໑໐. ສິຣິມຕ຺ເຖຣຄາຖາວຓ຺ຓນາ

ປເຣ ຈ ນໍ ປສໍສນ຺ຕີຕິ ອາຍສ຺ມໂຕ ສິຣິມຕ຺ເຖຣສ຺ສ ຄາຖາ. ກາ ອຸປ຺ປຕ຺ຕິ? ອຍມ຺ປິ ປຸຣິມພຸທ຺ເຘສຸ ກຕາຘິກາໂຣ ຕຕ຺ຖ ຕຕ຺ຖ ຠເວ ປຸຎ຺ຎານິ ອຸປຈິນນ຺ໂຕ ປທຸມຸຕ຺ຕຣສ຺ສ ຠຄວໂຕ ປາຣມິໂຍ ປູເຣຕ຺ວາ ຕຸສິຕຠວເນ ຐິຕກາເລ ພ຺ຣາຫ຺ມຓກຸເລ ນິພ຺ພຕ຺ຕິຕ຺ວາ ວິຎ຺ຎຸຕໍ ປຕ຺ໂຕ ຕິຓ຺ຓໍ ເວທານໍ ປາຣຄູ ສນິຆຓ຺ຑຸເກຏຸຠານໍ ສກ຺ຂຣປ຺ປເຠທານໍ ອິຕິຫາສປຎ຺ຈມານໍ ປທໂກ ເວຍ຺ຍາກຣໂຓ ໂລກາຍຕມຫາປຸຣິສລກ຺ຂເຓສຸ ອນວໂຍ ເນກ຺ຂມ຺ມຊ຺ຌາສຍຕາຍ ກາເມ ປຫາຍ ຕາປສປພ຺ພຊ຺ຊໍ ປພ຺ພຊິຕ຺ວາ ຈຕຸຣາສີຕິສຫສ຺ສປຣິມາເຓນ ຕາປສຄເຓນ ປຣິວຸໂຕ ຫິມວນ຺ຕປ຺ປເທເສ ເທວຕາຠິນິມ຺ມິເຕ ອສ຺ສເມ ຌານາຠິຎ຺ຎາໂຍ ນິພ຺ພຕ຺ເຕຕ຺ວາ ວສນ຺ໂຕ ປຸຣິມພຸທ຺ເຘສຸ ກຕາຘິກາຣຕາຍ ລກ຺ຂຓມນ຺ເຕສຸ ອາຄຕນິຍາເມນ ຈ ພຸທ຺ຘຄຸເຓ ອນຸສ຺ສຣິຕ຺ວາ ອຕີເຕ ພຸທ຺ເຘ ອຸທ຺ທິສ຺ສ ອຎ຺ຎຕຣສ຺ມິໍ ນທີນິວຕ຺ຕເນ ປຸລິນເຈຕິຍໍ ກຕ຺ວາ ປູຊາສກ຺ກາຣາຠິຣໂຕ ອໂຫສິ. ຕໍ ທິສ຺ວາ ຕາປສາ, ‘‘ກໍ ອຸທ຺ທິສ຺ສ ອຍໍ ປູຊາສກ຺ກາໂຣ ກຣີຍຕີ’’ຕິ ປຸຈ຺ຉິໍສຸ. ໂສ ເຕສໍ ລກ຺ຂຓມນ຺ເຕ ອາຫຣິຕ຺ວາ ຕຕ຺ຖ ອາຄຕານິ ມຫາປຸຣິສລກ຺ຂຓານິ ວິຠຊິຕ຺ວາ ຕທນຸສາເຣນ ອຕ຺ຕໂນ ພເລ ຐຕ຺ວາ ພຸທ຺ຘຄຸເຓ ກິຕ຺ເຕສິ. ຕໍ ສຸຕ຺ວາ ເຕປິ ຕາປສາ ປສນ຺ນມານສາ ຕໂຕ ປຏ຺ຐາຍ ສມ຺ມາສມ຺ພຸທ຺ຘໍ ອຸທ຺ທິສ຺ສ ຖູປປູຊໍ ກໂຣນ຺ຕາ ວິຫຣນ຺ຕິ.

ເຕນ ຈ ສມເຍນ ປທຸມຸຕ຺ຕຣໂພຘິສຕ຺ໂຕ ຕຸສິຕກາຍາ ຈວິຕ຺ວາ ມາຕຸກຸຈ຺ຉິໍ ໂອກ຺ກນ຺ໂຕ ໂຫຕິ. ຈຣິມຠເວ ທ຺ວຕ຺ຕິໍສ ປຸພ຺ພນິມິຕ຺ຕານິ ປາຕຸຣເຫສຸໍ, ສພ຺ເພ ຈ ອຈ຺ຉຣິຍພ຺ຠູຕຘມ຺ມາ. ຕາປໂສ ຕານິ ອນ຺ເຕວາສິການໍ ທສ຺ເສຕ຺ວາ ຠິຍ຺ໂຍໂສມຕ຺ຕາຍ ສມ຺ມາສມ຺ພຸທ຺ເຘສຸ ເຕສໍ ປສາທໍ ວຑ຺ເຒຕ຺ວາ ກາລໍ ກຕ຺ວາ ພ຺ຣຫ຺ມໂລເກ ນິພ຺ພຕ຺ຕິຕ຺ວາ ເຕຫິ ອຕ຺ຕໂນ ສຣີຣສ຺ສ ປູຊາຍ ກຣີຍມານາຍ ທິສ຺ສມານຣູໂປ ອາຄນ຺ຕ຺ວາ, ‘‘ອຫໍ ຕຸມ຺ຫາກໍ ອາຈຣິໂຍ ພ຺ຣຫ຺ມໂລເກ ນິພ຺ພຕ຺ໂຕ, ຕຸມ຺ເຫ ອປ຺ປມຕ຺ຕາ ປຸລິນເຈຕິຍປູຊມນຸຍຸຎ຺ຊຖ, ຠາວນາຍ ຈ ຍຸຕ຺ຕປ຺ປຍຸຕ຺ຕາ ໂຫຖາ’’ຕິ ວຕ຺ວາ ພ຺ຣຫ຺ມໂລກເມວ ຄໂຕ.

ເອວໍ ໂສ ເທວມນຸສ຺ເສສຸ ສໍສຣນ຺ໂຕ ອິມສ຺ມິໍ ພຸທ຺ຘຸປ຺ປາເທ ສາວຕ຺ຖິຍໍ ຄຫປຕິກຸເລ ນິພ຺ພຕ຺ຕິ, ຕສ຺ສ ຊາຕທິວສໂຕ ປຏ຺ຐາຍ ຕສ຺ມິໍ ກຸເລ ສິຣິສມ຺ປຕ຺ຕິຍາ ວຑ຺ຒມານຕ຺ຕາ ສິຣິມາຕ຺ເວວ ນາມໍ ອກໍສຸ. ຕສ຺ສ ປທສາ ຄມນກາເລ ກນິຏ຺ຐຠາຕາ ນິພ຺ພຕ຺ຕິ, ຕສ຺ສ ‘‘ອຍໍ ສິຣິໍ ວຑ຺ເຒນ຺ໂຕ ຊາໂຕ’’ຕິ ສິຣິວຑ຺ໂຒຕິ ນາມໍ ອກໍສຸ. ເຕ ອຸໂຠປິ ເຊຕວນປ຺ປຏິຄ຺ຄຫເຓ ພຸທ຺ຘານຸຠາວໍ ທິສ຺ວາ ປຏິລທ຺ຘສທ຺ຘາ ປພ຺ພຊິໍສຸ. ເຕສຸ ສິຣິວຑ຺ໂຒ ນ ຕາວ ອຸຕ຺ຕຣິມນຸສ຺ສຘມ຺ມສ຺ສ ລາຠີ ອໂຫສິ, ຈຕຸນ຺ນໍ ປຈ຺ຈຍານໍ ລາຠີ, ຄຫຏ຺ຐປພ຺ພຊິຕານໍ ສກ຺ກໂຕ ຄຣຸກໂຕ, ສິຣິມຕ຺ເຖໂຣ ປນ ປພ຺ພຊິຕກາລໂຕ ປຏ຺ຐາຍ ຕາທິເສນ ກມ຺ມຈ຺ຉິທ຺ເທນ ອປ຺ປລາຠີ ອໂຫສິ ພຫຸຊນາສມ຺ຠາວິໂຕ, ສມຖວິປສ຺ສນາສຸ ກມ຺ມໍ ກໂຣນ຺ໂຕ ນຈິຣສ຺ເສວ ຉຬຠິຎ຺ໂຎ ອໂຫສິ. ເຕນ ວຸຕ຺ຕໍ ອປທາເນ (ອປ. ເຖຣ ໒.໔໙.໑໑໑-໑໔໗) –

‘‘ປພ຺ພເຕ ຫິມວນ຺ຕມ຺ຫິ, ເທວໂລ ນາມ ຕາປໂສ;

ຕຕ຺ຖ ເມ ຈງ຺ກໂມ ອາສິ, ອມນຸສ຺ເສຫິ ມາປິໂຕ.

‘‘ຊຏາຠາເຣນ ຠຣິໂຕ, ກມຓ຺ຑລຸຘໂຣ ສທາ;

ອຸຕ຺ຕມຕ຺ຖໍ ຄເວສນ຺ໂຕ, ວິປິນາ ນິກ຺ຂມິໍ ຕທາ.

‘‘ຈຸລ຺ລາສີຕິສຫສ຺ສານິ, ສິສ຺ສາ ມຍ຺ຫໍ ອຸປຏ຺ຐຫຸໍ;

ສກກມ຺ມາຠິປສຸຕາ, ວສນ຺ຕິ ວິປິເນ ຕທາ.

‘‘ອສ຺ສມາ ອຠິນິກ຺ຂມ຺ມ, ອກໍ ປຸລິນເຈຕິຍໍ;

ນານາປຸປ຺ຜໍ ສມາເນຕ຺ວາ, ຕໍ ເຈຕິຍມປູຊຍິໍ.

‘‘ຕຕ຺ຖ ຈິຕ຺ຕໍ ປສາເທຕ຺ວາ, ອສ຺ສມໍ ປວິສາມຫໍ;

ສພ຺ເພ ສິສ຺ສາ ສມາຄນ຺ຕ຺ວາ, ເອຕມຕ຺ຖໍ ປຸຈ຺ຉິໍສຸ ມໍ.

‘‘ປຸລິເນນ ກໂຕ ຖູໂປ, ຍໍ ຕ຺ວໍ ເທວ ນມສ຺ສສິ;

ມຍມ຺ປິ ຎາຕຸມິຈ຺ຉາມ, ປຸຏ຺ໂຐ ອາຈິກ຺ຂ ໂນ ຕຸວໍ.

‘‘ນິທ຺ທິຏ຺ຐາ ນຸ ມນ຺ຕປເທ, ຈກ຺ຂຸມນ຺ໂຕ ມຫາຍສາ;

ເຕ ໂຂ ອຫໍ ນມສ຺ສາມິ, ພຸທ຺ຘເສຏ຺ເຐ ມຫາຍເສ.

‘‘ກີທິສາ ເຕ ມຫາວີຣາ, ສພ຺ພຎ຺ຎູ ໂລກນາຍກາ;

ກຖໍວຓ຺ຓາ ກຖໍສີລາ, ກີທິສາ ເຕ ມຫາຍສາ.

‘‘ພາຕ຺ຕິໍສລກ຺ຂຓາ ພຸທ຺ຘາ, ຈຕ຺ຕາລີສທິຊາປິ ຈ;

ເນຕ຺ຕາ ໂຄປຂຸມາ ເຕສໍ, ຊິຎ຺ຊຸກາ ຜລສນ຺ນິຠາ.

‘‘ຄຈ຺ຉມານາ ຈ ເຕ ພຸທ຺ຘາ, ຍຸຄມຕ຺ຕຎ຺ຈ ເປກ຺ຂເຣ;

ນ ເຕສໍ ຊາຓຸ ນທຕິ, ສນ຺ຘິສທ຺ໂທ ນ ສຸຍ຺ຍຕິ.

‘‘ຄຈ຺ຉມານາ ຈ ສຸຄຕາ, ອຸທ຺ຘຣນ຺ຕາວ ຄຈ຺ຉເຣ;

ປຐມໍ ທກ຺ຂິຓໍ ປາທໍ, ພຸທ຺ຘານໍ ເອສ ຘມ຺ມຕາ.

‘‘ອສມ຺ຠີຕາ ຈ ເຕ ພຸທ຺ຘາ, ມິຄຣາຊາວ ເກສຣີ;

ເນວຸກ຺ກໍເສນ຺ຕິ ອຕ຺ຕານໍ, ໂນ ຈ ວມ຺ເຠນ຺ຕິ ປາຓິນໍ.

‘‘ມານາວມານໂຕ ມຸຕ຺ຕາ, ສມາ ສພ຺ເພສຸ ປາຓິສຸ;

ອນຕ຺ຕຸກ຺ກໍສກາ ພຸທ຺ຘາ, ພຸທ຺ຘານໍ ເອສ ຘມ຺ມຕາ.

‘‘ອຸປ຺ປຊ຺ຊນ຺ຕາ ຈ ສມ຺ພຸທ຺ຘາ, ອາໂລກໍ ທສ຺ສຍນ຺ຕິ ເຕ;

ຉປ຺ປກາຣໍ ປກມ຺ເປນ຺ຕິ, ເກວລໍ ວສຸຘໍ ອິມໍ.

‘‘ປສ຺ສນ຺ຕິ ນິຣຍຎ຺ເຈເຕ, ນິພ຺ພາຕິ ນິຣໂຍ ຕທາ;

ປວສ຺ສຕິ ມຫາເມໂຆ, ພຸທ຺ຘານໍ ເອສ ຘມ຺ມຕາ.

‘‘ອີທິສາ ເຕ ມຫານາຄາ, ອຕຸລາ ຈ ມຫາຍສາ;

ວຓ຺ຓໂຕ ອນຕິກ຺ກນ຺ຕາ, ອປ຺ປເມຍ຺ຍາ ຕຖາຄຕາ.

‘‘ອນຸໂມທິໍສຸ ເມ ວາກ຺ຍໍ, ສພ຺ເພ ສິສ຺ສາ ສຄາຣວາ;

ຕຖາ ຈ ປຏິປຊ຺ຊິໍສຸ, ຍຖາສຕ຺ຕິ ຍຖາພລໍ.

‘‘ປຏິປູເຊນ຺ຕິ ປຸລິນໍ, ສກກມ຺ມາຠິລາສິໂນ;

ສທ຺ທຫນ຺ຕາ ມມ ວາກ຺ຍໍ, ພຸທ຺ຘສກ຺ກຕມານສາ.

‘‘ຕທາ ຈວິຕ຺ວາ ຕຸສິຕາ, ເທວປຸຕ຺ໂຕ ມຫາຍໂສ;

ອຸປ຺ປຊ຺ຊິ ມາຕຸກຸຈ຺ຉິມ຺ຫິ, ທສສຫສ຺ສິ ກມ຺ປຖ.

‘‘ອສ຺ສມສ຺ສາວິທູຣມ຺ຫິ, ຈງ຺ກມມ຺ຫິ ຐິໂຕ ອຫໍ;

ສພ຺ເພ ສິສ຺ສາ ສມາຄນ຺ຕ຺ວາ, ອາຄຈ຺ຉຸໍ ມມ ສນ຺ຕິເກ.

‘‘ອຸສໂຠວ ມຫີ ນທຕິ, ມິຄຣາຊາວ ກູຊຕິ;

ສຸສຸມາໂຣວ ສຬຕິ, ກິໍ ວິປາໂກ ຠວິສ຺ສຕິ.

‘‘ຍໍ ປກິຕ຺ເຕມິ ສມ຺ພຸທ຺ຘໍ, ສິກຕາຖູປສນ຺ຕິເກ;

ໂສ ທານິ ຠຄວາ ສຕ຺ຖາ, ມາຕຸກຸຈ຺ຉິມຸປາຄມິ.

‘‘ເຕສໍ ຘມ຺ມກຖໍ ວຕ຺ວາ, ກິຕ຺ຕຍິຕ຺ວາ ມຫາມຸນິໍ;

ອຸຍ຺ໂຍເຊຕ຺ວາ ສເກ ສິສ຺ເສ, ປລ຺ລງ຺ກມາຠຸຊິໍ ອຫໍ.

‘‘ພລຎ຺ຈ ວຕ ເມ ຂີຓໍ, ພ຺ຍາຘິນາ ປຣເມນ ຕໍ;

ພຸທ຺ຘເສຏ຺ຐໍ ສຣິຕ຺ວານ, ຕຕ຺ຖ ກາລງ຺ກໂຕ ອຫໍ.

‘‘ສພ຺ເພ ສິສ຺ສາ ສມາຄນ຺ຕ຺ວາ, ອກໍສຸ ຈິຕກໍ ຕທາ;

ກເຬວຣຎ຺ຈ ເມ ຄຍ຺ຫ, ຈິຕກໍ ອຠິໂຣປຍຸໍ.

‘‘ຈິຕກໍ ປຣິວາເຣຕ຺ວາ, ສີເສ ກຕ຺ວານ ອຎ຺ຊລິໍ;

ໂສກສລ຺ລປເຣຕາ ເຕ, ວິກ຺ກນ຺ທິໍສຸ ສມາຄຕາ.

‘‘ເຕສໍ ລາລປ຺ປມານານໍ, ອຄມໍ ຈິຕກໍ ຕທາ;

ອຫໍ ອາຈຣິໂຍ ຕຸມ຺ຫໍ, ມາ ໂສຈິຕ຺ຖ ສຸເມຘສາ.

‘‘ສທຕ຺ເຖ ວາຍເມຍ຺ຍາຖ, ຣຕ຺ຕິນ຺ທິວມຕນ຺ທິຕາ;

ມາ ໂວ ປມຕ຺ຕາ ອຫຸຕ຺ຖ, ຂໂຓ ໂວ ປຏິປາທິໂຕ.

‘‘ສເກ ສິສ຺ເສນຸສາສິຕ຺ວາ, ເທວໂລກໍ ປຸນາຄມິໍ;

ອຏ຺ຐາຣສ ຈ ກປ຺ປານິ, ເທວໂລເກ ຣມາມຫໍ.

‘‘ສຕານໍ ປຎ຺ຈກ຺ຂຕ຺ຕຸຎ຺ຈ, ຈກ຺ກວຕ຺ຕີ ອໂຫສຫໍ;

ອເນກສຕກ຺ຂຕ຺ຕຸຎ຺ຈ, ເທວຣຊ຺ຊມກາຣຍິໍ.

‘‘ອວເສເສສຸ ກປ຺ເປສຸ, ໂວກິຓ຺ໂຓ ສໍສຣິໍ ອຫໍ;

ທຸຄ຺ຄຕິໍ ນາຠິຊານາມິ, ອຸປ຺ປາທສ຺ສ ອິທໍ ຜລໍ.

‘‘ຍຖາ ໂກມຸທິເກ ມາເສ, ພຫູ ປຸປ຺ຜນ຺ຕິ ປາທປາ;

ຕເຖວາຫມ຺ປິ ສມເຍ, ປຸປ຺ຜິໂຕມ຺ຫິ ມເຫສິນາ.

‘‘ວີຣິຍໍ ເມ ຘຸຣໂຘຣຍ຺ຫໍ, ໂຍຄກ຺ເຂມາຘິວາຫນໍ;

ນາໂຄວ ພນ຺ຘນໍ ເຉຕ຺ວາ, ວິຫຣາມິ ອນາສໂວ.

‘‘ສຕສຫສ຺ສິໂຕ ກປ຺ເປ, ຍໍ ພຸທ຺ຘມຠິກິຕ຺ຕຍິໍ;

ທຸຄ຺ຄຕິໍ ນາຠິຊານາມິ, ກິຕ຺ຕນາຍ ອິທໍ ຜລໍ.

‘‘ກິເລສາ ຌາປິຕາ ມຍ຺ຫໍ…ເປ… ກຕໍ ພຸທ຺ຘສ຺ສ ສາສນ’’ນ຺ຕິ.

ຉຬຠິຎ຺ຎຎ຺ຫິ ສມານໍ ອາຍສ຺ມນ຺ຕໍ ສິຣິມຕ຺ເຖຣໍ ‘‘ອຣິໂຍ’’ຕິ ອຊານນ຺ຕາ ປຸຖຸຊ຺ຊນາ ຠິກ຺ຂູ ສາມເຓຣາ ຈ ອປ຺ປລາຠິຕາຍ ໂລກສ຺ສ ອນຠິຄຕຠາເວນ ອສມ຺ຠາເວນ຺ຕາ ຍໍກິຎ຺ຈິ ກເຖຕ຺ວາ ຄຣຫນ຺ຕິ. ສິຣິວຑ຺ຒຕ຺ເຖຣໍ ປນ ປຈ຺ຈຍານໍ ລາຠິຠາເວນ ໂລກສ຺ສ ສກ຺ກຕຄຣຸກຕຠາວໂຕ ສມ຺ຠາເວນ຺ຕາ ປສໍສນ຺ຕິ. ເຖໂຣ ‘‘ອວຓ຺ຓາຣຫສ຺ສ ນາມ ວຓ຺ຓຠຓນໍ, ວຓ຺ຓາຣຫສ຺ສ ຈ ອວຓ຺ຓຠຓນໍ ອສ຺ສ ປຸຖຸຊ຺ຊນຠາວສ຺ສ ໂທໂສ’’ຕິ ປຸຖຸຊ຺ຊນຠາວຎ຺ຈ ຄຣຫນ຺ໂຕ –

໑໕໙. ‘‘ປເຣ ຈ ນໍ ປສໍສນ຺ຕິ, ອຕ຺ຕາ ເຈ ອສມາຫິໂຕ;

ໂມຆໍ ປເຣ ປສໍສນ຺ຕິ, ອຕ຺ຕາ ຫິ ອສມາຫິໂຕ.

໑໖໐. ‘‘ປເຣ ຈ ນໍ ຄຣຫນ຺ຕິ, ອຕ຺ຕາ ເຈ ສຸສມາຫິໂຕ;

ໂມຆໍ ປເຣ ຄຣຫນ຺ຕິ, ອຕ຺ຕາ ຫິ ສຸສມາຫິໂຕ’’ຕິ.

– ຄາຖາທ຺ວຍມຠາສິ.

ຕຕ຺ຖ ປເຣຕິ ອຕ຺ຕໂຕ ອຎ຺ເຎ ປເຣ ນາມ, ອິຘ ປນ ປຓ຺ຑິເຕຫິ ອຎ຺ເຎ ພາລາ ປເຣຕິ ອຘິປ຺ເປຕາ. ເຕສຎ຺ຫິ ອຊານິຕ຺ວາ ອປຣິໂຍຄາເຫຕ຺ວາ ຠາສນໂຕ ຄຣຫາ ວິຍ ປສໍສາປິ ອປ຺ປມາຓຠູຕາ. ນນ຺ຕິ ນໍ ປຸຄ຺ຄລໍ. ປສໍສນ຺ຕີຕິ ອວິທ຺ທສຸຠາເວນ ຕຓ຺ຫາວິປນ຺ນຕາຍ ວາ, ອຖ ວາ ອຠູຕໍເຍວ ປຸຄ຺ຄລໍ ‘‘ອສຸໂກ ຠິກ຺ຂຸ ຌານລາຠີ, ອຣິໂຍ’’ຕິ ວາ ອຠູຕຄຸຓໂຣປເນນ ກິຕ຺ເຕນ຺ຕິ ອຠິຕ຺ຖວນ຺ຕິ. ໂຍ ປເນຕ຺ຖ ຈ-ສທ຺ໂທ, ໂສ ອຕ຺ຕູປນຍຕ຺ໂຖ. ເຕນ ປເຣ ນໍ ປຸຄ຺ຄລໍ ປສໍສນ຺ຕິ ຈ, ຕຎ຺ຈ ໂຂ ເຕສໍ ປສໍສນມຕ຺ຕໍ, ນ ປນ ຕສ຺ມິໍ ປສໍສາຍ ວຕ຺ຖຸ ອຕ຺ຖີຕິ ອິມມຕ຺ຖໍ ທສ຺ເສຕິ. ອຕ຺ຕາ ເຈ ອສມາຫິໂຕຕິ ຍໍ ປຸຄ຺ຄລໍ ປເຣ ປສໍສນ຺ຕິ, ໂສ ເຈ ສຍໍ ອສມາຫິໂຕ ມຄ຺ຄສມາຘິນາ ຜລສມາຘິນາ ອຸປຈາຣປ຺ປນາສມາຘິມຕ຺ເຕເນວ ວາ ນ ສມາຫິໂຕ, ສມາຘານສ຺ສ ປຏິປກ຺ຂຠູຕານໍ ກິເລສານໍ ອປ຺ປຫີນຕ຺ຕາ ວິກ຺ຂິຕ຺ໂຕ ວິພ຺ຠນ຺ຕຈິຕ຺ໂຕ ໂຫຕິ ເຈຕິ ອຕ຺ໂຖ. ‘‘ອສມາຫິໂຕ’’ຕິ ຈ ເອເຕນ ສມາຘິນິມິຕ຺ຕານໍ ຄຸຓານໍ ອຠາວໍ ທສ຺ເສຕິ. ໂມຆນ຺ຕິ ຠາວນປຸໍສກນິທ຺ເທໂສ ‘‘ວິສມໍ ຈນ຺ທິມສູຣິຍາ ປຣິວຕ຺ຕນ຺ຕີ’’ຕິອາທີສຸ ວິຍ. ປເຣ ປສໍສນ຺ຕີຕິ ເຍ ຕໍ ອສມາຫິຕໍ ປຸຄ຺ຄລໍ ປສໍສນ຺ຕິ, ເຕ ໂມຆໍ ມຸຘາ ອມູລກໍ ປສໍສນ຺ຕິ. ກສ຺ມາ? ອຕ຺ຕາ ຫິ ອສມາຫິໂຕ ຍສ຺ມາ ຕສ຺ສ ປຸຄ຺ຄລສ຺ສ ຈິຕ຺ຕໍ ອສມາຫິຕໍ, ຕສ຺ມາຕິ ອຕ຺ໂຖ.

ທຸຕິຍຄາຖາຍໍ ຄຣຫນ຺ຕີຕິ ອຕ຺ຕໂນ ອວິທ຺ທສຸຠາເວນ ໂທສນ຺ຕຣາຍ ວາ ອຣິຍໍ ຌານລາຠິຎ຺ຈ ສມານໍ ‘‘ອສຸໂກ ຠິກ຺ຂຸ ຊາຄຣິຍໍ ນານຸຍຸຎ຺ຊຕິ ອນ຺ຕມໂສ ໂຄທຸຫນມຕ຺ຕມ຺ປິ ກາລໍ ເກວລໍ ກາຍທຬ຺ຫິພຫຸໂລ ນິທ຺ທາຣາໂມ ຠສ຺ສາຣາໂມ ສງ຺ຄຓິກາຣາໂມ ວິຫຣຕີ’’ຕິອາທິນາ ອປ຺ປຏິປຊ຺ຊມານຕາວິຠາວເນນ ວາ ຄຸຓປຣິຘໍສເນນ ວາ ຄຣຫນ຺ຕິ ນິນ຺ທນ຺ຕິ, ອຸປກ຺ໂກສນ຺ຕິ ວາຕິ ອຕ຺ໂຖ. ເສສໍ ປຐມຄາຖາຍ ວຸຕ຺ຕປຣິຍາເຍນ ເວທິຕພ຺ພໍ. ເອວໍ ເຖເຣນ ອິມາຫິ ຄາຖາຫິ ອຕ຺ຕໂນ ນິກ຺ກິເລສຠາເວ ສິຣິວຑ຺ຒສ຺ສ ຈ ສກິເລສຠາເວ ປກາສິເຕ ຕໍ ສຸຕ຺ວາ ສິຣິວຑ຺ໂຒ ສໍເວຄຊາໂຕ ວິປສ຺ສນໍ ປຏ຺ຐເປຕ຺ວາ ນຈິຣສ຺ເສວ ສທຕ຺ຖໍ ປຣິປູເຣສິ, ຄຣຫກປຸຄ຺ຄລາ ຈ ເຖຣໍ ຂມາເປສຸໍ.

ສິຣິມຕ຺ເຖຣຄາຖາວຓ຺ຓນາ ນິຏ຺ຐິຕາ.

ທຸຕິຍວຄ຺ຄວຓ຺ຓນາ ນິຏ຺ຐິຕາ.