໙. ໂຕເທຍ຺ຍສຸຕ຺ຕວຓ຺ຓນາ

໑໐໙໕. ຍສ຺ມິໍ ກາມາຕິ ໂຕເທຍ຺ຍສຸຕ຺ຕໍ. ຕຕ຺ຖ ວິໂມກ຺ໂຂ ຕສ຺ສ ກີທິໂສຕິ ຕສ຺ສ ກີທິໂສ ວິໂມກ຺ໂຂ ອິຈ຺ຉິຕພ຺ໂພຕິ ປຸຈ຺ຉຕິ. ອິທານິ ຕສ຺ສ ອຎ຺ຎວິໂມກ຺ຂາຠາວໍ ທສ຺ເສນ຺ໂຕ ຠຄວາ ທຸຕິຍໍ ຄາຖມາຫ. ຕຕ຺ຖ ວິໂມກ຺ໂຂ ຕສ຺ສ ນາປໂຣຕິ ຕສ຺ສ ອຎ຺ໂຎ ວິໂມກ຺ໂຂ ນຕ຺ຖິ.

໑໐໙໗-໘. ເອວໍ ‘‘ຕຓ຺ຫກ຺ຂໂຍ ເອວ ວິໂມກ຺ໂຂ’’ຕິ ວຸຕ຺ເຕປິ ຕມຕ຺ຖໍ ອສລ຺ລກ຺ເຂນ຺ໂຕ ‘‘ນິຣາສໂສ ໂສ ອຸທ ອາສສາໂນ’’ຕິ ປຸນ ປຸຈ຺ຉຕິ. ຕຕ຺ຖ ອຸທ ປຎ຺ຎກປ຺ປີຕິ ອຸທາຫຸ ສມາປຕ຺ຕິຎາຓາທິນາ ຎາເຓນ ຕຓ຺ຫາກປ຺ປໍ ວາ ທິຏ຺ຐິກປ຺ປໍ ວາ ກປ຺ປຍຕິ. ອຖສ຺ສ ຠຄວາ ຕໍ ອາຈິກ຺ຂນ຺ໂຕ ທຸຕິຍໍ ຄາຖມາຫ. ຕຕ຺ຖ ກາມຠເວຕິ ກາເມ ຈ ຠເວ ຈ. ເສສໍ ສພ຺ພຕ຺ຖ ປາກຏເມວ.

ເອວໍ ຠຄວາ ອິມມ຺ປິ ສຸຕ຺ຕໍ ອຣຫຕ຺ຕນິກູເຏເນວ ເທເສສິ. ເທສນາປຣິໂຍສາເນ ຈ ປຸພ຺ພສທິໂສ ເອວ ຘມ຺ມາຠິສມໂຍ ອໂຫສີຕິ.

ປຣມຕ຺ຖໂຊຕິກາຍ ຂຸທ຺ທກ-ອຏ຺ຐກຖາຍ

ສຸຕ຺ຕນິປາຕ-ອຏ຺ຐກຖາຍ ໂຕເທຍ຺ຍສຸຕ຺ຕວຓ຺ຓນາ ນິຏ຺ຐິຕາ.