໔. ອິສິທິນ຺ນຕ຺ເຖຣຄາຖາວຓ຺ຓນາ

ທິຏ຺ຐາ ມຍາຕິ ອາຍສ຺ມໂຕ ອິສິທິນ຺ນຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ປຸຎ຺ຎານິ ກໂຣນ຺ໂຕ ວິປສ຺ສິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ພີຊນິໍ ຄເຫຕ຺ວາ ໂພຘິຍາ ປູຊໍ ອກາສິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ສຸນາປຣນ຺ຕຊນປເທ ເສຏ຺ຐິກຸເລ ນິພ຺ພຕ຺ຕິຕ຺ວາ ອິສິທິນ຺ໂນຕິ ລທ຺ຘນາໂມ ວຍປ຺ປຕ຺ໂຕ ສຕ຺ຖຸ ຈນ຺ທນມາຬປຏິຄ຺ຄຫເຓ ປາຏິຫາຣິຍໍ ທິສ຺ວາ ປສນ຺ນມານໂສ ສຕ຺ຖາຣໍ ອຸປສງ຺ກມິຕ຺ວາ ຘມ຺ມໍ ສຸຕ຺ວາ ໂສຕາປນ຺ໂນ ຫຸຕ຺ວາ ອຄາຣໍ ອຊ຺ຌາວສຕິ. ຕສ຺ສ ຫິຕານຸກມ຺ປິນີ ເທວຕາ ຕໍ ໂຈເທນ຺ຕີ –

໑໘໗. ‘‘ທິຏ຺ຐາ ມຍາ ຘມ຺ມຘຣາ ອຸປາສກາ, ກາມາ ອນິຈ຺ຈາ ອິຕິ ຠາສມານາ;

ສາຣຕ຺ຕຣຕ຺ຕາ ມຓິກຸຓ຺ຑເລສຸ, ປຸຕ຺ເຕສຸ ທາເຣສຸ ຈ ເຕ ອເປກ຺ຂາ.

໑໘໘. ‘‘ອທ຺ຘາ ນ ຊານນ຺ຕິ ຍໂຕຘ ຘມ຺ມໍ, ກາມາ ອນິຈ຺ຈາ ອິຕິ ຈາປິ ອາຫຸ;

ຣາຄຎ຺ຈ ເຕສໍ ນ ພລຕ຺ຖິ ເຉຕ຺ຕຸໍ, ຕສ຺ມາ ສິຕາ ປຸຕ຺ຕທາຣໍ ຘນຎ຺ຈາ’’ຕິ. –

ຄາຖາທ຺ວຍມຠາສິ.

ຕຕ຺ຖ ທິຏ຺ຐາ ມຍາ ຘມ຺ມຘຣາ ອຸປາສກາ, ກາມາ ອນິຈ຺ຈາ ອິຕິ ຠາສມານາຕິ ອິເຘກຈ຺ເຈ ປຣິຍຕ຺ຕິຘມ຺ມຘຣາ ອຸປາສກາ ມຍາ ທິຏ຺ຐາ, ປຣິຍຕ຺ຕິຘມ຺ມຘຣຕ຺ຕາ ເອວ ‘‘ກາມາ ນາເມເຕ ອນິຈ຺ຈາ ທຸກ຺ຂາ ວິປຣິຓາມຘມ຺ມາ’’ຕິ ກາເມສຸ ອາທີນວປຏິສໍຍຸຕ຺ຕໍ ຘມ຺ມໍ ຠາສມານາ, ສຍໍ ປນ ສາຣຕ຺ຕຣຕ຺ຕາ ມຓິກຸຓ຺ຑເລສຸ, ປຸຕ຺ເຕສຸ ທາເຣສຸ ຈ ເຕ ອເປກ຺ຂາຕິ ສາຣຕ຺ຕາ ຫຸຕ຺ວາ ພຫລຣາຄຣຕ຺ຕາ ມຓີສຸ ກຸຓ຺ຑເລສຸ ຈ, ມຓິຈິເຕສຸ ວາ ກຸຓ຺ຑເລສຸ, ປຸຕ຺ເຕສຸ ປຸຕ຺ຕຘີຕາສຸ ທາເຣສຸ ຈ ອຘິຄຕສ຺ເນຫາ, ອຎ຺ຎໍ ຠຓນ຺ຕາ ອຎ຺ຎໍ ກໂຣນ຺ຕາ ທິຏ຺ຐາ ມຍາຕິ ອຕ຺ໂຖ.

ຍໂຕຕິ ຍສ຺ມາ ເຕ ອຸປາສກາ ສາຣຕ຺ຕຣຕ຺ຕາ ມຓິກຸຓ຺ຑເລສຸ ປຸຕ຺ເຕສຸ ທາເຣສຸ ຈ ອເປກ຺ຂວນ຺ໂຕ, ຕສ຺ມາ ອິຘ ອິມສ຺ມິໍ ພຸທ຺ຘສາສເນ ຘມ຺ມໍ ຍາຖາວໂຕ ອທ຺ຘາ ເອກໍເສນ ນ ຊານນ຺ຕິ. ເອວໍ ຠູຕາ ຈ ‘‘ກາມາ ອນິຈ຺ຈາ’’ອິຕິ ຈາປິ ອາຫຸ ອໂຫສິ, ສຕ຺ຕປກຕິ ວິຈິຕ຺ຕສຠາວາຕິ ອຘິປ຺ປາໂຍ. ຣາຄຎ຺ຈ ເຕສໍ ນ ພລຕ຺ຖິ ເຉຕ຺ຕຸນ຺ຕິ ເຕສໍ ອຸປາສການໍ ຍສ຺ມາ ຣາຄໍ ເຉຕ຺ຕຸໍ ສມຸຈ຺ຉິນ຺ທິຕຸໍ ຕາທິສໍ ຎາຓພລໍ ນຕ຺ຖິ, ຕສ຺ມາ ເຕນ ກາຣເຓນ ສິຕາ ຕຓ຺ຫາວເສນ ນິສ຺ສິຕາ ປຸຕ຺ຕທາຣໍ ຘນຎ຺ຈ ອລ຺ລີນາ ນ ວິສ຺ສຊ຺ເຊນ຺ຕີຕິ ສພ຺ພເມຕໍ ເທວຕາ ຕໍເຍວ ອຸປາສກໍ ອຸທ຺ທິສ຺ສ ອຎ຺ຎາປເທເສນ ກເຖສິ. ຕໍ ສຸຕ຺ວາ ອຸປາສໂກ ສໍເວຄຊາໂຕ ປພ຺ພຊິຕ຺ວາ ນຈິຣສ຺ເສວ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໒.໔໘.໔໖-໕໐) –

‘‘ວິປສ຺ສິໂນ ຠຄວໂຕ, ໂພຘິຍາ ປາທປຸຕ຺ຕເມ;

ສຸມໂນ ພີຊນິໍ ຄຍ຺ຫ, ອພີຊິໍ ໂພຘິມຸຕ຺ຕມໍ.

‘‘ເອກນວຸຕິໂຕ ກປ຺ເປ, ອພີຊິໍ ໂພຘິມຸຕ຺ຕມໍ;

ທຸຄ຺ຄຕິໍ ນາຠິຊານາມິ, ພີຊນາຍ ອິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ອຎ຺ຎໍ ພ຺ຍາກໂຣນ຺ໂຕ ອິມາ ເອວ ຄາຖາ ອຠາສີຕິ.

ອິສິທິນ຺ນຕ຺ເຖຣຄາຖາວຓ຺ຓນາ ນິຏ຺ຐິຕາ.