໙. ປຐມສິເນຣຸປພ຺ພຕຣາຊສຸຕ຺ຕໍ

໑໑໑໙. ‘‘ເສຍ຺ຍຖາປິ, ຠິກ຺ຂເວ, ປຸຣິໂສ ສິເນຣຸສ຺ສ ປພ຺ພຕຣາຊສ຺ສ ສຕ຺ຕ ມຸຄ຺ຄມຕ຺ຕິໂຍ ປາສາຓສກ຺ຂຣາ ອຸປນິກ຺ຂິເປຍ຺ຍ. ຕໍ ກິໍ ມຎ຺ຎຖ, ຠິກ຺ຂເວ, ກຕມໍ ນຸ ໂຂ ພຫຸຕຣໍ – ຍາ ວາ [ຍາ ຈ] ສຕ຺ຕ ມຸຄ຺ຄມຕ຺ຕິໂຍ ປາສາຓສກ຺ຂຣາ ອຸປນິກ຺ຂິຕ຺ຕາ, ໂຍ ວາ [ໂຍ ຈ (ສ຺ຍາ. ກໍ. ປີ. ກ.) ສໍ. ນິ. ໒.໘໔] ສິເນຣຸປພ຺ພຕຣາຊາ’’ຕິ? ‘‘ເອຕເທວ, ຠນ຺ເຕ, ພຫຸຕຣໍ, ຍທິທໍ – ສິເນຣຸປພ຺ພຕຣາຊາ; ອປ຺ປມຕ຺ຕິກາ ສຕ຺ຕ ມຸຄ຺ຄມຕ຺ຕິໂຍ ປາສາຓສກ຺ຂຣາ ອຸປນິກ຺ຂິຕ຺ຕາ. ສງ຺ຂມ຺ປິ ນ ອຸເປນ຺ຕິ, ອຸປນິຘມ຺ປິ ນ ອຸເປນ຺ຕິ, ກລຠາຄມ຺ປິ ນ ອຸເປນ຺ຕິ ສິເນຣຸປພ຺ພຕຣາຊານໍ ອຸປນິຘາຍ ສຕ຺ຕ ມຸຄ຺ຄມຕ຺ຕິໂຍ ປາສາຓສກ຺ຂຣາ ອຸປນິກ຺ຂິຕ຺ຕາ’’ຕິ. ‘‘ເອວເມວ ໂຂ, ຠິກ຺ຂເວ, ອຣິຍສາວກສ຺ສ ທິຏ຺ຐິສມ຺ປນ຺ນສ຺ສ ປຸຄ຺ຄລສ຺ສ ອຠິສເມຕາວິໂນ ເອຕເທວ ພຫຸຕຣໍ ທຸກ຺ຂໍ ຍທິທໍ ປຣິກ຺ຂີຓໍ ປຣິຍາທິນ຺ນໍ; ອປ຺ປມຕ຺ຕກໍ ອວສິຏ຺ຐໍ. ສງ຺ຂມ຺ປິ ນ ອຸເປຕິ, ອຸປນິຘມ຺ປິ ນ ອຸເປຕິ, ກລຠາຄມ຺ປິ ນ ອຸເປຕິ, ປຸຣິມໍ ທຸກ຺ຂກ຺ຂນ຺ຘໍ ປຣິກ຺ຂີຓໍ ປຣິຍາທິນ຺ນໍ ອຸປນິຘາຍ ຍທິທໍ ສຕ຺ຕກ຺ຂຕ຺ຕຸປຣມຕາ; ໂຍ ‘ອິທໍ ທຸກ຺ຂ’ນ຺ຕິ ຍຖາຠູຕໍ ປຊານາຕິ…ເປ… ‘ອຍໍ ທຸກ຺ຂນິໂຣຘຄາມິນີ ປຏິປທາ’ຕິ ຍຖາຠູຕໍ ປຊານາຕິ’’.

‘‘ຕສ຺ມາຕິຫ, ຠິກ຺ຂເວ, ‘ອິທໍ ທຸກ຺ຂ’ນ຺ຕິ ໂຍໂຄ ກຣຓີໂຍ…ເປ… ‘ອຍໍ ທຸກ຺ຂນິໂຣຘຄາມິນີ ປຏິປທາ’ຕິ ໂຍໂຄ ກຣຓີໂຍ’’ຕິ. ນວມໍ.