໗. ນນ຺ທກຕ຺ເຖຣຄາຖາວຓ຺ຓນາ

ຍຖາປິ ຠທ຺ໂທ ອາຊຎ຺ໂຎຕິ ອາຍສ຺ມໂຕ ນນ຺ທກຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ປຸຎ຺ຎານິ ກໂຣນ຺ໂຕ ສິຂິສ຺ສ ຠຄວໂຕ ກາເລ ປຈ຺ຈນ຺ຕເທເສ ອຸປ຺ປຊ຺ຊິຕ຺ວາ ວິຎ຺ຎຸຕໍ ປຕ຺ໂຕ ວນຈາຣິໂກ ຫຸຕ຺ວາ ວິຈຣນ຺ໂຕ ເອກທິວສໍ ສຕ຺ຖຸ ຈງ຺ກມນຏ຺ຐານໍ ທິສ຺ວາ ປສນ຺ນຈິຕ຺ໂຕ ວາລຸກາ ໂອກິຣິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ຈມ຺ປາຍໍ ຄຫປຕິກຸເລ ນິພ຺ພຕ຺ຕິ, ຕສ຺ສ ນນ຺ທໂກຕິ ນາມໍ ອກໍສຸ. ເຊຏ຺ຐກຠາຕາ ປນສ຺ສ ຠຣໂຕ ນາມ. ຕສ຺ສ ປຸພ຺ພໂຍໂຄ ອນນ຺ຕຣວຕ຺ຖຸສ຺ມິໍ ອາວິຠວິສ຺ສຕິ. ເຕ ອຸໂຠປິ ວິຎ຺ຎຸຕໍ ປຕ຺ວາ ອາຍສ຺ມນ຺ຕໍ ໂສຓໍ ໂກຬິວິສໍ ປພ຺ພຊິຕໍ ສຸຕ຺ວາ ‘‘ໂສໂຓປິ ນາມ ຕຖາສຸຂຸມາໂລ ປພ຺ພຊິ, ກິມງ຺ຄໍ ປນ ມຍ’’ນ຺ຕິ ປພ຺ພຊິໍສຸ. ເຕສຸ ຠຣໂຕ ນຈິຣສ຺ເສວ ວິປສ຺ສນໍ ວຑ຺ເຒຕ຺ວາ ຉຬຠິຎ຺ໂຎ ອໂຫສິ. ນນ຺ທໂກ ປນ ກິເລສານໍ ພລວຠາເວນ ຕາວ ວິປສ຺ສນໍ ອຸສ຺ສຸກ຺ກາເປຕຸໍ ນາສກ຺ຂິ, ວິປສ຺ສນາຍ ກມ຺ມໍ ກໂຣຕິ ເອວ. ອຖສ຺ສ ຠຣຕຕ຺ເຖໂຣ ອາສຍໍ ຎຕ຺ວາ ອວສ຺ສໂຍ ຠວິຕຸກາໂມ ຕໍ ປຈ຺ຉາສມຓໍ ກຕ຺ວາ ວິຫາຣໂຕ ນິກ຺ຂມິຕ຺ວາ ມຄ຺ຄສມີເປ ນິສິນ຺ໂນ ວິປສ຺ສນາກຖໍ ກເຖສິ.

ເຕນ ຈ ສມເຍນ ສກຏສຕ຺ເຖ ຄຈ຺ຉນ຺ເຕ ເອໂກ ສກເຏ ຍຸຕ຺ໂຕ ໂຄໂຓ ຈິກ຺ຂລ຺ລຏ຺ຐາເນ ສກຏໍ ອຸທ຺ຘຣິຕຸໍ ອສກ຺ໂກນ຺ໂຕ ປຣິປຕິ. ຕໂຕ ນໍ ສຕ຺ຖວາໂຫ ສກຏາ ໂມເຈຕ຺ວາ ຕິຓຎ຺ຈ ປານີຍຎ຺ຈ ທຕ຺ວາ ປຣິສ຺ສມໍ ອປເນຕ຺ວາ ປຸນ ຘຸເຣ ໂຍເຊສິ. ຕໂຕ ໂຄໂຓ ວູປສນ຺ຕປຣິສ຺ສໂມ ລທ຺ຘພໂລ ຕໍ ສກຏໍ ຈິກ຺ຂລ຺ລຏ຺ຐານໂຕ ອຸທ຺ຘຣິຕ຺ວາ ຖເລ ປຕິຏ຺ຐາເປສິ. ອຖ ຠຣຕຕ຺ເຖໂຣ ນນ຺ທກສ຺ສ ‘‘ປສ຺ສສິ ໂນ ຕ຺ວໍ, ອາວຸໂສ ນນ຺ທກ, ອິມສ຺ສ ກມ຺ມ’’ນ຺ຕິ ຕໍ ນິທສ຺ເສຕ຺ວາ ເຕນ ‘‘ປສ຺ສາມີ’’ຕິ ວຸຕ຺ເຕ ‘‘ອິມມຕ຺ຖໍ ສຸຏ຺ຐຸ ອຸປຘາເຣຫີ’’ຕິ ອາຫ. ອິຕໂຣ ‘‘ຍຖາຍໍ ໂຄໂຓ ວູປສນ຺ຕປຣິສ຺ສໂມ ປງ຺ກຏ຺ຐານໂຕ ຠາຣໍ ອຸພ຺ພຫຕິ, ເອວໍ ມຍາປິ ສໍສາຣປງ຺ກໂຕ ອຕ຺ຕາ ອຸທ຺ຘຣິຕພ຺ໂພ’’ຕິ ຕເມວາຣມ຺ມຓໍ ກຕ຺ວາ ວິປສ຺ສນາຍ ກມ຺ມໍ ກໂຣນ຺ໂຕ ນຈິຣສ຺ເສວ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໒.໔໘.໙໐-໙໕) –

‘‘ມິຄລຸທ຺ໂທ ປຸເຣ ອາສິໍ, ອຣຎ຺ເຎ ການເນ ອຫໍ;

ວາຕມິຄໍ ຄເວສນ຺ໂຕ, ຈງ຺ກມໍ ອທ຺ທສໍ ອຫໍ.

‘‘ອຸຈ຺ຉງ຺ເຄນ ປຸລິນໍ ຄຍ຺ຫ, ຈງ຺ກເມ ໂອກິຣິໍ ອຫໍ;

ປສນ຺ນຈິຕ຺ໂຕ ສຸມໂນ, ສຸຄຕສ຺ສ ສິຣີມໂຕ.

‘‘ເອກຕິໍເສ ອິໂຕ ກປ຺ເປ, ປຸລິນໍ ໂອກິຣິໍ ອຫໍ;

ທຸຄ຺ຄຕິໍ ນາຠິຊານາມິ, ປຸລິນສ຺ສ ອິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ອຕ຺ຕໂນ ເຊຏ຺ຐຠາຕິກສ຺ສ ຠຣຕຕ຺ເຖຣສ຺ສ ສນ຺ຕິເກ ອຎ຺ຎໍ ພ຺ຍາກໂຣນ຺ໂຕ –

໑໗໓. ‘‘ຍຖາປິ ຠທ຺ໂທ ອາຊຎ຺ໂຎ, ຂລິຕ຺ວາ ປຕິຕິຏ຺ຐຕິ;

ຠິຍ຺ໂຍ ລທ຺ຘານ ສໍເວຄໍ, ອທີໂນ ວຫເຕ ຘຸຣໍ.

໑໗໔. ‘‘ເອວໍ ທສ຺ສນສມ຺ປນ຺ນໍ, ສມ຺ມາສມ຺ພຸທ຺ຘສາວກໍ;

ອາຊານີຍໍ ມໍ ຘາເຣຖ, ປຸຕ຺ຕໍ ພຸທ຺ຘສ຺ສ ໂອຣສ’’ນ຺ຕິ. – ຄາຖາທ຺ວຍໍ ອຠາສິ;

ຕຕ຺ຖ ຠິຍ຺ໂຍ ລທ຺ຘານ ສໍເວຄໍ, ອທີໂນ ວຫເຕ ຘຸຣນ຺ຕິ ‘‘ມຍ຺ຫໍ ຊາຕິພລວີຣິຍານໍ ອນນຸຈ຺ຉວິກເມຕໍ ຍທິທໍ ອາຄຕສ຺ສ ຠາຣສ຺ສ ອວຫນ’’ນ຺ຕິ ສໍເວຄໍ ລຠິຕ຺ວາ ອທີໂນ ອທີນມານໂສ ອລີນຈິຕ຺ໂຕ. ‘‘ອລີໂນ’’ຕິ ວາ ປາໂຐ, ໂສ ເອວ ອຕ຺ໂຖ. ຠິຍ຺ໂຍ ປຸນປ຺ປຸນໍ ຠິຍ຺ໂຍໂສມຕ຺ຕາຍ ອຕ຺ຕໂນ ຘຸຣໍ ຠາຣໍ ວຫເຕ ອຸພ຺ພຫຕິ. ເສສໍ ເຫຏ຺ຐາ ຣມຓີຍວິຫາຣິຕ຺ເຖຣສ຺ສ ຄາຖາວຓ຺ຓນາຍໍ ວຸຕ຺ຕນຍເມວ.

ນນ຺ທກຕ຺ເຖຣຄາຖາວຓ຺ຓນາ ນິຏ຺ຐິຕາ.