໘. ຠຣຕຕ຺ເຖຣຄາຖາວຓ຺ຓນາ

ເອຫິ, ນນ຺ທກ, ຄຈ຺ຉາມາຕິ ອາຍສ຺ມໂຕ ຠຣຕຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍໍ ກິຣ ອໂນມທສ຺ສິສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ເອກທິວສໍ ມນຸຎ຺ຎທສ຺ສນໍ ມຸທຸສຸຂສມ຺ຜສ຺ສໍ ອຸປາຫນທ຺ວຍໍ ຄເຫຕ຺ວາ ຄຈ຺ຉນ຺ໂຕ ສຕ຺ຖາຣໍ ຈງ຺ກມນ຺ຕໍ ທິສ຺ວາ ປສນ຺ນມານໂສ ອຸປາຫນາ ອຸປນາເມຕ຺ວາ, ‘‘ອຠິຣຸຫຕຸ ຠຄວາ ອຸປາຫນາ, ຍໍ ມມ ອສ຺ສ ທີຆຣຕ຺ຕໍ ຫິຕາຍ ສຸຂາຍາ’’ຕິ ອາຫ. ອຠິຣຸຫິ ຠຄວາ ຕສ຺ສ ອນຸຄ຺ຄຓ຺ຫນຕ຺ຖໍ ອຸປາຫນາ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ຈມ຺ປານຄເຣ ຄຫປຕິກຸເລ ນິພ຺ພຕ຺ຕິ, ຠຣໂຕຕິສ຺ສ ນາມໍ ອໂຫສິ. ໂສ ວິຎ຺ຎຸຕໍ ປຕ຺ໂຕ ໂສຓຕ຺ເຖຣສ຺ສ ປພ຺ພຊິຕຠາວໍ ສຸຕ຺ວາ ‘‘ໂສປິ ນາມ ປພ຺ພຊີ’’ຕິ ສຎ຺ຊາຕສໍເວໂຄ ປພ຺ພຊິຕ຺ວາ ກຕປຸພ຺ພກິຈ຺ໂຈ ວິປສ຺ສນາຍ ກມ຺ມໍ ກໂຣນ຺ໂຕ ນຈິຣສ຺ເສວ ຉຬຠິຎ຺ໂຎ ອໂຫສິ. ເຕນ ວຸຕ຺ຕໍ ອປທາເນ (ອປ. ເຖຣ ໒.໔໘.໗໑-໘໙) –

‘‘ອໂນມທສ຺ສີ ຠຄວາ, ໂລກເຊຏ຺ໂຐ ນຣາສໂຠ;

ທິວາວິຫາຣາ ນິກ຺ຂມ຺ມ, ປຖມາຣຸຫິ ຈກ຺ຂຸມາ.

‘‘ປານຘິໍ ສຸກຕໍ ຄຍ຺ຫ, ອທ຺ຘານໍ ປຏິປຊ຺ຊຫໍ;

ຕຕ຺ຖທ຺ທສາສິໍ ສມ຺ພຸທ຺ຘໍ, ປຕ຺ຕິກໍ ຈາຣຸທສ຺ສນໍ.

‘‘ສກໍ ຈິຕ຺ຕໍ ປສາເທຕ຺ວາ, ນີຫຣິຕ຺ວານ ປານຘິໍ;

ປາທມູເລ ຐເປຕ຺ວານ, ອິທໍ ວຈນມພ຺ຣວິໍ.

‘‘ອຠິຣູຫ ມຫາວີຣ, ສຸຄຕິນ຺ທ ວິນາຍກ;

ອິໂຕ ຜລໍ ລຠິສ຺ສາມິ, ໂສ ເມ ອຕ຺ໂຖ ສມິຊ຺ຌຕຸ.

‘‘ອໂນມທສ຺ສີ ຠຄວາ, ໂລກເຊຏ຺ໂຐ ນຣາສໂຠ;

ປານຘິໍ ອຠິຣູຫິຕ຺ວາ, ອິທໍ ວຈນມພ຺ຣວິ.

‘‘ໂຍ ປານຘິໍ ເມ ອທາສິ, ປສນ຺ໂນ ເສຫິ ປາຓິຠິ;

ຕມຫໍ ກິຕ຺ຕຍິສ຺ສາມິ, ສຸຓາຖ ມມ ຠາສໂຕ.

‘‘ພຸທ຺ຘສ຺ສ ຄິຣມຎ຺ຎາຍ, ສພ຺ເພ ເທວາ ສມາຄຕາ;

ອຸທຄ຺ຄຈິຕ຺ຕາ ສຸມນາ, ເວທຊາຕາ ກຕຎ຺ຊລີ.

‘‘ປານຘີນໍ ປທາເນນ, ສຸຂິໂຕຍໍ ຠວິສ຺ສຕິ;

ປຎ຺ຈປຎ຺ຎາສກ຺ຂຕ຺ຕຸຎ຺ຈ, ເທວຣຊ຺ຊໍ ກຣິສ຺ສຕິ.

‘‘ສຫສ຺ສກ຺ຂຕ຺ຕຸໍ ຣາຊາ ຈ, ຈກ຺ກວຕ຺ຕີ ຠວິສ຺ສຕິ;

ປເທສຣຊ຺ຊໍ ວິປຸລໍ, ຄຓນາໂຕ ອສງ຺ຂິຍໍ.

‘‘ອປຣິເມຍ຺ເຍ ອິໂຕ ກປ຺ເປ, ໂອກ຺ກາກກຸລສມ຺ຠໂວ;

ໂຄຕໂມ ນາມ ໂຄຕ຺ເຕນ, ສຕ຺ຖາ ໂລເກ ຠວິສ຺ສຕິ.

‘‘ຕສ຺ສ ຘມ຺ເມສຸ ທາຍາໂທ, ໂອຣໂສ ຘມ຺ມນິມ຺ມິໂຕ;

ສພ຺ພາສເວ ປຣິຎ຺ຎາຍ, ນິພ຺ພາຍິສ຺ສຕິນາສໂວ.

‘‘ເທວໂລເກ ມນຸສ຺ເສ ວາ, ນິພ຺ພຕ຺ຕິສ຺ສຕິ ປຸຎ຺ຎວາ;

ເທວຍານປຏິຠາຄໍ, ຍານໍ ປຏິລຠິສ຺ສຕິ.

‘‘ປາສາທາ ສິວິກາ ວຍ຺ຫໍ, ຫຕ຺ຖິໂນ ສມລງ຺ກຕາ;

ຣຖາ ວາຊຎ຺ຎສໍຍຸຕ຺ຕາ, ສທາ ປາຕຸຠວນ຺ຕິ ເມ.

‘‘ອຄາຣາ ນິກ຺ຂມນ຺ໂຕປິ, ຣເຖນ ນິກ຺ຂມິໍ ອຫໍ;

ເກເສສຸ ຉິຊ຺ຊມາເນສຸ, ອຣຫຕ຺ຕມປາປຸຓິໍ.

‘‘ລາຠາ ມຍ຺ຫໍ ສຸລທ຺ຘໍ ເມ, ວາຓິຊ຺ຊໍ ສຸປ຺ປໂຍຊິຕໍ;

ທຕ຺ວານ ປານຘິໍ ເອກໍ, ປຕ຺ໂຕມ຺ຫິ ອຈລໍ ປທໍ.

‘‘ອປຣິເມຍ຺ເຍ ອິໂຕ ກປ຺ເປ, ຍໍ ປານຘິມທາສຫໍ;

ທຸຄ຺ຄຕິໍ ນາຠິຊານາມິ, ປານຘິສ຺ສ ອິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ຉຬຠິຎ຺ໂຎ ປນ ຫຸຕ຺ວາ ອຕ຺ຕໂນ ກນິຏ຺ຐຠາຕິເກນ ນນ຺ທກຕ຺ເຖເຣນ ເຫຏ຺ຐາ ວຸຕ຺ຕນເຍນ ອຎ຺ຎາພ຺ຍາກຣເຓ ກເຕ ‘‘ອິທານິ ນນ຺ທໂກປິ ອຣຫາ ຊາໂຕ, ຫນ຺ທ ມຍໍ ອຸໂຠປິ ສຕ຺ຖຸ ສນ຺ຕິກໍ ຄນ຺ຕ຺ວາ ວຸສິຕພ຺ຣຫ຺ມຈຣິຍຕໍ ນິເວເທສ຺ສາມາຕິ ອຸປ຺ປນ຺ນໍ ປຣິວິຕກ຺ກໍ ນນ຺ທກຕ຺ເຖຣສ຺ສ ກເຖນ຺ໂຕ –

໑໗໕. ‘‘ເອຫິ ນນ຺ທກ ຄຈ຺ຉາມ, ອຸປຊ຺ຌາຍສ຺ສ ສນ຺ຕິກໍ;

ສີຫນາທໍ ນທິສ຺ສາມ, ພຸທ຺ຘເສຏ຺ຐສ຺ສ ສມ຺ມຸຂາ.

໑໗໖. ‘‘ຍາຍ ໂນ ອນຸກມ຺ປາຍ, ອມ຺ເຫ ປພ຺ພາຊຍີ ມຸນິ;

ໂສ ໂນ ອຕ຺ໂຖ ອນຸປ຺ປຕ຺ໂຕ, ສພ຺ພສໍໂຍຊນກ຺ຂໂຍ’’ຕິ. – ຄາຖາທ຺ວຍໍ ອຠາສິ;

ຕຕ຺ຖ ນນ຺ທກາຕິ ອາລປນໍ. ເອຫີຕິ ຕສ຺ສ ອຕ຺ຕໂນ ສນ຺ຕິກກຣຓໍ. ຄຈ຺ຉາມາຕິ ເຕນ ອຕ຺ຕນາ ຈ ເອກຊ຺ຌໍ ກາຕພ຺ພກິຣິຍາວຈນໍ, ອຸປຊ຺ຌາຍສ຺ສາຕິ ສມ຺ມາສມ຺ພຸທ຺ຘສ຺ສ, ສມ຺ມາສມ຺ພຸທ຺ໂຘ ຫິ ສມນ຺ຕຈກ຺ຂຸນາ ພຸທ຺ຘຈກ຺ຂຸນາ ຈ ສຕ຺ຕານໍ ອາສຍານຸສຍຈຣິຕາທີນໍ ຍຖາຠູຕວິໂລກເນນ ສເທວກສ຺ສ ໂລກສ຺ສ ວຊ຺ຊາວຊ຺ຊໍ ອຸປນິຊ຺ຌາຍຕີຕິ ວິເສສໂຕ ອຸປຊ຺ຌາໂຍຕິ ວຕ຺ຕພ຺ພຕໍ ອຣຫຕິ. ຍທຕ຺ຖໍ ຄມນໍ, ຕໍ ທສ຺ເສຕຸໍ ‘‘ສີຫນາທໍ ນທິສ຺ສາມ, ພຸທ຺ຘເສຏ຺ຐສ຺ສ ສມ຺ມຸຂາ’’ຕິ ອາຫ. ຍຖາຠຸຈ຺ຈຄຸຓາຠິພ຺ຍາຫາຣຕາຍ ອຠີຕນາທຠາວໂຕ ສີຫນາທໍ ພຸທ຺ຘສ຺ສ ສມ຺ມາສມ຺ພຸທ຺ຘສ຺ສ ຕໂຕ ເອວ ສພ຺ພສຕ຺ຕຸຕ຺ຕມຕາຍ ເສຏ຺ຐສ຺ສ, ພຸທ຺ຘານໍ ວາ ສາວກພຸທ຺ຘາທີນໍ ເສຏ຺ຐສ຺ສ ສມ຺ມຸຂາ ປຸຣໂຕ ນທິສ຺ສາມາຕິ ອຕ຺ໂຖ.

ຍຖາ ປນ ສີຫນາທໍ ນທິຕຸກາໂມ, ຕໍ ທສ຺ເສນ຺ໂຕ ‘‘ຍາຍາ’’ຕິ ຄາຖມາຫ. ຕຕ຺ຖ ຍາຍາຕິ ຍທຕ຺ຖໍ, ຍາຍ ຍທຕ຺ຖານຸປ຺ປຕ຺ຕິຍາຕິ ອຕ຺ໂຖ. ໂນຕິ ອມ຺ຫາກໍ. ອນຸກມ຺ປາຍາຕິ ອນຸຄ຺ຄຓ຺ຫເນນ ອມ຺ເຫ ທ຺ເວປິ ປພ຺ພາຊຍິ ປພ຺ພາເຊສິ. ມຸນີຕິ ຠຄວາ. ໂສ ໂນ ອຕ຺ໂຖ ອນຸປ຺ປຕ຺ໂຕຕິ ໂສ ອຕ຺ໂຖ ສພ຺ເພສໍ ສໍໂຍຊນານໍ ຂຍຠູຕໍ ອຣຫຕ຺ຕຜລໍ ໂນ ອມ຺ເຫຫິ ອນຸປ຺ປຕ຺ໂຕ, ອຘິຄໂຕຕິ ອຕ຺ໂຖ.

ຠຣຕຕ຺ເຖຣຄາຖາວຓ຺ຓນາ ນິຏ຺ຐິຕາ.