໙. ອຸສຠຕ຺ເຖຣຄາຖາວຓ຺ຓນາ

ອມ຺ພປລ຺ລວສງ຺ກາສນ຺ຕິ ອາຍສ຺ມໂຕ ອຸສຠຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ປຸຎ຺ຎານິ ກໂຣນ຺ໂຕ ສິຂິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ເອກທິວສໍ ສຕ຺ຖາຣໍ ປິຓ຺ຑາຍ ຈຣນ຺ຕໍ ທິສ຺ວາ ປສນ຺ນມານໂສ ໂກສມ຺ພຜລໍ ອທາສິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ກປິລວຕ຺ຖຸສ຺ມິໍ ສາກິຍຣາຊກຸເລ ນິພ຺ພຕ຺ຕິຕ຺ວາ ອຸສໂຠຕິ ລທ຺ຘນາໂມ ວຍປ຺ປຕ຺ໂຕ ສຕ຺ຖຸ ຎາຕິສມາຄເມ ພຸທ຺ຘານຸຠາວໍ ທິສ຺ວາ ປຏິລທ຺ຘສທ຺ໂຘ ປພ຺ພຊິ. ໂສ ປພ຺ພຊິຕກາລໂຕ ປຏ຺ຐາຍ ສມຓຘມ຺ມໍ ອກຕ຺ວາ ທິວາ ສງ຺ຄຓິກາຣາໂມ ສກລຣຕ຺ຕິໍ ນິທ຺ທາຍມາໂນ ວີຕິນາເມຕິ. ໂສ ເອກທິວສໍ ມຸຏ຺ຐສ຺ສຕິ ອສມ຺ປຊາໂນ ນິທ຺ທໍ ໂອກ຺ກນ຺ໂຕ ສຸປິເນ ເກສມສ຺ສຸໍ ໂອຫາເຣຕ຺ວາ ອມ຺ພປລ຺ລວວຓ຺ຓໍ ຈີວຣໍ ປາຣຸປິຕ຺ວາ ຫຕ຺ຖິຄີວາຍໍ ນິສີທິຕ຺ວາ ນຄຣໍ ປິຓ຺ຑາຍ ປວິຏ຺ຐໍ ຕຕ຺ເຖວ ມນຸສ຺ເສ ສມ຺ປຕ຺ເຕ ທິສ຺ວາ ລຊ຺ຊາຍ ຫຕ຺ຖິກ຺ຂນ຺ຘໂຕ ໂອຣຸຍ຺ຫ ອຕ຺ຕານໍ ທິສ຺ວາ ປຏິພຸທ຺ໂຘ, ‘‘ອີທິສໍ ນາມ ສຸປິນໍ ມຸຏ຺ຐສ຺ສຕິນາ ອສມ຺ປຊາເນນ ນິທ຺ທາຍມາເນນ ມຍາ ທິຏ຺ຐ’’ນ຺ຕິ ອຸປ຺ປນ຺ນສໍເວໂຄ ວິປສ຺ສນໍ ປຏ຺ຐເປຕ຺ວາ ນຈິຣສ຺ເສວ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໒.໕໒.໑໒-໑໖) –

‘‘ກກຸຘໍ ວິລສນ຺ຕໍວ, ເທວເທວໍ ນຣາສຠໍ;

ຣຖິຍໍ ປຏິປຊ຺ຊນ຺ຕໍ, ໂກສມ຺ພໍ ອທທິໍ ຕທາ.

‘‘ເອກຕິໍເສ ອິໂຕ ກປ຺ເປ, ຍໍ ຜລໍ ອທທິໍ ຕທາ;

ທຸຄ຺ຄຕິໍ ນາຠິຊານາມິ, ຜລທານສ຺ສິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຖ ເຖໂຣ ຍຖາທິຏ຺ຐໍ ສຸປິນໍ ອງ຺ກຸສໍ ກຕ຺ວາ ອຣຫຕ຺ຕສ຺ສ ອຘິຄຕຕ຺ຕາ ຕສ຺ເສວ ສຸປິນສ຺ສ ກິຕ຺ຕນວເສນ ອຎ຺ຎໍ ພ຺ຍາກໂຣນ຺ໂຕ –

໑໙໗. ‘‘ອມ຺ພປລ຺ລວສງ຺ກາສໍ, ອໍເສ ກຕ຺ວານ ຈີວຣໍ;

ນິສິນ຺ໂນ ຫຕ຺ຖິຄີວາຍໍ, ຄາມໍ ປິຓ຺ຑາຍ ປາວິສິໍ.

໑໙໘. ‘‘ຫຕ຺ຖິກ຺ຂນ຺ຘໂຕ ໂອຣຸຍ຺ຫ, ສໍເວຄໍ ອລຠິໍ ຕທາ;

ໂສຫໍ ທິຕ຺ໂຕ ຕທາ ສນ຺ໂຕ, ປຕ຺ໂຕ ເມ ອາສວກ຺ຂໂຍ’’ຕິ. – ຄາຖາທ຺ວຍມາຫ;

ຕຕ຺ຖ ອມ຺ພປລ຺ລວສງ຺ກາສໍ, ອໍເສ ກຕ຺ວານ ຈີວຣນ຺ຕິ ອມ຺ພປລ຺ລວາກາຣໍ ປວາຬວຓ຺ຓໍ ຈີວຣໍ ຂນ຺ເຘ ກຣິຕ຺ວາ ອຸຕ຺ຕຣາສງ຺ຄໍ ກຣິຕ຺ວາ. ຄາມນ຺ຕິ ອຕ຺ຕໂນ ຣາຊຘານິໍ ຫຕ຺ຖິກ຺ຂນ຺ເຘ ນິສິນ຺ໂນ ປິຓ຺ຑາຍ ປາວິສິໍ, ປວິຏ຺ຐມຕ຺ໂຕວ ມຫາຊເນນ ໂອໂລກິຍມາໂນ ຫຕ຺ຖິກ຺ຂນ຺ຘໂຕ ໂອຣຸຍ຺ຫ ຐິໂຕ ປຏິພຸຊ຺ຌິໍ, ປພຸທ຺ໂຘວ ສໍເວຄໍ ອລຠິໍ ຕທາ ‘‘ມຸຏ຺ຐສ຺ສຕິ ອສມ຺ປຊາໂນ ຫຸຕ຺ວາ ນິທ຺ທາໂຍກ຺ກມເນນ ເອຕໍ ຊາຕ’’ນ຺ຕິ. ອປເຣ ປນ ‘‘ຣາຊາວ ຫຸຕ຺ວາ ຣຕ຺ຕິຠາເຄ ເອວຣູປໍ ສຸປິນໍ ທິສ຺ວາ ວິຠາຕາຍ ຣຕ຺ຕິຍາ ຫຕ຺ຖິກ຺ຂນ຺ຘໍ ອາຣຸຍ຺ຫ ນຄຣວີຖິຍໍ ຈຣນ຺ໂຕ ຕໍ ສຸປິນໍ ສຣິຕ຺ວາ ຫຕ຺ຖິກ຺ຂນ຺ຘໂຕ ໂອຣຸຍ຺ຫ ສໍເວຄໍ ລຠິຕ຺ວາ ສຕ຺ຖຸ ສນ຺ຕິເກ ປພ຺ພຊິຕ຺ວາ ອຣຫຕ຺ຕໍ ປຕ຺ວາ ອຸທານໍ ອຸທາເນນ຺ໂຕ ອິມາ ຄາຖາ ອຠາສີ’’ຕິ ວທນ຺ຕິ. ທິຕ຺ໂຕຕິ ຕສ຺ມິໍ ຣາຊກາເລ ຊາຕິມທໂຠຄມທາທິປຣິທປ຺ປິໂຕ ສມາໂນ ສໍເວຄມລຠິນ຺ຕິ ໂຍຊນາ.

ອຸສຠຕ຺ເຖຣຄາຖາວຓ຺ຓນາ ນິຏ຺ຐິຕາ.