໑໔. ໂປສາລສຸຕ຺ຕວຓ຺ຓນາ

໑໑໑໙-໒໐. ໂຍ ອຕີຕນ຺ຕິ ໂປສາລສຸຕ຺ຕໍ. ຕຕ຺ຖ ໂຍ ອຕີຕໍ ອາທິສຕີຕິ ໂຍ ຠຄວາ ອຕ຺ຕໂນ ຈ ປເຣສຎ຺ຈ ‘‘ເອກມ຺ປິ ຊາຕິ’’ນ຺ຕິອາທິເຠທໍ ອຕີຕໍ ອາທິສຕິ. ວິຠູຕຣູປສຎ຺ຎິສ຺ສາຕິ ສມຕິກ຺ກນ຺ຕຣູປສຎ຺ຎິສ຺ສ. ສພ຺ພກາຍປ຺ປຫາຍິໂນຕິ ຕທງ຺ຄວິກ຺ຂມ຺ຠນວເສນ ສພ຺ພຣູປກາຍປ຺ປຫາຍິໂນ, ປຫີນຣູປຠວປຏິສນ຺ຘິກສ຺ສາຕິ ອຘິປ຺ປາໂຍ. ນຕ຺ຖິ ກິຎ຺ຈີຕິ ປສ຺ສໂຕຕິ ວິຎ຺ຎາຓາຠາວວິປສ຺ສເນນ ‘‘ນຕ຺ຖິ ກິຎ຺ຈີ’’ຕິ ປສ຺ສໂຕ, ອາກິຎ຺ຈຎ຺ຎາຍຕນລາຠິໂນຕິ ວຸຕ຺ຕໍ ໂຫຕິ. ຎາຓໍ ສກ຺ການຸປຸຈ຺ຉາມີຕິ ສກ຺ກາຕິ ຠຄວນ຺ຕໍ ອາລປນ຺ໂຕ ອາຫ. ຕສ຺ສ ປຸຄ຺ຄລສ຺ສ ຎາຓໍ ປຸຈ຺ຉາມິ, ກີທິສໍ ປຸຈ຺ຉິຕພ຺ພນ຺ຕິ. ກຖໍ ເນຍ຺ໂຍຕິ ກຖໍ ໂສ ເນຕພ຺ໂພ, ກຖມສ຺ສ ອຸຕ຺ຕຣິຎາຓໍ ອຸປ຺ປາເທຕພ຺ພນ຺ຕິ.

໑໑໒໑. ອຖສ຺ສ ຠຄວາ ຕາທິເສ ປຸຄ຺ຄເລ ອຕ຺ຕໂນ ອປ຺ປຏິຫຕຎາຓຕໍ ປກາເສຕ຺ວາ ຕໍ ຎາຓໍ ພ຺ຍາກາຕຸໍ ຄາຖາທ຺ວຍມາຫ. ຕຕ຺ຖ ວິຎ຺ຎາຓຏ຺ຐິຕິໂຍ ສພ຺ພາ, ອຠິຊານໍ ຕຖາຄໂຕຕິ ອຠິສງ຺ຂາຣວເສນ ຈຕສ຺ໂສ ປຏິສນ຺ຘິວເສນ ສຕ຺ຕາຕິ ເອວໍ ສພ຺ພາ ວິຎ຺ຎາຓຏ຺ຐິຕິໂຍ ອຠິຊານນ຺ໂຕ ຕຖາຄໂຕ. ຕິຏ຺ຐນ຺ຕເມນໍ ຊານາຕີຕິ ກມ຺ມາຠິສງ຺ຂາຣວເສນ ຕິຏ຺ຐນ຺ຕໍ ເອຕໍ ປຸຄ຺ຄລໍ ຊານາຕິ ‘‘ອາຍຕິໍ ອຍໍ ເອວໍຄຕິໂກ ຠວິສ຺ສຕີ’’ຕິ. ວິມຸຕ຺ຕນ຺ຕິ ອາກິຎ຺ຈຎ຺ຎາຍຕນາທີສຸ ອຘິມຸຕ຺ຕໍ. ຕປ຺ປຣາຍຓນ຺ຕິ ຕມ຺ມຍໍ.

໑໑໒໒. ອາກິຎ຺ຈຎ຺ຎສມ຺ຠວໍ ຎຕ຺ວາຕິ ອາກິຎ຺ຈຎ຺ຎາຍຕນຊນກໍ ກມ຺ມາຠິສງ຺ຂາຣໍ ຎຕ຺ວາ ‘‘ກິນ຺ຕິ ປລິໂພໂຘ ອຍ’’ນ຺ຕິ. ນນ຺ທີ ສໍໂຍຊນໍ ອິຕີຕິ ຍາ ຈ ຕຕ຺ຖ ອຣູປຣາຄສງ຺ຂາຕາ ນນ຺ທີ, ຕຎ຺ຈ ສໍໂຍຊນໍ ອິຕິ ຎຕ຺ວາ. ຕໂຕ ຕຕ຺ຖ ວິປສ຺ສຕີຕິ ຕໂຕ ອາກິຎ຺ຈຎ຺ຎາຍຕນສມາປຕ຺ຕິໂຕ ວຸຏ຺ຐຫິຕ຺ວາ ຕໍ ສມາປຕ຺ຕິໍ ອນິຈ຺ຈາທິວເສນ ວິປສ຺ສຕິ. ເອຕໍ ຎາຓໍ ຕຖໍ ຕສ຺ສາຕິ ເອຕໍ ຕສ຺ສ ປຸຄ຺ຄລສ຺ສ ເອວໍ ວິປສ຺ສໂຕ ອນຸກ຺ກເມເນວ ອຸປ຺ປນ຺ນໍ ອຣຫຕ຺ຕຎາຓໍ ອວິປຣີຕໍ. ວຸສີມໂຕຕິ ວຸສິຕວນ຺ຕສ຺ສ. ເສສໍ ສພ຺ພຕ຺ຖ ປາກຏເມວ.

ເອວໍ ຠຄວາ ອິມມ຺ປິ ສຸຕ຺ຕໍ ອຣຫຕ຺ຕນິກູເຏເນວ ເທເສສິ. ເທສນາປຣິໂຍສາເນ ຈ ປຸພ຺ພສທິໂສ ເອວ ຘມ຺ມາຠິສມໂຍ ອໂຫສີຕິ.

ປຣມຕ຺ຖໂຊຕິກາຍ ຂຸທ຺ທກ-ອຏ຺ຐກຖາຍ

ສຸຕ຺ຕນິປາຕ-ອຏ຺ຐກຖາຍ ໂປສາລສຸຕ຺ຕວຓ຺ຓນາ ນິຏ຺ຐິຕາ.