໖. ສປ຺ປສຸຕ຺ຕວຓ຺ຓນາ

໑໔໒. ຉຏ຺ເຐ ໂສຓ຺ຑິກາກິລຎ຺ຊນ຺ຕິ ສຸຣາກາຣການໍ ປິຏ຺ຐປຕ຺ຖຣຓກກິລຎ຺ຊໍ. ໂກສລິກາ ກໍສປາຕີຕິ ໂກສລຣຎ຺ໂຎ ຣຖຈກ຺ກປ຺ປມາຓາ ປຣິໂຠຄປາຕິ. ຄຬຄຬາຍນ຺ເຕຕິ ຄຊ຺ຊນ຺ເຕ. ກມ຺ມາຣຄຄ຺ຄຣິຍາຕິ ກມ຺ມາຣຸທ຺ຘນປຓາຬິຍາ. ຘມມານາຍາຕິ ຠສ຺ຕວາເຕນ ປູຣິຍມານາຍ. ອິຕິ ວິທິຕ຺ວາຕິ – ‘‘ສມໂຓ ໂຄຕໂມ ປຘານມນຸຍຸຕ຺ໂຕ ສຸເຂນ ນິສິນ຺ໂນ, ຆຏ຺ຏຍິສ຺ສາມິ ນ’’ນ຺ຕິ ວຸຕ຺ຕປ຺ປກາຣໍ ອຕ຺ຕຠາວໍ ມາເປຕ຺ວາ ນິຍາມຠູມິຍໍ ອິໂຕ ຈິໂຕ ຈ ສຎ຺ຈຣນ຺ຕໍ ວິຊ຺ຊຸລຕາໂລເກນ ທິສ຺ວາ, ‘‘ໂກ ນຸ ໂຂ ເອໂສ ສຕ຺ໂຕ’’ຕິ? ອາວຊ຺ເຊນ຺ໂຕ, ‘‘ມາໂຣ ອຍ’’ນ຺ຕິ ເອວໍ ວິທິຕ຺ວາ.

ສຸຎ຺ຎເຄຫານີຕິ ສຸຎ຺ຎາຄາຣານິ. ເສຍ຺ຍາຕິ ເສຍ຺ຍຕ຺ຖາຍ. ຐສ຺ສາມິ ຈງ຺ກມິສ຺ສາມິ ນິສີທິສ຺ສາມິ ນິປຊ຺ຊິສ຺ສາມີຕິ ເອຕທຕ຺ຖາຍ ໂຍ ສຸຎ຺ຎາຄາຣານິ ເສວຕີຕິ ອຕ຺ໂຖ. ໂສ ມຸນິ ອຕ຺ຕສຎ຺ຎໂຕຕິ ໂສ ພຸທ຺ຘມຸນິ ຫຕ຺ຖປາທກຸກ຺ກຸຈ຺ຈາຠາເວນ ສໍຍຕຕ຺ຕຠາໂວ. ໂວສ຺ສຊ຺ຊ ຈເຣຍ຺ຍ ຕຕ຺ຖ ໂສຕິ ໂສ ຕສ຺ມິໍ ອຕ຺ຕຠາເວ ອາລຍໍ ນິກນ຺ຕິໍ ໂວສ຺ສຊ຺ຊິຕ຺ວາ ປຫາຍ ຈເຣຍ຺ຍ. ປຕິຣູປໍ ຫິ ຕຖາວິຘສ຺ສ ຕນ຺ຕິ ຕາທິສສ຺ສ ຕໍສຓ຺ຐິຕສ຺ສ ພຸທ຺ຘມຸນິໂນ ຕໍ ອຕ຺ຕຠາເວ ນິກນ຺ຕິໍ ໂວສ຺ສຊ຺ຊິຕ຺ວາ ຈຣຓໍ ນາມ ປຕິຣູປໍ ຍຸຕ຺ຕໍ ອນຸຈ຺ຉວິກໍ.

ຈຣກາຕິ ສີຫພ຺ຍຄ຺ຆາທິກາ ສຎ຺ຈຣຓສຕ຺ຕາ. ເຠຣວາຕິ ສວິຎ຺ຎາຓກອວິຎ຺ຎາຓກເຠຣວາ. ຕຕ຺ຖ ສວິຎ຺ຎາຓກາ ສີຫພ຺ຍຄ຺ຆາທໂຍ, ອວິຎ຺ຎາຓກາ ຣຕ຺ຕິຠາເຄ ຂາຓຸວມ຺ມິກາທໂຍ. ເຕປິ ຫິ ຕສ຺ມິໍ ກາເລ ຍກ຺ຂາ ວິຍ ອຸປຏ຺ຐຫນ຺ຕິ, ຣຊ຺ຊຸວລ຺ລິຍາທີນິ ສພ຺ພານິ ສປ຺ປາ ວິຍ ອຸປຏ຺ຐຫນ຺ຕິ. ຕຕ຺ຖາຕິ ເຕສຸ ເຠຣເວສຸ ສຸຎ຺ຎາຄາຣຄໂຕ ພຸທ຺ຘມຸນິ ໂລມຈລນມຕ຺ຕກມ຺ປິ ນ ກໂຣຕິ.

ອິທານິ ອຏ຺ຐານປຣິກປ຺ປໍ ທສ຺ເສນ຺ໂຕ ນຠໍ ຜເລຍ຺ຍາຕິອາທິມາຫ. ຕຕ຺ຖ ຜເລຍ຺ຍາຕິ ກາກປທໍ ວິຍ ຫີຣຫີຣໂສ ຜເລຍ຺ຍ. ຈເລຍ຺ຍາຕິ ໂປກ຺ຂຣປຕ຺ເຕ ວາຕາຫໂຕ ອຸທກພິນ຺ທຸ ວິຍ ຈເລຍ຺ຍ. ສລ຺ລມ຺ປິ ເຈ ອຸຣສິ ປກປ຺ປເຍຍ຺ຍຸນ຺ຕິ ຕິຂິຓສຕ຺ຕິສລ຺ລໍ ເຈປິ ອຸຣສ຺ມິໍ ຈາເຣເຍຍ຺ຍຸໍ. ອຸປຘີສູຕິ ຂນ຺ຘູປຘີສຸ. ຕາຓໍ ນ ກໂຣນ຺ຕີຕິ ຕິຂິເຓ ສລ຺ເລ ອຸຣສ຺ມິໍ ຈາຣິຍມາເນ ຠເຍນ ຄຸມ຺ພນ຺ຕຣກນ຺ທຣາທີນິ ປວິສນ຺ຕາ ຕາຓໍ ກໂຣນ຺ຕິ ນາມ. ພຸທ຺ຘາ ປນ ສມຸຈ຺ຉິນ຺ນສພ຺ພຠຍາ ເອວຣູປໍ ຕາຓໍ ນາມ ນ ກໂຣນ຺ຕິ. ຉຏ຺ຐໍ.