໕. ປຣມຏ຺ຐກສຸຕ຺ຕວຓ຺ຓນາ

໘໐໓. ປຣມນ຺ຕິ ທິຏ຺ຐີສູຕິ ປຣມຏ຺ຐກສຸຕ຺ຕໍ. ກາ ອຸປ຺ປຕ຺ຕິ? ຠຄວຕິ ກິຣ ສາວຕ຺ຖິຍໍ ວິຫຣນ຺ເຕ ນານາຕິຕ຺ຖິຍາ ສນ຺ນິປຕິຕ຺ວາ ອຕ຺ຕໂນ ອຕ຺ຕໂນ ທິຏ຺ຐິໍ ທີເປນ຺ຕາ ‘‘ອິທໍ ປຣມໍ, ອິທໍ ປຣມ’’ນ຺ຕິ ກລຫໍ ກຕ຺ວາ ຣຎ຺ໂຎ ອາໂຣເຈສຸໍ. ຣາຊາ ສມ຺ພຫຸເລ ຊຈ຺ຈນ຺ເຘ ສນ຺ນິປາຕາເປຕ຺ວາ ‘‘ອິເມສໍ ຫຕ຺ຖິໍ ທສ຺ເສຖາ’’ຕິ ອາຓາເປສິ. ຣາຊປຸຣິສາ ອນ຺ເຘ ສນ຺ນິປາຕາເປຕ຺ວາ ຫຕ຺ຖິໍ ປຸຣໂຕ ສຍາເປຕ຺ວາ ‘‘ປສ຺ສຖາ’’ຕິ ອາຫໍສຸ. ເຕ ຫຕ຺ຖິສ຺ສ ເອກເມກໍ ອງ຺ຄໍ ປຣາມສິໍສຸ. ຕໂຕ ຣຎ຺ຎາ ‘‘ກີທິໂສ, ຠເຓ, ຫຕ຺ຖີ’’ຕິ ປຸຏ຺ໂຐ ໂຍ ໂສຓ຺ຑໍ ປຣາມສິ, ໂສ ‘‘ເສຍ຺ຍຖາປິ, ມຫາຣາຊ, ນງ຺ຄລີສາ’’ຕິ ຠຓິ. ເຍ ທນ຺ຕາທີນິ ປຣາມສິໍສຸ, ເຕ ອິຕຣໍ ‘‘ມາ ໂຠ ຣຎ຺ໂຎ ປຸຣໂຕ ມຸສາ ຠຓີ’’ຕິ ປຣິຠາສິຕ຺ວາ ‘‘ເສຍ຺ຍຖາປິ, ມຫາຣາຊ, ຠິຕ຺ຕິຂິໂລ’’ຕິອາທີນິ ອາຫໍສຸ. ຣາຊາ ຕໍ ສພ຺ພໍ ສຸຕ຺ວາ ‘‘ອີທິໂສ ຕຸມ຺ຫາກໍ ສມໂຍ’’ຕິ ຕິຕ຺ຖິເຍ ອຸຍ຺ໂຍເຊສິ. ອຎ຺ຎຕໂຣ ປິຓ຺ຑຈາຣິໂກ ຕໍ ປວຕ຺ຕິໍ ຎຕ຺ວາ ຠຄວໂຕ ອາໂຣເຈສິ. ຠຄວາ ຕສ຺ສໍ ອຏ຺ຐຸປ຺ປຕ຺ຕິຍໍ ຠິກ຺ຂູ ອາມນ຺ເຕຕ຺ວາ ‘‘ຍຖາ, ຠິກ຺ຂເວ, ຊຈ຺ຈນ຺ຘາ ຫຕ຺ຖິໍ ອຊານນ຺ຕາ ຕໍ ຕໍ ອງ຺ຄໍ ປຣາມສິຕ຺ວາ ວິວທິໍສຸ, ເອວໍ ຕິຕ຺ຖິຍາ ວິໂມກ຺ຂນ຺ຕິກຘມ຺ມໍ ອຊານນ຺ຕາ ຕໍ ຕໍ ທິຏ຺ຐິໍ ປຣາມສິຕ຺ວາ ວິວທນ຺ຕີ’’ຕິ ວຕ຺ວາ ຘມ຺ມເທສນຕ຺ຖໍ ອິມໍ ສຸຕ຺ຕມຠາສິ.

ຕຕ຺ຖ ປຣມນ຺ຕິ ທິຏ຺ຐີສຸ ປຣິພ຺ພສາໂນຕິ ‘‘ອິທໍ ປຣມ’’ນ຺ຕິ ຄເຫຕ຺ວາ ສກາຍ ສກາຍ ທິຏ຺ຐິຍາ ວສມາໂນ. ຍທຸຕ຺ຕຣິ ກຸຣຸເຕຕິ ຍໍ ອຕ຺ຕໂນ ສຕ຺ຖາຣາທິໍ ເສຏ຺ຐໍ ກໂຣຕິ. ຫີນາຕິ ອຎ຺ເຎ ຕໂຕ ສພ຺ພມາຫາຕິ ຕໍ ອຕ຺ຕໂນ ສຕ຺ຖາຣາທິໍ ຐເປຕ຺ວາ ຕໂຕ ອຎ຺ເຎ ສພ຺ເພ ‘‘ຫີນາ ອິເມ’’ຕິ ອາຫ. ຕສ຺ມາ ວິວາທານິ ອວີຕິວຕ຺ໂຕຕິ ເຕນ ກາຣເຓນ ໂສ ທິຏ຺ຐິກລເຫ ອວີຕິວຕ຺ໂຕວ ໂຫຕິ.

໘໐໔. ທຸຕິຍຄາຖາຍ ອຕ຺ໂຖ – ເອວໍ ອວີຕິວຕ຺ໂຕ ຈ ຍໍ ທິຏ຺ເຐ ສຸເຕ ສີລວເຕ ມຸເຕຕິ ເອເຕສຸ ວຕ຺ຖູສຸ ອຸປ຺ປນ຺ນທິຏ຺ຐິສງ຺ຂາເຕ ອຕ຺ຕນິ ປຸພ຺ເພ ວຸຕ຺ຕປ຺ປກາຣໍ ອານິສໍສໍ ປສ຺ສຕິ. ຕເທວ ໂສ ຕຕ຺ຖ ສກາຍ ທິຏ຺ຐິຍາ ອານິສໍສໍ ‘‘ອິທໍ ເສຏ຺ຐ’’ນ຺ຕິ ອຠິນິວິສິຕ຺ວາ ອຎ຺ຎໍ ສພ຺ພໍ ປຣສຕ຺ຖາຣາທິກໍ ນິຫີນໂຕ ປສ຺ສຕິ.

໘໐໕. ຕຕິຍຄາຖາຍ ອຕ຺ໂຖ – ເອວໍ ປສ຺ສໂຕ ຈສ຺ສ ຍໍ ອຕ຺ຕໂນ ສຕ຺ຖາຣາທິໍ ນິສ຺ສິໂຕ ອຎ຺ຎໍ ປຣສຕ຺ຖາຣາທິໍ ຫີນໍ ປສ຺ສຕິ ຕໍ ປນ ທສ຺ສນໍ ຄນ຺ຖເມວ ກຸສລາ ວທນ຺ຕິ, ພນ຺ຘນນ຺ຕິ ວຸຕ຺ຕໍ ໂຫຕິ. ຍສ຺ມາ ເອຕເທວ, ຕສ຺ມາ ຫິ ທິຏ຺ຐໍວ ສຸຕໍ ມຸຕໍ ວາ ສີລພ຺ພຕໍ ຠິກ຺ຂຸ ນ ນິສ຺ສເຍຍ຺ຍ, ນາຠິນິເວເສຍ຺ຍາຕິ ວຸຕ຺ຕໍ ໂຫຕິ.

໘໐໖. ຈຕຸຕ຺ຖຄາຖາຍ ອຕ຺ໂຖ – ນ ເກວລໍ ທິຏ຺ຐສຸຕາທິໍ ນ ນິສ຺ສເຍຍ຺ຍ, ອປິຈ ໂຂ ປນ ອສຎ຺ຊາຕໍ ອຸປຣູປຣິ ທິຏ຺ຐິມ຺ປິ ໂລກສ຺ມິໍ ນ ກປ຺ປເຍຍ຺ຍ, ນ ຊເນຍ຺ຍາຕິ ວຸຕ຺ຕໍ ໂຫຕິ. ກີທິສໍ? ຎາເຓນ ວາ ສີລວເຕນ ວາປິ, ສມາປຕ຺ຕິຎາຓາທິນາ ຎາເຓນ ວາ ສີລວເຕນ ວາ ຍາ ກປ຺ປິຍຕິ, ເອຕໍ ທິຏ຺ຐິໍ ນ ກປ຺ເປຍ຺ຍ. ນ ເກວລຎ຺ຈ ທິຏ຺ຐິໍ ນ ກປ຺ປເຍຍ຺ຍ, ອປິຈ ໂຂ ປນ ມາເນນປິ ຊາຕິອາທີຫິ ວຕ຺ຖູຫິ ສໂມຕິ ອຕ຺ຕານມນູປເນຍ຺ຍ, ຫີໂນ ນ ມຎ຺ເຎຖ ວິເສສິ ວາປີຕິ.

໘໐໗. ປຎ຺ຈມຄາຖາຍ ອຕ຺ໂຖ – ເອວຎ຺ຫິ ທິຏ຺ຐິໍ ອກປ຺ເປນ຺ໂຕ ອມຎ຺ຎມາໂນ ຈ ອຕ຺ຕໍ ປຫາຍ ອນຸປາທິຍາໂນ ອິຘ ວາ ຍໍ ປຸພ຺ເພ ຄຫິຕໍ, ຕໍ ປຫາຍ ອປຣໍ ອຄ຺ຄຓ຺ຫນ຺ໂຕ ຕສ຺ມິມ຺ປິ ວຸຕ຺ຕປ຺ປກາເຣ ຎາເຓ ທຸວິຘໍ ນິສ຺ສຍໍ ໂນ ກໂຣຕິ. ອກໂຣນ຺ໂຕ ຈ ສ ເວ ວິຍຕ຺ເຕສຸ ນານາທິຏ຺ຐິວເສນ ຠິນ຺ເນສຸ ສຕ຺ເຕສຸ ນ ວຄ຺ຄສາຣີ ຉນ຺ທາທິວເສນ ອຄຈ຺ຉນຘມ຺ໂມ ຫຸຕ຺ວາ ທ຺ວາສຏ຺ຐິຍາ ທິຏ຺ຐີສຸ ກິຎ຺ຈິປິ ທິຏ຺ຐິໍ ນ ປຈ຺ເຈຕິ, ນ ປຈ຺ຈາຄຈ຺ຉຕີຕິ ວຸຕ຺ຕໍ ໂຫຕິ.

໘໐໘-໑໐. ອິທານິ ໂຍ ໂສ ອິມາຍ ຄາຖາຍ ວຸຕ຺ໂຕ ຂີຓາສໂວ, ຕສ຺ສ ວຓ຺ຓຠຓນຕ຺ຖໍ ‘‘ຍສ຺ສູຠຍນ຺ເຕ’’ຕິອາທິກາ ຕິສ຺ໂສ ຄາຖາໂຍ ອາຫ. ຕຕ຺ຖ ອຸຠຍນ຺ເຕຕິ ປຸພ຺ເພ ວຸຕ຺ຕຜສ຺ສາທິເຠເທ. ປຓິຘີຕິ ຕຓ຺ຫາ. ຠວາຠວາຍາຕິ ປຸນປ຺ປຸນຠວາຍ. ອິຘ ວາ ຫຸຣໍ ວາຕິ ສກຕ຺ຕຠາວາທິເຠເທ ອິຘ ວາ ປຣຕ຺ຕຠາວາທິເຠເທ ປຣຕ຺ຖ ວາ. ທິຏ຺ເຐ ວາຕິ ທິຏ຺ຐສຸທ຺ຘິຍາ ວາ. ເອສ ນໂຍ ສຸຕາທີສຸ. ສຎ຺ຎາຕິ ສຎ຺ຎາສມຸຏ຺ຐາປິກາ ທິຏ຺ຐິ. ຘມ຺ມາປິ ເຕສໍ ນ ປຏິຈ຺ຉິຕາເສຕິ ທ຺ວາສຏ຺ຐິທິຏ຺ຐິຄຕຘມ຺ມາປິ ເຕສໍ ‘‘ອິທເມວ ສຈ຺ຈໍ ໂມຆມຎ຺ຎ’’ນ຺ຕິ ເອວໍ ນ ປຏິຈ຺ຉິຕາ. ປາຣງ຺ຄໂຕ ນ ປຈ຺ເຈຕິ ຕາທີຕິ ນິພ຺ພານປາຣໍ ຄໂຕ ເຕນ ເຕນ ມຄ຺ເຄນ ປຫີເນ ກິເລເສ ປຸນ ນາຄຈ຺ຉຕິ, ປຎ຺ຈຫິ ຈ ອາກາເຣຫິ ຕາທີ ໂຫຕີຕິ. ເສສໍ ປາກຏເມວາຕິ.

ປຣມຕ຺ຖໂຊຕິກາຍ ຂຸທ຺ທກ-ອຏ຺ຐກຖາຍ

ສຸຕ຺ຕນິປາຕ-ອຏ຺ຐກຖາຍ ປຣມຏ຺ຐກສຸຕ຺ຕວຓ຺ຓນາ ນິຏ຺ຐິຕາ.