໑. ປຣິມຓ຺ຑລສິກ຺ຂາປທວຓ຺ຓນາ

‘‘ອນ຺ຕຣຆເຣ’’ຕິ ວິເສເສຕ຺ວາ ນ ວຸຕ຺ຕຕ຺ຕາ ‘‘ອາຣາເມປິ ອນ຺ຕຣຆເຣປິ ສພ຺ພຕ຺ຖາ’’ຕິ ວຸຕ຺ຕໍ. ອາຣາເມປີຕິ ພຸທ຺ຘູປຏ຺ຐານາທິກາລໍ ສນ຺ຘາຍ ວຸຕ຺ຕໍ. ຍຖາ ‘‘ຕຕ຺ຣິເມ ຈຕ຺ຕາໂຣ ປາຣາຊິກາ ຘມ຺ມາ ອຸທ຺ເທສໍ ອາຄຈ຺ຉນ຺ຕີ’’ຕິອາທິນາ ຕຕ຺ຖ ຕຕ຺ຖ ປຣິຈ຺ເຉໂທ ກໂຕ, ເອວເມຕ຺ຖາປິ ‘‘ຕຕ຺ຣິເມ ປຎ຺ຈສຕ຺ຕຕິ ເສຂິຍາ ຘມ຺ມາ ອຸທ຺ເທສໍ ອາຄຈ຺ຉນ຺ຕີ’’ຕິ ກສ຺ມາ ປຣິຈ຺ເຉໂທ ນ ກໂຕຕິ ອາຫ ‘‘ເອຕ຺ຖ ຈາ’’ຕິອາທິ. ວຕ຺ຕກ຺ຂນ຺ຘເກ ວຸຕ຺ຕວຕ຺ຕານິປີຕິ ອາຄນ຺ຕຸກາວາສິກຄມິການຸໂມທນຠຕ຺ຕຄ຺ຄປິຓ຺ຑຈາຣິກາຣຎ຺ຎເສນາສນຊນ຺ຕາຆຣວຈ຺ຈກຸຏິອຸປຊ຺ຌາຈຣິຍສທ຺ຘິວິຫາຣິກອນ຺ເຕວາສິກວຕ຺ຕານິ. ອິທຎ຺ຈ ນິທສ຺ສນມຕ຺ຕໍ ອຎ຺ເຎສມ຺ປິ ຂນ຺ຘກວຕ຺ຕານໍ ເອຕ຺ເຖວ ສງ຺ຄຫສ຺ສ ອິຈ຺ຉິຕພ຺ພຕ຺ຕາ. ອຍຎ຺ເຫຕ຺ຖ ອຘິປ຺ປາໂຍ – ເສຂິຍຄ຺ຄຫເຓນ ເຈຕ຺ຖ ວຕ຺ຕກ຺ຂນ຺ຘກາທີສຸ (ຈູຬວ. ໓໕໖ ອາທໂຍ) ອາຄຕວຕ຺ຕາທີນມ຺ປິ ຄຫຓໍ. ເຕປິ ຫິ ສິກ຺ຂິຕພ຺ພຏ຺ເຐນ ‘‘ເສຂິຍາ’’ຕິ ອິຈ຺ຉິຕາ. ຕສ຺ມາ ມາຕິກາຍໍ ປາຣາຊິກາທີນໍ ວິຍ ເສຂິຍານໍ ປຣິຈ຺ເຉໂທ ນ ກໂຕຕິ. ນ ເກວລໍ ວຕ຺ຕກ຺ຂນ຺ຘກາທີສຸ (ຈູຬວ. ໓໕໖ ອາທໂຍ) ອາຄຕວຕ຺ຕາທີນໍ ຄຫຓຕ຺ຖເມວາຕິ ອາຫ ‘‘ຈາຣິຕ຺ຕວິນຍທສ຺ສນຕ຺ຖຎ຺ຈາ’’ຕິ. ເອຕ຺ຖາປິ ປຣິຈ຺ເຉໂທ ນ ກໂຕຕິ ອາເນຕ຺ວາ ໂຍເຊຕພ຺ພໍ. ມາຕິກາຍ ‘‘ທຸກ຺ກຏ’’ນ຺ຕິ ອວຸຕ຺ເຕ ກຖໍ ປເນຕ຺ຖ ທຸກ຺ກຏນ຺ຕິ ເວທິຕພ຺ພນ຺ຕິ ອາຫ ‘‘ໂຍ ປນາ’’ຕິອາທິ.

ອຏ຺ຐງ຺ຄຸລມຕ຺ຕນ຺ຕິ ປກຕງ຺ຄຸເລນ ອຏ຺ຐງ຺ຄຸລມຕ຺ຕໍ. ໂຍ ປນ ສຸກ຺ຂຊງ຺ໂຆ ວາ ມຫາປິຓ຺ຑິກມໍໂສ ວາ ໂຫຕິ, ຕສ຺ສ ສາຣຸປ຺ປຕ຺ຖາຍ ອຏ຺ຐງ຺ຄຸລາຘິກມ຺ປິ ໂອຕາເຣຕ຺ວາ ນິວາເສຕຸໍ ວຏ຺ຏຕິ.

ປາສນ຺ຕນ຺ຕິ ປາສສ຺ສ ອນ຺ຕໍ, ທສາມູລນ຺ຕິ ອຕ຺ໂຖ.

ອປຣິມຓ຺ຑລໍ ນິວາເສສ຺ສາມີຕິ ‘‘ປຸຣໂຕ ວາ ປຈ຺ຉໂຕ ວາ ໂອລມ຺ເພຕ຺ວາ ນິວາເສສ຺ສາມີ’’ຕິ ເອວໍ ອສຎ຺ຈິຈ຺ຈ. ກິຎ຺ຈາປິ ປຣິມຓ຺ຑລໍ ນິວາເສຕຸໍ ອຊານນ຺ຕສ຺ສ ອນາປຕ຺ຕິ, ຕຖາປິ ນິວາສນວຕ຺ຕໍ ສາຘຸກໍ ອຸຄ຺ຄເຫຕພ຺ພເມວ. ສຎ຺ຈິຈ຺ຈ ອນຸຄ຺ຄຫຓຎ຺ຫິ ອນາທຣິຍໍ ສິຍາຕິ ອາຫ ‘‘ອປິຈ ນິວາສນວຕ຺ຕໍ ອຸຄ຺ຄເຫຕພ຺ພ’’ນ຺ຕິ.

ປຣິມຓ຺ຑລສິກ຺ຂາປທວຓ຺ຓນາ ນິຏ຺ຐິຕາ.