໘. ນິສຠຕ຺ເຖຣຄາຖາວຓ຺ຓນາ

ປຎ຺ຈ ກາມຄຸເຓ ຫິຕ຺ວາຕິ ອາຍສ຺ມໂຕ ນິສຠຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ປຸຎ຺ຎານິ ອຸປຈິນນ຺ໂຕ ວິປສ຺ສິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ເອກທິວສໍ ສຕ຺ຖາຣໍ ປິຓ຺ຑາຍ ຈຣນ຺ຕໍ ທິສ຺ວາ ປສນ຺ນຈິຕ຺ໂຕ ກປິຕ຺ຖຜລມທາສິ. ໂສ ເຕນ ປຸຎ຺ຎກມ຺ເມນ ສຸຄຕີສຸເຍວ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ໂກລິຍຊນປເທ ກຸລເຄເຫ ນິພ຺ພຕ຺ຕິຕ຺ວາ ນິສໂຠຕິ ລທ຺ຘນາໂມ ວຍປ຺ປຕ຺ໂຕ ສາກິຍໂກລິຍານໍ ສງ຺ຄາເມ ພຸທ຺ຘານຸຠາວໍ ທິສ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາ ຕທເຫວ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໒.໕໒.໗-໑໑) –

‘‘ສຸວຓ຺ຓວຓ຺ຓໍ ສມ຺ພຸທ຺ຘໍ, ອາຫຸຕີນໍ ປຏິຄ຺ຄຫໍ;

ຣຖິຍໍ ປຏິປຊ຺ຊນ຺ຕໍ, ກປິຕ຺ຖໍ ອທທິໍ ຜລໍ.

‘‘ເອກນວຸຕິໂຕ ກປ຺ເປ, ຍໍ ຜລໍ ອທທິໍ ຕທາ;

ທຸຄ຺ຄຕິໍ ນາຠິຊານາມິ, ຜລທານສ຺ສິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ໂສ ອຣຫຕ຺ຕໍ ປນ ປຕ຺ວາ ອຕ຺ຕໂນ ສຫາຍຠິກ຺ຂູ ປມາທວິຫາເຣນ ກາລໍ ວີຕິນາເມນ຺ເຕ ທິສ຺ວາ ເຕ ໂອວທນ຺ໂຕ –

໑໙໕. ‘‘ປຎ຺ຈ ກາມຄຸເຓ ຫິຕ຺ວາ, ປິຍຣູເປ ມໂນຣເມ;

ສທ຺ຘາຍ ຆຣາ ນິກ຺ຂມ຺ມ, ທຸກ຺ຂສ຺ສນ຺ຕກໂຣ ຠເວ’’ຕິ. –

ປຐມໍ ຄາຖໍ ອຠາສິ.

ຕສ຺ສຕ຺ໂຖ – ພາລປຸຖຸຊ຺ຊນສ຺ສ ປິຍາຍິຕພ຺ພສຠາວຕາຍ ປິຍຣູເປ ມນຸຎ຺ຎສຠາວຕາຍ ມໂນຣເມ ຣູປາທິເກ ປຎ຺ຈ ກາມຄຸເຓ ກາມໂກຏ຺ຐາເສ ຫິຕ຺ວາ ປຫາຍ ປຣິຈ຺ຈຊິຕ຺ວາ ກມ຺ມຜລສທ຺ຘາຍ ຣຕນຕ຺ຕຍສທ຺ຘາຍ ຈ ວເສນ ຆຣາ ຆຣພນ຺ຘນໂຕ ນິກ຺ຂມ຺ມ ນິກ຺ຂມິຕ຺ວາ ປພ຺ພຊ຺ຊໍ ອຸປຄໂຕ ວິຎ຺ຎຸຊາຕິໂກ ປພ຺ພຊິຕກາລໂຕ ປຏ຺ຐາຍ ຆເຏນ຺ໂຕ ວາຍມນ຺ໂຕ ວຏ຺ຏທຸກ຺ຂສ຺ສ ອນ຺ຕກໂຣ ຠເວ ຠເວຍ຺ຍາຕິ. ເອວໍ ເຕ ຠິກ຺ຂູ ໂອວທິຕ຺ວາ ‘‘ອຍໍ ປເຣ ເອວ ສຎ຺ຎາເປນ຺ໂຕ ວິຫຣຕິ, ‘‘ສຍໍ ປນ ອກາຣໂກ’ຕິ ມາ ຈິນ຺ຕຍິຕ຺ຖາ’’ຕິ ເຕສໍ ອຕ຺ຕໂນ ປຏິປນ຺ນຠາວໍ ປກາເສນ຺ໂຕ –

໑໙໖. ‘‘ນາຠິນນ຺ທາມິ ມຣຓໍ, ນາຠິນນ຺ທາມິ ຊີວິຕໍ;

ກາລຎ຺ຈ ປຏິກງ຺ຂາມິ, ສມ຺ປຊາໂນ ປຕິສ຺ສໂຕ’’ຕິ. –

ທຸຕິຍຄາຖາຍ ອຎ຺ຎໍ ພ຺ຍາກາສິ. ຕຕ຺ຖ ນາຠິນນ຺ທາມິ ມຣຓນ຺ຕິ ມຣຓໍ ນ ອຠິກງ຺ຂາມິ. ນາຠິນນ຺ທາມິ ຊີວິຕນ຺ຕິ ອິທໍ ປນ ຕສ຺ສ ກາຣຓວຈນໍ, ຍສ຺ມາ ນາຠິນນ຺ທາມິ ຊີວິຕໍ, ຕສ຺ມາ ນາຠິນນ຺ທາມິ ມຣຓນ຺ຕິ. ໂຍ ຫິ ອາຍຕິໍ ຊາຕິຊຣາມຣຓາຍ ກິເລສາຠິສງ຺ຂາເຣ ອາຈິໂນຕິ ອຸປຈິໂນຕິ, ໂສ ປຸນພ຺ຠວາຠິນິພ຺ພຕ຺ຕິໍ ອຠິນນ຺ທນ຺ໂຕ ນານ຺ຕຣິຍກຕາຍ ອຕ຺ຕໂນ ມຣຓມ຺ປິ ອຠິນນ຺ທຕິ ນາມ ກາຣຓສ຺ສ ອປ຺ປຫີນຕ຺ຕາ, ຂີຓາສໂວ ປນ ສພ຺ພໂສ ອາຈຍຄາມິຘມ຺ເມ ປຫາຍ ອປຈຍຄາມິຘມ຺ເມ ປຕິຏ຺ຐິໂຕ ປຣິຎ຺ຎາຕວຕ຺ຖຸໂກ ສພ຺ພໂສ ຊີວິຕໍ ອນຠິນນ຺ທນ຺ໂຕ ມຣຓມ຺ປິ ອນຠິນນ຺ທຕິ ນາມ ກາຣຓສ຺ສ ເອວ ສຸປ຺ປຫີນຕ຺ຕາ. ເຕນາຫ – ‘‘ນາຠິນນ຺ທາມິ ມຣຓໍ, ນາຠິນນ຺ທາມິ ຊີວິຕ’’ນ຺ຕິ. ຍທິ ເອວໍ ຂີຓາສວສ຺ສ ປຣິນິພ຺ພານາຠິກງ຺ຂາ, ຍາວ ປຣິນິພ຺ພານາ ອວຏ຺ຐານຎ຺ຈ ກຖນ຺ຕິ ອາຫ ‘‘ກາລຎ຺ຈ ປຏິກງ຺ຂາມິ, ສມ຺ປຊາໂນ ປຕິສ຺ສໂຕ’’ຕິ, ກິເລສປຣິນິພ຺ພາເນ ສິທ຺ເຘ ສຕິປຎ຺ຎາເວປຸລ຺ລປ຺ປຕ຺ຕິຍາ ສໂຕ ສມ຺ປຊາໂນ ເກວລໍ ຂນ຺ຘປຣິນິພ຺ພານກາລໍ ປຏິກງ຺ຂາມິ, ຕໍ ອຸທິກ຺ຂມາໂນ ອາຄມຍມາໂນ ວິຫຣາມິ, ນ ປນ ເມ ມຣເຓ ຊີວິເຕ ວາ ອຠິນນ຺ທນາ ອຕ຺ຖິ ອຣຫຕ຺ຕມຄ຺ເຄເນວ ຕສ຺ສ ສມຸຄ຺ຆາຏິຕຕ຺ຕາຕິ.

ນິສຠຕ຺ເຖຣຄາຖາວຓ຺ຓນາ ນິຏ຺ຐິຕາ.