໑. ສີວກສຸຕ຺ຕວຓ຺ຓນາ

໒໖໙. ຕຕິຍວຄ຺ຄສ຺ສ ປຐເມ ໂມຬິຍສີວໂກຕິ ສີວໂກຕິ ຕສ຺ສ ນາມໍ. ຈູຬາ ປນສ຺ສ ອຕ຺ຖິ, ຕສ຺ມາ ໂມຬິຍສີວໂກຕິ ວຸຈ຺ຈຕິ. ປຣິພ຺ພາຊໂກຕິ ຉນ຺ນປຣິພ຺ພາຊໂກ. ປິຕ຺ຕສມຸຏ຺ຐານານີຕິ ປິຕ຺ຕປຈ຺ຈຍານິ. ເວທຍິຕານີຕິ ເວທນາ. ຕຕ຺ຖ ປິຕ຺ຕປຈ຺ຈຍາ ຕິສ຺ໂສ ເວທນາ ອຸປ຺ປຊ຺ຊນ຺ຕິ. ກຖໍ? ເອກຈ຺ໂຈ ຫິ ‘‘ປິຕ຺ຕໍ ເມ ກຸປິຕໍ ທຸຊ຺ຊານໍ ໂຂ ປນ ຊີວິຕ’’ນ຺ຕິ ທານໍ ເທຕິ, ສີລໍ ສມາທິຍຕິ ອຸໂປສຖກມ຺ມໍ ກໂຣຕິ, ເອວມສ຺ສ ກຸສລເວທນາ ອຸປ຺ປຊ຺ຊຕິ. ເອກຈ຺ໂຈ ‘‘ປິຕ຺ຕເຠສຊ຺ຊໍ ກຣິສ຺ສາມີ’’ຕິ ປາຓໍ ຫນຕິ, ອທິນ຺ນໍ ອາທິຍຕິ, ມຸສາ ຠຓຕິ, ທສ ທຸສ຺ສີລ຺ຍກມ຺ມານິ ກໂຣຕິ, ເອວມສ຺ສ ອກຸສລເວທນາ ອຸປ຺ປຊ຺ຊຕິ. ເອກຈ຺ໂຈ ‘‘ເອຕ຺ຕເກນປິ ເມ ເຠສຊ຺ຊກຣເຓນ ປິຕ຺ຕໍ ນ ວູປສມ຺ມຕິ, ອລໍ ຍໍ ໂຫຕິ. ຕໍ ໂຫຕູ’’ຕິ ມຊ຺ຌຕ຺ໂຕ ກາຍິກເວທນໍ ອຘິວາເສນ຺ໂຕ ນິປຊ຺ຊຕິ, ເອວໍ ອສ຺ສ ອພ຺ຍາກຕເວທນາ ອຸປ຺ປຊ຺ຊຕິ.

ສາມມ຺ປິ ໂຂ ເອຕນ຺ຕິ ຕໍ ຕໍ ປິຕ຺ຕວິກາຣໍ ທິສ຺ວາ ອຕ຺ຕນາປິ ເອຕໍ ເວທິຕພ຺ພໍ. ສຈ຺ຈສມ຺ມຕນ຺ຕິ ຠູຕສມ຺ມຕໍ. ໂລໂກປິ ຫິສ຺ສ ສຣີເຣ ສພລວຓ຺ຓຕາທິປິຕ຺ຕວິກາຣໍ ທິສ຺ວາ ‘‘ປິຕ຺ຕມສ຺ສ ກຸປິຕ’’ນ຺ຕິ ຊານາຕິ. ຕສ຺ມາຕິ ຍສ຺ມາ ສາມຎ຺ຈ ວິທິຕໍ ໂລກສ຺ສ ຈ ສຈ຺ຈສມ຺ມຕໍ ອຕິຘາວນ຺ຕິ, ຕສ຺ມາ. ເສມ຺ຫສມຸຏ຺ຐານາທີສຸປິ ເອເສວ ນໂຍ. ເອຕ຺ຖ ປນ ສນ຺ນິປາຕິການີຕິ ຕິຓ຺ຓມ຺ປິ ປິຕ຺ຕາທີນໍ ໂກເປນ ສມຸຏ຺ຐິຕານິ. ອຸຕຸປຣິຓາມຊານີຕິ ວິສຠາຄອຸຕຸໂຕ ຊາຕານິ. ຊງ຺ຄລເທສວາສີນຎ຺ຫິ ອນຸປເທເສ ວສນ຺ຕານໍ ວິສຠາໂຄ ອຸຕຸ ອຸປ຺ປຊ຺ຊຕິ, ອນຸປເທສວາສີນຎ຺ຈ ຊງ຺ຄລເທເສຕິ ເອວໍ ມລຍສມຸທ຺ທຕີຣາທິວເສນາປິ ອຸຕຸວິສຠາຄຕາ ອຸປ຺ປຊ຺ຊຕິເຍວ. ຕໂຕ ຊາຕາຕິ ອຸຕຸປຣິຓາມຊາຕານິ ນາມ.

ວິສມປຣິຫາຣຊານີຕິ ມຫາຠາຣວຫນສຸຘາໂກຏ຺ຏນາທິໂຕ ວາ ອເວລາຍ ຈຣນ຺ຕສ຺ສ ສປ຺ປຑໍສກູປປາຕາທິໂຕ ວາ ວິສມປຣິຫາຣໂຕ ຊາຕານິ. ໂອປກ຺ກມິການີຕິ ‘‘ອຍໍ ໂຈໂຣ ວາ ປາຣທາຣິໂກ ວາ’’ຕິ ຄເຫຕ຺ວາ ຊຓ຺ຓຸກກປ຺ປຣມຸຄ຺ຄຣາທີຫິ ນິປ຺ໂປຖນອຸປກ຺ກມໍ ປຈ຺ຈຍໍ ກຕ຺ວາ ອຸປ຺ປນ຺ນານິ. ເອຕໍ ພຫິ ອຸປກ຺ກມໍ ລຠິຕ຺ວາ ໂກຈິ ວຸຕ຺ຕນເຍເນວ ກຸສລໍ ກໂຣຕິ, ໂກຈິ ອກຸສລໍ, ໂກຈິ ອຘິວາເສນ຺ໂຕ ນິປຊ຺ຊຕິ. ກມ຺ມວິປາກຊານີຕິ ເກວລໍ ກມ຺ມວິປາກໂຕ, ຊາຕານິ. ເຕສຸປິ ຫິ ອຸປ຺ປນ຺ເນສຸ ວຸຕ຺ຕນເຍເນວ ໂກຈິ ກຸສລໍ ກໂຣຕິ, ໂກຈິ ອກຸສລໍ, ໂກຈິ ອຘິວາເສນ຺ໂຕ ນິປຊ຺ຊຕິ. ເອວໍ ສພ຺ພວາເຣສຸ ຕິວິຘາວ ເວທນາ ໂຫນ຺ຕິ.

ຕຕ຺ຖ ປຸຣິເມຫິ ສຕ຺ຕຫິ ກາຣເຓຫິ ອຸປ຺ປນ຺ນາ ສາຣີຣິກາ ເວທນາ ສກ຺ກາ ປຏິພາຫິຕຸໍ, ກມ຺ມວິປາກຊານໍ ປນ ສພ຺ພເຠສຊ຺ຊານິປິ ສພ຺ພປຣິຕ຺ຕານິປິ ນາລໍ ປຏິຆາຕາຍ. ອິມສ຺ມິໍ ສຸຕ຺ເຕ ໂລກໂວຫາໂຣ ນາມ ກຖິໂຕຕິ.