໖. ປຸຓ຺ຓມາສຕ຺ເຖຣຄາຖາວຓ຺ຓນາ

ປຎ຺ຈ ນີວຣເຓ ຫິຕ຺ວາຕິອາທິກາ ອາຍສ຺ມໂຕ ປຸຓ຺ຓມາສຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ປຸຎ຺ຎານິ ອຸປຈິນນ຺ໂຕ ຕິສ຺ສສ຺ສ ຠຄວໂຕ ກາເລ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ເອກທິວສໍ ສຕ຺ຖຣິ ອຣຎ຺ເຎ ວິຫຣນ຺ເຕ ປໍສຸກູລຈີວຣໍ ທຸມສາຂາຍ ລຄ຺ເຄຕ຺ວາ ຄນ຺ຘກຸຏິໍ ປວິຏ຺ເຐ ຘນຸຫຕ຺ໂຖ ຄຫນໍ ປວິຏ຺ໂຐ ສຕ຺ຖຸ ປໍສຸກູລໍ ທິສ຺ວາ ປສນ຺ນມານໂສ ຘນຸໍ ນິກ຺ຂິປິຕ຺ວາ ພຸທ຺ຘຄຸເຓ ອນຸສ຺ສຣິຕ຺ວາ ປໍສຸກູລໍ ວນ຺ທິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ກຸຏຸມ຺ພິຍກຸເລ ນິພ຺ພຕ຺ຕິ. ຕສ຺ສ ກິຣ ຊາຕທິວເສ ຕສ຺ມິໍ ເຄເຫ ສພ຺ພຠາຊນານິ ສຸວຓ຺ຓຣຕນມເຍຫິ ມາເສຫິ ປຣິປຸຓ຺ຓາເນວ ອເຫສຸໍ. ເຕນສ຺ສ ປຸຓ຺ຓມາໂສຕ຺ເວວ ນາມໍ ອກໍສຸ. ໂສ ວຍປ຺ປຕ຺ໂຕ ທາຣປຣິຄ຺ຄຫໍ ກຕ຺ວາ ເອກສ຺ມິໍ ປຸຕ຺ເຕ ອຸປ຺ປນ຺ເນ ຆຣາວາສໍ ປຫາຍ ປພ຺ພຊິຕ຺ວາ ຄາມກາວາເສ ວສນ຺ໂຕ ຆເຏນ຺ໂຕ ວາຍມນ຺ໂຕ ຉຬຠິຎ຺ໂຎ ອໂຫສິ. ເຕນ ວຸຕ຺ຕໍ ອປທາເນ (ອປ. ເຖຣ ໒.໔໙.໑-໘) –

‘‘ຕິສ຺ໂສ ນາມາສິ ຠຄວາ, ສຍມ຺ຠູ ອຄ຺ຄປຸຄ຺ຄໂລ;

ປໍສຸກູລໍ ຐເປຕ຺ວານ, ວິຫາຣໍ ປາວິສີ ຊິໂນ.

‘‘ວິນຕໍ ຘນຸມາທາຍ, ຠກ຺ຂຕ຺ຖາຍ ຈຣິໍ ອຫໍ;

ມຓ຺ຑລຄ຺ຄໍ ຄເຫຕ຺ວານ, ການນໍ ປາວິສິໍ ອຫໍ.

‘‘ຕຕ຺ຖທ຺ທສໍ ປໍສຸກູລໍ, ທຸມຄ຺ເຄ ລຄ຺ຄິຕໍ ຕທາ;

ຈາປໍ ຕຕ຺ເຖວ ນິກ຺ຂິປ຺ປ, ສິເຣ ກຕ຺ວານ ອຎ຺ຊລິໍ.

‘‘ປສນ຺ນຈິຕ຺ໂຕ ສຸມໂນ, ວິປຸລາຍ ຈ ປີຕິຍາ;

ພຸທ຺ຘເສຏ຺ຐໍ ສຣິຕ຺ວານ, ປໍສຸກູລໍ ອວນ຺ທຫໍ.

‘‘ທ຺ເວນວຸເຕ ອິໂຕ ກປ຺ເປ, ປໍສຸກູລມວນ຺ທຫໍ;

ທຸຄ຺ຄຕິໍ ນາຠິຊານາມິ, ວນ຺ທນາຍ ອິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ຉຬຠິຎ຺ໂຎ ປນ ຫຸຕ຺ວາ ສາວຕ຺ຖິໍ ອຸປຄນ຺ຕ຺ວາ ສຕ຺ຖາຣໍ ວນ຺ທິຕ຺ວາ ສຸສາເນ ວສຕິ, ຕສ຺ສ ຈ ອຈິຣາຄຕສ຺ເສວ ສໂຕ ປຸຕ຺ໂຕ ກາລມກາສິ. ທາຣກມາຕາ ເຖຣສ຺ສ ອາຄຕຠາວໍ ສຸຕ຺ວາ, ‘‘ມາ ອິທໍ ອປຸຕ຺ຕກໍ ສາປເຕຍ຺ຍໍ ຣາຊາໂນ ຫເຣຍ຺ຍຸ’’ນ຺ຕິ ຕໍ ອຸປ຺ປພ຺ພາເຊຕຸກາມາ ມຫຕາ ປຣິວາເຣນ ເຖຣສ຺ສ ສນ຺ຕິກໍ ຄນ຺ຕ຺ວາ ປຏິສນ຺ຖາຣໍ ກຕ຺ວາ ປໂລເຠຕຸໍ ອາຣຠິ. ເຖໂຣ ອຕ຺ຕໂນ ວີຕຣາຄຠາວຊານາປນຕ຺ຖໍ ອາກາເສ ຐຕ຺ວາ ອຕ຺ຕໂນ ປຏິປຕ຺ຕິກິຕ຺ຕນມຸເຂນ ຕສ຺ສາ ຘມ຺ມໍ ເທເສນ຺ໂຕ –

໑໗໑. ‘‘ປຎ຺ຈ ນີວຣເຓ ຫິຕ຺ວາ, ໂຍຄກ຺ເຂມສ຺ສ ປຕ຺ຕິຍາ;

ຘມ຺ມາທາສໍ ຄເຫຕ຺ວານ, ຎາຓທສ຺ສນມຕ຺ຕໂນ.

໑໗໒. ‘‘ປຈ຺ຈເວກ຺ຂິໍ ອິມໍ ກາຍໍ, ສພ຺ພໍ ສນ຺ຕຣພາຫິຣໍ;

ອຊ຺ຌຕ຺ຕຎ຺ຈ ພຫິທ຺ຘາ ຈ, ຕຸຈ຺ໂຉ ກາໂຍ ອທິສ຺ສຖາ’’ຕິ. –

ຄາຖາທ຺ວຍໍ ອຠາສິ.

ຕຕ຺ຖ ປຎ຺ຈ ນີວຣເຓ ຫິຕ຺ວາຕິ ກາມຈ຺ຉນ຺ທາທິເກ ປຎ຺ຈ ນີວຣເຓ ປຫາຍ ຌານາຘິຄເມນ ວິທ຺ຘໍເສຕ຺ວາ. ໂຍຄກ຺ເຂມສ຺ສ ປຕ຺ຕິຍາຕິ ກາມໂຍຄາທີຫິ ຈຕູຫິ ໂຍເຄຫິ ເຂມສ຺ສ ອນຸປທ຺ທຸຕສ຺ສ ນິພ຺ພານສ຺ສ ອຘິຄມາຍ. ຘມ຺ມາທາສນ຺ຕິ ຘມ຺ມຠູຕໍ ອາທາສໍ. ຍຖາ ຫິ ອາທາໂສ ໂອໂລເກນ຺ຕສ຺ສ ຣູປກາເຍ ຄຸຓາຄຸຓໍ ອາທໍເສຕິ, ເອວໍ ວິປສ຺ສນາສງ຺ຂາໂຕ ຘມ຺ມານໍ ສາມຎ຺ຎວິເສສາວໂພຘນໂຕ ຎາຓທສ຺ສນຠູໂຕ ຘມ຺ມາທາໂສ ວິປສ຺ສນ຺ຕສ຺ສ ໂວທານສໍກິເລສຘມ຺ມວິຠາວເນນ ຕປ຺ປຫານສາຘເນນ ຈ ວິເສສໂຕ ນາມກາເຍ ຄຸຓໍ ອາທໍເສຕິ. ເຕນາຫ –

‘‘ຘມ຺ມາທາສໍ ຄເຫຕ຺ວານ, ຎາຓທສ຺ສນມຕ຺ຕໂນ;

ປຈ຺ຈເວກ຺ຂິໍ ອິມໍ ກາຍໍ, ສພ຺ພໍ ສນ຺ຕຣພາຫິຣ’’ນ຺ຕິ. –

ອິມໍ ກາຍໍ ຘມ຺ມສມູຫໍ ມມ ອຕ຺ຕຠາວໍ ອຊ຺ຌຕ຺ຕິກພາຫິຣາຍຕນຠາວໂຕ ສນ຺ຕຣພາຫິຣໍ ສພ຺ພໍ ອນວເສສໍ ຘມ຺ມາທາສໍ ຄເຫຕ຺ວາ ‘‘ອນິຈ຺ຈ’’ນ຺ຕິປິ ‘‘ທຸກ຺ຂ’’ນ຺ຕິປິ ‘‘ອນຕ຺ຕາ’’ຕິປິ ປຕິອເວກ຺ຂິໍ ຎາຓຈກ຺ຂຸນາ ປສ຺ສິໍ. ເອວໍ ປສ຺ສຕາ ຈ ມຍາ ອຊ຺ຌຕ຺ຕຎ຺ຈ ພຫິທ຺ຘາ ຈາຕິ ອຕ຺ຕໂນ ສນ຺ຕາເນ ປຣສນ຺ຕາເນ ຈ ຕຸຈ຺ໂຉ ກາໂຍ ອທິສ຺ສຖ ນິຈ຺ຈສາຣາທິວິຣຫິໂຕ ຕຸຈ຺ໂຉ ຂນ຺ຘປຎ຺ຈກສງ຺ຂາໂຕ ອຕ຺ຕຠາວກາໂຍ ຎາຓຈກ຺ຂຸນາ ຍາຖາວໂຕ ອປສ຺ສິຕ຺ຖ. ສກລມ຺ປິ ຫິ ຂນ຺ຘປຎ຺ຈກໍ ‘‘ອວິຊ຺ຊານິວຸຕສ຺ສ, ຠິກ຺ຂເວ, ພາລສ຺ສ ຕຓ຺ຫາສໍຍຸຕ຺ຕສ຺ສ ເອວມຍໍ ກາໂຍ ສມຸທາຄໂຕ’’ຕິອາທີສຸ (ສໍ. ນິ. ໒.໑໙) ‘‘ກາໂຍ’’ຕິ ວຸຈ຺ຈຕິ. ‘‘ອທິສ຺ສຖາ’’ຕິ ຈ ອິມິນາ ຍເທວ ກາເຍ ທຏ຺ຐພ຺ພໍ, ຕໍ ທິຏ຺ຐໍ, ນ ທານິສ຺ສ ກິຎ຺ຈິ ມຍາ ປສ຺ສິຕພ຺ພໍ ອຕ຺ຖີຕິ ກຕກິຈ຺ຈຕໍ ທສ຺ເສນ຺ໂຕ ອຎ຺ຎໍ ພ຺ຍາກາສິ. ເອວໍ ເຖໂຣ ອິມາຫິ ຄາຖາຫິ ປຸຣາຓທຸຕິຍິກາຍ ຘມ຺ມໍ ເທເສຕ຺ວາ ຕໍ ສຣເຓສຸ ຈ ສີເລສຸ ຈ ສມ຺ປຕິຏ຺ຐາເປຕ຺ວາ ອຸຍ຺ໂຍເຊສິ.

ປຸຓ຺ຓມາສຕ຺ເຖຣຄາຖາວຓ຺ຓນາ ນິຏ຺ຐິຕາ.