໒. ທຸຕິຍປຣິມຓ຺ຑລສິກ຺ຂາປທວຓ຺ຓນາ

ປຏິກ຺ຂິຕ຺ຕໍ ຄິຫິປາຣຸຕນ຺ຕິ ຂຸທ຺ທກວຕ຺ຖຸຂນ຺ຘເກ ປຏິກ຺ຂິຕ຺ຕໍ ຄິຫິປາຣຸຕໍ. ອິທານິ ‘‘ນ, ຠິກ຺ຂເວ’’ຕິອາທິນາ (ຈູຬວ. ໒໘໐-໒໘໑) ສງ຺ເຂເປນ ວຸຕ຺ຕມຕ຺ຖເມວ ວິຕ຺ຖາເຣຕ຺ວາ ທສ຺ເສຕຸໍ ‘‘ຕຕ຺ຖາ’’ຕິອາທິມາຫ. ຍໍ ກິຎ຺ຈິ ອຎ຺ຎຖາ ປາຣຸຕນ຺ຕິ ສມ຺ພນ຺ໂຘ. ຕສ຺ມາຕິ ຍສ຺ມາ ເສຕປຏປາຣຸຕາທິ ຄິຫິປາຣຸຕໍ ນາມ, ຕສ຺ມາ. ເສຕປຏາຕິ ເອຕສ຺ເສວ ວິວຣຓໍ. ອຑ຺ຒປາລກນິຄຓ຺ຐາຕິ ອຑ຺ຒໍ ປາເລນ຺ຕີຕິ ອຑ຺ຒປາລກາ, ອຑ຺ຒປາລກາ ຈ ເຕ ນິຄຓ຺ຐາ ຈາຕິ ອຑ຺ຒປາລກນິຄຓ຺ຐາ. ເຕ ຫິ ອຸປຣິ ເອກເມວ ເສຕວຕ຺ຖໍ ອຸປກຈ຺ຉເກ ປເວເສຕ຺ວາ ປຣິທຫນ຺ຕິ, ເຫຏ຺ຐາ ນຄ຺ຄາປິ ອຑ຺ຒເມວ ປາເລນ຺ຕິ. ປຣິພ຺ພາຊກາຕິ ຄິຫິພນ຺ຘນໍ ປຫາຍ ປພ຺ພຊ຺ຊູປຄຕາ. ອຸຣໍ ວິວຣິຕ຺ວາຕິ ຫທຍມຊ຺ຌໍ ວິວຣິຕ຺ວາ. ອກ຺ຂິຕາຣກາມຕ຺ຕນ຺ຕິ ອກ຺ຂິມຕ຺ຕໍ. ອາຣາເມ ວາຕິ ພຸທ຺ຘູປຏ຺ຐານາທິກາລໍ ສນ຺ຘາຍ ວຸຕ຺ຕໍ. ອນ຺ຕຣຆເຣ ວາຕິ ອນ຺ຕເຣ ຆຣານິ ເອຕ຺ຖ, ເອຕສ຺ສາຕິ ວາ ‘‘ອນ຺ຕຣຆຣ’’ນ຺ຕິ ລທ຺ຘນາເມ ຄາເມ.

ທຸຕິຍປຣິມຓ຺ຑລສິກ຺ຂາປທວຓ຺ຓນາ ນິຏ຺ຐິຕາ.