໑. ອິຈ຺ຉານງ຺ຄລສຸຕ຺ຕໍ

໙໘໗. ເອກໍ ສມຍໍ ຠຄວາ ອິຈ຺ຉານງ຺ຄເລ ວິຫຣຕິ ອິຈ຺ຉານງ຺ຄລວນສຓ຺ເຑ. ຕຕ຺ຣ ໂຂ ຠຄວາ ຠິກ຺ຂູ ອາມນ຺ເຕສິ – ‘‘ອິຈ຺ຉາມຫໍ, ຠິກ຺ຂເວ, ເຕມາສໍ ປຏິສລ຺ລີຍິຕຸໍ. ນາມ຺ຫິ ເກນຈິ ອຸປສງ຺ກມິຕພ຺ໂພ, ອຎ຺ຎຕ຺ຣ ເອເກນ ປິຓ຺ຑປາຕນີຫາຣເກນາ’’ຕິ. ‘‘ເອວໍ, ຠນ຺ເຕ’’ຕິ ໂຂ ເຕ ຠິກ຺ຂູ ຠຄວໂຕ ປຏິສ຺ສຸຕ຺ວາ ນາສ຺ສຸຘ ໂກຈິ ຠຄວນ຺ຕໍ ອຸປສງ຺ກມຕິ, ອຎ຺ຎຕ຺ຣ ເອເກນ ປິຓ຺ຑປາຕນີຫາຣເກນ.

ອຖ ໂຂ ຠຄວາ ຕສ຺ສ ເຕມາສສ຺ສ ອຈ຺ຈເຍນ ປຏິສລ຺ລານາ ວຸຏ຺ຐິໂຕ ຠິກ຺ຂູ ອາມນ຺ເຕສິ – ‘‘ສເຈ ໂຂ, ຠິກ຺ຂເວ, ອຎ຺ຎຕິຕ຺ຖິຍາ ປຣິພ຺ພາຊກາ ເອວໍ ປຸຈ຺ເຉຍ຺ຍຸໍ – ‘ກຕເມນາວຸໂສ, ວິຫາເຣນ ສມໂຓ ໂຄຕໂມ ວສ຺ສາວາສໍ ພຫຸລໍ ວິຫາສີ’ຕິ, ເອວໍ ປຸຏ຺ຐາ ຕຸມ຺ເຫ, ຠິກ຺ຂເວ, ເຕສໍ ອຎ຺ຎຕິຕ຺ຖິຍານໍ ປຣິພ຺ພາຊການໍ ເອວໍ ພ຺ຍາກເຣຍ຺ຍາຖ – ‘ອານາປານສ຺ສຕິສມາຘິນາ ໂຂ, ອາວຸໂສ, ຠຄວາ ວສ຺ສາວາສໍ ພຫຸລໍ ວິຫາສີ’ຕິ. ອິຘາຫໍ, ຠິກ຺ຂເວ, ສໂຕ ອສ຺ສສາມິ, ສໂຕ ປສ຺ສສາມິ. ທີຆໍ ອສ຺ສສນ຺ໂຕ ‘ທີຆໍ ອສ຺ສສາມີ’ຕິ ປຊານາມິ, ທີຆໍ ປສ຺ສສນ຺ໂຕ ‘ທີຆໍ ປສ຺ສສາມີ’ຕິ ປຊານາມິ; ຣສ຺ສໍ ອສ຺ສສນ຺ໂຕ ‘ຣສ຺ສໍ ອສ຺ສສາມີ’ຕິ ປຊານາມິ, ຣສ຺ສໍ ປສ຺ສສນ຺ໂຕ ‘ຣສ຺ສໍ ປສ຺ສສາມີ’ຕິ ປຊານາມິ; ‘ສພ຺ພກາຍປ຺ປຏິສໍເວທີ ອສ຺ສສິສ຺ສາມີ’ຕິ ປຊານາມິ…ເປ… ‘ປຏິນິສ຺ສຄ຺ຄານຸປສ຺ສີ ອສ຺ສສິສ຺ສາມີ’ຕິ ປຊານາມິ, ‘ປຏິນິສ຺ສຄ຺ຄານຸປສ຺ສີ ປສ຺ສສິສ຺ສາມີ’ຕິ ປຊານາມິ’’.

‘‘ຍຎ຺ຫິ ຕໍ, ຠິກ຺ຂເວ, ສມ຺ມາ ວທມາໂນ ວເທຍ຺ຍ – ‘ອຣິຍວິຫາໂຣ’ ອິຕິປິ, ‘ພ຺ຣຫ຺ມວິຫາໂຣ’ ອິຕິປິ, ‘ຕຖາຄຕວິຫາໂຣ’ ອິຕິປິ. ອານາປານສ຺ສຕິສມາຘິໍ ສມ຺ມາ ວທມາໂນ ວເທຍ຺ຍ – ‘ອຣິຍວິຫາໂຣ’ ອິຕິປິ, ‘ພ຺ຣຫ຺ມວິຫາໂຣ’ ອິຕິປິ, ‘ຕຖາຄຕວິຫາໂຣ’ ອິຕິປິ. ເຍ ເຕ, ຠິກ຺ຂເວ, ຠິກ຺ຂູ ເສຂາ ອປ຺ປຕ຺ຕມານສາ ອນຸຕ຺ຕຣໍ ໂຍຄກ຺ເຂມໍ ປຕ຺ຖຍມານາ ວິຫຣນ຺ຕິ ເຕສໍ ອານາປານສ຺ສຕິສມາຘິ ຠາວິໂຕ ພຫຸລີກໂຕ ອາສວານໍ ຂຍາຍ ສໍວຕ຺ຕຕິ. ເຍ ຈ ໂຂ ເຕ, ຠິກ຺ຂເວ, ຠິກ຺ຂູ ອຣຫນ຺ໂຕ ຂີຓາສວາ ວຸສິຕວນ຺ໂຕ ກຕກຣຓີຍາ ໂອຫິຕຠາຣາ ອນຸປ຺ປຕ຺ຕສທຕ຺ຖາ ປຣິກ຺ຂີຓຠວສໍໂຍຊນາ ສມ຺ມທຎ຺ຎາ ວິມຸຕ຺ຕາ ເຕສໍ ອານາປານສ຺ສຕິສມາຘິ ຠາວິໂຕ ພຫຸລີກໂຕ ທິຏ຺ຐຘມ຺ມສຸຂວິຫາຣາຍ ເຈວ ສໍວຕ຺ຕຕິ ສຕິສມ຺ປຊຎ຺ຎາຍ ຈ.

‘‘ຍຎ຺ຫິ ຕໍ, ຠິກ຺ຂເວ, ສມ຺ມາ ວທມາໂນ ວເທຍ຺ຍ – ‘ອຣິຍວິຫາໂຣ’ ອິຕິປິ, ‘ພ຺ຣຫ຺ມວິຫາໂຣ’ ອິຕິປິ, ‘ຕຖາຄຕວິຫາໂຣ’ ອິຕິປິ. ອານາປານສ຺ສຕິສມາຘິໍ ສມ຺ມາ ວທມາໂນ ວເທຍ຺ຍ – ‘ອຣິຍວິຫາໂຣ’ ອິຕິປິ, ‘ພ຺ຣຫ຺ມວິຫາໂຣ’ ອິຕິປິ, ‘ຕຖາຄຕວິຫາໂຣ’ ອິຕິປີ’’ຕິ. ປຐມໍ.