໓. ທຸຏ຺ຐຏ຺ຐກສຸຕ຺ຕວຓ຺ຓນາ

໗໘໗. ວທນ຺ຕິ ເວ ທຸຏ຺ຐມນາປີຕິ ທຸຏ຺ຐຏ຺ຐກສຸຕ຺ຕໍ. ກາ ອຸປ຺ປຕ຺ຕິ? ອາທິຄາຖາຍ ຕາວ ອຸປ຺ປຕ຺ຕິ – ມຸນິສຸຕ຺ຕນເຍນ ຠຄວໂຕ ຠິກ຺ຂຸສງ຺ຆສ຺ສ ຈ ອຸປ຺ປນ຺ນລາຠສກ຺ກາຣໍ ອສຫມານາ ຕິຕ຺ຖິຍາ ສຸນ຺ທຣິໍ ປຣິພ຺ພາຊິກໍ ອຸຍ຺ໂຍເຊສຸໍ. ສາ ກິຣ ຊນປທກລ຺ຍາຓີ ເສຕວຕ຺ຖປຣິພ຺ພາຊິກາວ ອໂຫສິ. ສາ ສຸນ຺ຫາຕາ ສຸນິວຕ຺ຖາ ມາລາຄນ຺ຘວິເລປນວິຠູສິຕາ ຠຄວໂຕ ຘມ຺ມໍ ສຸຕ຺ວາ ສາວຕ຺ຖິວາສີນໍ ເຊຕວນໂຕ ນິກ຺ຂມນເວລາຍ ສາວຕ຺ຖິໂຕ ນິກ຺ຂມິຕ຺ວາ ເຊຕວນາຠິມຸຂີ ຄຈ຺ຉຕິ. ມນຸສ຺ເສຫິ ຈ ‘‘ກຸຫິໍ ຄຈ຺ຉສີ’’ຕິ ປຸຈ຺ຉິຕາ ‘‘ສມຓໍ ໂຄຕມໍ ສາວເກ ຈສ຺ສ ຣມຍິຕຸໍ ຄຈ຺ຉາມີ’’ຕິ ວຕ຺ວາ ເຊຕວນທ຺ວາຣໂກຏ຺ຐເກ ວິຈຣິຕ຺ວາ ເຊຕວນທ຺ວາຣໂກຏ຺ຐເກ ປິທຫິເຕ ນຄຣໍ ປວິສິຕ຺ວາ ປຠາເຕ ປຸນ ເຊຕວນໍ ຄນ຺ຕ຺ວາ ຄນ຺ຘກຸຏິສມີເປ ປຸປ຺ຜານິ ວິຈິນນ຺ຕີ ວິຍ ຈຣຕິ. ພຸທ຺ຘຸປຏ຺ຐານໍ ອາຄເຕຫິ ຈ ມນຸສ຺ເສຫິ ‘‘ກິມຕ຺ຖໍ ອາຄຕາສີ’’ຕິ ປຸຈ຺ຉິຕາ ຍໍກິຎ຺ຈິເທວ ຠຓຕິ. ເອວໍ ອຑ຺ຒມາສມຕ຺ເຕ ວີຕິກ຺ກນ຺ເຕ ຕິຕ຺ຖິຍາ ຕໍ ຊີວິຕາ ໂວໂຣເປຕ຺ວາ ປຣິຂາຕເຏ ນິກ຺ຂິປິຕ຺ວາ ປຠາເຕ ‘‘ສຸນ຺ທຣິໍ ນ ປສ຺ສາມາ’’ຕິ ໂກລາຫລໍ ກຕ຺ວາ ຣຎ຺ໂຎ ຈ ອາໂຣເຈຕ຺ວາ ເຕນ ອນຸຎ຺ຎາຕາ ເຊຕວນໍ ປວິສິຕ຺ວາ ວິຈິນນ຺ຕາ ວິຍ ຕໍ ນິກ຺ຂິຕ຺ຕຏ຺ຐານາ ອຸທ຺ຘຣິຕ຺ວາ ມຎ຺ຈກໍ ອາໂຣເປຕ຺ວາ ນຄຣໍ ອຠິຫຣິຕ຺ວາ ອຸປກ຺ໂກສໍ ອກໍສຸ. ສພ຺ພໍ ປາຬິຍໍ (ອຸທາ. ໓໘) ອາຄຕນເຍເນວ ເວທິຕພ຺ພໍ.

ຠຄວາ ຕໍ ທິວສໍ ປຈ຺ຈູສສມເຍ ພຸທ຺ຘຈກ຺ຂຸນາ ໂລກໍ ໂວໂລເກນ຺ໂຕ ‘‘ຕິຕ຺ຖິຍາ ອຊ຺ຊ ອຍສໍ ອຸປ຺ປາເທສ຺ສນ຺ຕີ’’ຕິ ຎຕ຺ວາ ‘‘ເຕສໍ ສທ຺ທຫິຕ຺ວາ ມາທິເສ ຈິຕ຺ຕໍ ປໂກເປຕ຺ວາ ມຫາຊໂນ ອປາຍາຠິມຸໂຂ ມາ ອໂຫສີ’’ຕິ ຄນ຺ຘກຸຏິທ຺ວາຣໍ ປິທຫິຕ຺ວາ ອນ຺ໂຕຄນ຺ຘກຸຏິຍໍເຍວ ອຈ຺ຉິ, ນ ນຄຣໍ ປິຓ຺ຑາຍ ປາວິສິ. ຠິກ຺ຂູ ປນ ທ຺ວາຣໍ ປິທຫິຕໍ ທິສ຺ວາ ປຸພ຺ພສທິສເມວ ປວິສິໍສຸ. ມນຸສ຺ສາ ຠິກ຺ຂູ ທິສ຺ວາ ນານປ຺ປກາເຣຫິ ອກ຺ໂກສິໍສຸ. ອຖ ອາຍສ຺ມາ ອານນ຺ໂທ ຠຄວໂຕ ຕໍ ປວຕ຺ຕິໍ ອາໂຣເຈຕ຺ວາ ‘‘ຕິຕ຺ຖິເຍຫິ, ຠນ຺ເຕ, ມຫາອຍໂສ ອຸປ຺ປາທິໂຕ, ນ ສກ຺ກາ ອິຘ ວສິຕຸໍ, ວິປຸໂລ ຊມ຺ພຸທີໂປ, ອຎ຺ຎຕ຺ຖ ຄຈ຺ຉາມາ’’ຕິ ອາຫ. ຕຕ຺ຖປິ ອຍເສ ອຸຏ຺ຐິເຕ ກຸຫິໍ ຄມິສ຺ສສິ ອານນ຺ທາຕິ? ‘‘ອຎ຺ຎໍ ນຄຣໍ ຠຄວາ’’ຕິ. ອຖ ຠຄວາ ‘‘ອາຄເມຫິ, ອານນ຺ທ, ສຕ຺ຕາຫເມວາຍໍ ສທ຺ໂທ ຠວິສ຺ສຕິ, ສຕ຺ຕາຫຈ຺ຈເຍນ ເຍຫິ ອຍໂສ ກໂຕ, ເຕສໍເຍວ ອຸປຣິ ປຕິສ຺ສຕີ’’ຕິ ວຕ຺ວາ ອານນ຺ທຕ຺ເຖຣສ຺ສ ຘມ຺ມເທສນຕ຺ຖໍ ‘‘ວທນ຺ຕິ ເວ’’ຕິ ອິມໍ ຄາຖມຠາສິ.

ຕຕ຺ຖ ວທນ຺ຕີຕິ ຠຄວນ຺ຕໍ ຠິກ຺ຂຸສງ຺ຆຎ຺ຈ ອຸປວທນ຺ຕິ. ທຸຏ຺ຐມນາປິ ເອເກ ອໂຖປິ ເວ ສຈ຺ຈມນາຕິ ເອກຈ຺ເຈ ທຸຏ຺ຐຈິຕ຺ຕາ, ເອກຈ຺ເຈ ຕຖສຎ຺ຎິໂນປິ ຫຸຕ຺ວາ, ຕິຕ຺ຖິຍາ ທຸຏ຺ຐຈິຕ຺ຕາ, ເຍ ເຕສໍ ວຈນໍ ສຸຕ຺ວາ ສທ຺ທຫິໍສຸ, ເຕ ສຈ຺ຈມນາຕິ ອຘິປ຺ປາໂຍ. ວາທຎ຺ຈ ຊາຕນ຺ຕິ ເອຕໍ ອກ຺ໂກສວາທໍ ອຸປ຺ປນ຺ນໍ. ມຸນິ ໂນ ອຸເປຕີຕິ ອກາຣກຕາຍ ຈ ອກຸປ຺ປນຕາຍ ຈ ພຸທ຺ຘມຸນິ ນ ອຸເປຕິ. ຕສ຺ມາ ມຸນີ ນຕ຺ຖິ ຂິໂລ ກຸຫິຎ຺ຈີຕິ ເຕນ ກາຣເຓນ ອຍໍ ມຸນິ ຣາຄາທິຂິເລຫິ ນຕ຺ຖິ ຂິໂລ ກຸຫິຎ຺ຈີຕິ ເວທິຕພ຺ໂພ.

໗໘໘. ອິມຎ຺ຈ ຄາຖໍ ວຕ຺ວາ ຠຄວາ ອານນ຺ທຕ຺ເຖຣໍ ປຸຈ຺ຉິ, ‘‘ເອວໍ ຂຸໍເສຕ຺ວາ ວມ຺ເຠຕ຺ວາ ວຸຈ຺ຈມານາ ຠິກ຺ຂູ, ອານນ຺ທ, ກິໍ ວທນ຺ຕີ’’ຕິ. ນ ກິຎ຺ຈິ ຠຄວາຕິ. ‘‘ນ, ອານນ຺ທ, ‘ອຫໍ ສີລວາ’ຕິ ສພ຺ພຕ຺ຖ ຕຸຓ຺ຫີ ຠວິຕພ຺ພໍ, ໂລເກ ຫິ ນາຠາສມານໍ ຊານນ຺ຕິ ມິສ຺ສໍ ພາເລຫິ ປຓ຺ຑິຕ’’ນ຺ຕິ ວຕ຺ວາ, ‘‘ຠິກ຺ຂູ, ອານນ຺ທ, ເຕ ມນຸສ຺ເສ ເອວໍ ປຏິໂຈເທນ຺ຕູ’’ຕິ ຘມ຺ມເທສນຕ຺ຖາຍ ‘‘ອຠູຕວາທີ ນິຣຍໍ ອຸເປຕີ’’ຕິ ອິມໍ ຄາຖມຠາສິ. ເຖໂຣ ຕໍ ອຸຄ຺ຄເຫຕ຺ວາ ຠິກ຺ຂູ ອາຫ – ‘‘ມນຸສ຺ສາ ຕຸມ຺ເຫຫິ ອິມາຍ ຄາຖາຍ ປຏິໂຈເທຕພ຺ພາ’’ຕິ. ຠິກ຺ຂູ ຕຖາ ອກໍສຸ. ປຓ຺ຑິຕມນຸສ຺ສາ ຕຸຓ຺ຫີ ອເຫສຸໍ. ຣາຊາປິ ຣາຊປຸຣິເສ ສພ຺ພໂຕ ເປເສຕ຺ວາ ເຍສໍ ຘຸຕ຺ຕານໍ ລຎ຺ຊໍ ທຕ຺ວາ ຕິຕ຺ຖິຍາ ຕໍ ມາຣາເປສຸໍ, ເຕ ຄເຫຕ຺ວາ ນິຄ຺ຄຍ຺ຫ ຕໍ ປວຕ຺ຕິໍ ຎຕ຺ວາ ຕິຕ຺ຖິເຍ ປຣິຠາສິ. ມນຸສ຺ສາປິ ຕິຕ຺ຖິເຍ ທິສ຺ວາ ເລຑ຺ຑຸນາ ປຫຣນ຺ຕິ, ປໍສຸນາ ໂອກິຣນ຺ຕິ ‘‘ຠຄວໂຕ ອຍສໍ ອຸປ຺ປາເທສຸ’’ນ຺ຕິ. ອານນ຺ທຕ຺ເຖໂຣ ຕໍ ທິສ຺ວາ ຠຄວໂຕ ອາໂຣເຈສິ, ຠຄວາ ເຖຣສ຺ສ ອິມໍ ຄາຖມຠາສິ ‘‘ສກຎ຺ຫິ ທິຏ຺ຐິໍ…ເປ… ວເທຍ຺ຍາ’’ຕິ.

ຕສ຺ສຕ຺ໂຖ – ຍາຍໍ ທິຏ຺ຐິ ຕິຕ຺ຖິຍຊນສ຺ສ ‘‘ສຸນ຺ທຣິໍ ມາເຣຕ຺ວາ ສມຓານໍ ສກ຺ຍປຸຕ຺ຕິຍານໍ ອວຓ຺ຓໍ ປກາເສຕ຺ວາ ເອເຕນຸປາເຍນ ລທ຺ຘໍ ສກ຺ກາຣໍ ສາທິຍິສ຺ສາມາ’’ຕິ, ໂສ ຕໍ ທິຏ຺ຐິໍ ກຖໍ ອຕິກ຺ກເມຍ຺ຍ, ອຖ ໂຂ ໂສ ອຍໂສ ຕເມວ ຕິຕ຺ຖິຍຊນໍ ປຈ຺ຈາຄໂຕ ຕໍ ທິຏ຺ຐິໍ ອຈ຺ເຈຕຸໍ ອສກ຺ໂກນ຺ຕໍ. ໂຍ ວາ ສສ຺ສຕາທິວາທີ, ໂສປິ ສກໍ ທິຏ຺ຐິໍ ກຖໍ ອຈ຺ຈເຍຍ຺ຍ ເຕນ ທິຏ຺ຐິຈ຺ຉນ຺ເທນ ອນຸນີໂຕ ຕາຍ ຈ ທິຏ຺ຐິຣຸຈິຍາ ນິວິຏ຺ໂຐ, ອປິຈ ໂຂ ປນ ສຍໍ ສມຕ຺ຕານິ ປກຸພ຺ພມາໂນ ອຕ຺ຕນາວ ປຣິປຸຓ຺ຓານິ ຕານິ ທິຏ຺ຐິຄຕານິ ກໂຣນ຺ໂຕ ຍຖາ ຊາເນຍ຺ຍ, ຕເຖວ ວເທຍ຺ຍາຕິ.

໗໘໙. ອຖ ຣາຊາ ສຕ຺ຕາຫຈ຺ຈເຍນ ຕໍ ກຸຓປໍ ຉຑ຺ຑາເປຕ຺ວາ ສາຍນ຺ຫສມຍໍ ວິຫາຣໍ ຄນ຺ຕ຺ວາ ຠຄວນ຺ຕໍ ອຠິວາເທຕ຺ວາ ອາຫ – ‘‘ນນຸ, ຠນ຺ເຕ, ອີທິເສ ອຍເສ ອຸປ຺ປນ຺ເນ ມຍ຺ຫມ຺ປິ ອາໂຣເຈຕພ຺ພໍ ສິຍາ’’ຕິ. ເອວໍ ວຸຕ຺ເຕ ຠຄວາ, ‘‘ນ, ມຫາຣາຊ, ‘ອຫໍ ສີລວາ ຄຸຓສມ຺ປນ຺ໂນ’ຕິ ປເຣສໍ ອາໂຣເຈຕຸໍ ອຣິຍານໍ ປຕິຣູປ’’ນ຺ຕິ ວຕ຺ວາ ຕສ຺ສາ ອຏ຺ຐຸປ຺ປຕ຺ຕິຍໍ ‘‘ໂຍ ອຕ຺ຕໂນ ສີລວຕານີ’’ຕິ ອວເສສຄາຖາໂຍ ອຠາສິ.

ຕຕ຺ຖ ສີລວຕານີຕິ ປາຕິໂມກ຺ຂາທີນິ ສີລານິ ອາຣຎ຺ຎິກາທີນິ ຘຸຕງ຺ຄວຕານິ ຈ. ອນານຸປຸຏ຺ໂຐຕິ ອປຸຈ຺ຉິໂຕ. ປາວາຕິ ວທຕິ. ອນຣິຍຘມ຺ມໍ ກຸສລາ ຕມາຫຸ, ໂຍ ອາຕຸມານໍ ສຍເມວ ປາວາຕິ ໂຍ ເອວໍ ອຕ຺ຕານໍ ສຍເມວ ວທຕິ, ຕສ຺ສ ຕໍ ວາທໍ ‘‘ອນຣິຍຘມ຺ໂມ ເອໂສ’’ຕິ ກຸສລາ ເອວໍ ກເຖນ຺ຕິ.

໗໙໐. ສນ຺ໂຕຕິ ຣາຄາທິກິເລສວູປສເມນ ສນ຺ໂຕ, ຕຖາ ອຠິນິພ຺ພຸຕຕ຺ໂຕ. ອິຕິຫນ຺ຕິ ສີເລສຸ ອກຕ຺ຖມາໂນຕິ ‘‘ອຫມສ຺ມິ ສີລສມ຺ປນ຺ໂນ’’ຕິອາທິນາ ນເຍນ ອິຕິ ສີເລສຸ ອກຕ຺ຖມາໂນ, ສີລນິມິຕ຺ຕໍ ອຕ຺ຕູປນາຍິກໍ ວາຈໍ ອຠາສມາໂນຕິ ວຸຕ຺ຕໍ ໂຫຕິ. ຕມຣິຍຘມ຺ມໍ ກຸສລາ ວທນ຺ຕີຕິ ຕສ຺ສ ຕໍ ອກຕ຺ຖນໍ ‘‘ອຣິຍຘມ຺ໂມ ເອໂສ’’ຕິ ພຸທ຺ຘາທໂຍ ຂນ຺ຘາທິກຸສລາ ວທນ຺ຕິ. ຍສ຺ສຸສ຺ສທາ ນຕ຺ຖິ ກຸຫິຎ຺ຈິ ໂລເກຕິ ຍສ຺ສ ຂີຓາສວສ຺ສ ຣາຄາທໂຍ ສຕ຺ຕ ອຸສ຺ສທາ ກຸຫິຎ຺ຈິ ໂລເກ ນຕ຺ຖິ, ຕສ຺ສ ຕໍ ອກຕ຺ຖນໍ ‘‘ອຣິຍຘມ຺ໂມ ເອໂສ’’ຕິ ເອວໍ ກຸສລາ ວທນ຺ຕີຕິ ສມ຺ພນ຺ໂຘ.

໗໙໑. ເອວໍ ຂີຓາສວປຏິປຕ຺ຕິໍ ທສ຺ເສຕ຺ວາ ອິທານິ ທິຏ຺ຐິຄຕິການໍ ຕິຕ຺ຖິຍານໍ ປຏິປຕ຺ຕິໍ ຣຎ຺ໂຎ ທສ຺ເສນ຺ໂຕ ອາຫ – ‘‘ປກປ຺ປິຕາ ສງ຺ຂຕາ’’ຕິ. ຕຕ຺ຖ ປກປ຺ປິຕາຕິ ປຣິກປ຺ປິຕາ. ສງ຺ຂຕາຕິ ປຈ຺ຈຍາຠິສງ຺ຂຕາ. ຍສ຺ສາຕິ ຍສ຺ສ ກສ຺ສຈິ ທິຏ຺ຐິຄຕິກສ຺ສ. ຘມ຺ມາຕິ ທິຏ຺ຐິໂຍ. ປຸຣກ຺ຂຕາຕິ ປຸຣໂຕ ກຕາ. ສນ຺ຕີຕິ ສໍວິຊ຺ຊນ຺ຕິ. ອວີວທາຕາຕິ ອໂວທາຕາ. ຍທຕ຺ຕນິ ປສ຺ສຕິ ອານິສໍສໍ, ຕໍ ນິສ຺ສິໂຕ ກຸປ຺ປປຏິຈ຺ຈສນ຺ຕິນ຺ຕິ ຍສ຺ເສເຕ ທິຏ຺ຐິຘມ຺ມາ ປຸຣກ຺ຂຕາ ອໂວທາຕາ ສນ຺ຕິ, ໂສ ເອວໍວິໂຘ ຍສ຺ມາ ອຕ຺ຕນິ ຕສ຺ສາ ທິຏ຺ຐິຍາ ທິຏ຺ຐິຘມ຺ມິກຎ຺ຈ ສກ຺ກາຣາທິໍ, ສມ຺ປຣາຍິກຎ຺ຈ ຄຕິວິເສສາທິໍ ອານິສໍສໍ ປສ຺ສຕິ, ຕສ຺ມາ ຕຎ຺ຈ ອານິສໍສໍ, ຕຎ຺ຈ ກຸປ຺ປຕາຍ ຈ ປຏິຈ຺ຈສມຸປ຺ປນ຺ນຕາຍ ຈ ສມ຺ມຸຕິສນ຺ຕິຕາຍ ຈ ກຸປ຺ປປຏິຈ຺ຈສນ຺ຕິສງ຺ຂາຕໍ ທິຏ຺ຐິໍ ນິສ຺ສິໂຕວ ໂຫຕິ, ໂສ ຕນ຺ນິສ຺ສິຕຕ຺ຕາ ອຕ຺ຕານໍ ວາ ອຸກ຺ກໍເສຍ຺ຍ ປເຣ ວາ ວມ຺ເຠຍ຺ຍ ອຠູເຕຫິປິ ຄຸຓໂທເສຫິ.

໗໙໒. ເອວໍ ນິສ຺ສິເຕນ ຈ ທິຏ຺ຐີນິເວສາ…ເປ… ອາທິຍຕີ ຈ ຘມ຺ມນ຺ຕິ. ຕຕ຺ຖ ທິຏ຺ຐີນິເວສາຕິ ອິທໍສຈ຺ຈາຠິນິເວສສງ຺ຂາຕານິ ທິຏ຺ຐິນິເວສນານິ. ນ ຫິ ສ຺ວາຕິວຕ຺ຕາຕິ ສຸເຂນ ອຕິວຕ຺ຕິຕພ຺ພາ ນ ໂຫນ຺ຕິ. ຘມ຺ເມສຸ ນິຈ຺ເຉຍ຺ຍ ສມຸຄ຺ຄຫີຕນ຺ຕິ ທ຺ວາສຏ຺ຐິທິຏ຺ຐິຘມ຺ເມສຸ ຕໍ ຕໍ ສມຸຄ຺ຄຫິຕໍ ອຠິນິວິຏ຺ຐໍ ຘມ຺ມໍ ນິຈ຺ຉິນິຕ຺ວາ ປວຕ຺ຕຕ຺ຕາ ທິຏ຺ຐິນິເວສາ ນ ຫິ ສ຺ວາຕິວຕ຺ຕາຕິ ວຸຕ຺ຕໍ ໂຫຕິ. ຕສ຺ມາ ນໂຣ ເຕສຸ ນິເວສເນສຸ, ນິຣສ຺ສຕີ ອາທິຍຕີ ຈ ຘມ຺ມນ຺ຕິ ຍສ຺ມາ ນ ຫິ ສ຺ວາຕິວຕ຺ຕາ, ຕສ຺ມາ ນໂຣ ເຕສຸເຍວ ທິຏ຺ຐິນິເວສເນສຸ ອຊສີລໂຄສີລກຸກ຺ກຸຣສີລປຎ຺ຈາຕປມຣຸປ຺ປປາຕອຸກ຺ກຸຏິກປ຺ປຘານກຓ຺ຏກາປສ຺ສຍາທິເຠທໍ ສຕ຺ຖາຣຘມ຺ມກ຺ຂານຄຓາທິເຠທຎ຺ຈ ຕໍ ຕໍ ຘມ຺ມໍ ນິຣສ຺ສຕິ ຈ ອາທິຍຕິ ຈ ຊຫຕິ ຈ ຄຓ຺ຫາຕິ ຈ ວນມກ຺ກໂຏ ວິຍ ຕໍ ຕໍ ສາຂນ຺ຕິ ວຸຕ຺ຕໍ ໂຫຕິ. ເອວໍ ນິຣສ຺ສນ຺ໂຕ ຈ ອາທິຍນ຺ໂຕ ຈ ອນວຏ຺ຐິຕຈິຕ຺ຕຕ຺ຕາ ອສນ຺ເຕຫິປິ ຄຸຓໂທເສຫິ ອຕ຺ຕໂນ ວາ ປຣສ຺ສ ວາ ຍສາຍສໍ ອຸປ຺ປາເທຍ຺ຍ.

໗໙໓. ໂຍ ປນາຍໍ ສພ຺ພທິຏ຺ຐິຄຕາທິໂທສຘຸນນາຍ ປຎ຺ຎາຍ ສມນ຺ນາຄຕຕ຺ຕາ ໂຘໂນ, ຕສ຺ສ ໂຘນສ຺ສ ຫິ…ເປ… ອນູປໂຍ ໂສ. ກິໍ ວຸຕ຺ຕໍ ໂຫຕິ? ໂຘນຘມ຺ມສມນ຺ນາຄມາ ໂຘນສ຺ສ ຘຸຕສພ຺ພປາປສ຺ສ ອຣຫໂຕ ກຕ຺ຖຈິ ໂລເກ ເຕສຸ ເຕສຸ ຠເວສຸ ປກປ຺ປິຕາ ທິຏ຺ຐິ ນຕ຺ຖິ, ໂສ ຕສ຺ສາ ທິຏ຺ຐິຍາ ອຠາເວນ, ຍາຍ ຈ ອຕ຺ຕນາ ກຕໍ ປາປກມ຺ມໍ ປຏິຈ຺ຉາເທນ຺ຕາ ຕິຕ຺ຖິຍາ ມາຍາຍ ມາເນນ ວາ ເອຕໍ ອຄຕິໍ ຄຈ຺ຉນ຺ຕິ, ຕມ຺ປິ ມາຍຎ຺ຈ ມານຎ຺ຈ ປຫາຍ ໂຘໂນ ຣາຄາທີນໍ ໂທສານໍ ເກນ ຄຈ຺ເຉຍ຺ຍ, ທິຏ຺ຐຘມ຺ເມ ສມ຺ປຣາເຍ ວາ ນິຣຍາທີສຸ ຄຕິວິເສເສສຸ ເກນ ສງ຺ຂໍ ຄຈ຺ເຉຍ຺ຍ, ອນູປໂຍ ໂສ, ໂສ ຫິ ຕຓ຺ຫາທິຏ຺ຐິອຸປຍານໍ ທ຺ວິນ຺ນໍ ອຠາເວນ ອນູປໂຍຕິ.

໗໙໔. ໂຍ ປນ ເຕສໍ ທ຺ວິນ຺ນໍ ຠາເວນ ອຸປໂຍ ໂຫຕິ, ໂສ ອຸປໂຍ ຫິ…ເປ… ທິຏ຺ຐິມິເຘວ ສພ຺ພນ຺ຕິ. ຕຕ຺ຖ ອຸປໂຍຕິ ຕຓ຺ຫາທິຏ຺ຐິນິສ຺ສິໂຕ. ຘມ຺ເມສຸ ອຸເປຕິ ວາທນ຺ຕິ ‘‘ຣຕ຺ໂຕ’’ຕິ ວາ ‘‘ທຸຏ຺ໂຐ’’ຕິ ວາ ເອວໍ ເຕສຸ ເຕສຸ ຘມ຺ເມສຸ ອຸເປຕິ ວາທໍ. ອນູປຍໍ ເກນ ກຖໍ ວເທຍ຺ຍາຕິ ຕຓ຺ຫາທິຏ຺ຐິປຫາເນນ ອນູປຍໍ ຂີຓາສວໍ ເກນ ຣາເຄນ ວາ ໂທເສນ ວາ ກຖໍ ‘‘ຣຕ຺ໂຕ’’ຕິ ວາ ‘‘ທຸຏ຺ໂຐ’’ຕິ ວາ ວເທຍ຺ຍ, ເອວໍ ອນຸປວຊ຺ໂຊ ຈ ໂສ ກິໍ ຕິຕ຺ຖິຍາ ວິຍ ກຕປຏິຈ຺ຉາທໂກ ຠວິສ຺ສຕີຕິ ອຘິປ຺ປາໂຍ. ອຕ຺ຕາ ນິຣຕ຺ຕາ ນ ຫິ ຕສ຺ສ ອຕ຺ຖີຕິ ຕສ຺ສ ຫິ ອຕ຺ຕທິຏ຺ຐິ ວາ ອຸຈ຺ເຉທທິຏ຺ຐິ ວາ ນຕ຺ຖິ, ຄຫຓໍ ມຸຎ຺ຈນໍ ວາປິ ອຕ຺ຕນິຣຕ຺ຕສຎ຺ຎິຕໍ ນຕ຺ຖິ. ກິໍກາຣຓາ ນຕ຺ຖີຕິ ເຈ? ອໂຘສິ ໂສ ທິຏ຺ຐິມິເຘວ ສພ຺ພໍ, ຍສ຺ມາ ໂສ ອິເຘວ ອຕ຺ຕຠາເວ ຎາຓວາເຕນ ສພ຺ພໍ ທິຏ຺ຐິຄຕໍ ອໂຘສິ, ປຊຫິ, ວິໂນເທສີຕິ ອຣຫຕ຺ຕນິກູເຏນ ເທສນໍ ນິຏ຺ຐາເປສິ. ຕໍ ສຸຕ຺ວາ ຣາຊາ ອຕ຺ຕມໂນ ຠຄວນ຺ຕໍ ອຠິວາເທຕ຺ວາ ປກ຺ກາມີຕິ.

ປຣມຕ຺ຖໂຊຕິກາຍ ຂຸທ຺ທກ-ອຏ຺ຐກຖາຍ

ສຸຕ຺ຕນິປາຕ-ອຏ຺ຐກຖາຍ ທຸຏ຺ຐຏ຺ຐກສຸຕ຺ຕວຓ຺ຓນາ ນິຏ຺ຐິຕາ.