໘. ສູທສຸຕ຺ຕໍ

໓໗໔. ‘‘ເສຍ຺ຍຖາປິ, ຠິກ຺ຂເວ, ພາໂລ ອພ຺ຍຕ຺ໂຕ ອກຸສໂລ ສູໂທ ຣາຊານໍ ວາ ຣາຊມຫາມຕ຺ຕໍ ວາ [ຣາຊມຫາມຕ຺ຕານໍ ວາ (ສີ.)] ນານຈ຺ຈເຍຫິ ສູເປຫິ ປຈ຺ຈຸປຏ຺ຐິໂຕ ອສ຺ສ – ອມ຺ພິລຄ຺ເຄຫິປິ, ຕິຕ຺ຕກຄ຺ເຄຫິປິ, ກຏຸກຄ຺ເຄຫິປິ, ມຘຸຣຄ຺ເຄຫິປິ, ຂາຣິເກຫິປິ, ອຂາຣິເກຫິປິ, ໂລຓິເກຫິປິ, ອໂລຓິເກຫິປິ.

‘‘ສ ໂຂ ໂສ, ຠິກ຺ຂເວ, ພາໂລ ອພ຺ຍຕ຺ໂຕ ອກຸສໂລ ສູໂທ ສກສ຺ສ ຠຕ຺ຕຸ ນິມິຕ຺ຕໍ ນ ອຸຄ຺ຄຓ຺ຫາຕິ – ‘ອິທໍ ວາ ເມ ອຊ຺ຊ ຠຕ຺ຕຸ ສູເປຍ຺ຍໍ ຣຸຈ຺ຈຕິ, ອິມສ຺ສ ວາ ອຠິຫຣຕິ, ອິມສ຺ສ ວາ ພຫຸໍ ຄຓ຺ຫາຕິ, ອິມສ຺ສ ວາ ວຓ຺ຓໍ ຠາສຕິ. ອມ຺ພິລຄ຺ຄໍ ວາ ເມ ອຊ຺ຊ ຠຕ຺ຕຸ ສູເປຍ຺ຍໍ ຣຸຈ຺ຈຕິ, ອມ຺ພິລຄ຺ຄສ຺ສ ວາ ອຠິຫຣຕິ, ອມ຺ພິລຄ຺ຄສ຺ສ ວາ ພຫຸໍ ຄຓ຺ຫາຕິ, ອມ຺ພິລຄ຺ຄສ຺ສ ວາ ວຓ຺ຓໍ ຠາສຕິ. ຕິຕ຺ຕກຄ຺ຄໍ ວາ ເມ ອຊ຺ຊ… ກຏຸກຄ຺ຄໍ ວາ ເມ ອຊ຺ຊ… ມຘຸຣຄ຺ຄໍ ວາ ເມ ອຊ຺ຊ… ຂາຣິກໍ ວາ ເມ ອຊ຺ຊ… ອຂາຣິກໍ ວາ ເມ ອຊ຺ຊ… ໂລຓິກໍ ວາ ເມ ອຊ຺ຊ… ອໂລຓິກໍ ວາ ເມ ອຊ຺ຊ ຠຕ຺ຕຸ ສູເປຍ຺ຍໍ ຣຸຈ຺ຈຕິ, ອໂລຓິກສ຺ສ ວາ ອຠິຫຣຕິ, ອໂລຓິກສ຺ສ ວາ ພຫຸໍ ຄຓ຺ຫາຕິ, ອໂລຓິກສ຺ສ ວາ ວຓ຺ຓໍ ຠາສຕີ’’’ຕິ.

‘‘ສ ໂຂ ໂສ, ຠິກ຺ຂເວ, ພາໂລ ອພ຺ຍຕ຺ໂຕ ອກຸສໂລ ສູໂທ ນ ເຈວ ລາຠີ ໂຫຕິ ອຈ຺ຉາທນສ຺ສ, ນ ລາຠີ ເວຕນສ຺ສ, ນ ລາຠີ ອຠິຫາຣານໍ. ຕໍ ກິສ຺ສ ເຫຕຸ? ຕຖາ ຫິ ໂສ, ຠິກ຺ຂເວ, ພາໂລ ອພ຺ຍຕ຺ໂຕ ອກຸສໂລ ສູໂທ ສກສ຺ສ ຠຕ຺ຕຸ ນິມິຕ຺ຕໍ ນ ອຸຄ຺ຄຓ຺ຫາຕິ. ເອວເມວ ໂຂ, ຠິກ຺ຂເວ, ອິເຘກຈ຺ໂຈ ພາໂລ ອພ຺ຍຕ຺ໂຕ ອກຸສໂລ ຠິກ຺ຂຸ ກາເຍ ກາຍານຸປສ຺ສີ ວິຫຣຕິ ອາຕາປີ ສມ຺ປຊາໂນ ສຕິມາ, ວິເນຍ຺ຍ ໂລເກ ອຠິຊ຺ຌາໂທມນສ຺ສໍ. ຕສ຺ສ ກາເຍ ກາຍານຸປສ຺ສິໂນ ວິຫຣໂຕ ຈິຕ຺ຕໍ ນ ສມາຘິຍຕິ, ອຸປກ຺ກິເລສາ ນ ປຫີຍນ຺ຕິ. ໂສ ຕໍ ນິມິຕ຺ຕໍ ນ ອຸຄ຺ຄຓ຺ຫາຕິ. ເວທນາສຸ ເວທນານຸປສ຺ສີ ວິຫຣຕິ…ເປ… ຈິຕ຺ເຕ ຈິຕ຺ຕານຸປສ຺ສີ ວິຫຣຕິ …ເປ… ຘມ຺ເມສຸ ຘມ຺ມານຸປສ຺ສີ ວິຫຣຕິ ອາຕາປີ ສມ຺ປຊາໂນ ສຕິມາ, ວິເນຍ຺ຍ ໂລເກ ອຠິຊ຺ຌາໂທມນສ຺ສໍ. ຕສ຺ສ ຘມ຺ເມສຸ ຘມ຺ມານຸປສ຺ສິໂນ ວິຫຣໂຕ ຈິຕ຺ຕໍ ນ ສມາຘິຍຕິ, ອຸປກ຺ກິເລສາ ນ ປຫີຍນ຺ຕິ. ໂສ ຕໍ ນິມິຕ຺ຕໍ ນ ອຸຄ຺ຄຓ຺ຫາຕິ.

‘‘ສ ໂຂ ໂສ, ຠິກ຺ຂເວ, ພາໂລ ອພ຺ຍຕ຺ໂຕ ອກຸສໂລ ຠິກ຺ຂຸ ນ ເຈວ ລາຠີ ໂຫຕິ ທິຏ຺ເຐວ ຘມ຺ເມ ສຸຂວິຫາຣານໍ, ນ ລາຠີ ສຕິສມ຺ປຊຎ຺ຎສ຺ສ. ຕໍ ກິສ຺ສ ເຫຕຸ? ຕຖາ ຫິ ໂສ, ຠິກ຺ຂເວ, ພາໂລ ອພ຺ຍຕ຺ໂຕ ອກຸສໂລ ຠິກ຺ຂຸ ສກສ຺ສ ຈິຕ຺ຕສ຺ສ ນິມິຕ຺ຕໍ ນ ອຸຄ຺ຄຓ຺ຫາຕິ.

‘‘ເສຍ຺ຍຖາປິ, ຠິກ຺ຂເວ, ປຓ຺ຑິໂຕ ພ຺ຍຕ຺ໂຕ ກຸສໂລ ສູໂທ ຣາຊານໍ ວາ ຣາຊມຫາມຕ຺ຕໍ ວາ ນານຈ຺ຈເຍຫິ ສູເປຫິ ປຈ຺ຈຸປຏ຺ຐິໂຕ ອສ຺ສ – ອມ຺ພິລຄ຺ເຄຫິປິ, ຕິຕ຺ຕກຄ຺ເຄຫິປິ, ກຏຸກຄ຺ເຄຫິປິ, ມຘຸຣຄ຺ເຄຫິປິ, ຂາຣິເກຫິປິ, ອຂາຣິເກຫິປິ, ໂລຓິເກຫິປິ, ອໂລຓິເກຫິປິ.

‘‘ສ ໂຂ ໂສ, ຠິກ຺ຂເວ, ປຓ຺ຑິໂຕ ພ຺ຍຕ຺ໂຕ ກຸສໂລ ສູໂທ ສກສ຺ສ ຠຕ຺ຕຸ ນິມິຕ຺ຕໍ ອຸຄ຺ຄຓ຺ຫາຕິ – ‘ອິທໍ ວາ ເມ ອຊ຺ຊ ຠຕ຺ຕຸ ສູເປຍ຺ຍໍ ຣຸຈ຺ຈຕິ, ອິມສ຺ສ ວາ ອຠິຫຣຕິ, ອິມສ຺ສ ວາ ພຫຸໍ ຄຓ຺ຫາຕິ, ອິມສ຺ສ ວາ ວຓ຺ຓໍ ຠາສຕິ. ອມ຺ພິລຄ຺ຄໍ ວາ ເມ ອຊ຺ຊ ຠຕ຺ຕຸ ສູເປຍ຺ຍໍ ຣຸຈ຺ຈຕິ, ອມ຺ພິລຄ຺ຄສ຺ສ ວາ ອຠິຫຣຕິ, ອມ຺ພິລຄ຺ຄສ຺ສ ວາ ພຫຸໍ ຄຓ຺ຫາຕິ, ອມ຺ພິລຄ຺ຄສ຺ສ ວາ ວຓ຺ຓໍ ຠາສຕິ. ຕິຕ຺ຕກຄ຺ຄໍ ວາ ເມ ອຊ຺ຊ… ກຏຸກຄ຺ຄໍ ວາ ເມ ອຊ຺ຊ… ມຘຸຣຄ຺ຄໍ ວາ ເມ ອຊ຺ຊ… ຂາຣິກໍ ວາ ເມ ອຊ຺ຊ… ອຂາຣິກໍ ວາ ເມ ອຊ຺ຊ… ໂລຓິກໍ ວາ ເມ ອຊ຺ຊ… ອໂລຓິກໍ ວາ ເມ ອຊ຺ຊ ຠຕ຺ຕຸ ສູເປຍ຺ຍໍ ຣຸຈ຺ຈຕິ, ອໂລຓິກສ຺ສ ວາ ອຠິຫຣຕິ, ອໂລຓິກສ຺ສ ວາ ພຫຸໍ ຄຓ຺ຫາຕິ, ອໂລຓິກສ຺ສ ວາ ວຓ຺ຓໍ ຠາສຕີ’’’ຕິ.

‘‘ສ ໂຂ ໂສ, ຠິກ຺ຂເວ, ປຓ຺ຑິໂຕ ພ຺ຍຕ຺ໂຕ ກຸສໂລ ສູໂທ ລາຠີ ເຈວ ໂຫຕິ ອຈ຺ຉາທນສ຺ສ, ລາຠີ ເວຕນສ຺ສ, ລາຠີ ອຠິຫາຣານໍ. ຕໍ ກິສ຺ສ ເຫຕຸ? ຕຖາ ຫິ ໂສ, ຠິກ຺ຂເວ, ປຓ຺ຑິໂຕ ພ຺ຍຕ຺ໂຕ ກຸສໂລ ສູໂທ ສກສ຺ສ ຠຕ຺ຕຸ ນິມິຕ຺ຕໍ ອຸຄ຺ຄຓ຺ຫາຕິ. ເອວເມວ ໂຂ, ຠິກ຺ຂເວ, ອິເຘກຈ຺ໂຈ ປຓ຺ຑິໂຕ ພ຺ຍຕ຺ໂຕ ກຸສໂລ ຠິກ຺ຂຸ ກາເຍ ກາຍານຸປສ຺ສີ ວິຫຣຕິ ອາຕາປີ ສມ຺ປຊາໂນ ສຕິມາ, ວິເນຍ຺ຍ ໂລເກ ອຠິຊ຺ຌາໂທມນສ຺ສໍ. ຕສ຺ສ ກາເຍ ກາຍານຸປສ຺ສິໂນ ວິຫຣໂຕ ຈິຕ຺ຕໍ ສມາຘິຍຕິ, ອຸປກ຺ກິເລສາ ປຫີຍນ຺ຕິ. ໂສ ຕໍ ນິມິຕ຺ຕໍ ອຸຄ຺ຄຓ຺ຫາຕິ. ເວທນາສຸ ເວທນານຸປສ຺ສີ ວິຫຣຕິ…ເປ… ຈິຕ຺ເຕ ຈິຕ຺ຕານຸປສ຺ສີ ວິຫຣຕິ…ເປ… ຘມ຺ເມສຸ ຘມ຺ມານຸປສ຺ສີ ວິຫຣຕິ ອາຕາປີ ສມ຺ປຊາໂນ ສຕິມາ, ວິເນຍ຺ຍ ໂລເກ ອຠິຊ຺ຌາໂທມນສ຺ສໍ. ຕສ຺ສ ຘມ຺ເມສຸ ຘມ຺ມານຸປສ຺ສິໂນ ວິຫຣໂຕ ຈິຕ຺ຕໍ ສມາຘິຍຕິ, ອຸປກ຺ກິເລສາ ປຫີຍນ຺ຕິ. ໂສ ຕໍ ນິມິຕ຺ຕໍ ອຸຄ຺ຄຓ຺ຫາຕິ.

‘‘ສ ໂຂ ໂສ, ຠິກ຺ຂເວ, ປຓ຺ຑິໂຕ ພ຺ຍຕ຺ໂຕ ກຸສໂລ ຠິກ຺ຂຸ ລາຠີ ເຈວ ໂຫຕິ ທິຏ຺ເຐວ ຘມ຺ເມ ສຸຂວິຫາຣານໍ, ລາຠີ ໂຫຕິ ສຕິສມ຺ປຊຎ຺ຎສ຺ສ. ຕໍ ກິສ຺ສ ເຫຕຸ? ຕຖາ ຫິ ໂສ, ຠິກ຺ຂເວ, ປຓ຺ຑິໂຕ ພ຺ຍຕ຺ໂຕ ກຸສໂລ ຠິກ຺ຂຸ ສກສ຺ສ ຈິຕ຺ຕສ຺ສ ນິມິຕ຺ຕໍ ອຸຄ຺ຄຓ຺ຫາຕີ’’ຕິ. ອຏ຺ຐມໍ.