໖. ອາຣາມວຄ຺ໂຄ

໑-໒. ອາຣາມປວິສນາທິສິກ຺ຂາປທວຓ຺ຓນາ

ສີສານຸໂລກິກາຍາຕິ ສີສໍ ອນຸໂລເກນ຺ຕິຍາ. ຍຕ຺ຖ ວາ ຠິກ຺ຂຸນິໂຍ ສນ຺ນິປຕິຕາຕິ ຍຕ຺ຖ ຠິກ຺ຂຸນິໂຍ ປຐມຕຣໍ ສຊ຺ຌາຍນເຈຕິຍວນ຺ທນາທິອຕ຺ຖໍ ສນ຺ນິປຕິຕາ. ອາປທາສູຕິ ເກນຈິ ອຸປທ຺ທຸຕາ ໂຫຕິ, ເອວຣູປາສຸ ອາປທາສຸ ປວິສິຕຸໍ ວຏ຺ຏຕິ.

ທຸຕິຍໍ ອຸຕ຺ຕານຕ຺ຖເມວ.

ອາຣາມປວິສນາທິສິກ຺ຂາປທວຓ຺ຓນາ ນິຏ຺ຐິຕາ.

໓-໔. ຄຓປຣິຠາສນາທິສິກ຺ຂາປທວຓ຺ຓນາ

ເສສນ຺ຕິ ‘‘ອຕ຺ຖຘມ຺ມອນຸສາສນິປຸເຣກ຺ຂາຣາຍາ’’ຕິອາທິກໍ ອວເສສໍ. ຕຕ຺ຖ ອນຸສາສນິປຸເຣກ຺ຂາຣາຍາຕິ ‘‘ອິທານິປິ ຕ຺ວໍ ພາລາ ອພ຺ຍຕ຺ຕາ’’ຕິອາທິນາ (ປາຈິ. ອຏ຺ຐ. ໑໐໓໖) ນເຍນ ອນຸສາສນິປກ຺ເຂ ຐຕ຺ວາ ວທນ຺ຕິຍາ ອນາປຕ຺ຕິ.

ຈຕຸຕ຺ຖໍ ອຸຕ຺ຕານຕ຺ຖເມວ.

ຄຓປຣິຠາສນາທິສິກ຺ຂາປທວຓ຺ຓນາ ນິຏ຺ຐິຕາ.

໕. ກຸລມຈ຺ຉຣິນີສິກ຺ຂາປທວຓ຺ຓນາ

ກຸເລ ມຈ຺ຉໂຣ ກຸລມຈ຺ຉໂຣຕິ ປຸຣິມສ຺ມິໍ ປກ຺ເຂ ສກຕ຺ເຖ ອິນີປຈ຺ຈໂຍ, ຕໍ ກຸລໍ ອສ຺ສທ຺ຘໍ ອປ຺ປສນ຺ນນ຺ຕິ ກຸລສ຺ສ ອຄຸຓໍ, ອຍສໍ ວາ ຠາສນ຺ຕິຍາຕິ ອຕ຺ໂຖ. ຠິກ຺ຂຸນີນໍ ອວຓ຺ຓໍ ຠາສນ຺ຕິຍາຕິ ‘‘ຠິກ຺ຂຸນິໂຍ ທຸສ຺ສີລາ ປາປຘມ຺ມາ’’ຕິ (ປາຈິ. ອຏ຺ຐ. ໑໐໔໓) ຠິກ຺ຂຸນີນໍ ອຄຸຓໍ, ອຍສໍ ວາ ຠາສນ຺ຕິຍາ.

ສນ຺ຕໍເຍວ ອາທີນວນ຺ຕິ ກຸລສ຺ສ ວາ ຠິກ຺ຂຸນີນໍ ວາ ສນ຺ຕໍເຍວ ອຄຸຓໍ.

ກຸລມຈ຺ຉຣິນີສິກ຺ຂາປທວຓ຺ຓນາ ນິຏ຺ຐິຕາ.

໖-໘. ອຠິກ຺ຂຸກາວາສາທິສິກ຺ຂາປທວຓ຺ຓນາ

ສມນ຺ຕປາສາທິກາຍໍ ວຸຕ຺ໂຕຕິ ສມນ຺ຕປາສາທິກາຍ ໂອວາທວຄ຺ຄສ຺ສ ປຐມສິກ຺ຂາປເທ (ປາຈິ. ອຏ຺ຐ. ໑໔໔) ວຸຕ຺ໂຕ.

ສຕ຺ຕມຏ຺ຐມານິ ອຸຕ຺ຕານຕ຺ຖາເນວ.

ອຠິກ຺ຂຸກາວາສາທິສິກ຺ຂາປທວຓ຺ຓນາ ນິຏ຺ຐິຕາ.

໙-໑໐. ໂອວາທູປສງ຺ກມນາທິສິກ຺ຂາປທວຓ຺ຓນາ

ອຸໂປສຖສ຺ສ ປຸຈ຺ຉນໍ ອຸໂປສຖປຸຈ຺ຉາ, ສາວກປຈ຺ຈຍໍ, ຣສ຺ສຕ຺ຕຎ຺ຈ ກຕ຺ວາ ‘‘ອຸໂປສຖປຸຈ຺ຉກ’’ນ຺ຕິ ວຸຕ຺ຕາຕິ ອາຫ ‘‘ອຸໂປສຖປຸຈ຺ຉນ’’ນ຺ຕິ. ໂອວາທຕ຺ຖາຍາຕິ ໂອວາທຍາຈນຕ຺ຖາຍ.

ທສມໍ ອຸຕ຺ຕານຕ຺ຖເມວ.

ໂອວາທູປສງ຺ກມນາທິສິກ຺ຂາປທວຓ຺ຓນາ ນິຏ຺ຐິຕາ.

ອາຣາມວຄ຺ໂຄ ຉຏ຺ໂຐ.