໘. ອຏ຺ຐວຕ຺ຖຸກາສິກ຺ຂາປທວຓ຺ຓນາ

ໂລກສ຺ສາທມິຕ຺ຕສນ຺ຖວວເສນາຕິ (ສາຣຕ຺ຖ. ຏີ. ປາຈິຕ຺ຕິຍ ໓.໖໗໕) ໂລກສ຺ສາທສງ຺ຂາຕສ຺ສ ມິຕ຺ຕສນ຺ຖວສ຺ສ ວເສນ. ກິໍ ຕນ຺ຕິ ອາຫ ‘‘ກາຍສໍສຄ຺ຄຣາເຄນາ’’ຕິ. ກາຍສໍສຄ຺ຄຣາເຄເນວ ຕິນ຺ຕາ ອິຘ ອວສ຺ສຸຕາ ນາມ, ນ ເມຖຸນຣາເຄນາຕິ. ກຖເມຕໍ ວິຎ຺ຎາຍຕີຕິ ອາຫ ‘‘ອຍເມວ ຫີ’’ຕິອາທິ. ກິໍ ປເນຕ຺ຖ ກາຣຓນ຺ຕິ ອາຫ ‘‘ສມນ຺ຕປາສາທິກາຍໍ ປນສ຺ສ ວິຈາຣຓາ ກຕາ’’ຕິ. ຕຕ຺ຖາຍໍ ວິຈາຣຓາ – ເອຕ຺ຖ ຈ ອສທ຺ຘມ຺ໂມຕິ ກາຍສໍສຄ຺ໂຄວ ເວທິຕພ຺ໂພ, ນ ເມຖຸນຘມ຺ໂມ. ນ ຫິ ເມຖຸນສ຺ສ ສາມນ຺ຕາ ຖຸລ຺ລຈ຺ຈຍໍ ໂຫຕິ. ‘‘ວິຎ຺ຎູ ປຏິພໂລ ກາຍສໍສຄ຺ຄໍ ສມາປຊ຺ຊິຕຸ’’ນ຺ຕິ (ປາຈິ. ໖໗໖) ວຈນມ຺ປິ ເຈຕ຺ຖ ສາຘກນ຺ຕິ. ຍໍ ເຍນ ກຕໍ, ຕໍ ຕສ຺ເສວ ໂຫຕີຕິ. ປຸຣິສປຸຄ຺ຄລສ຺ສາຕິ ສາມິວຈນນ຺ຕິ ທສ຺ເສຕຸໍ ‘‘ຍໍ ປຸຣິສປຸຄ຺ຄເລນາ’’ຕິອາທິ ວຸຕ຺ຕໍ. ຕຕ຺ຖ ຫຕ຺ໂຖຕິ ອຕ຺ຕໂນ ຫຕ຺ໂຖ. ນ ເກວລຎ຺ເຈຕ຺ຖ ຫຕ຺ຖຄ຺ຄຫຓນ຺ຕິ ‘‘ຫຕ຺ໂຖ ນາມ ກປ຺ປຣໍ ອຸປາທາຍ ຍາວ ອຄ຺ຄນຂາ’’ຕິ (ປາຈິ. ໖໗໖) ວຸຕ຺ຕສ຺ສ ຫຕ຺ຖສ຺ເສວ ຄຫຓໍ, ອຖ ໂຂ ຕສ຺ສ ຈ ອຎ຺ຎສ຺ສປິ ອປາຣາຊິກເຂຕ຺ຕສ຺ສ ຄຫຓໍ ເອກຊ຺ຌໍ ກຕ຺ວາ ‘‘ຫຕ຺ຖຄ຺ຄຫຓ’’ນ຺ຕິ ວຸຕ຺ຕໍ. ຕຖາ ສງ຺ຆາຏິກຓ຺ຓຄ຺ຄຫຓນ຺ຕິ ນ ເກວລໍ ສງ຺ຆາຏິກຓ຺ຓສ຺ເສວ ຄຫຓໍ, ອຖ ໂຂ ຕສ຺ສ ຈ ອຎ຺ຎສ຺ສປິ ຍສ຺ສ ກສ຺ສຈິ ຈີວຣປ຺ປເທສສ຺ສ ຄຫຓໍ ວຸຕ຺ຕນ຺ຕິ ທສ຺ເສຕຸໍ ‘‘ເອຕ຺ຖ ຈ ຍສ຺ສ ກສ຺ສຈີ’’ຕິອາທິ ວຸຕ຺ຕໍ. ອິຕ຺ຖນ຺ນາມໍ ຐານນ຺ຕິ ເອວໍນາມກໍ ຐານໍ. ‘‘ປຏິປາຏິຍາ ວາ ອຸປ຺ປຏິປາຏິຍາ ວາ ປູເຣຕ຺ວາ’’ຕິ ອິທໍ ນິທສ຺ສນມຕ຺ຕໍ. ຕສ຺ມາ ປຏິປາຏິຍາ ວາ ອຸປ຺ປຏິປາຏິຍາ ວາ ເອກນ຺ຕຣິກາຍ ວາ ເຍນ ເຕນ ນເຍນ ປູເຣຕ຺ວາຕິ ອຕ຺ໂຖ.

ຕາ ອາປຕ຺ຕິໂຍຕິ ຕາ ອາປນ຺ນາ ອາປຕ຺ຕິໂຍ. ຍຖາ ເຈເກກສ຺ມິໍ ວຕ຺ຖຸສ຺ມິໍ ເອວໍ ວິສຸໍ ວິສຸໍ ສຕ຺ຕສຸ ວຕ຺ຖູສຸ ສຕກ຺ຂຕ຺ຕຸມ຺ປິ ວີຕິກ຺ກນ຺ເຕສຸ ຕາ ອາປຕ຺ຕິໂຍ ເທເສຕ຺ວາ ມຸຈ຺ຈຕິ. ຄຓນູປິກາຕິ ເທສິຕຄຓນໍ ອຸປຄຈ຺ຉຕິ. ຘຸຣນິກ຺ເຂປໍ ກຕ຺ວາຕິ ‘‘ອຎ຺ຎໍ ວຕ຺ຖຸໍ ອາປຊ຺ຊິສ຺ສາມີ’’ຕິ ອຸສ຺ສາຫໍ ຐເປຕ຺ວາ.

ອຏ຺ຐວຕ຺ຖຸກາສິກ຺ຂາປທວຓ຺ຓນາ ນິຏ຺ຐິຕາ.

ອິຕິ ກງ຺ຂາວິຕຣຓິຍາ ປາຕິໂມກ຺ຂວຓ຺ຓນາຍ

ວິນຍຕ຺ຖມຎ຺ຊູສາຍໍ ລີນຕ຺ຖປ຺ປກາສນິຍໍ

ຠິກ຺ຂຸນິປາຕິໂມກ຺ເຂ ປາຣາຊິກວຓ຺ຓນາ ນິຏ຺ຐິຕາ.