ອສາຘາຣຓປາຣາຊິກໍ

໕. ອຸພ຺ຠຊາຓຸມຓ຺ຑລສິກ຺ຂາປທວຓ຺ຓນາ

ອຸພ຺ຠກປ຺ປຣນ຺ຕິ ທຸຕິຍມຫາສນ຺ຘິໂຕ ອຸທ຺ຘໍ. ອິໂຕ ຈິໂຕ ຈ ສຎ຺ຈຣຓນ຺ຕິ ຫຕ຺ຖສ຺ສ ວາ ກາຍສ຺ສ ວາ ຕິຣິຍໍ ອິໂຕ ຈິໂຕ ຈ ສຎ຺ຈຣຓໍ.

ເອກໂຕອວສ຺ສຸເຕຕິ (ປາຈິ. ອຏ຺ຐ. ໖໖໒) ຠິກ຺ຂຸນິຍາ ອວສ຺ສເວ, ຠິກ຺ຂຸນິຍາ ກາຍສໍສຄ຺ຄຣາເຄນ ອວສ຺ສຸຕຠາເວ ສຕີຕິ ອຕ຺ໂຖ. ຠິກ຺ຂຸນິຍາ ວເສເນວ ຈ ເອກໂຕອວສ຺ສຸຕຠາໂວ ຄເຫຕພ຺ໂພ. ວຸຕ຺ຕຎ຺ເຫຕໍ ສມນ຺ຕປາສາທິກາຍໍ (ປາຈິ. ອຏ຺ຐ. ໖໖໒) –

‘‘ເອກໂຕອວສ຺ສຸເຕຕິ ເອຕ຺ຖ ກິຎ຺ຈາປິ ‘ເອກໂຕ’ຕິ ອວິເສເສນ ວຸຕ຺ຕໍ, ຕຖາປິ ຠິກ຺ຂຸນິຍາ ເອວ ອວສ຺ສຸເຕ ສຕິ ອຍໍ ອາປຕ຺ຕິເຠໂທ ວຸຕ຺ໂຕຕິ ເວທິຕພ຺ໂພ’’ຕິ.

ປຸຣິສສ຺ສ ກາຍນ຺ຕິ ປຸຣິສສ຺ສ ຍໍ ກຎ຺ຈິ ກາຍໍ. ອຸຠໂຕອວສ຺ສຸເຕປີຕິ ຠິກ຺ຂຸນິຍາ ເຈວ ປຸຣິສສ຺ສ ຈ ກາຍສໍສຄ຺ຄຣາເຄນ ອວສ຺ສຸຕຠາເວ ສຕິປິ. ກາເຍນາຕິ ຍຖາປຣິຈ຺ຉິນ຺ເນນ ອຕ຺ຕໂນ ກາເຍນ. ກາຍປ຺ປຏິພທ຺ຘນ຺ຕິ ປຸຣິສສ຺ສ ກາຍປ຺ປຏິພທ຺ຘໍ. ອວເສສກາເຍນ ວາຕິ ຍຖາປຣິຈ຺ຉິນ຺ນກາຍໂຕ ອວເສເສນ ກາເຍນ, ອຸພ຺ຠກ຺ຂກອໂຘຊາຓຸມຓ຺ຑລອໂຘກປ຺ປຣສງ຺ຂາເຕນ ກາເຍນາຕິ ວຸຕ຺ຕໍ ໂຫຕິ. ຕສ຺ສ ກາຍນ຺ຕິ ອວສ຺ສຸຕສ຺ສ ຕສ຺ສ ປຸຣິສສ຺ສ ຍໍ ກຎ຺ຈິ ກາຍໍ. ຍຖາ ເຈຕ຺ຖ ສຍໍ ອາມສນ຺ຕິຍາ ຖຸລ຺ລຈ຺ຈຍໍ, ເອວໍ ຕສ຺ສ ອາມສນໍ ສາທິຍນ຺ຕິຍາປີຕິ ທຏ຺ຐພ຺ພໍ. ປຸຣິສສ຺ສ ກາຍສໍສຄ຺ຄຣາໂຄ ນຕ຺ຖີຕິ ປຸຣິສສ຺ສ ເມຖຸນຣາໂຄ, ເຄຫສິຕເປມໍ, ສຸທ຺ຘຈິຕ຺ຕໍ ວາ. ອວເສເສຕິ ປາຣາຊິກເຂຕ຺ຕໂຕ ອວເສເສ. ກາຍປ຺ປຏິພທ຺ເຘນ ກາຍປ຺ປຏິພທ຺ຘາທິເຠເທຕິ ‘‘ກາຍປ຺ປຏິພທ຺ເຘນ ກາຍປ຺ປຏິພທ຺ຘໍ ອາມສຕິ, ອາປຕ຺ຕິ ທຸກ຺ກຏສ຺ສາ’’ຕິອາທິເກ (ປາຈິ. ໖໕໙, ໖໖໒) ສພ຺ພວາເຣ. ‘‘ອສຎ຺ຈິຈ຺ຈາ’’ຕິອາທີສຸ ວິຣຊ຺ຌິຕ຺ວາ ວາ ອາມສນ຺ຕິຍາ, ອຎ຺ຎວິຫິຕາຍ ວາ, ‘‘ອຍໍ ປຸຣິໂສ’’ຕິ ວາ ‘‘ອິຕ຺ຖີ’’ຕິ ວາ ອຊານນ຺ຕິຍາ ວາ, ເຕນ ຜຸຏ຺ຐາຍປິ ຕໍ ຜສ຺ສໍ ອສ຺ສາທຍນ຺ຕິຍາ ວາ ອາມສເນປິ ສຕິ ອນາປຕ຺ຕິ.

ອຸພ຺ຠຊາຓຸມຓ຺ຑລສິກ຺ຂາປທວຓ຺ຓນາ ນິຏ຺ຐິຕາ.

໖. ວຊ຺ຊປ຺ປຏິຈ຺ຉາທິກາສິກ຺ຂາປທວຓ຺ຓນາ

ປາຣາຊິກໍ ຘມ຺ມໍ ອຊ຺ຌາປນ຺ນນ຺ຕິ ຠິກ຺ຂູຫິ ສາຘາຣຓານໍ ຈຕຸນ຺ນໍ, ອສາຘາຣຓານໍ ຈຕຸນ຺ນຎ຺ຈາຕິ ອຏ຺ຐນ຺ນມຎ຺ຎຕຣໍ ອຊ຺ຌາປນ຺ນໍ. ອິທຎ຺ຈ ປາຣາຊິກໍ (ປາຈິ. ອຏ຺ຐ. ໖໖໖) ປຈ຺ຉາ ປຎ຺ຎຕ຺ຕໍ, ສງ຺ຄີຕິກາຣກາຈຣິເຍຫິ ປນ ປຸຣິເມນ ສທ຺ຘິໍ ຍຸຄຬໍ ກຕ຺ວາ ອິມສ຺ມິໍ ໂອກາເສ ຐປິຕນ຺ຕິ ເວທິຕພ຺ພໍ. ‘‘ອຏ຺ຐນ຺ນໍ ປາຣາຊິການໍ ອຎ຺ຎຕຣ’’ນ຺ຕິ (ປາຈິ. ໖໖໖) ວຈນໂຕ ປນ ວຊ຺ຊປ຺ປຏິຈ຺ຉາທິກໍ ຍາ ປຏິຈ຺ຉາເທຕິ, ສາປິ ວຊ຺ຊປ຺ປຏິຈ຺ຉາທິກາ ເອວາຕິ ທຏ຺ຐພ຺ພໍ. ກິຎ຺ຈາປິ ວຊ຺ຊປ຺ປຏິຈ຺ຉາທນໍ ເປມວເສນ ໂຫຕິ, ຕຖາປິ ສິກ຺ຂາປທວີຕິກ຺ກມຈິຕ຺ຕໍ ໂທມນສ຺ສເມວ ໂຫຕີຕິ ກຕ຺ວາ ທຸກ຺ຂເວທນໍ ໂຫຕີຕິ ‘‘ຕຕ຺ຣ ຫິ ປາຈິຕ຺ຕິຍໍ…ເປ… ເສສໍ ຕາທິສເມວາ’’ຕິ ວຸຕ຺ຕໍ.

ວຊ຺ຊປ຺ປຏິຈ຺ຉາທິກາສິກ຺ຂາປທວຓ຺ຓນາ ນິຏ຺ຐິຕາ.

໗. ອຸກ຺ຂິຕ຺ຕານຸວຕ຺ຕິກາສິກ຺ຂາປທວຓ຺ຓນາ

ສຕ຺ຖຸສາສເນນາຕິ ຎຕ຺ຕິສມ຺ປທາຍ ເຈວ ອນຸສ຺ສາວນສມ຺ປທາຍ ຈ. ອິຘ ປນ ໂຈທນາສາຣຓາປຸພ຺ພກເມວ ຎຕ຺ຕິອນຸສ຺ສາວນໍ ສຕ຺ຖຸສາສນນ຺ຕິ ອາຫ ‘‘ອິຘາປີ’’ຕິອາທິ. ກຣຓນ຺ຕິ ຎຕ຺ຕິຏ຺ຐປນຎ຺ເຈວ ອນຸສ຺ສາວນາວຈນຎ຺ຈ. ອນາທຣນ຺ຕິ ປຸຄ຺ຄເລ ເຈວ ຘມ຺ເມ ຈ ອາທຣວິຣຫິຕໍ. ເຕນາຫ ‘‘ເຍນາ’’ຕິອາທິ. ຕຕ຺ຖ ປຣິຍາປນ຺ນຄເຓ ວາຕິ ຕສ຺ມິໍ ສງ຺ເຆ ປຣິຍາປນ຺ເນ ສມ຺ພຫຸລປຸຄ຺ຄລສງ຺ຂາເຕ ຄເຓ ວາ. ‘‘ສມ຺ມາວຕ຺ຕນາຍ ອວຕ຺ຕມານນ຺ຕິ ອຕ຺ໂຖ’’ຕິ ອິມິນາ ອຘິປ຺ປາຍຕ຺ໂຖ ວຸຕ຺ໂຕ. ເອກກມ຺ມາທິເກຕິ ເອກກມ຺ມເອກຸທ຺ເທສສມສິກ຺ຂາຕາຍ. ສຫ ອຍນຠາເວນາຕິ ສຫ ວຕ຺ຕນຠາເວນ. ສມາໂນ ສໍວາໂສ ເອເຕສນ຺ຕິ ສມານສໍວາສກາ.

ອິທານິ ເຍນ ສໍວາເສນ ເຕ ‘‘ສມານສໍວາສກາ’’ຕິ (ປາຈິ. ອຏ຺ຐ. ໖໖໙) ວຸຕ຺ຕາ, ໂສ ສໍວາໂສ ຕສ຺ສ ອຸກ຺ຂິຕ຺ຕກສ຺ສ ເຕຫິ ສທ຺ຘິໍ ນຕ຺ຖິ, ເຍຫິ ຈ ສທ຺ຘິໍ ຕສ຺ສ ໂສ ສໍວາໂສ ນຕ຺ຖິ, ນ ເຕນ ເຕ ຠິກ຺ຂູ ອຕ຺ຕໂນ ສຫາຍາ ກຕາ ໂຫນ຺ຕິ, ຕສ຺ມາ ໂສ ອກຕສຫາໂຍ ນາມາຕິ ອິມມຕ຺ຖໍ ທສ຺ເສຕຸໍ ‘‘ຍສ຺ສ ປນາ’’ຕິອາທິ ວຸຕ຺ຕໍ. ເອວໍ ປທວຓ຺ຓນໍ ກຕ຺ວາ ອິທານິ ອຕ຺ຖມຕ຺ຕໍ ທສ຺ເສຕຸໍ ‘‘ສມານສໍວາສກຠາວໍ ອນຸປຄຕນ຺ຕິ ອຕ຺ໂຖ’’ຕິ ວຸຕ຺ຕໍ. ກິໍ ຕໍ ອນຸວຕ຺ຕນນ຺ຕິ ກສ຺ສຈິ ອາສງ຺ກາ ສິຍາຕິ ຕໍ ສຣູປໂຕ ທສ຺ເສນ຺ໂຕ ‘‘ຍໍທິຏ຺ຐິໂກ ໂສ ໂຫຕີ’’ຕິອາທິມາຫ. ຕຕ຺ຖ ໂສຕິ ໂຍ ອຸກ຺ຂິຕ຺ຕໂກ, ໂສ.

ອຸກ຺ຂິຕ຺ຕານຸວຕ຺ຕິກາສິກ຺ຂາປທວຓ຺ຓນາ ນິຏ຺ຐິຕາ.

໘. ອຏ຺ຐວຕ຺ຖຸກາສິກ຺ຂາປທວຓ຺ຓນາ

ໂລກສ຺ສາທມິຕ຺ຕສນ຺ຖວວເສນາຕິ (ສາຣຕ຺ຖ. ຏີ. ປາຈິຕ຺ຕິຍ ໓.໖໗໕) ໂລກສ຺ສາທສງ຺ຂາຕສ຺ສ ມິຕ຺ຕສນ຺ຖວສ຺ສ ວເສນ. ກິໍ ຕນ຺ຕິ ອາຫ ‘‘ກາຍສໍສຄ຺ຄຣາເຄນາ’’ຕິ. ກາຍສໍສຄ຺ຄຣາເຄເນວ ຕິນ຺ຕາ ອິຘ ອວສ຺ສຸຕາ ນາມ, ນ ເມຖຸນຣາເຄນາຕິ. ກຖເມຕໍ ວິຎ຺ຎາຍຕີຕິ ອາຫ ‘‘ອຍເມວ ຫີ’’ຕິອາທິ. ກິໍ ປເນຕ຺ຖ ກາຣຓນ຺ຕິ ອາຫ ‘‘ສມນ຺ຕປາສາທິກາຍໍ ປນສ຺ສ ວິຈາຣຓາ ກຕາ’’ຕິ. ຕຕ຺ຖາຍໍ ວິຈາຣຓາ – ເອຕ຺ຖ ຈ ອສທ຺ຘມ຺ໂມຕິ ກາຍສໍສຄ຺ໂຄວ ເວທິຕພ຺ໂພ, ນ ເມຖຸນຘມ຺ໂມ. ນ ຫິ ເມຖຸນສ຺ສ ສາມນ຺ຕາ ຖຸລ຺ລຈ຺ຈຍໍ ໂຫຕິ. ‘‘ວິຎ຺ຎູ ປຏິພໂລ ກາຍສໍສຄ຺ຄໍ ສມາປຊ຺ຊິຕຸ’’ນ຺ຕິ (ປາຈິ. ໖໗໖) ວຈນມ຺ປິ ເຈຕ຺ຖ ສາຘກນ຺ຕິ. ຍໍ ເຍນ ກຕໍ, ຕໍ ຕສ຺ເສວ ໂຫຕີຕິ. ປຸຣິສປຸຄ຺ຄລສ຺ສາຕິ ສາມິວຈນນ຺ຕິ ທສ຺ເສຕຸໍ ‘‘ຍໍ ປຸຣິສປຸຄ຺ຄເລນາ’’ຕິອາທິ ວຸຕ຺ຕໍ. ຕຕ຺ຖ ຫຕ຺ໂຖຕິ ອຕ຺ຕໂນ ຫຕ຺ໂຖ. ນ ເກວລຎ຺ເຈຕ຺ຖ ຫຕ຺ຖຄ຺ຄຫຓນ຺ຕິ ‘‘ຫຕ຺ໂຖ ນາມ ກປ຺ປຣໍ ອຸປາທາຍ ຍາວ ອຄ຺ຄນຂາ’’ຕິ (ປາຈິ. ໖໗໖) ວຸຕ຺ຕສ຺ສ ຫຕ຺ຖສ຺ເສວ ຄຫຓໍ, ອຖ ໂຂ ຕສ຺ສ ຈ ອຎ຺ຎສ຺ສປິ ອປາຣາຊິກເຂຕ຺ຕສ຺ສ ຄຫຓໍ ເອກຊ຺ຌໍ ກຕ຺ວາ ‘‘ຫຕ຺ຖຄ຺ຄຫຓ’’ນ຺ຕິ ວຸຕ຺ຕໍ. ຕຖາ ສງ຺ຆາຏິກຓ຺ຓຄ຺ຄຫຓນ຺ຕິ ນ ເກວລໍ ສງ຺ຆາຏິກຓ຺ຓສ຺ເສວ ຄຫຓໍ, ອຖ ໂຂ ຕສ຺ສ ຈ ອຎ຺ຎສ຺ສປິ ຍສ຺ສ ກສ຺ສຈິ ຈີວຣປ຺ປເທສສ຺ສ ຄຫຓໍ ວຸຕ຺ຕນ຺ຕິ ທສ຺ເສຕຸໍ ‘‘ເອຕ຺ຖ ຈ ຍສ຺ສ ກສ຺ສຈີ’’ຕິອາທິ ວຸຕ຺ຕໍ. ອິຕ຺ຖນ຺ນາມໍ ຐານນ຺ຕິ ເອວໍນາມກໍ ຐານໍ. ‘‘ປຏິປາຏິຍາ ວາ ອຸປ຺ປຏິປາຏິຍາ ວາ ປູເຣຕ຺ວາ’’ຕິ ອິທໍ ນິທສ຺ສນມຕ຺ຕໍ. ຕສ຺ມາ ປຏິປາຏິຍາ ວາ ອຸປ຺ປຏິປາຏິຍາ ວາ ເອກນ຺ຕຣິກາຍ ວາ ເຍນ ເຕນ ນເຍນ ປູເຣຕ຺ວາຕິ ອຕ຺ໂຖ.

ຕາ ອາປຕ຺ຕິໂຍຕິ ຕາ ອາປນ຺ນາ ອາປຕ຺ຕິໂຍ. ຍຖາ ເຈເກກສ຺ມິໍ ວຕ຺ຖຸສ຺ມິໍ ເອວໍ ວິສຸໍ ວິສຸໍ ສຕ຺ຕສຸ ວຕ຺ຖູສຸ ສຕກ຺ຂຕ຺ຕຸມ຺ປິ ວີຕິກ຺ກນ຺ເຕສຸ ຕາ ອາປຕ຺ຕິໂຍ ເທເສຕ຺ວາ ມຸຈ຺ຈຕິ. ຄຓນູປິກາຕິ ເທສິຕຄຓນໍ ອຸປຄຈ຺ຉຕິ. ຘຸຣນິກ຺ເຂປໍ ກຕ຺ວາຕິ ‘‘ອຎ຺ຎໍ ວຕ຺ຖຸໍ ອາປຊ຺ຊິສ຺ສາມີ’’ຕິ ອຸສ຺ສາຫໍ ຐເປຕ຺ວາ.

ອຏ຺ຐວຕ຺ຖຸກາສິກ຺ຂາປທວຓ຺ຓນາ ນິຏ຺ຐິຕາ.

ອິຕິ ກງ຺ຂາວິຕຣຓິຍາ ປາຕິໂມກ຺ຂວຓ຺ຓນາຍ

ວິນຍຕ຺ຖມຎ຺ຊູສາຍໍ ລີນຕ຺ຖປ຺ປກາສນິຍໍ

ຠິກ຺ຂຸນິປາຕິໂມກ຺ເຂ ປາຣາຊິກວຓ຺ຓນາ ນິຏ຺ຐິຕາ.