໑໐. ກຓ຺ຫທິນ຺ນຕ຺ເຖຣຄາຖາວຓ຺ຓນາ

ອຸປາສິຕາ ສປ຺ປຸຣິສາຕິ ອາຍສ຺ມໂຕ ກຓ຺ຫທິນ຺ນຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ປຸຎ຺ຎານິ ອຸປຈິນນ຺ໂຕ ອິໂຕ ຈຕຸນວຸເຕ ກປ຺ເປ ກຸລເຄເຫ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ເອກທິວສໍ ໂສຠິຕໍ ນາມ ປຈ຺ເຈກພຸທ຺ຘໍ ທິສ຺ວາ ປສນ຺ນຈິຕ຺ໂຕ ປຸນ຺ນາຄປຸປ຺ເຜຫິ ປູຊໍ ອກາສິ. ໂສ ເຕນ ປຸຎ຺ຎກມ຺ເມນ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ຣາຊຄເຫ ພ຺ຣາຫ຺ມຓກຸເລ ນິພ຺ພຕ຺ຕິຕ຺ວາ ກຓ຺ຫທິນ຺ໂນຕິ ລທ຺ຘນາໂມ ວຍປ຺ປຕ຺ໂຕ ອຸປນິສ຺ສຍສມ຺ປຕ຺ຕິຍາ ໂຈທິຍມາໂນ ຘມ຺ມເສນາປຕິໍ ອຸປສງ຺ກມິຕ຺ວາ ຘມ຺ມໍ ສຸຕ຺ວາ ປຏິລທ຺ຘສທ຺ໂຘ ປພ຺ພຊິຕ຺ວາ ວິປສ຺ສນໍ ວຑ຺ເຒຕ຺ວາ ອຣຫຕ຺ຕໍ ປາປຸຓິ. ເຕນ ວຸຕ຺ຕໍ ອປທາເນ (ອປ. ເຖຣ ໒.໔໘.໖໑-໖໕) –

‘‘ໂສຠິໂຕ ນາມ ສມ຺ພຸທ຺ໂຘ, ຈິຕ຺ຕກູເຏ ວສີ ຕທາ;

ຄເຫຕ຺ວາ ຄິຣິປຸນ຺ນາຄໍ, ສຍມ຺ຠຸໍ ອຠິປູຊຍິໍ.

‘‘ຈຕຸນ຺ນວຸຕິໂຕ ກປ຺ເປ, ຍໍ ພຸທ຺ຘມຠິປູຊຍິໍ;

ທຸຄ຺ຄຕິໍ ນາຠິຊານາມິ, ພຸທ຺ຘປູຊາຍິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ອຣຫຕ຺ຕໍ ປນ ປຕ຺ວາ ອຎ຺ຎໍ ພ຺ຍາກໂຣນ຺ໂຕ –

໑໗໙. ‘‘ອຸປາສິຕາ ສປ຺ປຸຣິສາ, ສຸຕາ ຘມ຺ມາ ອຠິຓ຺ຫໂສ;

ສຸຕ຺ວານ ປຏິປຊ຺ຊິສ຺ສໍ, ອຎ຺ຊສໍ ອມໂຕຄຘໍ.

໑໘໐. ‘‘ຠວຣາຄຫຕສ຺ສ ເມ ສໂຕ, ຠວຣາໂຄ ປຸນ ເມ ນ ວິຊ຺ຊຕິ;

ນ ຈາຫຸ ນ ຈ ເມ ຠວິສ຺ສຕິ, ນ ຈ ເມ ເອຕຣຫິ ວິຊ຺ຊຕີ’’ຕິ. –

ຄາຖາທ຺ວຍໍ ອຠາສິ.

ຕຕ຺ຖ ອຸປາສິຕາຕິ ປຣິຈຣິຕາ ປຏິປຕ຺ຕິປຍິຣຸປາສນາຍ ປຍິຣຸປາສິຕາ. ສປ຺ປຸຣິສາຕິ ສນ຺ເຕຫິ ສີລາທິຄຸເຓຫິ ສມນ຺ນາຄຕາ ປຸຣິສາ, ອຣິຍປຸຄ຺ຄລາ ສາຣິປຸຕ຺ຕຕ຺ເຖຣາທໂຍ. ເອເຕນ ປຸຣິມຈກ຺ກທ຺ວຍສມ຺ປຕ຺ຕິມຕ຺ຕໂນ ທສ຺ເສຕິ. ນ ຫິ ປຕິຣູປເທສວາເສນ ວິນາ ສປ຺ປຸຣິສູປນິສ຺ສໂຍ ສມ຺ຠວຕິ. ສຸຕາ ຘມ຺ມາຕິ ສຈ຺ຈປຏິຈ຺ຈສມຸປ຺ປາທາທິປຏິສໍຍຸຕ຺ຕຘມ຺ມາ ໂສຕທ຺ວາຣານຸສາເຣນ ອຸປຘາຣິຕາ. ເອເຕນ ອຕ຺ຕໂນ ພາຫຸສຈ຺ຈໍ ທສ຺ເສນ຺ໂຕ ປຈ຺ຉິມຈກ຺ກທ຺ວຍສມ຺ປຕ຺ຕິໍ ທສ຺ເສຕິ. ອຠິຓ຺ຫໂສຕິ ພຫຸໂສ ນ ກາເລນ ກາລໍ. ອິທຎ຺ຈ ປທໍ ‘‘ອຸປາສິຕາ ສປ຺ປຸຣິສາ’’ຕິ ເອຕ຺ຖາປິ ໂຍເຊຕພ຺ພໍ. ສຸຕ຺ວານ ປຏິປຊ຺ຊິສ຺ສໍ, ອຎ຺ຊສໍ ອມໂຕຄຘນ຺ຕິ ເຕ ຘມ຺ເມ ສຸຕ຺ວາ ຕຕ຺ຖ ວຸຕ຺ຕຣູປາຣູປຘມ຺ເມ ສລກ຺ຂຓາທິໂຕ ປຣິຄ຺ຄເຫຕ຺ວາ ອນຸກ຺ກເມນ ວິປສ຺ສນໍ ວຑ຺ເຒຕ຺ວາ ອມໂຕຄຘໍ ນິພ຺ພານປຕິຏ຺ຐໍ ຕໍສມ຺ປາປກໍ ອຎ຺ຊສໍ ອຣິຍໍ ອຏ຺ຐງ຺ຄິກໍ ມຄ຺ຄໍ ປຏິປຊ຺ຊິໍ ປາປຸຓິໍ.

ຠວຣາຄຫຕສ຺ສ ເມ ສໂຕຕິ ຠວຣາເຄນ ຠວຕຓ຺ຫາຍ ອນາທິມຕິ ສໍສາເຣ ຫຕສ຺ສ ອຸປທ຺ທຸຕສ຺ສ ມມ ສໂຕ ສມານສ຺ສ, ອຄ຺ຄມຄ຺ເຄນ ວາ ຫຕຠວຣາຄສ຺ສ. ຠວຣາໂຄ ປຸນ ເມ ນ ວິຊ຺ຊຕີຕິ ຕໂຕ ເອວ ປຸນ ອິທານິ ຠວຣາໂຄ ເມ ນຕ຺ຖິ. ນ ຈາຫຸ ນ ເມ ຠວິສ຺ສຕິ, ນ ຈ ເມ ເອຕຣຫິ ວິຊ຺ຊຕີຕິ ຍທິປິ ປຸພ຺ເພ ປຸຖຸຊ຺ຊນກາເລ ເສກ຺ຂກາເລ ຈ ເມ ຠວຣາໂຄ ອໂຫສິ, ອຄ຺ຄມຄ຺ຄປ຺ປຕ຺ຕິໂຕ ປນ ປຏ຺ຐາຍ ນ ຈາຫຸ ນ ຈ ອໂຫສິ, ອາຍຕິມ຺ປິ ນ ເມ ຠວິສ຺ສຕິ, ເອຕຣຫິ ອຘຸນາປິ ນ ຈ ເມ ວິຊ຺ຊຕິ ນ ຈ ອຸປລພ຺ຠຕິ, ປຫີໂນຕິ ອຕ຺ໂຖ. ຠວຣາຄວຈເນເນວ ເຈຕ຺ຖ ຕເທກຏ຺ຐຕາຍ ມານາທີນມ຺ປິ ອຠາໂວ ວຸຕ຺ໂຕຕິ ສພ຺ພໂສ ປຣິກ຺ຂີຓຠວສໍໂຍຊນຕໍ ທສ຺ເສຕິ.

ກຓ຺ຫທິນ຺ນຕ຺ເຖຣຄາຖາວຓ຺ຓນາ ນິຏ຺ຐິຕາ.

ຕຕິຍວຄ຺ຄວຓ຺ຓນາ ນິຏ຺ຐິຕາ.