໔. ສຸທ຺ຘຏ຺ຐກສຸຕ຺ຕວຓ຺ຓນາ

໗໙໕. ປສ຺ສາມິ ສຸທ຺ຘນ຺ຕິ ສຸທ຺ຘຏ຺ຐກສຸຕ຺ຕໍ. ກາ ອຸປ຺ປຕ຺ຕິ? ອຕີເຕ ກິຣ ກສ຺ສປສ຺ສ ຠຄວໂຕ ກາເລ ພາຣາຓສິວາສີ ອຎ຺ຎຕໂຣ ກຸຏຸມ຺ພິໂກ ປຎ຺ຈຫິ ສກຏສເຕຫິ ປຈ຺ຈນ຺ຕຊນປທໍ ອຄມາສິ ຠຓ຺ຑຄ຺ຄຫຓຕ຺ຖໍ. ຕຕ຺ຖ ວນຈຣເກນ ສທ຺ຘິໍ ມິຕ຺ຕໍ ກຕ຺ວາ ຕສ຺ສ ປຓ຺ຓາກາຣໍ ທຕ຺ວາ ປຸຈ຺ຉິ – ‘‘ກຈ຺ຈິ, ເຕ ສມ຺ມ, ຈນ຺ທນສາຣໍ ທິຏ຺ຐປຸພ຺ພ’’ນ຺ຕິ? ‘‘ອາມ ສາມີ’’ຕິ ຈ ວຸຕ຺ເຕ ເຕເນວ ສທ຺ຘິໍ ຈນ຺ທນວນໍ ປວິສິຕ຺ວາ ສພ຺ພສກຏານິ ຈນ຺ທນສາຣສ຺ສ ປູເຣຕ຺ວາ ຕມ຺ປິ ວນຈຣກໍ ‘‘ຍທາ, ສມ຺ມ, ພາຣາຓສິໍ ອາຄຈ຺ຉສິ, ຕທາ ຈນ຺ທນສາຣໍ ຄເຫຕ຺ວາ ອາຄຈ຺ເຉຍ຺ຍາສີ’’ຕິ ວຕ຺ວາ ພາຣາຓສິໍເຍວ ອຄມາສິ. ອຖາປເຣນ ສມເຍນ ໂສປິ ວນຈຣໂກ ຈນ຺ທນສາຣໍ ຄເຫຕ຺ວາ ຕສ຺ສ ຆຣໍ ອຄມາສິ. ໂສ ຕໍ ທິສ຺ວາ ສພ຺ພໍ ປຏິສນ຺ຖາຣໍ ກຕ຺ວາ ສາຍນ຺ຫສມເຍ ຈນ຺ທນສາຣໍ ປິສາເປຕ຺ວາ ສມຸຄ຺ຄໍ ປູເຣຕ຺ວາ ‘‘ຄຈ຺ຉ, ສມ຺ມ, ນ຺ຫາຍິຕ຺ວາ ອາຄຈ຺ຉາ’’ຕິ ອຕ຺ຕໂນ ປຸຣິເສນ ສທ຺ຘິໍ ນ຺ຫານຕິຕ຺ຖໍ ເປເສສິ. ເຕນ ຈ ສມເຍນ ພາຣາຓສິຍໍ ອຸສ຺ສໂວ ໂຫຕິ. ອຖ ພາຣາຓສິວາສິໂນ ປາໂຕວ ທານໍ ທຕ຺ວາ ສາຍໍ ສຸທ຺ຘວຕ຺ຖນິວຕ຺ຖາ ມາລາຄນ຺ຘາທີນິ ຄເຫຕ຺ວາ ກສ຺ສປສ຺ສ ຠຄວໂຕ ມຫາເຈຕິຍໍ ວນ຺ທິຕຸໍ ຄຈ຺ຉນ຺ຕິ. ໂສ ວນຈຣໂກ ເຕ ທິສ຺ວາ ‘‘ມຫາຊໂນ ກຸຫິໍ ຄຈ຺ຉຕີ’’ຕິ ປຸຈ຺ຉິ. ‘‘ວິຫາຣໍ ເຈຕິຍວນ຺ທນຕ຺ຖາຍາ’’ຕິ ຈ ສຸຕ຺ວາ ສຍມ຺ປິ ອຄມາສິ. ຕຕ຺ຖ ມນຸສ຺ເສ ຫຣິຕາລມໂນສິລາທີຫິ ນານປ຺ປກາເຣຫິ ເຈຕິເຍ ປູຊໍ ກໂຣນ຺ເຕ ທິສ຺ວາ ກິຎ຺ຈິ ຈິຕ຺ຣໍ ກາຕຸໍ ອຊານນ຺ໂຕ ຕໍ ຈນ຺ທນໍ ຄເຫຕ຺ວາ ມຫາເຈຕິເຍ ສຸວຓ຺ຓິຏ຺ຐການໍ. ອຸປຣິ ກໍສປາຕິມຕ຺ຕໍ ມຓ຺ຑລໍ ອກາສິ. ອຖ ຕຕ຺ຖ ສູຣິຍຸຄ຺ຄມນເວລາຍໍ ສູຣິຍຣສ຺ມິໂຍ ອຸຏ຺ຐຫິໍສຸ. ໂສ ຕໍ ທິສ຺ວາ ປສີທິ, ປຕ຺ຖນຎ຺ຈ ອກາສິ ‘‘ຍຕ຺ຖ ຍຕ຺ຖ ນິພ຺ພຕ຺ຕາມິ, ອີທິສາ ເມ ຣສ຺ມິໂຍ ອຸເຣ ອຸຏ຺ຐຫນ຺ຕູ’’ຕິ. ໂສ ກາລໍ ກຕ຺ວາ ຕາວຕິໍເສສຸ ນິພ຺ພຕ຺ຕິ. ຕສ຺ສ ອຸເຣ ຣສ຺ມິໂຍ ອຸຏ຺ຐຫິໍສຸ, ຈນ຺ທມຓ຺ຑລໍ ວິຍສ຺ສ ອຸຣມຓ຺ຑລໍ ວິໂຣຈຕິ, ‘‘ຈນ຺ທາໂຠ ເທວປຸຕ຺ໂຕ’’ຕ຺ເວວ ຈ ນໍ ສຎ຺ຊານິໍສຸ.

ໂສ ຕາຍ ສມ຺ປຕ຺ຕິຍາ ຉສຸ ເທວໂລເກສຸ ອນຸໂລມປຏິໂລມໂຕ ເອກໍ ພຸທ຺ຘນ຺ຕຣໍ ເຂເປຕ຺ວາ ອມ຺ຫາກໍ ຠຄວຕິ ອຸປ຺ປນ຺ເນ ສາວຕ຺ຖິຍໍ ພ຺ຣາຫ຺ມຓມຫາສາລກຸເລ ນິພ຺ພຕ຺ຕິ, ຕເຖວສ຺ສ ອຸເຣ ຈນ຺ທມຓ຺ຑລສທິສໍ ຣສ຺ມິມຓ຺ຑລໍ ອໂຫສິ. ນາມກຣຓທິວເສ ຈສ຺ສ ມງ຺ຄລໍ ກຕ຺ວາ ພ຺ຣາຫ຺ມຓາ ຕໍ ມຓ຺ຑລໍ ທິສ຺ວາ ‘‘ຘຎ຺ຎປຸຎ຺ຎລກ຺ຂໂຓ ອຍໍ ກຸມາໂຣ’’ຕິ ວິມ຺ຫິຕາ ‘‘ຈນ຺ທາໂຠ’’ ຕ຺ເວວ ນາມໍ ອກໍສຸ. ຕໍ ວຍປ຺ປຕ຺ຕໍ ພ຺ຣາຫ຺ມຓາ ຄເຫຕ຺ວາ ອລງ຺ກຣິຕ຺ວາ ຣຕ຺ຕກຎ຺ຈຸກໍ ປາຣຸປາເປຕ຺ວາ ຣເຖ ອາໂຣເປຕ຺ວາ ‘‘ມຫາພ຺ຣຫ຺ມາ ອຍ’’ນ຺ຕິ ປູເຊຕ຺ວາ ‘‘ໂຍ ຈນ຺ທາຠໍ ປສ຺ສຕິ, ໂສ ຍສຘນາທີນິ ລຠຕິ, ສມ຺ປຣາຍຎ຺ຈ ສຄ຺ຄໍ ຄຈ຺ຉຕີ’’ຕິ ອຸຄ຺ໂຆເສນ຺ຕາ ຄາມນິຄມຣາຊຘານີສຸ ອາຫິຓ຺ຑນ຺ຕິ. ຄຕຄຕຏ຺ຐາເນ ມນຸສ຺ສາ ‘‘ເອສ ກິຣ ໂຠ ຈນ຺ທາໂຠ ນາມ, ໂຍ ເອຕໍ ປສ຺ສຕິ, ໂສ ຍສຘນສຄ຺ຄາທີນິ ລຠຕີ’’ຕິ ອຸປຣູປຣິ ອາຄຈ຺ຉນ຺ຕິ, ສກລຊມ຺ພຸທີໂປ ຈລິ. ພ຺ຣາຫ຺ມຓາ ຕຸຈ຺ຉຫຕ຺ຖການໍ ອາຄຕານໍ ນ ທສ຺ເສນ຺ຕິ, ສຕໍ ວາ ສຫສ຺ສໍ ວາ ຄເຫຕ຺ວາ ອາຄຕານເມວ ທສ຺ເສນ຺ຕິ. ເອວໍ ຈນ຺ທາຠໍ ຄເຫຕ຺ວາ ອນຸວິຈຣນ຺ຕາ ພ຺ຣາຫ຺ມຓາ ກເມນ ສາວຕ຺ຖິໍ ອນຸປ຺ປຕ຺ຕາ.

ເຕນ ຈ ສມເຍນ ຠຄວາ ປວຕ຺ຕິຕວຣຘມ຺ມຈກ຺ໂກ ອນຸປຸພ຺ເພນ ສາວຕ຺ຖິໍ ອາຄນ຺ຕ຺ວາ ສາວຕ຺ຖິຍໍ ວິຫຣຕິ ເຊຕວເນ ພຫຸຊນຫິຕາຍ ຘມ຺ມໍ ເທເສນ຺ໂຕ. ອຖ ຈນ຺ທາໂຠ ສາວຕ຺ຖິໍ ປຕ຺ວາ ສມຸທ຺ທປກ຺ຂນ຺ຕກຸນ຺ນທີ ວິຍ ອປາກໂຏ ອໂຫສິ, ຈນ຺ທາໂຠຕິ ຠຓນ຺ໂຕປິ ນຕ຺ຖິ. ໂສ ສາຍນ຺ຫສມເຍ ມຫາຊນກາຍໍ ມາລາຄນ຺ຘາທີນິ ອາທາຍ ເຊຕວນາຠິມຸຂໍ ຄຈ຺ຉນ຺ຕໍ ທິສ຺ວາ ‘‘ກຸຫິໍ ຄຈ຺ຉຖາ’’ຕິ ປຸຈ຺ຉິ. ‘‘ພຸທ຺ໂຘ ໂລເກ ອຸປ຺ປນ຺ໂນ, ໂສ ພຫຸຊນຫິຕາຍ ຘມ຺ມໍ ເທເສຕິ, ຕໍ ໂສຕຸໍ ເຊຕວນໍ ຄຈ຺ຉາມາ’’ຕິ ຈ ເຕສໍ ວຈນໍ ສຸຕ຺ວາ ໂສປິ ພ຺ຣາຫ຺ມຓຄຓປຣິວຸໂຕ ຕຕ຺ເຖວ ອຄມາສິ. ຠຄວາ ຈ ຕສ຺ມິໍ ສມເຍ ຘມ຺ມສຠາຍໍ ວຣພຸທ຺ຘາສເນ ນິສິນ຺ໂນວ ໂຫຕິ. ຈນ຺ທາໂຠ ຠຄວນ຺ຕໍ ອຸປສງ຺ກມ຺ມ ມຘຸຣປຏິສນ຺ຖາຣໍ ກຕ຺ວາ ເອກມນ຺ຕໍ ນິສີທິ, ຕາວເທວ ຈສ຺ສ ໂສ ອາໂລໂກ ອນ຺ຕຣຫິໂຕ. ພຸທ຺ຘາໂລກສ຺ສ ຫິ ສມີເປ ອສີຕິຫຕ຺ຖພ຺ຠນ຺ຕເຣ ອຎ຺ໂຎ ອາໂລໂກ ນາຠິໂຠຕິ. ໂສ ‘‘ອາໂລໂກ ເມ ນຏ຺ໂຐ’’ຕິ ນິສີທິຕ຺ວາວ ອຸຏ຺ຐາສິ, ອຸຏ຺ຐຫິຕ຺ວາ ຈ ຄນ຺ຕຸມາຣທ຺ໂຘ. ອຖ ນໍ ອຎ຺ຎຕໂຣ ປຸຣິໂສ ອາຫ – ‘‘ກິໍ ໂຠ ຈນ຺ທາຠ, ສມຓສ຺ສ ໂຄຕມສ຺ສ ຠີໂຕ ຄຈ຺ຉສີ’’ຕິ. ນາຫໍ ຠີໂຕ ຄຈ຺ຉາມິ, ອປິຈ ເມ ອິມສ຺ສ ເຕເຊນ ອາໂລໂກ ນ ສມ຺ປຊ຺ຊຕີຕິ ປຸນເທວ ຠຄວໂຕ ປຸຣໂຕ ນິສີທິຕ຺ວາ ປາທຕລາ ປຏ຺ຐາຍ ຍາວ ເກສຄ຺ຄາ ຣູປຣໍສິລກ຺ຂຓາທິສມ຺ປຕ຺ຕິໍ ທິສ຺ວາ ‘‘ມເຫສກ຺ໂຂ ສມໂຓ ໂຄຕໂມ, ມມ ອຸເຣ ອປ຺ປມຕ຺ຕໂກ ອາໂລໂກ ອຸຏ຺ຐິໂຕ, ຕາວຕເກນປິ ມໍ ຄເຫຕ຺ວາ ພ຺ຣາຫ຺ມຓາ ສກລຊມ຺ພຸທີປໍ ວິຈຣນ຺ຕິ. ເອວໍ ວຣລກ຺ຂຓສມ຺ປຕ຺ຕິສມນ຺ນາຄຕສ຺ສ ສມຓສ຺ສ ໂຄຕມສ຺ສ ເນວ ມາໂນ ອຸປ຺ປນ຺ໂນ, ອທ຺ຘາ ອຍໍ ອໂນມຄຸຓສມນ຺ນາຄໂຕ ຠວິສ຺ສຕິ ສຕ຺ຖາ ເທວມນຸສ຺ສານ’’ນ຺ຕິ ອຕິວິຍ ປສນ຺ນຈິຕ຺ໂຕ ຠຄວນ຺ຕໍ ວນ຺ທິຕ຺ວາ ປພ຺ພຊ຺ຊໍ ຍາຈິ. ຠຄວາ ອຎ຺ຎຕຣໍ ເຖຣໍ ອາຓາເປສິ – ‘‘ປພ຺ພາເຊຫິ ນ’’ນ຺ຕິ. ໂສ ຕໍ ປພ຺ພາເຊຕ຺ວາ ຕຈປຎ຺ຈກກມ຺ມຏ຺ຐານໍ ອາຈິກ຺ຂິ. ໂສ ວິປສ຺ສນໍ ອາຣຠິຕ຺ວາ ນ ຈິເຣເນວ ອຣຫຕ຺ຕໍ ປຕ຺ວາ ‘‘ຈນ຺ທາຠຕ຺ເຖໂຣ’’ຕິ ວິສ຺ສຸໂຕ ອໂຫສິ. ຕໍ ອາຣພ຺ຠ ຠິກ຺ຂູ ກຖໍ ສມຸຏ຺ຐາເປສຸໍ ‘‘ກິໍ ນຸ ໂຂ, ອາວຸໂສ, ເຍ ຈນ຺ທາຠໍ ອທ຺ທສໍສຸ. ເຕ ຍສໍ ວາ ຘນໍ ວາ ລຠິໍສຸ, ສຄ຺ຄໍ ວາ ຄຈ຺ຉິໍສຸ, ວິສຸທ຺ຘິໍ ວາ ປາປຸຓິໍສຸ ເຕນ ຈກ຺ຂຸທ຺ວາຣິກຣູປທສ຺ສເນນາ’’ຕິ. ຠຄວາ ຕສ຺ສໍ ອຏ຺ຐຸປ຺ປຕ຺ຕິຍໍ ອິມໍ ສຸຕ຺ຕມຠາສິ.

ຕຕ຺ຖ ປຐມຄາຖາຍ ຕາວຕ຺ໂຖ – ນ, ຠິກ຺ຂເວ, ເອວຣູເປນ ທສ຺ສເນນ ສຸທ຺ຘິ ໂຫຕິ. ອປິຈ ໂຂ ກິເລສມລິນຕ຺ຕາ ອສຸທ຺ຘໍ, ກິເລສໂຣຄານໍ ອວິຄມາ ສໂຣຄເມວ ຈນ຺ທາຠໍ ພ຺ຣາຫ຺ມຓໍ ອຎ຺ຎໍ ວາ ເອວຣູປໍ ທິສ຺ວາ ທິຏ຺ຐິຄຕິໂກ ພາໂລ ອຠິຊານາຕິ ‘‘ປສ຺ສາມິ ສຸທ຺ຘໍ ປຣມໍ ອໂຣຄໍ, ເຕນ ຈ ທິຏ຺ຐິສງ຺ຂາເຕນ ທສ຺ສເນນ ສໍສຸທ຺ຘິ ນຣສ຺ສ ໂຫຕີ’’ຕິ, ໂສ ເອວໍ ອຠິຊານນ຺ໂຕ ຕໍ ທສ຺ສນໍ ‘‘ປຣມ’’ນ຺ຕິ ຎຕ຺ວາ ຕສ຺ມິໍ ທສ຺ສເນ ສຸທ຺ຘານຸປສ຺ສີ ສມາໂນ ຕໍ ທສ຺ສນໍ ‘‘ມຄ຺ຄຎາຓ’’ນ຺ຕິ ປຈ຺ເຈຕິ. ຕໍ ປນ ມຄ຺ຄຎາຓໍ ນ ໂຫຕິ. ເຕນາຫ – ‘‘ທິຏ຺ເຐນ ເຈ ສຸທ຺ຘີ’’ຕິ ທຸຕິຍຄາຖໍ.

໗໙໖. ຕສ຺ສຕ຺ໂຖ – ເຕນ ຣູປທສ຺ສນສງ຺ຂາເຕນ ທິຏ຺ເຐນ ຍທິ ກິເລສສຸທ຺ຘິ ນຣສ຺ສ ໂຫຕິ. ເຕນ ວາ ຎາເຓນ ໂສ ຍທິ ຊາຕິອາທິທຸກ຺ຂໍ ປຊຫາຕິ. ເອວໍ ສນ຺ເຕ ອຣິຍມຄ຺ຄໂຕ ອຎ຺ເຎນ ອສຸທ຺ຘິມຄ຺ເຄເນວ ໂສ ສຸຊ຺ຌຕິ, ຣາຄາທີຫິ ອຸປຘີຫິ ສອຸປຘິໂກ ເອວ ສມາໂນ ສຸຊ຺ຌຕີຕິ ອາປນ຺ນໍ ໂຫຕິ, ນ ຈ ເອວໍວິໂຘ ສຸຊ຺ຌຕິ. ຕສ຺ມາ ທິຏ຺ຐີ ຫິ ນໍ ປາວ ຕຖາ ວທານໍ, ສາ ນໍ ທິຏ຺ຐິເຍວ ‘‘ມິຈ຺ຉາທິຏ຺ຐິໂກ ອຍ’’ນ຺ຕິ ກເຖຕິ ທິຏ຺ຐິອນຸຣູປໍ ‘‘ສສ຺ສໂຕ ໂລໂກ’’ຕິອາທິນາ ນເຍນ ຕຖາ ຕຖາ ວທນ຺ຕິ.

໗໙໗. ນ ພ຺ຣາຫ຺ມໂຓຕິ ຕຕິຍຄາຖາ. ຕສ຺ສຕ຺ໂຖ – ໂຍ ປນ ພາຫິຕປາປຕ຺ຕາ ພ຺ຣາຫ຺ມໂຓ ໂຫຕິ, ໂສ ມຄ຺ເຄນ ອຘິຄຕາສວກ຺ຂໂຍ ຂີຓາສວພ຺ຣາຫ຺ມໂຓ ອຣິຍມຄ຺ຄຎາຓໂຕ ອຎ຺ເຎນ ອຠິມງ຺ຄລສມ຺ມຕຣູປສງ຺ຂາເຕ ທິຏ຺ເຐ ຕຖາວິຘສທ຺ທສງ຺ຂາເຕ ສຸເຕ ອວີຕິກ຺ກມສງ຺ຂາເຕ ສີເລ ຫຕ຺ຖິວຕາທິເຠເທ ວເຕ ປຖວິອາທິເຠເທ ມຸເຕ ຈ ອຸປ຺ປນ຺ເນນ ມິຈ຺ຉາຎາເຓນ ສຸທ຺ຘິໍ ນ ອາຫ. ເສສມສ຺ສ ພ຺ຣາຫ຺ມຓສ຺ສ ວຓ຺ຓຠຓນຕ຺ຖໍ ວຸຕ຺ຕໍ. ໂສ ຫິ ເຕຘາຕຸກປຸຎ຺ເຎ ສພ຺ພສ຺ມິຎ຺ຈ ປາເປ ອນູປລິຕ຺ໂຕ, ຕສ຺ສ ປຫີນຕ຺ຕາ ອຕ຺ຕທິຏ຺ຐິຍາ ຍສ຺ສ ກສ຺ສຈິ ວາ ຄຫຓສ຺ສ ປຫີນຕ຺ຕາ ອຕ຺ຕຎ຺ຊໂຫ, ປຸຎ຺ຎາຠິສງ຺ຂາຣາທີນໍ ອກຣຓໂຕ ນຍິຘ ປກຸພ຺ພມາໂນຕິ ວຸຈ຺ຈຕິ. ຕສ຺ມາ ນໍ ເອວໍ ປສໍສນ຺ໂຕ ອາຫ. ສພ຺ພສ຺ເສວ ຈສ຺ສ ປຸຣິມປາເທນ ສມ຺ພນ຺ໂຘ ເວທິຕພ຺ໂພ – ປຸຎ຺ເຎ ຈ ປາເປ ຈ ອນູປລິຕ຺ໂຕ, ອຕ຺ຕຎ຺ຊໂຫ ນຍິຘ ປກຸພ຺ພມາໂນ, ນ ພ຺ຣາຫ຺ມໂຓ ອຎ຺ຎໂຕ ສຸທ຺ຘິມາຫາຕິ.

໗໙໘. ເອວໍ ນ ພ຺ຣາຫ຺ມໂຓ ອຎ຺ຎໂຕ ສຸທ຺ຘິມາຫາຕິ ວຕ຺ວາ ອິທານິ ເຍ ທິຏ຺ຐິຄຕິກາ ອຎ຺ຎໂຕ ສຸທ຺ຘິໍ ພ຺ຣຸວນ຺ຕິ, ເຕສໍ ຕສ຺ສາ ທິຏ຺ຐິຍາ ອນິພ຺ພາຫກຠາວໍ ທສ຺ເສນ຺ໂຕ ‘‘ປຸຣິມໍ ປຫາຍາ’’ຕິ ຄາຖມາຫ. ຕສ຺ສຕ຺ໂຖ – ເຕ ຫິ ອຎ຺ຎໂຕ ສຸທ຺ຘິວາທາ ສມານາປິ ຍສ຺ສາ ທິຏ຺ຐິຍາ ອປ຺ປຫີນຕ຺ຕາ ຄຫຓມຸຎ຺ຈນໍ ໂຫຕິ. ຕາຍ ປຸຣິມໍ ສຕ຺ຖາຣາທິໍ ປຫາຍ ອປຣໍ ນິສ຺ສິຕາ ເອຊາສງ຺ຂາຕາຍ ຕຓ຺ຫາຍ ອນຸຄຕາ ອຠິຠູຕາ ຣາຄາທິເຠທໍ ນ ຕຣນ຺ຕິ ສງ຺ຄໍ, ຕຎ຺ຈ ອຕຣນ຺ຕາ ຕໍ ຕໍ ຘມ຺ມໍ ອຸຄ຺ຄຓ຺ຫນ຺ຕິ ຈ ນິຣສ຺ສຊນ຺ຕິ ຈ ມກ຺ກໂຏວ ສາຂນ຺ຕິ.

໗໙໙. ປຎ຺ຈມຄາຖາຍ ສມ຺ພນ຺ໂຘ – ໂຍ ຈ ໂສ ‘‘ທິຏ຺ຐີ ຫິ ນໍ ປາວ ຕຖາ ວທານ’’ນ຺ຕິ ວຸຕ຺ໂຕ, ໂສ ສຍໍ ສມາທາຍາຕິ. ຕຕ຺ຖ ສຍນ຺ຕິ ສາມໍ. ສມາທາຍາຕິ ຄເຫຕ຺ວາ. ວຕານີຕິ ຫຕ຺ຖິວຕາທີນິ. ອຸຈ຺ຈາວຈນ຺ຕິ ອປຣາປຣໍ ຫີນປຓີຕໍ ວາ ສຕ຺ຖາຣໂຕ ສຕ຺ຖາຣາທິໍ. ສຎ຺ຎສຕ຺ໂຕຕິ ກາມສຎ຺ຎາທີສຸ ລຄ຺ໂຄ. ວິທ຺ວາ ຈ ເວເທຫິ ສເມຈ຺ຈ ຘມ຺ມນ຺ຕິ ປຣມຕ຺ຖວິທ຺ວາ ຈ ອຣຫາ ຈຕູຫິ ມຄ຺ຄຎາຓເວເທຫິ ຈຕຸສຈ຺ຈຘມ຺ມໍ ອຠິສເມຈ຺ຈາຕິ. ເສສໍ ປາກຏເມວ.

໘໐໐. ສ ສພ຺ພຘມ຺ເມສຸ ວິເສນິຠູໂຕ, ຍໍ ກິຎ຺ຈິ ທິຏ຺ຐໍວ ສຸຕໍ ມຸຕໍ ວາຕິ ໂສຠູຣິປຎ຺ໂຎ ຂີຓາສໂວ ຍໍ ກິຎ຺ຈິ ທິຏ຺ຐໍ ວາ ສຸຕໍ ວາ ມຸຕໍ ວາ ເຕສຸ ສພ຺ພຘມ຺ເມສຸ ມາຣເສນໍ ວິນາເສຕ຺ວາ ຐິຕຠາເວນ ວິເສນິຠູໂຕ. ຕເມວທສ຺ສິນ຺ຕິ ຕໍ ເອວໍ ວິສຸທ຺ຘທສ຺ສິໍ. ວິວຏໍ ຈຣນ຺ຕນ຺ຕິຕຓ຺ຫຈ຺ຉທນາທິວິຄເມນ ວິວຏໍ ຫຸຕ຺ວາ ຈຣນ຺ຕໍ. ເກນີຘ ໂລກສ຺ມິໍ ວິກປ຺ປເຍຍ຺ຍາຕິ ເກນ ອິຘ ໂລເກ ຕຓ຺ຫາກປ຺ເປນ ວາ ທິຏ຺ຐິກປ຺ເປນ ວາ ໂກຈິ ວິກປ຺ເປຍ຺ຍ, ເຕສໍ ວາ ປຫີນຕ຺ຕາ ຣາຄາທິນາ ປຸພ຺ເພ ວຸຕ຺ເຕນາຕິ.

໘໐໑. ນ ກປ຺ປຍນ຺ຕີຕິ ຄາຖາຍ ສມ຺ພນ຺ໂຘ ອຕ຺ໂຖ ຈ – ກິຎ຺ຈ ຠິຍ຺ໂຍ? ເຕ ຫິ ຕາທິສາ ສນ຺ໂຕ ທ຺ວິນ຺ນໍ ກປ຺ປານໍ ປຸເຣກ຺ຂາຣານຎ຺ຈ ເກນຈິ ນ ກປ຺ປຍນ຺ຕິ ນ ປຸເຣກ຺ຂໂຣນ຺ຕິ, ປຣມຕ຺ຖອຈ຺ຈນ຺ຕສຸທ຺ຘິອຘິຄຕຕ຺ຕາ ອນຈ຺ຈນ຺ຕສຸທ຺ຘິໍເຍວ ອກິຣິຍສສ຺ສຕທິຏ຺ຐິໍ ອຈ຺ຈນ຺ຕ ສຸທ຺ຘີຕິ ນ ເຕ ວທນ຺ຕິ. ອາທານຄນ຺ຖໍ ຄຖິຕໍ ວິສຊ຺ຊາຕິ ຈຕຸພ຺ພິຘມ຺ປິ ຣູປາທີນໍ ອາທາຍກຕ຺ຕາ ອາທານຄນ຺ຖໍ ອຕ຺ຕໂນ ຈິຕ຺ຕສນ຺ຕາເນ ຄຖິຕໍ ພທ຺ຘໍ ອຣິຍມຄ຺ຄສຕ຺ເຖນ ວິສຊ຺ຊ ຉິນ຺ທິຕ຺ວາ. ເສສໍ ປາກຏເມວ.

໘໐໒. ສີມາຕິໂຄຕິ ຄາຖາ ເອກປຸຄ຺ຄລາຘິຏ຺ຐານາຍ ເທສນາຍ ວຸຕ຺ຕາ. ປຸພ຺ພສທິໂສ ເອວ ປນສ຺ສາ ສມ຺ພນ຺ໂຘ, ໂສ ເອວໍ ອຕ຺ຖວຓ຺ຓນາຍ ສທ຺ຘິໍ ເວທິຕພ຺ໂພ – ກິຎ຺ຈ ຠິຍ຺ໂຍ ໂສ ອີທິໂສ ຠູຣິປຎ຺ໂຎ ຈຕຸນ຺ນໍ ກິເລສສີມານໍ ອຕີຕຕ຺ຕາ ສີມາຕິໂຄ ພາຫິຕປາປຕ຺ຕາ ຈ ພ຺ຣາຫ຺ມໂຓ, ອິຕ຺ຖມ຺ຠູຕສ຺ສ ຈ ຕສ຺ສ ນຕ຺ຖິ ປຣຈິຕ຺ຕປຸພ຺ເພນິວາສຎາເຓຫິ ຎຕ຺ວາ ວາ ມໍສຈກ຺ຂຸທິພ຺ພຈກ຺ຂູຫິ ທິສ຺ວາ ວາ ກິຎ຺ຈິ ສມຸຄ຺ຄຫີຕໍ, ອຠິນິວິຏ຺ຐນ຺ຕິ ວຸຕ຺ຕໍ ໂຫຕິ. ໂສ ຈ ກາມຣາຄາຠາວໂຕ ນ ຣາຄຣາຄີ, ຣູປາຣູປຣາຄາຠາວໂຕ ນ ວິຣາຄຣຕ຺ໂຕ. ຍໂຕ ເອວໍວິຘສ຺ສ ‘‘ອິທໍ ປຣ’’ນ຺ຕິ ກິຎ຺ຈິ ອິຘ ອຸຄ຺ຄຫິຕໍ ນຕ຺ຖີຕິ ອຣຫຕ຺ຕນິກູເຏນ ເທສນໍ ນິຏ຺ຐາເປສິ.

ປຣມຕ຺ຖໂຊຕິກາຍ ຂຸທ຺ທກ-ອຏ຺ຐກຖາຍ

ສຸຕ຺ຕນິປາຕ-ອຏ຺ຐກຖາຍ ສຸທ຺ຘຏ຺ຐກສຸຕ຺ຕວຓ຺ຓນາ ນິຏ຺ຐິຕາ.