໖. ຈູຬກຕ຺ເຖຣຄາຖາວຓ຺ຓນາ

ນທນ຺ຕິ ໂມຣາ ສຸສິຂາ ສຸເປຂຸຓາຕິ ອາຍສ຺ມໂຕ ຈູຬກຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ກຸສລໍ ອຸປຈິນນ຺ໂຕ ອິໂຕ ເອກຕິໍເສ ກປ຺ເປ ສິຂິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ເອກທິວສໍ ສຕ຺ຖາຣໍ ທິສ຺ວາ ປສນ຺ນມານໂສ ຉຕ຺ຕປຓ຺ຓິຜລໍ ອທາສິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ຣາຊຄເຫ ພ຺ຣາຫ຺ມຓກຸເລ ນິພ຺ພຕ຺ຕິຕ຺ວາ ຈູຬໂກຕິ ລທ຺ຘນາໂມ ວຍປ຺ປຕ຺ໂຕ ຘນປາລທມເນ ສຕ຺ຖຣິ ລທ຺ຘປ຺ປສາໂທ ປພ຺ພຊິຕ຺ວາ ສມຓຘມ຺ມໍ ກໂຣນ຺ໂຕ ອິນ຺ທສາລຄຸຫາຍໍ ວສຕິ, ໂສ ເອກທິວສໍ ຄຸຫາທ຺ວາເຣ ນິສິນ຺ໂນ ມຄຘກ຺ເຂຕ຺ຕໍ ໂອໂລເກສິ. ຕສ຺ມິໍ ຂເຓ ປາວຸສກາລເມໂຆ ຄມ຺ຠີຣມຘຸຣນິຄ຺ໂຆໂສ ສຕປຏລສຫສ຺ສປຏໂລ ອຎ຺ຊນ ສິຂຣສນ຺ນິກາໂສ ນຠໍ ປູເຣຕ຺ວາ ປວສ຺ສຕິ, ມຍູຣສງ຺ຆາ ຈ ເມຆຄຊ຺ຊິຕໍ ສຸຕ຺ວາ ຫຏ຺ຐຕຸຏ຺ຐາ ເກກາສທ຺ທໍ ມຸຎ຺ຈິຕ຺ວາ ຕຕ຺ຖ ຕຕ຺ຖ ປເທເສ ນຈ຺ຈນ຺ຕາ ວິຈຣນ຺ຕິ. ເຖຣສ຺ສປິ ອາວາສຄພ຺ເຠ ເມຆວາຕຜສ຺ເສຫິ ອປຄຕຘມ຺ມຕ຺ຕາ ປສ຺ສທ຺ຘກຣຊກາເຍ ກລ຺ລຕໍ ປຕ຺ເຕ ອຸຕຸສປ຺ປາຍລາເຠນ ຈິຕ຺ຕໍ ເອກຄ຺ຄໍ ອໂຫສິ, ກມ຺ມຏ຺ຐານວີຖິໍ ໂອຕຣິ, ໂສ ຕໍ ຎຕ຺ວາ ກາລສມ຺ປທາທິກິຕ຺ຕນມຸເຂນ ອຕ຺ຕານໍ ຠາວນາຍ ອຸສ຺ສາເຫນ຺ໂຕ –

໒໑໑. ‘‘ນທນ຺ຕິ ໂມຣາ ສຸສິຂາ ສຸເປຂຸຓາ, ສຸນີລຄີວາ ສຸມຸຂາ ສຸຄຊ຺ຊິໂນ;

ສຸສທ຺ທລາ ຈາປິ ມຫາມຫີ ອຍໍ, ສຸພ຺ຍາປິຕມ຺ພຸ ສຸວລາຫກໍ ນຠໍ.

໒໑໒. ‘‘ສຸກລ຺ລຣູໂປ ສຸມນສ຺ສ ຌາຍຕໍ, ສຸນິກ຺ກໂມ ສາຘຸ ສຸພຸທ຺ຘສາສເນ;

ສຸສຸກ຺ກສຸກ຺ກໍ ນິປຸຓໍ ສຸທຸທ຺ທສໍ, ຜຸສາຫິ ຕໍ ອຸຕ຺ຕມມຈ຺ຈຸຕໍ ປທ’’ນ຺ຕິ. –

ທ຺ເວ ຄາຖາ ອຠາສິ.

ຕຕ຺ຖ ນທນ຺ຕິ ໂມຣາ ສຸສິຂາ ສຸເປຂຸຓາ, ສຸນີລຄີວາ ສຸມຸຂາ ສຸຄຊ຺ຊິໂນຕິ ເອເຕ ມຕ຺ຖເກ ອຸຏ຺ຐິຕາຫິ ສຸນ຺ທຣາຫິ ສິຂາຫິ ສມນ຺ນາຄຕຕ຺ຕາ ສຸສິຂາ, ນານາວຓ຺ເຓຫິ ອເນເກຫິ ໂສຠເນຫິ ຠທ຺ທກປິຎ຺ເຉຫິ ສມນ຺ນາຄຕຕ຺ຕາ ສຸເປຂຸຓາ, ຣາຊີວວຓ຺ຓສງ຺ກາສາຍ ສຸນ຺ທຣາຍ ນີລວຓ຺ຓາຍ ຄີວາຍ ສມນ຺ນາຄຕຕ຺ຕາ ສຸນີລຄີວາ, ສຸນ຺ທຣມຸຂຕາຍ ສຸມຸຂາ, ມນຸຎ຺ຎວາທິຕາຍ ສຸຄຊ຺ຊິໂນ, ໂມຣາ ສິຂຓ຺ຑິໂນ ຉຊ຺ຊສໍວາທີ ເກກາສທ຺ທໍ ມຸຎ຺ຈນ຺ຕາ ນທນ຺ຕິ ຣວນ຺ຕິ. ສຸສທ຺ທລາ ຈາປິ ມຫາມຫີ ອຍນ຺ຕິ ອຍຎ຺ຈ ມຫາປຖວີ ສຸສທ຺ທລາ ສຸນ຺ທຣຫຣິຕຕິຓາ. ສຸພ຺ຍາປິຕມ຺ພູຕິ ອຠິນວວຸຏ຺ຐິຍາ ຕຫໍ ຕຫໍ ວິສ຺ສນ຺ທມານສລິລຕາຍ ສຸຏ຺ຐຸ ພ຺ຍາປິຕຊລາ ວິຕຕຊລາ. ‘‘ສຸສຸກ຺ກຕມ຺ພູ’’ຕິປິ ປາໂຐ, ສຸວິສຸທ຺ຘຊລາຕິ ອຕ຺ໂຖ. ສຸວລາຫກໍ ນຠນ຺ຕິ ອິທຎ຺ຈ ນຠໍ ອາກາສໍ ນີລຸປ຺ປລທລສນ຺ນິເຠຫິ ສມນ຺ຕໂຕ ປູເຣຕ຺ວາ ຐິເຕຫິ ສຸນ຺ທເຣຫິ ວລາຫເກຫິ ເມເຆຫິ ສຸວລາຫກໍ.

ສຸກລ຺ລຣູໂປ ສຸມນສ຺ສ ຌາຍຕນ຺ຕິ ອິທານິ ອຸຕຸສປ຺ປາຍລາເຠນ ສຸຏ຺ຐຸ ກລ຺ລຣູໂປ ກມ຺ມນິຍສຠາໂວ ຕ຺ວໍ, ນີວຣເຓຫິ ອນຊ຺ຌາຣູຬ຺ຫຈິຕ຺ຕຕາຍ ສຸນ຺ທຣມນສ຺ສ ໂຍຄາວຈຣສ຺ສ ຍໍ ອາຣມ຺ມຓູປນິຊ຺ຌານວເສນ ລກ຺ຂຓູປນິຊ຺ຌານວເສນ ຈ ຌາຍຕໍ. ສຸນິກ຺ກໂມ…ເປ… ອຈ຺ຈຸຕໍ ປທນ຺ຕິ ເອວໍ ຌາຍນ຺ໂຕ ຈ ສາຘຸ ສຸພຸທ຺ຘສ຺ສ ສມ຺ມາສມ຺ພຸທ຺ຘສ຺ສ ສາສເນ ສຸນ຺ທຣນິກ຺ກໂມ ຫຸຕ຺ວາ ສຸປຣິສຸທ຺ຘສີລຕາຍ ສຸສຸກ຺ກໍ, ວິສຸທ຺ຘສຠາວຕາຍ ສພ຺ພສ຺ສປິ ສໍກິເລສສ຺ສ ໂຄຈຣຠາວານຸປຄມນໂຕ ສຸກ຺ກໍ, ນິປຸຓຎາຓໂຄຈຣຕາຍ ນິປຸຓໍ, ປຣມຄມ຺ຠີຣຕາຍ ສຸທຸທ຺ທສໍ, ປຓີຕຠາເວນ ເສຏ຺ຐຠາເວນ ຈ ອຸຕ຺ຕມໍ, ນິຈ຺ຈສຠາວຕາຍ ອຈ຺ຈຸຕໍ ປທໍ ຕໍ ນິພ຺ພານໍ ຜຸສາຫິ ອຕ຺ຕປຈ຺ຈກ຺ຂກຣເຓນ ສມ຺ມາປຏິປຕ຺ຕິຍາ ສຈ຺ຉິກໂຣຫີຕິ.

ເອວໍ ເຖໂຣ ອຕ຺ຕານໍ ໂອວທນ຺ໂຕວ ອຸຕຸສປ຺ປາຍລາເຠນ ສມາຫິຕຈິຕ຺ໂຕ ວິປສ຺ສນໍ ອຸສ຺ສຸກ຺ກາເປຕ຺ວາ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໑.໓໙.໓໗-໔໒) –

‘‘ກຓິກາຣໍວ ຊລິຕໍ, ປຸຓ຺ຓມາເຍວ ຈນ຺ທິມໍ;

ຊລນ຺ຕໍ ທີປຣຸກ຺ຂໍວ, ອທ຺ທສໍ ໂລກນາຍກໍ.

‘‘ກທລິຜລໍ ປຄ຺ຄຍ຺ຫ, ອທາສິໍ ສຕ຺ຖຸໂນ ອຫໍ;

ປສນ຺ນຈິຕ຺ໂຕ ສຸມໂນ, ວນ຺ທິຕ຺ວານ ອປກ຺ກມິໍ.

‘‘ເອກຕິໍເສ ອິໂຕ ກປ຺ເປ, ຍໍ ຜລມທທິໍ ຕທາ;

ທຸຄ຺ຄຕິໍ ນາຠິຊານາມິ, ຜລທານສ຺ສິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ເຖໂຣ ອຕ຺ຕໂນ ປຏິປຕ຺ຕິໍ ປຈ຺ຈເວກ຺ຂິຕ຺ວາ ປີຕິໂສມນສ຺ສຊາໂຕ ‘‘ນທນ຺ຕິ ໂມຣາ’’ຕິອາທິນາ ຕາເຍວ ຄາຖາ ປຈ຺ຈຸທາຫາສິ. ເຕນສ຺ສ ອິທເມວ ອຎ຺ຎາພ຺ຍາກຣຓໍ ອໂຫສີຕິ.

ຈູຬກຕ຺ເຖຣຄາຖາວຓ຺ຓນາ ນິຏ຺ຐິຕາ.