໙. ສນ຺ຘິຕຕ຺ເຖຣຄາຖາວຓ຺ຓນາ

ອສ຺ສຕ຺ເຖ ຫຣິໂຕຠາເສຕິ ອາຍສ຺ມໂຕ ສນ຺ຘິຕຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ປຸຎ຺ຎານິ ອຸປຈິນນ຺ໂຕ ອິໂຕ ເອກຕິໍເສ ກປ຺ເປ ສິຂິສ຺ສ ຠຄວໂຕ ກາເລ ເອໂກ ໂຄປາລໂກ ອໂຫສິ. ໂສ ສຕ຺ຖຣິ ປຣິນິພ຺ພຸເຕ ອຎ຺ຎຕຣໍ ເຖຣໍ ອຸປສງ຺ກມິຕ຺ວາ ຕສ຺ສ ສນ຺ຕິເກ ພຸທ຺ຘຄຸຓປຏິສໍຍຸຕ຺ຕໍ ຘມ຺ມໍ ສຸຕ຺ວາ ປສນ຺ນມານໂສ ‘‘ກຸຫິໍ ຠຄວາ’’ຕິ ປຸຈ຺ຉິຕ຺ວາ ປຣິນິພ຺ພຸຕຠາວໍ ສຸຕ຺ວາ ‘‘ເອວໍ ມຫານຸຠາວາ ພຸທ຺ຘາປິ ນາມ ອນິຈ຺ຈຕາວສໍ ຄຈ຺ຉນ຺ຕິ, ອໂຫ ສງ຺ຂາຣາ ອທ຺ຘຸວາ’’ຕິ ອນິຈ຺ຈສຎ຺ຎໍ ປຏິລຠິ. ຕໍ ເຖໂຣ ໂພຘິປູຊາຍ ອຸສ຺ສາເຫສິ. ໂສ ກາເລນ ກາລໍ ໂພຘິຣຸກ຺ຂສມີປໍ ຄນ຺ຕ຺ວາ ວິປສ຺ສນໍ ປຏ຺ຐເປຕ຺ວາ ພຸທ຺ຘຄຸເຓ ອນຸສ຺ສຣນ຺ໂຕ ໂພຘິໍ ວນ຺ທຕິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ໂກສລຣຏ຺ເຐ ອິພ຺ຠກຸເລ ນິພ຺ພຕ຺ຕິຕ຺ວາ ສນ຺ຘິໂຕຕິ ລທ຺ຘນາໂມ ວຍປ຺ປຕ຺ໂຕ ອນິຈ຺ຈຕາປຏິສໍຍຸຕ຺ຕໍ ຘມ຺ມກຖໍ ສຸຕ຺ວາ ສໍເວຄຊາໂຕ ປພ຺ພຊິຕ຺ວາ ວິປສ຺ສນໍ ປຏ຺ຐເປຕ຺ວາ ຎາຓສ຺ສ ປຣິປາກໍ ຄຕຕ຺ຕາ ນຈິຣສ຺ເສວ ຉຬຠິຎ຺ໂຎ ອໂຫສິ. ໂສ ອຕ຺ຕໂນ ປຸພ຺ເພນິວາສໍ ອນຸສ຺ສຣນ຺ໂຕ ສິຂິສ຺ສ ຠຄວໂຕ ກາເລ ໂພຘິວນ຺ທນໍ ພຸທ຺ຘານຸສ຺ສຕິໍ ອນິຈ຺ຈສຎ຺ຎາປຏິລາຠຎ຺ຈ ອນຸສ຺ສຣິຕ຺ວາ ຕທຸປນິສ຺ສເຍນ ອຕ຺ຕໂນ ວິເສສາຘິຄມໍ ປກາເສນ຺ໂຕ –

໒໑໗. ‘‘ອສ຺ສຕ຺ເຖ ຫຣິໂຕຠາເສ, ສໍວິຣູຬ຺ຫມ຺ຫິ ປາທເປ;

ເອກໍ ພຸທ຺ຘຄຕໍ ສຎ຺ຎໍ, ອລຠິຕ຺ຖໍ ປຕິສ຺ສໂຕ.

໒໑໘. ‘‘ເອກຕິໍເສ ອິໂຕ ກປ຺ເປ, ຍໍ ສຎ຺ຎມລຠິໍ ຕທາ;

ຕສ຺ສາ ສຎ຺ຎາຍ ວາຫສາ, ປຕ຺ໂຕ ເມ ອາສວກ຺ຂໂຍ’’ຕິ. –

ທ຺ເວ ຄາຖາ ອຠາສິ.

ຕຕ຺ຖ ອສ຺ສຕ຺ເຖຕິ ອສ຺ສຕ຺ຖຏ຺ຐານີເຍ, ຍ຺ວາຍໍ ເອຕຣຫິ ອມ຺ຫາກໍ ຠຄວໂຕ ໂພຘິຣຸກ຺ໂຂ ອສ຺ສຕ຺ໂຖ, ເອຕສ຺ສ ຐາເນ ຕທາ ສິຂິສ຺ສ ຠຄວໂຕ ໂພຘິຣຸກ຺ໂຂ ປຸຓ຺ຑຣີໂກ ຐິໂຕຕິ ໂສ ອສ຺ສຕ຺ຖຏ຺ຐານີຍຕາຍ ‘‘ອສ຺ສຕ຺ເຖ’’ຕິ ວຸຕ຺ຕໍ. ສຕ຺ຕານໍ ອສ຺ສາສຊນນໂຕ ວາ. ອປເຣ ປນ ‘‘ອສ຺ສຕ຺ຖຣຸກ຺ຂມູເລ ນິສີທິຕ຺ວາ ຕທາ ພຸທ຺ຘານຸສ຺ສຕິຍາ ຠາວິຕຕ຺ຕາ ເຖໂຣ ‘ອສ຺ສຕ຺ເຖ’ຕິ ອໂວຈາ’’ຕິ ວທນ຺ຕິ. ຫຣິໂຕຠາເສຕິ ຫຣິເຕຫິ ສາຣມຓິວຓ຺ເຓຫິ ໂອຠາສມາເນ. ສໍວິຣູຬ຺ຫມ຺ຫີຕິ ສຸຏ຺ຐຸ ວິຣູຬ຺ເຫ ສຸປ຺ປຕິຏ຺ຐິເຕ, ສຸຆນນິຈິຕປຕ຺ຕປລາສປລ຺ລເວຫິ ວິຣູຬ຺ຫສຎ຺ຉນ຺ເນຕິ ຈ ວທນ຺ຕິ. ປາທເປຕິ ຣຸກ຺ເຂ. ເອກໍ ພຸທ຺ຘຄຕໍ ສຎ຺ຎໍ, ອລຠິຕ຺ຖໍ ປຕິສ຺ສໂຕຕິ ພຸທ຺ຘາຣມ຺ມຓໍ ອາຣມ຺ມຓສ຺ສ ເອກຊາຕິຍຕ຺ຕາ ເອກໍ ‘‘ອິຕິປິ ໂສ ຠຄວາ’’ຕິອາທິນຍປ຺ປວຕ຺ຕໍ ພຸທ຺ຘານຸສ຺ສຕິສຫຄຕໍ ສຎ຺ຎໍ ພຸທ຺ຘຄຸຓານໍ ປຕິປຕິສຣຓໂຕ ປຕິສ຺ສໂຕ ຫຸຕ຺ວາ ອລຠິໍ.

ກທາ ປນ ສາ ສຎ຺ຎາ ລທ຺ຘາ, ກີວຕາຍ ສິທ຺ຘາຕິ ອາຫ ‘‘ເອກຕິໍເສ ອິໂຕ ກປ຺ເປ’’ຕິອາທິ. ອິໂຕ ຠທ຺ທກປ຺ປໂຕ ອຸທ຺ຘໍ ອາໂຣຫນວເສນ ເອກຕິໍເສ ກປ຺ເປ. ຍໍ ສຎ຺ຎນ຺ຕິ ຍໍ ພຸທ຺ຘານຸສ຺ສຕິສຫຄຕໍ ສຎ຺ຎໍ, ຍໍ ວາ ພຸທ຺ຘານໍ ອນິຈ຺ຈຕໍ ທິສ຺ວາ ຕທນຸສາເຣນ ສພ຺ພາສງ຺ຂາເຣສຸ ຕທາ ອນິຈ຺ຈສຎ຺ຎໍ ອລຠິໍ. ຕສ຺ສາ ສຎ຺ຎາຍ ວາຫສາຕິ ຕສ຺ສາ ຍຖາວຸຕ຺ຕາຍ ສຎ຺ຎາຍ ກາຣຓຠາເວນ ຕໍ ອຸປນິສ຺ສຍໍ ກຕ຺ວາ. ປຕ຺ໂຕ ເມ ອາສວກ຺ຂໂຍຕິ ອິທານິ ມຍາ ອາສວານໍ ຂໂຍ ນິໂຣໂຘ ອຘິຄໂຕຕິ ອິມາເຍວ ຈ ອິມສ຺ສ ເຖຣສ຺ສ ອປທານຄາຖາປິ. ຍຖາຫ (ອປ. ເຖຣ ໑.໒໒.໒໗-໓໐) –

‘‘ອສ຺ສຕ຺ເຖ ຫຣິໂຕຠາເສ…ເປ… ປຕ຺ໂຕ ເມ ອາສວກ຺ຂໂຍ.

‘‘ອິໂຕ ເຕຣສກປ຺ປມ຺ຫິ, ຘນິຏ຺ໂຐ ນາມ ຂຕ຺ຕິໂຍ;

ສຕ຺ຕຣຕນສມ຺ປນ຺ໂນ, ຈກ຺ກວຕ຺ຕີ ມຫພ຺ພໂລ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ສນ຺ຘິຕຕ຺ເຖຣຄາຖາວຓ຺ຓນາ ນິຏ຺ຐິຕາ.

ປຎ຺ຈມວຄ຺ຄວຓ຺ຓນາ ນິຏ຺ຐິຕາ.

ນິຏ຺ຐິຕາ ຈ ທຸກນິປາຕວຓ຺ຓນາ.