໕. ວິສາຂປຎ຺ຈາລປຸຕ຺ຕຕ຺ເຖຣຄາຖາວຓ຺ຓນາ

ນ ອຸກ຺ຂິເປ ໂນ ຈ ປຣິກ຺ຂິເປ ປເຣຕິ ອາຍສ຺ມໂຕ ວິສາຂສ຺ສ ປຎ຺ຈາລປຸຕ຺ຕສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ປຸຎ຺ຎໍ ອຸປຈິນນ຺ໂຕ ອິໂຕ ຈຸທ຺ທເສ ກປ຺ເປ ປຈ຺ຈນ຺ຕຄາເມ ທລິທ຺ທກຸເລ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ເອກທິວສໍ ຜລປຣິເຍສນໍ ຈຣນ຺ເຕຫິ ຕສ຺ມິໍ ຄາເມ ມນຸສ຺ເສຫິ ສທ຺ຘິໍ ອຣຎ຺ຎໍ ຄໂຕ ຕຕ຺ຖ ເອກໍ ປຈ຺ເຈກພຸທ຺ຘໍ ທິສ຺ວາ ປສນ຺ນມານໂສ ວລ຺ລິຜລໍ ອທາສິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ມຄຘຣຏ຺ເຐ ມຓ຺ຑລິກຣາຊກຸເລ ນິພ຺ພຕ຺ຕິຕ຺ວາ ວິສາໂຂຕິ ລທ຺ຘນາໂມ ປຎ຺ຈາລຣາຊຘີຕຸຍາ ປຸຕ຺ຕຠາວໂຕ ປຈ຺ຉາ ປຎ຺ຈາລປຸຕ຺ໂຕຕິ ປຎ຺ຎາຍິຕ຺ຖ. ໂສ ປິຕຣິ ມເຕ ຣຊ຺ຊໍ ກາເຣນ຺ໂຕ ສຕ຺ຖຣິ ອຕ຺ຕໂນ ຄາມສມີປຄເຕ ສຕ຺ຖຸ ສນ຺ຕິກໍ ຄນ຺ຕ຺ວາ ຘມ຺ມໍ ສຸຕ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາ ສຕ຺ຖາຣາ ສທ຺ຘິໍ ສາວຕ຺ຖິໍ ຄໂຕ ວິປສ຺ສນໍ ປຏ຺ຐເປຕ຺ວາ ນຈິຣສ຺ເສວ ຉຬຠິຎ຺ໂຎ ອໂຫສິ. ເຕນ ວຸຕ຺ຕໍ ອປທາເນ (ອປ. ເຖຣ ໑.໓໙.໓໑-໓໖) –

‘‘ສພ຺ເພ ຊນາ ສມາຄມ຺ມ, ອຄມິໍສຸ ວນໍ ຕທາ;

ຜລມນ຺ເວສມານາ ເຕ, ອລຠິໍສຸ ຜລໍ ຕທາ.

‘‘ຕຕ຺ຖທ຺ທສາສິໍ ສມ຺ພຸທ຺ຘໍ, ສຍມ຺ຠຸໍ ອປຣາຊິຕໍ;

ປສນ຺ນຈິຕ຺ໂຕ ສຸມໂນ, ວລ຺ລິຜລມທາສຫໍ.

‘‘ຈຕຸທ຺ທເສ ອິໂຕ ກປ຺ເປ, ຍໍ ຜລມທທິໍ ຕທາ;

ທຸຄ຺ຄຕິໍ ນາຠິຊານາມິ, ຜລທານສ຺ສິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ຉຬຠິຎ຺ໂຎ ປນ ຫຸຕ຺ວາ ເຖໂຣ ຎາຕີນໍ ອນຸກມ຺ປາຍ ຊາຕິຠູມິໍ ອຄມາສິ. ຕຕ຺ຖ ມນຸສ຺ສາ ເຖຣໍ ອຸປສງ຺ກມິຕ຺ວາ ກາເລນ ກາລໍ ຘມ຺ມໍ ສຸຓນ຺ຕາ ເອກທິວສໍ ‘‘ກຕິຫິ ນຸ ໂຂ, ຠນ຺ເຕ, ອງ຺ເຄຫິ ສມນ຺ນາຄໂຕ ຘມ຺ມກຖິໂກ ໂຫຕີ’’ຕິ ຘມ຺ມກຖິກລກ຺ຂຓໍ ປຸຈ຺ຉິໍສຸ. ເຖໂຣ ເຕສໍ ຘມ຺ມກຖິກລກ຺ຂຓໍ ກເຖນ຺ໂຕ –

໒໐໙. ‘‘ນ ອຸກ຺ຂິເປ ໂນ ຈ ປຣິກ຺ຂິເປ ປເຣ, ນ ໂອກ຺ຂິເປ ປາຣຄຕໍ ນ ເອຣເຍ;

ນ ຈຕ຺ຕວຓ຺ຓໍ ປຣິສາສຸ ພ຺ຍາຫເຣ, ອນຸທ຺ຘໂຕ ສມ຺ມິຕຠາຓິ ສຸພ຺ພໂຕ.

໒໑໐. ‘‘ສຸສຸຂຸມນິປຸຓຕ຺ຖທສ຺ສິນາ, ມຕິກຸສເລນ ນິວາຕວຸຕ຺ຕິນາ;

ສໍເສວິຕພຸທ຺ຘສີລິນາ, ນິພ຺ພານໍ ນ ຫິ ເຕນ ທຸລ຺ລຠ’’ນ຺ຕິ. –

ຄາຖາທ຺ວຍໍ ອຠາສິ.

ຕຕ຺ຖ ນ ອຸກ຺ຂິເປຕິ ອຕ຺ຕານໍ ນ ອຸກ຺ຂິເປຍ຺ຍ, ຊາຕິອາທີຫິ ພາຫຸສຈ຺ຈາທີຫິ ຈ ອຕ຺ຕຸກ຺ກໍສນໍ ນ ກເຣຍ຺ຍ. ໂນ ຈ ປຣິກ຺ຂິເປ ປເຣຕິ ປເຣ ປຣປຸຄ຺ຄເລ ເຕເຫວ ຊາຕິອາທີຫິ ໂນ ປຣິກ຺ຂິເປ ປຣິຈ຺ຉິນ຺ທິຕ຺ວາ ນ ຂິເປຍ຺ຍ ຄຸຓປຣິຘໍສນວເສນ ວາ ນ ຂິເປຍ຺ຍ. ນ ໂອກ຺ຂິເປ ປເຣ ອິຈ຺ເຈວໍ ສມ຺ພນ຺ໂຘ. ປເຣ ໂອຊ຺ຌາປນວເສນ ນ ໂອກ຺ຂິເປ ເຫຏ຺ຐໂຕ ກຕ຺ວາ ປເຣ ນ ໂອໂລກາເປຍ຺ຍ, ນ ໂອຊ຺ຌາເປຍ຺ຍາຕິ ອຕ຺ໂຖ. ‘‘ນ ອຸກ຺ຂິເປ’’ຕິ ເກຈິ ປຐນ຺ຕິ, ໂສ ເອວຕ຺ໂຖ. ປາຣຄຕນ຺ຕິ ສໍສາຣປາຣໍ ວິຍ ວິຊ຺ຊາຍ ປາຣໍ ຄຕໍ ຂີຓາສວໍ ເຕວິຊ຺ຊໍ ຉຬຠິຎ຺ຎໍ ວາ ນ ເອຣເຍ ນ ຆຏ຺ຏເຍ ນ ອາສາເທຍ຺ຍ. ນ ຈຕ຺ຕວຓ຺ຓໍ ປຣິສາສຸ ພ຺ຍາຫເຣຕິ ອຕ຺ຕໂນ ວຓ຺ຓໍ ຄຸຓໍ ລາຠສກ຺ກາຣສິໂລກໍ ນິກາມຍມາໂນ ຂຕ຺ຕິຍປຣິສາທີສຸ ນ ຠາເສຍ຺ຍ. ອນຸທ຺ຘໂຕຕິ ອຸທ຺ຘຈ຺ຈຣຫິໂຕ. ອຸທ຺ຘຕສ຺ສ ຫິ ວຈນໍ ນາທິຍນ຺ຕິ. ສມ຺ມິຕຠາຓີຕິ ສມ຺ມເທວ ມິຕຠາຓີ, ກາເລນ ສາປເທສໍ ປຣິຍນ຺ຕວຕິໍ ອຕ຺ຖສຎ຺ຫິຕເມວ ວາຈໍ ຠາສນສີໂລຕິ ອຕ຺ໂຖ. ອິໂຕ ອຎ຺ຎຖາ ວທນ຺ຕສ຺ສ ວຈນໍ ອຄຫຓີຍໍ ໂຫຕິ. ສຸພ຺ພໂຕຕິ ສຸນ຺ທຣວໂຕ ສີລສມ຺ປນ຺ໂນ. ‘‘ສິຍາ’’ຕິ ກິຣິຍາປທໍ ອາເນຕ຺ວາ ໂຍເຊຕພ຺ພໍ.

ເອວໍ ເຖໂຣ ສງ຺ເຂເປເນວ ຘມ຺ມກຖິກລກ຺ຂຓໍ ວຕ຺ວາ ເຕສໍ ຄຸຓານໍ ອຕ຺ຕນິ ລພ຺ຠມານຕໍ ອຘິມຸຈ຺ຈິຕ຺ວາ ຠິຍ຺ໂຍໂສມຕ຺ຕາຍ ອຠິປ຺ປສນ຺ນໍ ມຫາຊນໍ ຎຕ຺ວາ ‘‘ເອວໍວິຘສ຺ສ ຘມ຺ມກຖິກສ຺ສ ວິມຸຕ຺ຕາຍຕນສນ຺ນິສ຺ສິຕສ຺ສ ນ ນິພ຺ພານໍ ທຸລ຺ລຠໍ, ອຖ ໂຂ ສຸລຠເມວາ’’ຕິ ທສ຺ເສນ຺ໂຕ ‘‘ສຸສຸຂຸມນິປຸຓຕ຺ຖທສ຺ສິນາ’’ຕິ ທຸຕິຍຄາຖມາຫ. ຕສ຺ສຕ຺ໂຖ ເຫຏ຺ຐາ ວຸຕ຺ໂຕເຍວ.

ວິສາຂປຎ຺ຈາລປຸຕ຺ຕຕ຺ເຖຣຄາຖາວຓ຺ຓນາ ນິຏ຺ຐິຕາ.