໑໕. ໂມຆຣາຊສຸຕ຺ຕວຓ຺ຓນາ

໑໑໒໓. ທ຺ວາຫໍ ສກ຺ກນ຺ຕິ ໂມຆຣາຊສຸຕ຺ຕໍ. ຕຕ຺ຖ ທ຺ວາຫນ຺ຕິ ທ຺ເວ ວາເຣ ອຫໍ. ໂສ ຫິ ປຸພ຺ເພ ອຊິຕສຸຕ຺ຕສ຺ສ ຈ ຕິສ຺ສເມຕ຺ເຕຍ຺ຍສຸຕ຺ຕສ຺ສ ຈ ອວສາເນ ທ຺ວິກ຺ຂຕ຺ຕຸໍ ຠຄວນ຺ຕໍ ປຸຈ຺ຉິ. ຠຄວາ ປນສ຺ສ ອິນ຺ທ຺ຣິຍປຣິປາກໍ ອາຄມຍມາໂນ ນ ພ຺ຍາກາສິ. ເຕນາຫ – ‘‘ທ຺ວາຫໍ ສກ຺ກໍ ອປຸຈ຺ຉິສ຺ສ’’ນ຺ຕິ. ຍາວຕຕິຍຎ຺ຈ ເທວີສິ, ພ຺ຍາກໂຣຕີຕິ ເມ ສຸຕນ຺ຕິ ຍາວຕຕິຍຎ຺ຈ ສຫຘມ຺ມິກໍ ປຸຏ຺ໂຐ ວິສຸທ຺ຘິເທວຠູໂຕ ອິສິ ຠຄວາ ສມ຺ມາສມ຺ພຸທ຺ໂຘ ພ຺ຍາກໂຣຕີຕິ ເອວໍ ເມ ສຸຕໍ. ໂຄຘາວຣີຕີເຣເຍວ ກິຣ ໂສ ເອວມສ຺ໂສສິ. ເຕນາຫ – ‘‘ພ຺ຍາກໂຣຕີຕິ ເມ ສຸຕ’’ນ຺ຕິ.

໑໑໒໔. ອຍໍ ໂລໂກຕິ ມນຸສ຺ສໂລໂກ. ປໂຣ ໂລໂກຕິ ຕໍ ຐເປຕ຺ວາ ອວເສໂສ. ສເທວໂກຕິ ພ຺ຣຫ຺ມໂລກໍ ຐເປຕ຺ວາ ອວເສໂສ ອຸປປຕ຺ຕິເທວສມ຺ມຸຕິເທວຍຸຕ຺ໂຕ, ‘‘ພ຺ຣຫ຺ມໂລໂກ ສເທວໂກ’’ຕິ ເອຕໍ ວາ ‘‘ສເທວເກ ໂລເກ’’ຕິອາທິນຍນິທສ຺ສນມຕ຺ຕໍ, ເຕນ ສພ຺ໂພປິ ຕຖາວຸຕ຺ຕປ຺ປກາໂຣ ໂລໂກ ເວທິຕພ຺ໂພ.

໑໑໒໕. ເອວໍ ອຠິກ຺ກນ຺ຕທສ຺ສາວິນ຺ຕິ ເອວໍ ອຄ຺ຄທສ຺ສາວິໍ, ສເທວກສ຺ສ ໂລກສ຺ສ ອຊ຺ຌາສຍາຘິມຸຕ຺ຕິຄຕິປຣາຍຓາທີນິ ປສ຺ສິຕຸໍ ສມຕ຺ຖນ຺ຕິ ທສ຺ເສຕິ.

໑໑໒໖. ສຸຎ຺ຎໂຕ ໂລກໍ ອເວກ຺ຂສ຺ສູຕິ ອວສິຍປວຕ຺ຕສລ຺ລກ຺ຂຓວເສນ ວາ ຕຸຈ຺ຉສງ຺ຂາຣສມນຸປສ຺ສນາວເສນ ວາຕິ ທ຺ວີຫິ ກາຣເຓຫິ ສຸຎ຺ຎໂຕ ໂລກໍ ປສ຺ສ. ອຕ຺ຕານຸທິຏ຺ຐິໍ ອູຫຈ຺ຈາຕິ ສກ຺ກາຍທິຏ຺ຐິໍ ອຸທ຺ຘຣິຕ຺ວາ. ເສສໍ ສພ຺ພຕ຺ຖ ປາກຏເມວ.

ເອວໍ ຠຄວາ ອິມມ຺ປິ ສຸຕ຺ຕໍ ອຣຫຕ຺ຕນິກູເຏເນວ ເທເສສິ. ເທສນາປຣິໂຍສາເນ ຈ ວຸຕ຺ຕສທິໂສ ເອວ ຘມ຺ມາຠິສມໂຍ ອໂຫສີຕິ.

ປຣມຕ຺ຖໂຊຕິກາຍ ຂຸທ຺ທກ-ອຏ຺ຐກຖາຍ

ສຸຕ຺ຕນິປາຕ-ອຏ຺ຐກຖາຍ ໂມຆຣາຊສຸຕ຺ຕວຓ຺ຓນາ ນິຏ຺ຐິຕາ.