໗. ອນູປມຕ຺ເຖຣຄາຖາວຓ຺ຓນາ

ນນ຺ທມານາຄຕໍ ຈິຕ຺ຕາຕິ ອາຍສ຺ມໂຕ ອນູປມຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ປຸຎ຺ຎໍ ອຸປຈິນນ຺ໂຕ ອິໂຕ ເອກຕິໍເສ ກປ຺ເປ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ເອກທິວສໍ ປທຸມໍ ນາມ ປຈ຺ເຈກພຸທ຺ຘໍ ປິຓ຺ຑາຍ ຈຣນ຺ຕໍ ຣຖິຍໍ ທິສ຺ວາ ປສນ຺ນມານໂສ ອງ຺ໂກລປຸປ຺ເຜຫິ ປູເຊສິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ໂກສລຣຏ຺ເຐ ອິພ຺ຠກຸເລ ນິພ຺ພຕ຺ຕິຕ຺ວາ ຣູປສມ຺ປຕ຺ຕິຍາ ອນູປໂມຕິ ລທ຺ຘນາໂມ ວຍປ຺ປຕ຺ໂຕ ອຸປນິສ຺ສຍສມ຺ປນ຺ນຕາຍ ກາເມ ປຫາຍ ປພ຺ພຊິຕ຺ວາ ວິປສ຺ສນາຍ ກມ຺ມໍ ກໂຣນ຺ໂຕ ອຣຎ຺ເຎ ວິຫຣຕິ. ຕສ຺ສ ຈິຕ຺ຕໍ ພຫິທ຺ຘາ ຣູປາທິອາຣມ຺ມເຓສຸ ວິຘາວຕິ. ກມ຺ມຏ຺ຐານໍ ປຣິວຏ຺ຏຕິ. ເຖໂຣ ວິຘາວນ຺ຕໍ ຈິຕ຺ຕໍ ນິຄ຺ຄຓ຺ຫນ຺ໂຕ –

໒໑໓. ‘‘ນນ຺ທມານາຄຕໍ ຈິຕ຺ຕໍ, ສູລມາໂຣປມານກໍ;

ເຕນ ເຕເນວ ວຊສິ, ເຍນ ສູລໍ ກລິງ຺ຄຣໍ.

໒໑໔. ‘‘ຕາຫໍ ຈິຕ຺ຕກລິໍ ພ຺ຣູມິ, ຕໍ ພ຺ຣູມິ ຈິຕ຺ຕທຸພ຺ຠກໍ;

ສຕ຺ຖາ ເຕ ທຸລ຺ລໂຠ ລທ຺ໂຘ, ມານຕ຺ເຖ ມໍ ນິໂຍຊຍີ’’ຕິ. –

ອິມາຫິ ທ຺ວີຫິ ຄາຖາຫິ ໂອວທິ.

ຕຕ຺ຖ ນນ຺ທມານາຄຕໍ ຈິຕ຺ຕາຕິ ນນ຺ທມານ ອຠິນນ຺ທມານ ຈິຕ຺ຕ ອຠິນນ຺ທມານໍ ອາຄຕໍ ອຸປ຺ປນ຺ນໍ. ສູລມາໂຣປມານກນ຺ຕິ ທຸກ຺ຂຸປ຺ປຕ຺ຕິຏ຺ຐານຕາຍ ສູລສທິສຕ຺ຕາ ສູລໍ ຕໍ ຕໍ ຠວໍ ກມ຺ມກິເລເສຫິ ເອຕ຺ຕກໍ ກາລໍ ອາໂຣປິຍມານໍ. ເຕນ ເຕເນວ ວຊສິ, ເຍນ ສູລໍ ກລິງ຺ຄຣນ຺ຕິ ຍຕ຺ຖ ຍຕ຺ຖ ສູລສງ຺ຂາຕາ ຠວາ ກລິງ຺ຄຣສງ຺ຂາຕາ ອຘິກຸຏ຺ຏນກາ ກາມຄຸຓາ ຈ ເຕນ ເຕເນວ, ປາປຈິຕ຺ຕ, ວຊສິ, ຕໍ ຕເທວ ຐານໍ ອຸປຄຈ຺ຉສິ, ອຕ຺ຕໂນ ອນຕ຺ຖໍ ນ ສລ຺ລກ຺ເຂສິ.

ຕາຫໍ ຈິຕ຺ຕກລິໍ ພ຺ຣູມີຕິ ຕໍ ຕສ຺ມາ ປມຕ຺ຕຠາວໂຕ ຈິຕ຺ຕກລິໍ ຈິຕ຺ຕກາລກຓ຺ຓິໍ ອຫໍ ກຖຍາມິ. ປຸນປິ ຕໍ ພ຺ຣູມິ ກເຖມິ ຈິຕ຺ຕທຸພ຺ຠກໍ ຈິຕ຺ຕສງ຺ຂາຕສ຺ສ ອຕ຺ຕໂນ ພຫູປກາຣສ຺ສ ສນ຺ຕານສ຺ສ ອນຕ຺ຖາວຫນໂຕ ຈິຕ຺ຕທຸພ຺ຠິໍ. ‘‘ຈິຕ຺ຕທຸພ຺ຠຄາ’’ຕິປິ ປຐນ຺ຕິ. ຈິຕ຺ຕສງ຺ຂາຕອລກ຺ຂິກອປ຺ປປຸຎ຺ຎາຕິ ອຕ຺ໂຖ. ກິນ຺ຕິ ພ຺ຣູຫີຕິ ເຈ? ອາຫ ‘‘ສຕ຺ຖາ ເຕ ທຸລ຺ລໂຠ ລທ຺ໂຘ, ມານຕ຺ເຖ ມໍ ນິໂຍຊຍີ’’ຕິ. ກປ຺ປານໍ ອສງ຺ຂ຺ເຍຍ຺ຍມ຺ປິ ນາມ ພຸທ຺ຘສຸຎ຺ໂຎ ໂລໂກ ໂຫຕິ, ສຕ຺ຖຣິ ອຸປ຺ປນ຺ເນປິ ມນຸສ຺ສຕ຺ຕສທ຺ຘາປຏິລາຠາທໂຍ ທຸລ຺ລຠາ ເອວ, ລທ຺ເຘສຸ ຈ ເຕສຸ ສຕ຺ຖາປິ ທຸລ຺ລໂຠເຍວ ໂຫຕິ. ເອວໍ ທຸລ຺ລໂຠ ສຕ຺ຖາ ອິທານິ ຕຍາ ລທ຺ໂຘ, ຕສ຺ມິໍ ລທ຺ເຘ ສມ຺ປຕິປິ ອນຕ຺ເຖ ອຫິເຕ ອາຍຕິຎ຺ຈ ອນຕ຺ຖາວເຫ ທຸກ຺ຂາວເຫ ອກຸສເລ ມໍ ມາ ນິໂຍເຊສີຕິ. ເອວໍ ເຖໂຣ ອຕ຺ຕໂນ ຈິຕ຺ຕໍ ໂອວທນ຺ໂຕ ເອວ ວິປສ຺ສນໍ ວຑ຺ເຒຕ຺ວາ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໑.໓໗.໑໖-໑໙) –

‘‘ປທຸໂມ ນາມ ສມ຺ພຸທ຺ໂຘ, ຈິຕ຺ຕກູເຏ ວສີ ຕທາ;

ທິສ຺ວານ ຕໍ ອຫໍ ພຸທ຺ຘໍ, ສຍມ຺ຠຸໍ ອປຣາຊິຕໍ.

‘‘ອງ຺ໂກລໍ ປຸປ຺ຜິຕໍ ທິສ຺ວາ, ໂອຈິນິຕ຺ວານຫໍ ຕທາ;

ອຸປຄນ຺ຕ຺ວານ ສມ຺ພຸທ຺ຘໍ, ປູຊຍິໍ ປທຸມໍ ຊິນໍ.

‘‘ເອກຕິໍເສ ອິໂຕ ກປ຺ເປ, ຍໍ ປຸປ຺ຜມຠິປູຊຍິໍ;

ທຸຄ຺ຄຕິໍ ນາຠິຊານາມິ, ພຸທ຺ຘປູຊາຍິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອນູປມຕ຺ເຖຣຄາຖາວຓ຺ຓນາ ນິຏ຺ຐິຕາ.