໑໐. ທຸຕິຍສິເນຣຸປພ຺ພຕຣາຊສຸຕ຺ຕໍ

໑໑໒໐. ‘‘ເສຍ຺ຍຖາປິ, ຠິກ຺ຂເວ, ສິເນຣຸປພ຺ພຕຣາຊາຍໍ ປຣິກ຺ຂຍໍ ປຣິຍາທານໍ ຄຈ຺ເຉຍ຺ຍ, ຐເປຕ຺ວາ ສຕ຺ຕ ມຸຄ຺ຄມຕ຺ຕິໂຍ ປາສາຓສກ຺ຂຣາ. ຕໍ ກິໍ ມຎ຺ຎຖ, ຠິກ຺ຂເວ, ກຕມໍ ນຸ ໂຂ ພຫຸຕຣໍ – ຍໍ ວາ ສິເນຣຸສ຺ສ ປພ຺ພຕຣາຊສ຺ສ ປຣິກ຺ຂີຓໍ ປຣິຍາທິນ຺ນໍ, ຍາ ວາ ສຕ຺ຕ ມຸຄ຺ຄມຕ຺ຕິໂຍ ປາສາຓສກ຺ຂຣາ ອວສິຏ຺ຐາ’’ຕິ? ‘‘ເອຕເທວ, ຠນ຺ເຕ, ພຫຸຕຣໍ ສິເນຣຸສ຺ສ ປພ຺ພຕຣາຊສ຺ສ ຍທິທໍ ປຣິກ຺ຂີຓໍ ປຣິຍາທິນ຺ນໍ; ອປ຺ປມຕ຺ຕິກາ ສຕ຺ຕ ມຸຄ຺ຄມຕ຺ຕິໂຍ ປາສາຓສກ຺ຂຣາ ອວສິຏ຺ຐາ. ສງ຺ຂມ຺ປິ ນ ອຸເປນ຺ຕິ, ອຸປນິຘມ຺ປິ ນ ອຸເປນ຺ຕິ, ກລຠາຄມ຺ປິ ນ ອຸເປນ຺ຕິ ສິເນຣຸສ຺ສ ປພ຺ພຕຣາຊສ຺ສ ປຣິກ຺ຂີຓໍ ປຣິຍາທິນ຺ນໍ ອຸປນິຘາຍ ສຕ຺ຕ ມຸຄ຺ຄມຕ຺ຕິໂຍ ປາສາຓສກ຺ຂຣາ ອວສິຏ຺ຐາ’’ຕິ. ‘‘ເອວເມວ ໂຂ, ຠິກ຺ຂເວ, ອຣິຍສາວກສ຺ສ ທິຏ຺ຐິສມ຺ປນ຺ນສ຺ສ ປຸຄ຺ຄລສ຺ສ ອຠິສເມຕາວິໂນ ເອຕເທວ ພຫຸຕຣໍ ທຸກ຺ຂໍ ຍທິທໍ ປຣິກ຺ຂີຓໍ ປຣິຍາທິນ຺ນໍ; ອປ຺ປມຕ຺ຕກໍ ອວສິຏ຺ຐໍ. ສງ຺ຂມ຺ປິ ນ ອຸເປຕິ, ອຸປນິຘມ຺ປິ ນ ອຸເປຕິ, ກລຠາຄມ຺ປິ ນ ອຸເປຕິ, ປຸຣິມໍ ທຸກ຺ຂກ຺ຂນ຺ຘໍ ປຣິກ຺ຂີຓໍ ປຣິຍາທິນ຺ນໍ ອຸປນິຘາຍ ຍທິທໍ ສຕ຺ຕກ຺ຂຕ຺ຕຸປຣມຕາ; ໂຍ ‘ອິທໍ ທຸກ຺ຂ’ນ຺ຕິ ຍຖາຠູຕໍ ປຊານາຕິ…ເປ… ‘ອຍໍ ທຸກ຺ຂນິໂຣຘຄາມິນີ ປຏິປທາ’ຕິ ຍຖາຠູຕໍ ປຊານາຕິ’’.

‘‘ຕສ຺ມາຕິຫ, ຠິກ຺ຂເວ, ‘ອິທໍ ທຸກ຺ຂ’ນ຺ຕິ ໂຍໂຄ ກຣຓີໂຍ…ເປ… ‘ອຍໍ ທຸກ຺ຂນິໂຣຘຄາມິນີ ປຏິປທາ’ຕິ ໂຍໂຄ ກຣຓີໂຍ’’ຕິ. ທສມໍ.

ປປາຕວຄ຺ໂຄ ປຎ຺ຈໂມ.

ຕສ຺ສຸທ຺ທານໍ –

ຈິນ຺ຕາ ປປາໂຕ ປຣິຬາໂຫ, ກູຏໍ ວາລນ຺ຘກາໂຣ ຈ;

ຉິຄ຺ຄເຬນ ຈ ທ຺ເວ ວຸຕ຺ຕາ, ສິເນຣຸ ອປເຣ ທຸເວຕິ.