໕. ທຸຕິຍມາຣປາສສຸຕ຺ຕວຓ຺ຓນາ

໑໔໑. ປຎ຺ຈເມ ມຸຕ຺ຕາຫນ຺ຕິ ມຸຕ຺ໂຕ ອຫໍ. ປຸຣິມໍ ສຸຕ຺ຕໍ ອນ຺ໂຕວສ຺ເສ ວຸຕ຺ຕໍ, ອິທໍ ປນ ປວາເຣຕ຺ວາ ວຸຏ຺ຐວສ຺ສກາເລ. ຈາຣິກນ຺ຕິ ອນຸປຸພ຺ພຄມນຈາຣິກໍ. (ປວາເຣຕ຺ວາ) ທິວເສ ທິວເສ ໂຍຊນປຣມໍ ຄຈ຺ຉນ຺ຕາ ຈຣຖາຕິ ວທຕິ. ມາ ເອເກນ ທ຺ເວຕິ ເອກມຄ຺ເຄນ ທ຺ເວ ຊນາ ມາ ອຄມິຕ຺ຖ. ເອວຎ຺ຫິ ຄເຕສຸ ເອກສ຺ມິໍ ຘມ຺ມໍ ເທເສນ຺ເຕ, ເອເກນ ຕຸຓ຺ຫີຠູເຕນ ຐາຕພ຺ພໍ ໂຫຕິ. ຕສ຺ມາ ເອວມາຫ.

ອາທິກລ຺ຍາຓນ຺ຕິ ອາທິມ຺ຫິ ກລ຺ຍາຓໍ ສຸນ຺ທຣໍ ຠທ຺ທກໍ. ຕຖາ ມຊ຺ຌປຣິໂຍສາເນສຸ. ອາທິມຊ຺ຌປຣິໂຍສານຎ຺ຈ ນາເມຕໍ ສາສນສ຺ສ ຈ ເທສນາຍ ຈ ວເສນ ທຸວິຘໍ. ຕຕ຺ຖ ສາສນສ຺ສ ສີລໍ ອາທິ, ສມຖວິປສ຺ສນາມຄ຺ຄາ ມຊ຺ຌໍ, ຜລນິພ຺ພານານິ ປຣິໂຍສານໍ. ສີລສມາຘໂຍ ວາ ອາທິ, ວິປສ຺ສນາມຄ຺ຄາ ມຊ຺ຌໍ, ຜລນິພ຺ພານານິ ປຣິໂຍສານໍ. ສີລສມາຘິວິປສ຺ສນາ ວາ ອາທິ, ມຄ຺ໂຄ ມຊ຺ຌໍ, ຜລນິພ຺ພານານິ ປຣິໂຍສານໍ. ເທສນາຍ ປນ ຈຕຸປ຺ປທິກາຍ ຄາຖາຍ ຕາວ ປຐມປາໂທ ອາທິ, ທຸຕິຍຕຕິຍາ ມຊ຺ຌໍ, ຈຕຸຕ຺ໂຖ ປຣິໂຍສານໍ. ປຎ຺ຈປທຉປ຺ປທານໍ ປຐມປາໂທ ອາທິ, ອວສານປາໂທ ປຣິໂຍສານໍ, ອວເສສາ ມຊ຺ຌໍ. ເອການຸສນ຺ຘິກສຸຕ຺ຕສ຺ສ ນິທານໍ ອາທິ, ‘‘ອິທມໂວຈາ’’ຕິ ປຣິໂຍສານໍ, ເສສໍ ມຊ຺ຌໍ. ອເນການຸສນ຺ຘິກສ຺ສ ມຊ຺ເຌ ພຫູປິ ອນຸສນ຺ຘິ ມຊ຺ຌເມວ, ນິທານໍ ອາທິ, ‘‘ອິທມໂວຈາ’’ຕິ ປຣິໂຍສານໍ.

ສາຕ຺ຖນ຺ຕິ ສາຕ຺ຖກໍ ກຕ຺ວາ ເທເສຖ. ສພ຺ຍຎ຺ຊນນ຺ຕິ ພ຺ຍຎ຺ຊເນຫິ ເຈວ ປເທຫິ ຈ ປຣິປູຣໍ ກຕ຺ວາ ເທເສຖ. ເກວລປຣິປຸຓ຺ຓນ຺ຕິ ສກລປຣິປຸຓ຺ຓໍ. ປຣິສຸທ຺ຘນ຺ຕິ ນິຣຸປກ຺ກິເລສໍ. ພ຺ຣຫ຺ມຈຣິຍນ຺ຕິ ສິກ຺ຂຕ຺ຕຍສງ຺ຄຫໍ ສາສນພ຺ຣຫ຺ມຈຣິຍໍ. ປກາເສຖາຕິ ອາວິກໂຣຖ.

ອປ຺ປຣຊກ຺ຂຊາຕິກາຕິ ປຎ຺ຎາຈກ຺ຂຸມ຺ຫິ ອປ຺ປກິເລສຣຊສຠາວາ, ທຸກູລສາຓິຍາ ປຏິຈ຺ຉນ຺ນາ ວິຍ ຈຕຸປ຺ປທິກຄາຖາປຣິໂຍສາເນ ອຣຫຕ຺ຕໍ ປຕ຺ຕຸໍ ສມຕ຺ຖາ ສນ຺ຕີຕິ ອຕ຺ໂຖ. ອສ຺ສວນຕາຕິ ອສ຺ສວນຕາຍ. ປຣິຫາຍນ຺ຕີຕິ ອລາຠປຣິຫານິຍາ ຘມ຺ມໂຕ ປຣິຫາຍນ຺ຕິ. ເສນານິຄໂມຕິ ປຐມກປ຺ປິການໍ ເສນາຍ ນິວິຏ຺ໂຐກາເສ ປຕິຏ຺ຐິຕຄາໂມ, ສຸຊາຕາຍ ວາ ປິຕຸ ເສນານີ ນາມ ນິຄໂມ. ເຕນຸປສງ຺ກມິສ຺ສາມີຕິ ນາຫໍ ຕຸມ຺ເຫ ອຸຍ຺ໂຍເຊຕ຺ວາ ປຣິເວຓາທີນິ ກາເຣຕ຺ວາ ອຸປຏ຺ຐາກາທີຫິ ປຣິຈຣິຍມາໂນ ວິຫຣິສ຺ສາມິ, ຕິຓ຺ຓໍ ປນ ຊຏິລານໍ ອຑ຺ຒຸຑ຺ຒານິ ປາຏິຫາຣິຍສຫສ຺ສານິ ທສ຺ເສຕ຺ວາ ຘມ຺ມເມວ ເທເສຕຸໍ ອຸປສງ຺ກມິສ຺ສາມີຕິ. ເຕນຸປສງ຺ກມີຕິ, ‘‘ອຍໍ ສມໂຓ ໂຄຕໂມ ມຫາຍຸທ຺ຘໍ ວິຈາເຣນ຺ໂຕ ວິຍ, ‘ມາ ເອເກນ ທ຺ເວ ອຄມິຕ຺ຖ, ຘມ຺ມໍ ເທເສຖາ’ຕິ ສຏ຺ຐິ ຊເນ ອຸຍ຺ໂຍເຊຕິ, ອິມສ຺ມິໍ ປນ ເອກສ຺ມິມ຺ປິ ຘມ຺ມໍ ເທເສນ຺ເຕ ມຍ຺ຫໍ ຈິຕ຺ຕສ຺ສາທໍ ນຕ຺ຖິ, ເອວໍ ພຫູສຸ ເທເສນ຺ເຕສຸ ກຸໂຕ ຠວິສ຺ສຕິ, ປຏິພາຫາມິ ນ’’ນ຺ຕິ ຈິນ຺ເຕຕ຺ວາ ອຸປສງ຺ກມິ. ປຎ຺ຈມໍ.