໕. ວີຕໂສກຕ຺ເຖຣຄາຖາວຓ຺ຓນາ

ເກເສ ເມ ໂອລິຂິສ຺ສນ຺ຕີຕິອາທິກາ ອາຍສ຺ມໂຕ ວີຕໂສກຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ປຸຎ຺ຎານິ ອຸປຈິນນ຺ໂຕ ສິທ຺ຘຕ຺ຖສ຺ສ ຠຄວໂຕ ກາເລ ພ຺ຣາຫ຺ມຓກຸເລ ນິພ຺ພຕ຺ຕິຕ຺ວາ ພ຺ຣາຫ຺ມຓານໍ ວິຊ຺ຊາສິປ຺ເປສຸ ນິປ຺ຜຕ຺ຕິໍ ຄໂຕ ກາເມ ປຫາຍ ອິສິປພ຺ພຊ຺ຊໍ ປພ຺ພຊິຕ຺ວາ ມຫຕາ ອິສິຄເຓນ ປຣິວຸໂຕ ອຣຎ຺ເຎ ວສນ຺ໂຕ ພຸທ຺ຘຸປ຺ປາທໍ ສຸຕ຺ວາ ຫຏ຺ຐຕຸຏ຺ໂຐ ‘‘ອຸທຸມ຺ພຣປຸປ຺ຜສທິສາ ທຸລ຺ລຠທສ຺ສນາ ພຸທ຺ຘາ ຠຄວນ຺ໂຕ, ອິທາເນວ ອຸປຄນ຺ຕພ຺ພາ’’ຕິ ມຫຕິຍາ ປຣິສາຍ ສທ຺ຘິໍ ສຕ຺ຖາຣໍ ທຏ຺ຐຸໍ ຄຈ຺ຉນ຺ໂຕ ທິຍຑ຺ຒໂຍຊເນ ເສເສ ພ຺ຍາຘິໂກ ຫຸຕ຺ວາ ພຸທ຺ຘຄຕາຍ ສຎ຺ຎາຍ ກາລງ຺ກໂຕ ເທເວສຸ ອຸປ຺ປຊ຺ຊິຕ຺ວາ ອປຣາປຣໍ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ອຏ຺ຐາຣສວສ຺ສາຘິການໍ ທ຺ວິນ຺ນໍ ວສ຺ສສຕານໍ ມຕ຺ຖເກ ຘມ຺ມາໂສກຣຎ຺ໂຎ ກນິຏ຺ຐຠາຕາ ຫຸຕ຺ວາ ນິພ຺ພຕ຺ຕິ, ຕສ຺ສ ວີຕໂສໂກຕິ ນາມ ອໂຫສິ. ໂສ ວຍປ຺ປຕ຺ໂຕ ຂຕ຺ຕິຍກຸມາເຣຫິ ສິກ຺ຂິຕພ຺ພວິຊ຺ຊາສິປ຺ເປສຸ ນິປ຺ຜຕ຺ຕິໍ ຄໂຕ ຄິຣິທຕ຺ຕຕ຺ເຖຣໍ ນິສ຺ສາຍ ຄິຫິຠູໂຕ ສຸຕ຺ຕນ຺ຕປິຏເກ ອຠິຘມ຺ມປິຏເກ ຈ ວິສາຣໂທ ຫຸຕ຺ວາ ເອກທິວສໍ ມສ຺ສຸກມ຺ມສມເຍ ກປ຺ປກສ຺ສ ຫຕ຺ຖໂຕ ອາທາສໍ ຄເຫຕ຺ວາ ກາຍໍ ໂອໂລເກນ຺ໂຕ ວລິຕປລິຕາທີນິ ທິສ຺ວາ ສຎ຺ຊາຕສໍເວໂຄ ວິປສ຺ສນາຍ ຈິຕ຺ຕໍ ໂອຕາເຣຕ຺ວາ ຠາວນໍ ອຸສ຺ສຸກ຺ກາເປຕ຺ວາ ຕສ຺ມິໍເຍວ ອາສເນ ໂສຕາປນ຺ໂນ ຫຸຕ຺ວາ ຄິຣິທຕ຺ຕຕ຺ເຖຣສ຺ສ ສນ຺ຕິເກ ປພ຺ພຊິຕ຺ວາ ນຈິຣສ຺ເສວ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໒.໔໙.໙-໒໖) –

‘‘ອຊ຺ຌາຍໂກ ມນ຺ຕຘໂຣ, ຕິຓ຺ຓໍ ເວທານ ປາຣຄູ;

ລກ຺ຂເຓ ອິຕິຫາເສ ຈ, ສນິຆຓ຺ຑຸສເກຏຸເຠ.

‘‘ນທີໂສຕປຏິຠາຄາ, ສິສ຺ສາ ອາຍນ຺ຕິ ເມ ຕທາ;

ເຕສາຫໍ ມນ຺ເຕ ວາເຈມິ, ຣຕ຺ຕິນ຺ທິວມຕນ຺ທິໂຕ.

‘‘ສິທ຺ຘຕ຺ໂຖ ນາມ ສມ຺ພຸທ຺ໂຘ, ໂລເກ ອຸປ຺ປຊ຺ຊິ ຕາວເທ;

ຕມນ຺ຘກາຣໍ ນາເສຕ຺ວາ, ຎາຓາໂລກໍ ປວຕ຺ຕຍິ.

‘‘ມມ ອຎ຺ຎຕໂຣ ສິສ຺ໂສ, ສິສ຺ສານໍ ໂສ ກເຖສິ ເມ;

ສຸຕ຺ວານ ເຕ ເອຕມຕ຺ຖໍ, ອາໂຣເຈສຸໍ ມມໍ ຕທາ.

‘‘ພຸທ຺ໂຘ ໂລເກ ສມຸປ຺ປນ຺ໂນ, ສພ຺ພຎ຺ຎູ ໂລກນາຍໂກ;

ຕສ຺ສານຸວຕ຺ຕຕິ ຊໂນ, ລາໂຠ ອມ຺ຫໍ ນ ວິຊ຺ຊຕິ.

‘‘ອຘິຈ຺ຈຸປ຺ປຕ຺ຕິກາ ພຸທ຺ຘາ, ຈກ຺ຂຸມນ຺ໂຕ ມຫາຍສາ;

ຍໍນູນາຫໍ ພຸທ຺ຘເສຏ຺ຐໍ, ປສ຺ເສຍ຺ຍໍ ໂລກນາຍກໍ.

‘‘ອຊິນໍ ເມ ຄເຫຕ຺ວານ, ວາກຈີຣໍ ກມຓ຺ຑລຸໍ;

ອສ຺ສມາ ອຠິນິກ຺ຂມ຺ມ, ສິສ຺ເສ ອາມນ຺ຕຍິໍ ອຫໍ.

‘‘ໂອທຸມ຺ພຣິກປຸປ຺ຜໍວ, ຈນ຺ທມ຺ຫິ ສສກໍ ຍຖາ;

ວາຍສານໍ ຍຖາ ຂີຣໍ, ທຸລ຺ລໂຠ ໂລກນາຍໂກ.

‘‘ພຸທ຺ໂຘ ໂລກມ຺ຫິ ອຸປ຺ປນ຺ໂນ, ມນຸສ຺ສຕ຺ຕມ຺ປິ ທຸລ຺ລຠໍ;

ອຸໂຠສຸ ວິຊ຺ຊມາເນສຸ, ສວນຎ຺ຈ ສຸທຸລ຺ລຠໍ.

‘‘ພຸທ຺ໂຘ ໂລເກ ສມຸປ຺ປນ຺ໂນ, ຈກ຺ຂຸໍ ລຈ຺ຉາມ ໂນ ຠວໍ;

ເອຖ ສພ຺ເພ ຄມິສ຺ສາມ, ສມ຺ມາສມ຺ພຸທ຺ຘສນ຺ຕິກໍ.

‘‘ກມຓ຺ຑລຸຘຣາ ສພ຺ເພ, ຂຣາຊິນນິວາສິໂນ;

ເຕ ຊຏາຠາຣຠຣິຕາ, ນິກ຺ຂມຸໍ ວິປິນາ ຕທາ.

‘‘ຍຸຄມຕ຺ຕໍ ເປກ຺ຂມານາ, ອຸຕ຺ຕມຕ຺ຖໍ ຄເວສິໂນ;

ອາສຕ຺ຕິໂທສຣຫິຕາ, ອສມ຺ຠີຕາວ ເກສຣີ.

‘‘ອປ຺ປກິຈ຺ຈາ ອໂລລຸປ຺ປາ, ນິປກາ ສນ຺ຕວຸຕ຺ຕິໂນ;

ອຸຎ຺ຉາຍ ຈຣມານາ ເຕ, ພຸທ຺ຘເສຏ຺ຐມຸປາຄມຸໍ.

‘‘ທິຍຑ຺ຒໂຍຊເນ ເສເສ, ພ຺ຍາຘິ ເມ ອຸປປຊ຺ຊຖ;

ພຸທ຺ຘເສຏ຺ຐໍ ສຣິຕ຺ວານ, ຕຕ຺ຖ ກາລງ຺ກໂຕ ອຫໍ.

‘‘ຈຕຸນ຺ນວຸຕິໂຕ ກປ຺ເປ, ຍໍ ສຎ຺ຎມລຠິໍ ຕທາ;

ທຸຄ຺ຄຕິໍ ນາຠິຊານາມິ, ພຸທ຺ຘສຎ຺ຎາຍິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ອຎ຺ຎໍ ພ຺ຍາກໂຣນ຺ໂຕ –

໑໖໙. ‘‘ເກເສ ເມ ໂອລິຂິສ຺ສນ຺ຕິ, ກປ຺ປໂກ ອຸປສງ຺ກມິ;

ຕໂຕ ອາທາສມາທາຍ, ສຣີຣໍ ປຈ຺ຈເວກ຺ຂິສໍ.

໑໗໐. ‘‘ຕຸຈ຺ໂຉ ກາໂຍ ອທິສ຺ສິຕ຺ຖ, ອນ຺ຘກາເຣ ຕໂມ ພ຺ຍຄາ;

ສພ຺ເພ ໂຈຬາ ສມຸຈ຺ຉິນ຺ນາ, ນຕ຺ຖິ ທານິ ປຸນພ຺ຠໂວ’’ຕິ. – ຄາຖາທ຺ວຍໍ ອຠາສິ;

ຕຕ຺ຖ ເກເສ ເມ ໂອລິຂິສ຺ສນ຺ຕິ, ກປ຺ປໂກ ອຸປສງ຺ກມີຕິ ຄິຫິກາເລ ມສ຺ສຸກມ຺ມສມເຍ ‘‘ມມ ເກເສ ໂອລິຂິສ຺ສໍ ກປ຺ເປມີ’’ຕິ ເກສາທີນໍ ເຉທນາທິວເສນ ກປ຺ປນໂຕ ກປ຺ປໂກ ນ຺ຫາປິໂຕ ມໍ ອຸປຄຈ຺ຉິ. ຕໂຕຕິ ກປ຺ປກໂຕ. ສຣີຣໍ ປຈ຺ຈເວກ຺ຂິສນ຺ຕິ ສພ຺ພກາຍິເກ ອາທາເສ ປລິຕວລິຕມຸຂນິມິຕ຺ຕາທິທສ຺ສນມຸເຂນ ‘‘ອຠິຠູໂຕ ວຕ ຊຣາຍ ເມ ກາໂຍ’’ຕິ ຊຣາຠິຠູຕໍ ອຕ຺ຕໂນ ສຣີຣໍ ປຈ຺ຈເວກ຺ຂິໍ. ເອວໍ ປຈ຺ຈເວກ຺ຂໂຕ ຈ ຕຸຈ຺ໂຉ ກາໂຍ ອທິສ຺ສິຕ຺ຖ ນິຈ຺ຈຘຸວສຸຂສຠາວາທີຫິ ຣິຕ຺ໂຕ ຫຸຕ຺ວາ ເມ ກາໂຍ ອທິສ຺ສຖ ປຎ຺ຎາຍິ. ກສ຺ມາ? ອນ຺ຘກາເຣ ຕໂມ ພ຺ຍຄາ ເຍນ ອໂຍນິໂສມນສິກາຣສງ຺ຂາເຕນ ຕມສາ ອຕ຺ຕໂນ ກາເຍ ອນ຺ຘຄຕາ ວິຊ຺ຊມານມ຺ປິ ອສຸຠາທິສຠາວໍ ອປສ຺ສນ຺ຕາ ອວິຊ຺ຊມານໍ ສຸຠາທິອາກາຣໍ ຄຓ຺ຫນ຺ຕິ, ຕສ຺ມິໍ ອນ຺ຘກາເຣ ອນ຺ຘກຣຓຏ຺ຐາເນ ກາເຍ ໂຍນິໂສມນສິກາຣສງ຺ຂາເຕນ ຎາຓາໂລເກນ ອວິຊ຺ຊາຕໂມ ວິຄໂຕ, ຕໂຕ ເອວ ສພ຺ເພ ໂຈຬາ ສມຸຈ຺ຉິນ຺ນາ ໂຈຣາ ວິຍ ກຸສລຠຓ຺ຑຈ຺ເຉທນໂຕ, ສາຘູຫິ ອລາຕພ຺ພໂຕ ອສງ຺ຄເຫຕພ຺ພໂຕ ສງ຺ກາຣກູຏາທີສຸ ຉຑ຺ຑິຕປິໂລຕິກຂຓ຺ຑໍ ວິຍ ອິສ຺ສຣຊເນນ ອຣິຍຊເນນ ຊິຄຸຈ຺ຉິຕພ຺ພຕາຍ ໂຈຬາ ວິຍາຕິ ວາ ‘‘ໂຈຬາ’’ຕິ ລທ຺ຘນາມາ ກິເລສາ ສມຸຈ຺ຉິນ຺ນາ. ອຄ຺ຄມຄ຺ເຄນ ສມຸຄ຺ຆາຏິຕຕ຺ຕາ ເອວ ຈ ເນສໍ ນຕ຺ຖິ ທານິ ປຸນພ຺ຠໂວ ອາຍຕິໍ ປຸນພ຺ຠວາຠິນິພ຺ພຕ຺ຕິ ນຕ຺ຖີຕິ.

ວີຕໂສກຕ຺ເຖຣຄາຖາວຓ຺ຓນາ ນິຏ຺ຐິຕາ.