໑. ຕໂປກມ຺ມສຸຕ຺ຕວຓ຺ຓນາ

໑໓໗. ມາຣສໍຍຸຕ຺ຕສ຺ສ ປຐເມ ອຸຣຸເວລາຍໍ ວິຫຣຕີຕິ ປຏິວິທ຺ຘສພ຺ພຎ຺ຎຸຕຎ຺ຎາໂຓ ອຸຣຸເວລຄາມໍ ອຸປນິສ຺ສາຍ ວິຫຣຕິ. ປຐມາຠິສມ຺ພຸທ຺ໂຘຕິ ອຠິສມ຺ພຸທ຺ໂຘ ຫຸຕ຺ວາ ປຐມໍ ອນ຺ໂຕສຕ຺ຕາຫສ຺ມິໍເຍວ. ທຸກ຺ກຣກາຣິກາຍາຕິ ຉພ຺ພສ຺ສານິ ກຕາຍ ທຸກ຺ກຣກາຣິກາຍ. ມາໂຣ ປາປິມາຕິ ອຕ຺ຕໂນ ວິສຍໍ ອຕິກ຺ກມິຕຸໍ ປຏິປນ຺ເນ ສຕ຺ເຕ ມາເຣຕີຕິ ມາໂຣ. ປາເປ ນິໂຍເຊຕິ, ສຍໍ ວາ ປາເປ ນິຍຸຕ຺ໂຕຕິ ປາປິມາ. ອຎ຺ຎານິປິສ຺ສ ກຓ຺ໂຫ, ອຘິປຕິ, ວສວຕ຺ຕີ, ອນ຺ຕໂກ, ນມຸຈິ, ປມຕ຺ຕພນ຺ຘູຕິອາທີນິ ພຫູນິ ນາມານິ, ອິຘ ປນ ນາມທ຺ວຍເມວ ຄຫິຕໍ. ອຸປສງ຺ກມີຕິ – ‘‘ອຍໍ ສມໂຓ ໂຄຕໂມ ‘ມຸຕ຺ໂຕສ຺ມີ’ຕິ ມຎ຺ຎຕິ, ອມຸຕ຺ຕຠາວມສ຺ສ ກເຖສ຺ສາມີ’’ຕິ ຈິນ຺ເຕຕ຺ວາ ອຸປສງ຺ກມິ.

ຕໂປກມ຺ມາ ອປກ຺ກມ຺ມາຕິ ຕໂປກມ຺ມໂຕ ອປກ຺ກມິຕ຺ວາ. ອປຣທ຺ໂຘຕິ ‘‘ທູເຣ ຕ຺ວໍ ສຸທ຺ຘິມຄ຺ຄາ’’ຕິ ວທຕິ. ອມຣໍ ຕປນ຺ຕິ ອມຣຕປໍ ອມຣຠາວຕ຺ຖາຍ ກຕໍ ລູຂຕປໍ, ອຕ຺ຕກິລມຖານຸໂຍໂຄ. ສພ຺ພານຕ຺ຖາວຫໍ ໂຫຕີຕິ, ‘‘ສພ຺ພໍ ຕປໍ ມຍ຺ຫໍ ອຕ຺ຖາວຫໍ ນ ຠວຕີ’’ຕິ ຎຕ຺ວາ. ຜິຍາຣິຕ຺ຕໍວ ຘມ຺ມນີຕິ ອຣຎ຺ເຎ ຖເລ ຜິຍາຣິຕ຺ຕໍ ວິຍ. ອິທໍ ວຸຕ຺ຕໍ ໂຫຕິ – ຍຖາ ອຣຎ຺ເຎ ຖເລ ນາວໍ ຐເປຕ຺ວາ ຠຓ຺ຑສ຺ສ ປູເຣຕ຺ວາ ມຫາຊນາ ອຠິຣູຫິຕ຺ວາ ຜິຍາຣິຕ຺ຕໍ ຄເຫຕ຺ວາ ສໍກຑ຺ເຒຍ຺ຍຸໍ ເຈວ ອຸປ຺ປີເລຍ຺ຍຸໍ ຈ, ໂສ ມຫາຊນສ຺ສ ວາຍາໂມ ເອກງ຺ຄຸລທ຺ວງ຺ຄຸລມຕ຺ຕມ຺ປິ ນາວາຍ ຄມນໍ ອສາເຘນ຺ໂຕ ນິຣຕ຺ຖໂກ ຠເວຍ຺ຍ ນ ອນຕ຺ຖາວໂຫ, ເອວເມວ ອຫໍ ‘ສພ຺ພໍ ອມຣໍ ຕປໍ ອນຕ຺ຖາວຫໍ ໂຫຕີ’ຕິ ຎຕ຺ວາ ວິສ຺ສຊ຺ເຊສິນ຺ຕິ.

ອິທານິ ຕໍ ອມຣໍ ຕປໍ ປຫາຍ ເຍນ ມຄ຺ເຄນ ພຸທ຺ໂຘ ຊາໂຕ, ຕໍ ທສ຺ເສນ຺ໂຕ ສີລນ຺ຕິອາທິມາຫ. ຕຕ຺ຖ ສີລນ຺ຕິ ວຈເນນ ສມ຺ມາວາຈາກມ຺ມນ຺ຕາຊີວາ ຄຫິຕາ, ສມາຘິນາ ສມ຺ມາວາຍາມສຕິສມາຘໂຍ, ປຎ຺ຎາຍ ສມ຺ມາທິຏ຺ຐິສງ຺ກປ຺ປາ. ມຄ຺ຄໍ ໂພຘາຍ ຠາວຍນ຺ຕິ ອິມໍ ອຏ຺ຐງ຺ຄິກເມວ ອຣິຍມຄ຺ຄໍ ໂພຘຕ຺ຖາຍ ຠາວຍນ຺ໂຕ. ເອຕ຺ຖ ຈ ໂພຘາຍາຕິ ມຄ຺ຄຕ຺ຖາຍ. ຍຖາ ຫິ ຍາຄຸຕ຺ຖາຍ ຍາຄຸເມວ ປຈນ຺ຕິ, ປູວຕ຺ຖາຍ ປູວເມວ ປຈນ຺ຕິ, ນ ອຎ຺ຎໍ ກິຎ຺ຈິ ກໂຣນ຺ຕິ, ເອວໍ ມຄ຺ຄເມວ ມຄ຺ຄຕ຺ຖາຍ ຠາເວຕິ. ເຕນາຫ ‘‘ມຄ຺ຄໍ ໂພຘາຍ ຠາວຍ’’ນ຺ຕິ. ປຣມໍ ສຸທ຺ຘິນ຺ຕິ ອຣຫຕ຺ຕໍ. ນິຫໂຕຕິ ຕ຺ວໍ ມຍາ ນິຫໂຕ ປຣາຊິໂຕ. ປຐມໍ.