໑. ສມ຺ພຫຸລສຸຕ຺ຕວຓ຺ຓນາ

໑໕໗. ຕຕິຍວຄ຺ຄສ຺ສ ປຐເມ ຊຏຓ຺ຑຸເວນາຕິ ຊຏາຈຸມ຺ພຏເກນ. ອຊິນກ຺ຂິປນິວຕ຺ໂຖຕິ ສຂຸຣໍ ອຊິນຈມ຺ມໍ ເອກໍ ນິວຕ຺ໂຖ ເອກໍ ປາຣຸໂຕ. ອຸທຸມ຺ພຣທຓ຺ຑນ຺ຕິ ອປ຺ປິຈ຺ຉຠາວປ຺ປກາສນຕ຺ຖໍ ອີສກໍ ວງ຺ກໍ ອຸທຸມ຺ພຣທຓ຺ຑໍ ຄເຫຕ຺ວາ. ເອຕທໂວຈາຕິ ໂລເກ ພ຺ຣາຫ຺ມຓສ຺ສ ວຈນໍ ນາມ ສຸສ຺ສູສນ຺ຕິ, ພ຺ຣາຫ຺ມເຓສຸປິ ປພ຺ພຊິຕສ຺ສ, ປພ຺ພຊິເຕສຸປິ ມຫລ຺ລກສ຺ສາຕິ ມຫລ຺ລກພ຺ຣາຫ຺ມຓສ຺ສ ປພ຺ພຊິຕເວສໍ ຄເຫຕ຺ວາ ປຘານຠູມິຍໍ ກມ຺ມໍ ກໂຣນ຺ເຕ ເຕ ຠິກ຺ຂູ ອຸປສງ຺ກມິຕ຺ວາ ຫຕ຺ຖໍ ອຸກ຺ຂິປິຕ຺ວາ ເອຕໍ ‘‘ທຫຣາ ຠວນ຺ໂຕ’’ຕິອາທິວຈນໍ ອໂວຈ. ໂອກມ຺ເປຕ຺ວາຕິ ຫນຸເກນ ອຸຣໍ ປຫຣນ຺ໂຕ ອໂຘນຕໍ ກຕ຺ວາ. ຊິວ຺ຫໍ ນິລ຺ລາເລຕ຺ວາຕິ ກພຣມຫາຊິວ຺ຫໍ ນີຫຣິຕ຺ວາ ອຸທ຺ຘມໂຘ ອຸຠຍປສ຺ເສສຸ ຈ ລາເລຕ຺ວາ. ຕິວິສາຂນ຺ຕິ ຕິສາຂໍ. ນລາຏິກນ຺ຕິ ຠກຸຏິໍ, ນລາເຏ ອຸຏ຺ຐິຕໍ ວລິຕ຺ຕຍນ຺ຕິ ອຕ຺ໂຖ. ປກ຺ກາມີຕິ ຕຸມ຺ເຫ ຊານນ຺ຕານໍ ວຈນໍ ອກຕ຺ວາ ອຕ຺ຕໂນວ ເຕເລ ປຈ຺ຈິສ຺ສຖາຕິ ວຕ຺ວາ ເອກໍ ມຄ຺ຄໍ ຄເຫຕ຺ວາ ຄໂຕ. ປຐມໍ.