໒. ສມິທ຺ຘິສຸຕ຺ຕວຓ຺ຓນາ

໑໕໘. ທຸຕິເຍ ລາຠາ ວຕ ເມ, ສຸລທ຺ຘໍ ວຕ ເມຕິ ເອວຣູປສ຺ສ ສຕ຺ຖຸ ເຈວ ຘມ຺ມສ຺ສ ຈ ສພ຺ຣຫ຺ມຈາຣີນຎ຺ຈ ລທ຺ຘຕ຺ຕາ ມຍ຺ຫໍ ລາຠາ ມຍ຺ຫໍ ສຸລທ຺ຘນ຺ຕິ. ໂສ ກິຣາຍສ຺ມາ ປຈ຺ຉາ ມູລກມ຺ມຏ຺ຐານໍ ສມ຺ມສິຕ຺ວາ ‘‘ອຣຫຕ຺ຕໍ ຄເຫສ຺ສາມີ’’ຕິ ປາສາທິກໍ ຕາວ ກມ຺ມຏ຺ຐານໍ ຄເຫຕ຺ວາ ພຸທ຺ຘຘມ຺ມສງ຺ຆຄຸເຓ ອາວຊ຺ເຊຕ຺ວາ ຈິຕ຺ຕກລ຺ລຕໍ ອຸປ຺ປາເທຕ຺ວາ ຈິຕ຺ຕໍ ຫາເສຕ຺ວາ ໂຕເສຕ຺ວາ ນິສິນ຺ໂນ. ເຕນສ຺ສ ເອວມໂຫສິ. ອຸປສງ຺ກມີຕິ ‘‘ອຍໍ ສມິທ຺ຘິ ຠິກ຺ຂຸ ປາສາທິກໍ ກມ຺ມຏ຺ຐານໍ ຄເຫຕ຺ວາ ນິສິນ຺ນສທິໂສ, ຍາວ ມູລກມ຺ມຏ຺ຐານໍ ຄເຫຕ຺ວາ ອຣຫຕ຺ຕໍ ນ ຄຓ຺ຫາຕິ, ຕາວສ຺ສ ອນ຺ຕຣາຍໍ ກຣິສ຺ສາມີ’’ຕິ ອຸປສງ຺ກມິ. ຄຈ຺ຉ ຕ຺ວນ຺ຕິ ສຕ຺ຖາ ສກລຊມ຺ພຸທີປໍ ໂອໂລເກນ຺ໂຕ ‘‘ຕສ຺ມິໍເຍວ ຐາເນ ຕສ຺ສ ກມ຺ມຏ຺ຐານໍ ສປ຺ປາຍໍ ຠວິສ຺ສຕີ’’ຕິ ອທ຺ທສ, ຕສ຺ມາ ເອວມາຫ. ສຕິປຎ຺ຎາ ຈ ເມ ພຸທ຺ຘາຕິ ມຍາ ສຕິ ຈ ປຎ຺ຎາ ຈ ຎາຕາ. ກຣສ຺ສຸ ຣູປານີຕິ ພຫູນິປິ ວິຠິໍສກາຣຫານິ ຣູປານິ ກຣສ຺ສຸ. ເນວ ມໍ ພ຺ຍາຘຍິສ຺ສສີຕິ ມໍ ເນວ ເວຘຍິສ຺ສສິ ນ ກມ຺ປສ຺ເສສິ. ທຸຕິຍໍ.