໓. ພ຺ຣຫ຺ມາລິຕ຺ເຖຣຄາຖາວຓ຺ຓນາ

ກສ຺ສິນ຺ທ຺ຣິຍານິ ສມຖງ຺ຄຕານີຕິ ອາຍສ຺ມໂຕ ພ຺ຣຫ຺ມາລິຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ວິວຏ຺ຏູປນິສ຺ສຍໍ ກຸສລໍ ອຸປຈິນນ຺ໂຕ ວິປສ຺ສິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ເອກທິວສໍ ສຕ຺ຖາຣໍ ປິຓ຺ຑາຍ ຈຣນ຺ຕໍ ທິສ຺ວາ ປສນ຺ນມານໂສ ວນ຺ທິຕ຺ວາ ປາທຜລໍ ອທາສິ. ສຕ຺ຖາ ອນຸໂມທນໍ ວຕ຺ວາ ປກ຺ກາມິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ໂກສລຣຏ຺ເຐ ພ຺ຣາຫ຺ມຓກຸເລ ນິພ຺ພຕ຺ຕິຕ຺ວາ ພ຺ຣຫ຺ມາລີຕິ ລທ຺ຘນາໂມ ວິຎ຺ຎຸຕໍ ປຕ຺ໂຕ ເຫຕຸສມ຺ປຕ຺ຕິຍາ ໂຈທິຍມາໂນ ສໍສາເຣ ສຎ຺ຊາຕສໍເວໂຄ ຕາທິເສນ ກລ຺ຍາຓມິຕ຺ຕສນ຺ນິສ຺ສເຍນ ພຸທ຺ຘສາສເນ ປພ຺ພຊິຕ຺ວາ ປຕິຣູປກມ຺ມຏ຺ຐານໍ ຄເຫຕ຺ວາ ອຣຎ຺ເຎ ວິຫຣນ຺ໂຕ ຎາຓສ຺ສ ປຣິປາກຄຕຕ຺ຕາ ນຈິຣສ຺ເສວ ວິປສ຺ສນໍ ວຑ຺ເຒຕ຺ວາ ຉຬຠິຎ຺ໂຎ ອໂຫສິ. ເຕນ ວຸຕ຺ຕໍ ອປທາເນ (ອປ. ເຖຣ ໒.໕໑.໖໓-໖໗) –

‘‘ສຸວຓ຺ຓວຓ຺ຓໍ ສມ຺ພຸທ຺ຘໍ, ອາຫຸຕີນໍ ປຏິຄ຺ຄຫໍ;

ຣຖິຍໍ ປຏິປຊ຺ຊນ຺ຕໍ, ປາທຜລໍ ອທາສຫໍ.

‘‘ເອກນວຸຕິໂຕ ກປ຺ເປ, ຍໍ ຜລໍ ອທທິໍ ຕທາ;

ທຸຄ຺ຄຕິໍ ນາຠິຊານາມິ, ຜລທານສ຺ສິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ຉຬຠິຎ຺ໂຎ ປນ ຫຸຕ຺ວາ ມຄ຺ຄສຸເຂນ ຜລສຸເຂນ ວີຕິນາເມນ຺ໂຕ ເອກທິວສໍ ປຘານປຣິຄ຺ຄາຫເກນ ເຖເຣນ ຕສ຺ມິໍ ອຣຎ຺ຎາຍຕເນ ຠິກ຺ຂູ ອຸທ຺ທິສ຺ສ ວຸຕ຺ຕໍ ປຘານານຸໂຍຄໍ ປຣິຄ຺ຄຓ຺ຫນ຺ໂຕ –

໒໐໕. ‘‘ກສ຺ສິນ຺ທ຺ຣິຍານິ ສມຖງ຺ຄຕານິ, ອສ຺ສາ ຍຖາ ສາຣຖິນາ ສຸທນ຺ຕາ;

ປຫີນມານສ຺ສ ອນາສວສ຺ສ, ເທວາປິ ກສ຺ສ ປິຫຍນ຺ຕິ ຕາທິໂນ.

໒໐໖. ‘‘ມຍ຺ຫິນ຺ທ຺ຣິຍານິ ສມຖງ຺ຄຕານິ, ອສ຺ສາ ຍຖາ ສາຣຖິນາ ສຸທນ຺ຕາ;

ປຫີນມານສ຺ສ ອນາສວສ຺ສ, ເທວາປິ ມຍ຺ຫໍ ປິຫຍນ຺ຕິ ຕາທິໂນ’’ຕິ. –

ຄາຖາທ຺ວຍໍ ອຠາສິ.

ຕສ຺ສຕ຺ໂຖ – ອິມສ຺ມິໍ ອຣຎ຺ຎາຍຕເນ ວສນ຺ເຕສຸ ຠິກ຺ຂູສຸ ກສ຺ສ ຠິກ຺ຂຸໂນ ເຖຣສ຺ສ ວາ ນວສ຺ສ ວາ ມຊ຺ຌິມສ຺ສ ວາ ເຉເກນ ສາຣຖິນາ ສຸທນ຺ຕາ ອສ຺ສາ ວິຍ ມນຈ຺ຉຏ຺ຐານິ ອິນ຺ທ຺ຣິຍານິ ສມຖໍ ທນ຺ຕຠາວໍ ນິພ຺ພິເສວນຠາວໍ ຄຕານິ. ກສ຺ສ ນວວິຘມ຺ປິ ມານໍ ປຫາຍ ຐິຕຕ຺ຕາ ປຫີນມານສ຺ສ ຈຕຸນ຺ນມ຺ປິ ອາສວານໍ ອຠາເວນ ອນາສວສ຺ສ ອິຏ຺ຐາທີສຸ ຕາທິລກ຺ຂຓປ຺ປຕ຺ຕິຍາ ຕາທິໂນ ເທວາປິ ປິຫຍນ຺ຕິ ມນຸສ຺ສາປິ ສມ຺ມາປຏິປຕ຺ຕິທສ຺ສນາທິນາ ຈ ອາທເຣນ ປຕ຺ເຖນ຺ຕີຕິ.

ຕຕ຺ຖ ຈ ຄາຖາຍໍ ປຸຣິມຑ຺ເຒນ ອນາຄາມິມຄ຺ຄາຘິຄໂມ ປຸຏ຺ໂຐ, ອນາຄາມິໂນປິ ຫິ ອິນ຺ທ຺ຣິຍານິ ປຫີນກາມຣາຄພ຺ຍາປາທຕາຍ ສມຖໍ ນິພ຺ພິເສວນຕໍ ຄຕານິ ໂຫນ຺ຕິ. ອິຕເຣນ ອຣຫຕ຺ຕມຄ຺ຄປຏິລາໂຠ, ອຣຫາ ຫິ ‘‘ປຫີນມາໂນ ອນາສໂວ ຕາທີ’’ຕິ ຈ ວຸຈ຺ຈຕິ.

ອຖາຍສ຺ມາ ພ຺ຣຫ຺ມາລິ ປຘານປຣິຄ຺ຄາຫເກນ ວຸຕ຺ຕໍ ‘‘ກສ຺ສິນ຺ທ຺ຣິຍານີ’’ຕິ ຄາຖໍ ປຈ຺ຈນຸຠາສິ. ຕທຕ຺ຖໍ ອຕ຺ຕູປນາຍິກວເສນ ວິສ຺ສຊ຺ເຊນ຺ໂຕ ‘‘ມຍ຺ຫິນ຺ທ຺ຣິຍານີ’’ຕິອາທິກາຍ ທຸຕິຍຄາຖາຍ ອຎ຺ຎໍ ພ຺ຍາກາສິ, ຕຕ຺ຖ ມຍ຺ຫິນ຺ທ຺ຣິຍານີຕິ ມມ ຈກ຺ຂາທີນິ ອິນ຺ທ຺ຣິຍານິ. ເສສໍ ວຸຕ຺ຕນຍເມວ.

ພ຺ຣຫ຺ມາລິຕ຺ເຖຣຄາຖາວຓ຺ຓນາ ນິຏ຺ຐິຕາ.