໒. ຫຕ຺ຖິຣາຊວຓ຺ຓສຸຕ຺ຕວຓ຺ຓນາ

໑໓໘. ທຸຕິເຍ ຣຕ຺ຕນ຺ຘກາຣຕິມິສາຍນ຺ຕິ ຣຕ຺ຕິໍ ອນ຺ຘຠາວກາຣເກ ມຫາຕເມ ຈຕຸຣງ຺ເຄ ຕມສິ. ອພ຺ໂຠກາເສ ນິສິນ຺ໂນ ໂຫຕີຕິ ຄນ຺ຘກຸຏິໂຕ ນິກ຺ຂມິຕ຺ວາ ຈງ຺ກມນໂກຏິຍໍ ປາສາຓຜລເກ ມຫາຈີວຣໍ ສີເສ ຐເປຕ຺ວາ ປຘານໍ ປຣິຄ຺ຄຓ຺ຫມາໂນ ນິສິນ຺ໂນ ໂຫຕິ.

ນນຸ ຈ ຕຖາຄຕສ຺ສ ອຠາວິໂຕ ວາ ມຄ຺ໂຄ, ອປ຺ປຫີນາ ວາ ກິເລສາ, ອປ຺ປຏິວິທ຺ຘໍ ວາ ອກຸປ຺ປໍ, ອສຈ຺ຉິກໂຕ ວາ ນິໂຣໂຘ ນຕ຺ຖິ, ກສ຺ມາ ເອວມກາສີຕິ? ອນາຄເຕ ກຸລປຸຕ຺ຕານໍ ອງ຺ກຸສຕ຺ຖໍ. ‘‘ອນາຄເຕ ຫິ ກຸລປຸຕ຺ຕາ ມຍາ ຄຕມຄ຺ຄໍ ອາວຊ຺ຊິຕ຺ວາ ອພ຺ໂຠກາສວາສໍ ວສິຕພ຺ພໍ ມຎ຺ຎມານາ ປຘານກມ຺ມໍ ກຣິສ຺ສນ຺ຕີ’’ຕິ ສມ຺ປສ຺ສມາໂນ ສຕ຺ຖາ ເອວມກາສິ. ມຫາຕິ ມຫນ຺ໂຕ. ອຣິຏ຺ຐໂກຕິ ກາຬໂກ. ມຓີຕິ ປາສາໂຓ. ເອວມສ຺ສ ສີສໍ ໂຫຕີຕິ ເອວຣູປໍ ຕສ຺ສ ກາຬວຓ຺ຓໍ ກູຏາຄາຣປ຺ປມາຓໍ ມຫາປາສາຓສທິສໍ ສີສໍ ໂຫຕິ.

ສຸຠາສຸຠນ຺ຕິ ທີຆມທ຺ຘານໍ ສໍສຣນ຺ໂຕ ສຸນ຺ທຣາສຸນ຺ທຣໍ ວຓ຺ຓໍ ກຕ຺ວາ ອາຄໂຕສີຕິ ວທຕິ. ອຖ ວາ ສໍສຣນ຺ຕິ ສໍສຣນ຺ໂຕ ອາຄຈ຺ຉນ຺ໂຕ. ທີຆມທ຺ຘານນ຺ຕິ ວສວຕ຺ຕິຏ຺ຐານໂຕ ຍາວ ອຸຣຸເວລາຍ ທີຆມຄ຺ຄໍ, ປຸເຣ ໂພຘາຍ ວາ ຉພ຺ພສ຺ສານິ ທຸກ຺ກຣກາຣິກສມຍສງ຺ຂາຕໍ ທີຆກາລໍ. ວຓ຺ຓໍ ກຕ຺ວາ ສຸຠາສຸຠນ຺ຕິ ສຸນ຺ທຣຎ຺ຈ ອສຸນ຺ທຣຎ຺ຈ ນານປ຺ປກາຣໍ ວຓ຺ຓໍ ກຕ຺ວາ ອເນກວາຣໍ ມມ ສນ຺ຕິກໍ ອາຄໂຕສີຕິ ອຕ຺ໂຖ. ໂສ ກິຣ ວຓ຺ໂຓ ນາມ ນຕ຺ຖິ, ເຍນ ວຓ຺ເຓນ ມາໂຣ ວິຠິໍສກຕ຺ຖາຍ ຠຄວໂຕ ສນ຺ຕິກໍ ນ ອາຄຕປຸພ຺ໂພ. ເຕນ ຕໍ ຠຄວາ ເອວມາຫ. ອລໍ ເຕ ເຕນາຕິ ອລໍ ຕຸຍ຺ຫໍ ເອເຕນ ມາຣວິຠິໍສາກາຣທສ຺ສນພ຺ຍາປາເຣນ. ທຸຕິຍໍ.