໒. ຘມ຺ມປາລຕ຺ເຖຣຄາຖາວຓ຺ຓນາ

ໂຍ ຫເວ ທຫໂຣ ຠິກ຺ຂູຕິ ອາຍສ຺ມໂຕ ຘມ຺ມປາລຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ປຸຎ຺ຎານິ ອຸປຈິນນ຺ໂຕ ອຕ຺ຖທສ຺ສິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ເກນຈິເທວ ກຣຓີເຍນ ວນນ຺ຕໍ ອຸປຄໂຕ ສຕ຺ຖາຣໍ ທິສ຺ວາ ປສນ຺ນມານໂສ ປິລກ຺ຂຜລມທາສິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ສຕ຺ຖຣິ ປຣິນິພ຺ພຸເຕ ອວນ຺ຕິຣຏ຺ເຐ ພ຺ຣາຫ຺ມຓກຸເລ ນິພ຺ພຕ຺ຕິຕ຺ວາ ຘມ຺ມປາໂລຕິ ລທ຺ຘນາໂມ ວຍປ຺ປຕ຺ໂຕ ຕກ຺ກສິລໍ ຄນ຺ຕ຺ວາ ສິປ຺ປໍ ອຸຄ຺ຄເຫຕ຺ວາ ປຏິນິວຕ຺ເຕນ຺ໂຕ ອນ຺ຕຣາມຄ຺ເຄ ເອກສ຺ມິໍ ວິຫາເຣ ອຎ຺ຎຕຣໍ ເຖຣໍ ທິສ຺ວາ ຕສ຺ສ ສນ຺ຕິເກ ຘມ຺ມໍ ສຸຕ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາ ວິປສ຺ສນໍ ວຑ຺ເຒຕ຺ວາ ຉຬຠິຎ຺ໂຎ ອໂຫສິ. ເຕນ ວຸຕ຺ຕໍ ອປທາເນ (ອປ. ເຖຣ ໑.໓໙.໒໑-໒໕) –

‘‘ວນນ຺ຕເຣ ພຸທ຺ຘໍ ທິສ຺ວາ, ອຕ຺ຖທສ຺ສິໍ ມຫາຍສໍ;

ປສນ຺ນຈິຕ຺ໂຕ ສຸມໂນ, ປິລກ຺ຂສ຺ສາທທິໍ ຜລໍ.

‘‘ອຏ຺ຐາຣເສ ກປ຺ປສເຕ, ຍໍ ຜລມທທິໍ ຕທາ;

ທຸຄ຺ຄຕິໍ ນາຠິຊານາມິ, ຜລທານສ຺ສິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ຉຬຠິຎ຺ໂຎ ປນ ຫຸຕ຺ວາ ສມາປຕ຺ຕິສຸເຂນ ວີຕິນາເມນ຺ໂຕ ເອກທິວສໍ ຕສ຺ມິໍ ວິຫາເຣ ທ຺ເວ ສາມເຓເຣ ຣຸກ຺ຂຄ຺ເຄ ປຸປ຺ຜານິ ໂອຈິນນ຺ເຕ ອາຣູຬ຺ຫສາຂາຍ ຠຄ຺ຄາຍ ປຕນ຺ເຕ ທິສ຺ວາ ເຖໂຣ ອິທ຺ຘານຸຠາເວນ ຫຕ຺ເຖນ ຄເຫຕ຺ວາ ອໂຣເຄເຍວ ຠູມິຍໍ ຐເປຕ຺ວາ ເຕສໍ ສາມເຓຣານໍ ຘມ຺ມໍ ເທເສນ຺ໂຕ –

໒໐໓. ‘‘ໂຍ ຫເວ ທຫໂຣ ຠິກ຺ຂຸ, ຍຸຎ຺ຊຕິ ພຸທ຺ຘສາສເນ;

ຊາຄໂຣ ສ ຫິ ສຸຕ຺ເຕສຸ, ອໂມຆໍ ຕສ຺ສ ຊີວິຕໍ.

໒໐໔. ‘‘ຕສ຺ມາ ສທ຺ຘຎ຺ຈ ສີລຎ຺ຈ, ປສາທໍ ຘມ຺ມທສ຺ສນໍ;

ອນຸຍຸຎ຺ເຊຖ ເມຘາວີ, ສຣໍ ພຸທ຺ຘານ ສາສນ’’ນ຺ຕິ. – ອິມາ ທ຺ເວ ຄາຖາ ອຠາສິ;

ຕຕ຺ຖ ໂຍຕິ ອນິຍມວຈນໍ. ຫເວຕິ ທຬ຺ຫຕ຺ເຖ ນິປາໂຕ. ທຫໂຣຕິ ຕຣຸໂຓ. ຠິກ຺ຂຕີຕິ ຠິກ຺ຂຸ. ຍຸຎ຺ຊຕີຕິ ຆຏຕິ ວາຍມຕິ. ຊາຄໂຣຕິ ຊາຄຣຓຘມ຺ມສມນ຺ນາຄໂຕ. ສຸຕ຺ເຕສູຕິ ສຸປນ຺ເຕສຸ. ອິທໍ ວຸຕ຺ຕໍ ໂຫຕິ ໂຍ ຠິກ຺ຂຸ ທຫໂຣວ ສມາໂນ ຕຣຸໂຓ ‘‘ຕຖາຫໍ ປຈ຺ຉາ ວຸຑ຺ຒກາເລ ຊານິສ຺ສາມີ’’ຕິ ອຈິນ຺ເຕຕ຺ວາ ພຸທ຺ຘານໍ ສາສເນ ອປ຺ປມາທປຏິປຕ຺ຕິຍໍ ຍຸຎ຺ຊຕິ ສມຖວິປສ຺ສນາຠາວນາຍ ໂຍຄໍ ກໂຣຕິ, ໂສ ສຸຕ຺ເຕສຸ ອວິຊ຺ຊານິທ຺ທາຍ ສຸຕ຺ເຕສຸ ປມຕ຺ເຕສຸ ສທ຺ຘາທິຊາຄຣຘມ຺ມສມນ຺ນາຄເມນ ຊາຄໂຣ, ຕໂຕ ເອວ ອຕ຺ຕຫິຕປຣຫິຕປາຣິປູຣິຍາ ອໂມຆໍ ອວຎ຺ຌໍ ຕສ຺ສ ຊີວິຕໍ, ຍສ຺ມາ ຈ ເອຕເທວໍ, ຕສ຺ມາ ສທ຺ຘຎ຺ຈ ‘‘ອຕ຺ຖິ ກມ຺ມໍ ອຕ຺ຖິ ກມ຺ມວິປາໂກ’’ຕິອາທິນຍປ຺ປວຕ຺ຕໍ ກມ຺ມຜລສທ຺ຘຎ຺ຈ, ສທ຺ຘູປນິພນ຺ຘຕ຺ຕາ ສີລສ຺ສ ຕທຸປນິສ຺ສຍໍ ຈຕຸປາຣິສຸທ຺ຘິສີລຎ຺ຈ, ‘‘ສມ຺ມາສມ຺ພຸທ຺ໂຘ ຠຄວາ, ສ຺ວາຂາໂຕ ຘມ຺ໂມ, ສຸປ຺ປຏິປນ຺ໂນ ສງ຺ໂຆ’’ຕິ ເອວໍ ປວຕ຺ຕຣຕນຕ຺ຕຍປ຺ປສາທຎ຺ຈ, ວິປສ຺ສນາປຎ຺ຎາສຫິຕາຍ ມຄ຺ຄປຎ຺ຎາຍ ປຣິຎ຺ຎາທິວເສນ ຈຕຸສຈ຺ຈຘມ຺ມທສ຺ສນຎ຺ຈ ເມຘາວີ ຘມ຺ໂມຊປຎ຺ຎາຍ ສມນ຺ນາຄໂຕ ຠິກ຺ຂຸ ພຸທ຺ຘານໍ ສາສນໍ ໂອວາທໍ ອນຸສິຏ຺ຐິໍ ອນຸສ຺ສຣນ຺ໂຕ ອາທິຕ຺ຕມ຺ປິ ອຕ຺ຕໂນ ສີສໍ ອຊ຺ຌຸເປກ຺ຂິຕ຺ວາ ອນຸຍຸຎ຺ເຊຖ, ຕຕ຺ຖ ອນຸໂຍຄໍ ອາຕປ຺ປໍ ກເຣຍ຺ຍາຕິ ອຕ຺ໂຖ.

ຘມ຺ມປາລຕ຺ເຖຣຄາຖາວຓ຺ຓນາ ນິຏ຺ຐິຕາ.