຣເຓເຍວ ອາປຕ຺ຕິສມ຺ຠວໂຕ ສຈິຕ຺ຕການິ. ອຸປສມ຺ປທາທີນໍ ເອກນ຺ຕາກຸສລຈິຕ຺ເຕເນວ ອກຕ຺ຕພ຺ພຕ຺ຕາ ປຓ຺ຓຕ຺ຕິວຊ຺ຊານິ. ‘‘ອິຘ ສຈິຕ຺ຕກາຈິຕ຺ຕກຕາ ປຓ຺ຓຕ຺ຕິຊານນາຊານນຕາຍ ອຄ຺ຄເຫຏ຺ຐາ ວຕ຺ຖຸຊານນາຊານນຕາຍ ຄເຫຕພ຺ພ’’ນ຺ຕິ ວທນ຺ຕິ.

ອສາຘາຣຓສມຸຏ຺ຐານວຓ຺ຓນາ ນິຏ຺ຐິຕາ.