໘. ກິມິລຕ຺ເຖຣຄາຖາວຓ຺ຓນາ

ປາຈີນວໍສທາຍມ຺ຫີຕິອາທິກາ ອາຍສ຺ມໂຕ ກິມິລຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ຕສ຺ສ ປຸພ຺ພໂຍໂຄ ສໍເວຄຸປ຺ປຕ຺ຕິ ປພ຺ພຊ຺ຊາ ຈ ເອກກນິປາເຕ ‘‘ອຠິສຕ຺ໂຕ’’ຕິ ຄາຖາຍ ສໍວຓ຺ຓນາຍໍ ວຸຕ຺ຕາເຍວ. ຕາຍ ຈ ຄາຖາຍ ເຖເຣນ ອຕ຺ຕໂນ ວິເສສາຘິຄມສ຺ສ ກາຣຓໍ ທສ຺ສິຕໍ. ອິຘ ປນ ອຘິຄຕວິເສສສ຺ສ ອຕ຺ຕໂນ ອາຍສ຺ມຕາ ຈ ອນຸຣຸທ຺ເຘນ ອາຍສ຺ມຕາ ຈ ນນ຺ທິເຍນ ສຫ ສມຄ຺ຄວາໂສ ທສ຺ສິໂຕຕິ ເວທິຕພ຺ພໍ. ສມຄ຺ຄວາສໍ ປນ ວສນ຺ຕາ ເຕ ຍຖາ ຈ ວສິໍສຸ, ຕໍ ທສ຺ເສນ຺ໂຕ –

໑໕໕. ‘‘ປາຈີນວໍສທາຍມ຺ຫິ, ສກ຺ຍປຸຕ຺ຕາ ສຫາຍກາ;

ປຫາຍານປ຺ປເກ ໂຠເຄ, ອຸຎ຺ເຉ ປຕ຺ຕາຄເຕ ຣຕາ.

໑໕໖. ‘‘ອາຣທ຺ຘວີຣິຍາ ປຫິຕຕ຺ຕາ, ນິຈ຺ຈໍ ທຬ຺ຫປຣກ຺ກມາ;

ຣມນ຺ຕິ ຘມ຺ມຣຕິຍາ, ຫິຕ຺ວານ ໂລກິຍໍ ຣຕິ’’ນ຺ຕິ. – ຄາຖາທ຺ວຍໍ ອຠາສິ;

ຕຕ຺ຖ ປາຈີນວໍສທາຍມ຺ຫີຕິ ປາຈີນວໍສນາມເກ ຣກ຺ຂິຕໂຄປິເຕ ສຫປຣິຈ຺ເຉເທ ວເນ. ຕຎ຺ຫິ ວນໍ ຄາມສ຺ສ ປາຈີນທິສາຍໍ ຐິຕຕ຺ຕາ ວໍສຄຸມ຺ພປຣິກ຺ຂິຕ຺ຕຕ຺ຕາ ຈ ‘‘ປາຈີນວໍສທາໂຍ’’ຕິ ວຸຕ຺ໂຕ, ວໍສວນຠາເວນ ວາຕິ. ສກ຺ຍປຸຕ຺ຕາຕິ ອນຸຣຸທ຺ຘຕ຺ເຖຣາທໂຍ ສກ຺ຍຣາຊກຸມາຣາ. ສຫາຍກາຕິ ສໍເວຄຸປ຺ປຕ຺ຕິປພ຺ພຊ຺ຊາສມຓຘມ຺ມກຣຓສໍວາເສຫິ ສຫ ອຍນໂຕ ປວຕ຺ຕນໂຕ ສຫາຍກາ. ປຫາຍານປ຺ປເກ ໂຠເຄຕິ ອຸຬາເຣນ ປຸຎ຺ຎານຸຠາເວນ ອຘິຄເຕ ກຸລປຣມ຺ປຣາຄເຕ ຈ ມຫນ຺ເຕ ໂຠຄກ຺ຂນ຺ເຘ ຉຑ຺ເຑຕ຺ວາ. ‘‘ສຫາຍານປ຺ປເກ’’ຕິປິ ປາຬິ. ອຸຎ຺ເຉ ປຕ຺ຕາຄເຕ ຣຕາຕິ ອຸຎ຺ຉາຈຣິຍາຍ ອາຠຕຕ຺ຕາ ອຸຎ຺ເຉ ປຕ຺ເຕ ອາຄຕຕ຺ຕາ ປຕ຺ຕາຄເຕ ປຕ຺ຕປຣິຍາປນ຺ເນ ຣຕາ ອຠິຣຕາ, ສງ຺ຆຠຕ຺ຕາທິອຕິເຣກລາຠໍ ປຏິກ຺ຂິປິຕ຺ວາ ຊງ຺ຆພລໍ ນິສ຺ສາຍ ຠິກ຺ຂາຈຣິຍາຍ ລທ຺ເຘນ ມິສ຺ສກຠຕ຺ເຕເນວ ສນ຺ຕຸຏ຺ຐາຕິ ອຕ຺ໂຖ.

ອາຣທ຺ຘວີຣິຍາຕິ ອຸຕ຺ຕມຕ຺ຖສ຺ສ ອຘິຄມາຍ ອາທິໂຕວ ປເຄວ ສມ຺ປາທິຕວີຣິຍາ. ປຫິຕຕ຺ຕາຕິ ນິນ຺ນໂປຓປພ຺ຠາຣຠາເວນ ກາເລນ ກາລໍ ສມາປຊ຺ຊເນນ ຈ ນິພ຺ພານໍ ປຕິເປສິຕຈິຕ຺ຕາ. ນິຈ຺ຈໍ ທຬ຺ຫປຣກ຺ກມາຕິ ວຕ຺ຕປຏິປຕ຺ຕີສຸ ທິຏ຺ຐຘມ຺ມສຸຂວິຫາຣານຸໂຍເຄນ ສພ຺ພກາລໍ ອສິຖິລປຣກ຺ກມາ. ຣມນ຺ຕິ ຘມ຺ມຣຕິຍາ, ຫິຕ຺ວານ ໂລກິຍໍ ຣຕິນ຺ຕິ ໂລເກ ວິທິຕຕາຍ ໂລກປຣິຍາປນ຺ນຕາຍ ຈ ໂລກິຍໍ ຣູປາຣມ຺ມຓາທິຣຕິໍ ປຫາຍ ມຄ຺ຄປຎ຺ຎາຍ ປຊຫິຕ຺ວາ ໂລກຸຕ຺ຕຣຘມ຺ມຣຕິຍາ ອຄ຺ຄຜລນິພ຺ພານາຠິຣຕິຍາ ຈ ຣມນ຺ຕິ ອຠິຣມນ຺ຕີຕິ.

ກິມິລຕ຺ເຖຣຄາຖາວຓ຺ຓນາ ນິຏ຺ຐິຕາ.