໑໓. ມຫາພ຺ຍູຫສຸຕ຺ຕວຓ຺ຓນາ

໙໐໒. ເຍ ເກຈິເມຕິ ມຫາພ຺ຍູຫສຸຕ຺ຕໍ. ກາ ອຸປ຺ປຕ຺ຕິ? ອິທມ຺ປິ ຕສ຺ມິໍເຍວ ມຫາສມເຍ ‘‘ກິໍ ນຸ ໂຂ ອິເມ ທິຏ຺ຐິປຣິພ຺ພສານາ ວິຎ຺ຎູນໍ ສນ຺ຕິກາ ນິນ຺ທເມວ ລຠນ຺ຕິ, ອຸທາຫຸ ປສໍສມ຺ປີ’’ຕິ ອຸປ຺ປນ຺ນຈິຕ຺ຕານໍ ເອກຈ຺ຈານໍ ເທວຕານໍ ຕມຕ຺ຖໍ ອາວິກາຕຸໍ ປຸຣິມນເຍນ ນິມ຺ມິຕພຸທ຺ເຘນ ອຕ຺ຕານໍ ປຸຈ຺ຉາເປຕ຺ວາ ວຸຕ຺ຕໍ. ຕຕ຺ຖ ອນ຺ວານຍນ຺ຕີຕິ ອນຸ ອານຍນ຺ຕິ, ປຸນປ຺ປຸນໍ ອາຫຣນ຺ຕິ.

໙໐໓. ອິທານິ ຍສ຺ມາ ເຕ ‘‘ອິທເມວ ສຈ຺ຈ’’ນ຺ຕິ ວທນ຺ຕາ ທິຏ຺ຐິຄຕິກາ ວາທິໂນ ກທາຈິ ກຕ຺ຖຈິ ປສໍສມ຺ປິ ລຠນ຺ຕິ, ຍໍ ເອຕໍ ປສໍສາສງ຺ຂາຕໍ ວາທຜລໍ, ຕໍ ອປ຺ປໍ ຣາຄາທີນໍ ສມາຍ ສມຕ຺ຖໍ ນ ໂຫຕິ, ໂກ ປນ ວາໂທ ທຸຕິເຍ ນິນ຺ທາຜເລ, ຕສ຺ມາ ເອຕມຕ຺ຖໍ ທສ຺ເສນ຺ໂຕ ອິມໍ ຕາວ ວິສ຺ສຊ຺ຊນຄາຖມາຫ. ‘‘ອປ຺ປຎ຺ຫິ ເອຕໍ ນ ອລໍ ສມາຍ, ທຸເວ ວິວາທສ຺ສ ຜລານິ ພ຺ຣູມີ’’ຕິອາທິ. ຕຕ຺ຖ ທຸເວ ວິວາທສ຺ສ ຜລານີຕິ ນິນ຺ທາ ປສໍສາ ຈ, ຊຍປຣາຊຍາທີນິ ວາ ຕໍສຠາຄານິ. ເອຕມ຺ປິ ທິສ຺ວາຕິ ‘‘ນິນ຺ທາ ອນິຏ຺ຐາ ເອວ, ປສໍສາ ນາລໍ ສມາຍາ’’ຕິ ເອຕມ຺ປິ ວິວາທຜເລ ອາທີນວໍ ທິສ຺ວາ. ເຂມາຠິປສ຺ສໍ ອວິວາທຠູມິນ຺ຕິ ອວິວາທຠູມິໍ ນິພ຺ພານໍ ‘‘ເຂມ’’ນ຺ຕິ ປສ຺ສມາໂນ.

໙໐໔. ເອວຎ຺ຫິ ອວິວທມາໂນ – ຍາ ກາຈິມາຕິ ຄາຖາ. ຕຕ຺ຖ ສມ຺ມຸຕິໂຍຕິ ທິຏ຺ຐິໂຍ. ປຸຖຸຊ຺ຊາຕິ ປຸຖຸຊ຺ຊນສມ຺ຠວາ. ໂສ ອຸປຍໍ ກິເມຍ຺ຍາຕິ ໂສ ອຸປຄນ຺ຕພ຺ພຏ຺ເຐນ ອຸປຍໍ ຣູປາທີສຸ ເອກມ຺ປິ ຘມ຺ມໍ ກິໍ ອຸເປຍ຺ຍ, ເກນ ວາ ກາຣເຓນ ອຸເປຍ຺ຍ. ທິຏ຺ເຐ ສຸເຕ ຂນ຺ຕິມກຸພ຺ພມາໂນຕິ ທິຏ຺ຐສຸຕສຸທ຺ຘີສຸ ເປມໍ ອກໂຣນ຺ໂຕ.

໙໐໕. ອິໂຕ ພາຫິຣາ ປນ – ສີລຸຕ຺ຕມາຕິ ຄາຖາ. ຕສ຺ສຕ຺ໂຖ – ສີລໍເຍວ ‘‘ອຸຕ຺ຕມ’’ນ຺ຕິ ມຎ຺ຎມານາ ສີລຸຕ຺ຕມາ ເອເກ ໂຠນ຺ໂຕ ສໍຍມມຕ຺ເຕນ ສຸທ຺ຘິໍ ວທນ຺ຕິ, ຫຕ຺ຖິວຕາທິຎ຺ຈ ວຕໍ ສມາທາຍ ອຸປຏ຺ຐິຕາ, ອິເຘວ ທິຏ຺ຐິຍໍ ອສ຺ສ ສຕ຺ຖຸໂນ ສຸທ຺ຘິນ຺ຕິ ຠວູປນີຕາ ຠວຊ຺ໂຌສິຕາ ສມານາ ວທນ຺ຕິ, ອປິຈ ເຕ ກຸສລາ ວທານາ ‘‘ກຸສລາ ມຍ’’ນ຺ຕິ ເອວໍ ວາທາ.

໙໐໖. ເອວໍ ສີລຸຕ຺ຕເມສຸ ຈ ເຕສຸ ຕຖາ ປຏິປນ຺ໂນ ໂຍ ໂກຈິ – ສເຈ ຈຸໂຕຕິ ຄາຖາ. ຕສ຺ສຕ຺ໂຖ – ສເຈ ຕໂຕ ສີລວຕໂຕ ປຣວິຈ຺ຉນ຺ທເນນ ວາ ອນຠິສມ຺ຠຸຓນ຺ໂຕ ວາ ຈຸໂຕ ໂຫຕິ, ໂສ ຕໍ ສີລພ຺ພຕາທິກມ຺ມໍ ປຸຎ຺ຎາຠິສງ຺ຂາຣາທິກມ຺ມໍ ວາ ວິຣາຘຍິຕ຺ວາ ປເວຘຕີ. ນ ເກວລຎ຺ຈ ເວຘຕິ, ອປິຈ ໂຂ ຕໍ ສີລພ຺ພຕສຸທ຺ຘິໍ ປຊປ຺ປຕີ ຈ ວິປ຺ປລປຕິ ປຕ຺ຖຍຕີ ຈ. ກິມິວ? ສຕ຺ຖາວ ຫີໂນ ປວສໍ ຆຣມ຺ຫາ. ຆຣມ຺ຫາ ປວສນ຺ໂຕ ສຕ຺ຖໂຕ ຫີໂນ ຍຖາ ຕໍ ຆຣໍ ວາ ສຕ຺ຖໍ ວາ ປຕ຺ເຖຍ຺ຍາຕິ.

໙໐໗. ເອວໍ ປນ ສີລຸຕ຺ຕມານໍ ເວຘກາຣຓໍ ອຣິຍສາວໂກ – ສີລພ຺ພຕໍ ວາປິ ປຫາຍ ສພ຺ພນ຺ຕິ ຄາຖາ. ຕຕ຺ຖ ສາວຊ຺ຊນວຊ຺ຊນ຺ຕິ ສພ຺ພາກຸສລໍ ໂລກິຍກຸສລຎ຺ຈ. ເອຕໍ ສຸທ຺ຘິໍ ອສຸທ຺ຘິນ຺ຕິ ອປຕ຺ຖຍາໂນຕິ ປຎ຺ຈກາມຄຸຓາທິເຠທໍ ເອຕໍ ສຸທ຺ຘິໍ, ອກຸສລາທິເຠທໍ ອສຸທ຺ຘິຎ຺ຈ ອປຕ຺ຖຍມາໂນ. ວິຣໂຕ ຈເຣຕິ ສຸທ຺ຘິຍາ ອສຸທ຺ຘິຍາ ຈ ວິຣໂຕ ຈເຣຍ຺ຍ. ສນ຺ຕິມນຸຄ຺ຄຫາຍາຕິ ທິຏ຺ຐິໍ ອຄເຫຕ຺ວາ.

໙໐໘. ເອວໍ ອິໂຕ ພາຫິຣເກ ສີລຸຕ຺ຕເມ ສໍຍເມນ ວິສຸທ຺ຘິວາເທ ເຕສໍ ວິຆາຕໍ ສີລພ຺ພຕປ຺ປຫາຍິໂນ ອຣຫໂຕ ຈ ປຏິປຕ຺ຕິໍ ທສ຺ເສຕ຺ວາ ອິທານິ ອຎ຺ຎຖາປິ ສຸທ຺ຘິວາເທ ພາຫິຣເກ ທສ຺ເສນ຺ໂຕ ‘‘ຕມູປນິສ຺ສາຍາ’’ຕິ ຄາຖມາຫ. ຕສ຺ສຕ຺ໂຖ – ສນ຺ຕຎ຺ເຎປິ ສມຓພ຺ຣາຫ຺ມຓາ, ເຕ ຊິຄຸຈ຺ຉິຕໍ ອມຣນ຺ຕປໍ ວາ ທິຏ຺ຐສຸທ຺ຘິອາທີສຸ ວາ ອຎ຺ຎຕຣຎ຺ຎຕຣໍ ອຸປນິສ຺ສາຍ ອກິຣິຍທິຏ຺ຐິຍາ ວາ ອຸທ຺ຘໍສຣາ ຫຸຕ຺ວາ ຠວາຠເວສຸ ອວີຕຕຓ຺ຫາເສ ສຸທ຺ຘິມນຸຕ຺ຖຸນນ຺ຕິ ວທນ຺ຕິ ກເຖນ຺ຕີຕິ.

໙໐໙. ເອວໍ ເຕສໍ ອວີຕຕຓ຺ຫານໍ ສຸທ຺ຘິໍ ອນຸຕ຺ຖຸນນ຺ຕານໍ ໂຍປິ ສຸທ຺ຘິປ຺ປຕ຺ຕເມວ ອຕ຺ຕານໍ ມຎ຺ເຎຍ຺ຍ, ຕສ຺ສປິ ອວີຕຕຓ຺ຫຕ຺ຕາ ຠວາຠເວສຸ ຕໍ ຕໍ ວຕ຺ຖຸໍ ປຕ຺ຖຍມານສ຺ສ ຫິ ຊປ຺ປິຕານິ ປຸນປ຺ປຸນໍ ໂຫນ຺ຕິເຍວາຕິ ອຘິປ຺ປາໂຍ. ຕຓ຺ຫາ ຫິ ອາເສວິຕາ ຕຓ຺ຫໍ ວຑ຺ຒຍເຕວ. ນ ເກວລຎ຺ຈ ຊປ຺ປິຕານິ, ປເວຘິຕໍ ວາປິ ປກປ຺ປິເຕສຸ, ຕຓ຺ຫາທິຏ຺ຐີຫິ ຈສ຺ສ ປກປ຺ປິເຕສຸ ວຕ຺ຖູສຸ ປເວຘິຕມ຺ປິ ໂຫຕີຕິ ວຸຕ຺ຕໍ ໂຫຕິ. ຠວາຠເວສຸ ປນ ວີຕຕຓ຺ຫຕ຺ຕາ ອາຍຕິໍ ຈຸຕູປປາໂຕ ອິຘ ຍສ຺ສ ນຕ຺ຖິ, ສເກນ ເວເຘຍ຺ຍ ກຸຫິໍວ ຊປ຺ເປຕິ ອຍເມຕິສ຺ສາ ຄາຖາຍ ສມ຺ພນ຺ໂຘ. ເສສໍ ນິທ຺ເທເສ ວຸຕ຺ຕນຍເມວ.

໙໑໐-໑໑. ຍມາຫູຕິ ປຸຈ຺ຉາຄາຖາ. ອິທານິ ຍສ຺ມາ ເອໂກປິ ເອຕ຺ຖ ວາໂທ ສຈ຺ໂຈ ນຕ຺ຖິ, ເກວລໍ ທິຏ຺ຐິມຕ຺ຕເກນ ຫິ ເຕ ວທນ຺ຕິ, ຕສ຺ມາ ຕມຕ຺ຖໍ ທສ຺ເສນ຺ໂຕ ‘‘ສກຎ຺ຫີ’’ຕິ ອິມໍ ຕາວ ວິສ຺ສຊ຺ຊນຄາຖມາຫ. ຕຕ຺ຖ ສມ຺ມຸຕິນ຺ຕິ ທິຏ຺ຐິໍ.

໙໑໒. ເອວເມເຕສຸ ສກໍ ຘມ຺ມໍ ປຣິປຸຓ຺ຓໍ ພ຺ຣຸວນ຺ເຕສຸ ອຎ຺ຎສ຺ສ ປນ ຘມ຺ມໍ ‘‘ຫີນ’’ນ຺ຕິ ວທນ຺ເຕສຸ ຍສ຺ສ ກສ຺ສຈິ – ປຣສ຺ສ ເຈ ວມ຺ຠຍິເຕນ ຫີໂນຕິ ຄາຖາ. ຕສ຺ສຕ຺ໂຖ – ຍທິ ປຣສ຺ສ ນິນ຺ທິຕກາຣຓາ ຫີໂນ ຠເວຍ຺ຍ, ນ ໂກຈິ ຘມ຺ເມສຸ ວິເສສິ ອຄ຺ໂຄ ຠເວຍ຺ຍ. ກິໍ ກາຣຓໍ? ປຸຖູ ຫິ ອຎ຺ຎສ຺ສ ວທນ຺ຕິ ຘມ຺ມໍ, ນິຫີນໂຕ ສພ຺ເພວ ເຕ ສມ຺ຫິ ທຬ຺ຫໍ ວທານາ ສກຘມ຺ເມ ທຬ຺ຫວາທາ ເອວ.

໙໑໓. ກິຎ຺ຈ ຠິຍ຺ໂຍ – ສທ຺ຘມ຺ມປູຊາຕິ ຄາຖາ. ຕສ຺ສຕ຺ໂຖ – ເຕ ຈ ຕິຕ຺ຖິຍາ ຍຖາ ປສໍສນ຺ຕິ ສກາຍນານິ, ສທ຺ຘມ຺ມປູຊາປິ ເນສໍ ຕເຖວ ວຕ຺ຕຕິ. ເຕ ຫິ ອຕິວິຍ ສຕ຺ຖາຣາທີນິ ສກ຺ກໂຣນ຺ຕິ. ຕຕ຺ຖ ຍທິ ເຕ ປມາຓາ ສິຍຸໍ, ເອວໍ ສນ຺ເຕ ສພ຺ເພວ ວາທາ ຕຖິຍາ ຠເວຍ຺ຍຸໍ. ກິໍ ກາຣຓໍ? ສຸທ຺ຘີ ຫິ ເນສໍ ປຈ຺ຈຕ຺ຕເມວ, ນ ສາ ອຎ຺ຎຕ຺ຣ ສິຊ຺ຌຕິ, ນາປິ ປຣມຕ຺ຖໂຕ. ອຕ຺ຕນິ ທິຏ຺ຐິຄາຫມຕ຺ຕເມວ ຫິ ຕໍ ເຕສໍ ປຣປຈ຺ຈຍເນຍ຺ຍພຸທ຺ຘີນໍ.

໙໑໔. ໂຍ ວາ ປນ ວິປຣີໂຕ ພາຫິຕປາປຕ຺ຕາ ພ຺ຣາຫ຺ມໂຓ, ຕສ຺ສ – ນ ພ຺ຣາຫ຺ມຓສ຺ສ ປຣເນຍ຺ຍມຕ຺ຖີຕິ ຄາຖາ. ຕສ຺ສຕ຺ໂຖ – ພ຺ຣາຫ຺ມຓສ຺ສ ຫິ ‘‘ສພ຺ເພ ສງ຺ຂາຣາ ອນິຈ຺ຈາ’’ຕິອາທິນາ (ຘ. ປ. ໒໗໗; ເນຕ຺ຕິ. ໕) ນເຍນ ສຸທິຏ຺ຐຕ຺ຕາ ປເຣນ ເນຕພ຺ພໍ ຎາຓໍ ນຕ຺ຖິ, ທິຏ຺ຐິຘມ຺ເມສຸ ‘‘ອິທເມວ ສຈ຺ຈ’’ນ຺ຕິ ນິຈ຺ຉິນິຕ຺ວາ ສມຸຄ຺ຄຫີຕມ຺ປິ ນຕ຺ຖິ. ຕໍກາຣຓາ ໂສ ທິຏ຺ຐິກລຫານິ ອຕີໂຕ, ນ ຈ ໂສ ເສຏ຺ຐໂຕ ປສ຺ສຕິ ຘມ຺ມມຎ຺ຎໍ ອຎ຺ຎຕ຺ຣ ສຕິປຏ຺ຐານາທີຫິ.

໙໑໕. ຊານາມີຕິ ຄາຖາຍ ສມ຺ພນ຺ໂຘ ອຕ຺ໂຖ ຈ – ເອວໍ ຕາວ ປຣມຕ຺ຖພ຺ຣາຫ຺ມໂຓ ນ ຫິ ເສຏ຺ຐໂຕ ປສ຺ສຕິ ຘມ຺ມມຎ຺ຎໍ, ອຎ຺ເຎ ປນ ຕິຕ຺ຖິຍາ ປຣຈິຕ຺ຕຎາຓາທີຫິ ຊານນ຺ຕາ ປສ຺ສນ຺ຕາປິ ‘‘ຊານາມິ ປສ຺ສາມິ ຕເຖວ ເອຕ’’ນ຺ຕິ ເອວໍ ວທນ຺ຕາປິ ຈ ທິຏ຺ຐິຍາ ສຸທ຺ຘິໍ ປຈ຺ເຈນ຺ຕິ. ກສ຺ມາ? ຍສ຺ມາ ເຕສຸ ເອໂກປິ ອທ຺ທກ຺ຂິ ເຈ ອທ຺ທສ ເຈປິ ເຕນ ປຣຈິຕ຺ຕຎາຓາທິນາ ຍຖາຠູຕໍ ອຕ຺ຖໍ, ກິຎ຺ຫິ ຕຸມສ຺ສ ເຕນ ຕສ຺ສ ເຕນ ທສ຺ສເນນ ກິໍ ກຕໍ, ກິໍ ທຸກ຺ຂປຣິຎ຺ຎາ ສາຘິຕາ, ອຸທາຫຸ ສມຸທຍປຫານາທີນໍ ອຎ຺ຎຕຣໍ, ຍໂຕ ສພ຺ພຖາປິ ອຕິກ຺ກມິຕ຺ວາ ອຣິຍມຄ຺ຄໍ ເຕ ຕິຕ຺ຖິຍາ ອຎ຺ເຎເນວ ວທນ຺ຕິ ສຸທ຺ຘິໍ, ອຕິກ຺ກມິຕ຺ວາ ວາ ເຕ ຕິຕ຺ຖິເຍ ພຸທ຺ຘາທໂຍ ອຎ຺ເຎເນວ ວທນ຺ຕິ ສຸທ຺ຘິນ຺ຕິ.

໙໑໖. ປສ຺ສໍ ນໂຣຕິ ຄາຖາຍ ສມ຺ພນ຺ໂຘ ອຕ຺ໂຖ ຈ. ກິຎ຺ຈ ຠິຍ຺ໂຍ? ຍ຺ວາຍໍ ປຣຈິຕ຺ຕຎາຓາທີຫິ ອທ຺ທກ຺ຂິ, ໂສ ປສ຺ສໍ ນໂຣ ທກ຺ຂຕິ ນາມຣູປໍ, ນ ຕໂຕ ປຣໍ ທິສ຺ວານ ວາ ຎສ຺ສຕິ ຕານິເມວ ນາມຣູປານິ ນິຈ຺ຈໂຕ ສຸຂໂຕ ວາ ນ ອຎ຺ຎຖາ. ໂສ ເອວໍ ປສ຺ສນ຺ໂຕ ກາມໍ ພຫຸໍ ປສ຺ສຕຸ ອປ຺ປກໍ ວາ ນາມຣູປໍ ນິຈ຺ຈໂຕ ສຸຂໂຕ ຈ, ອຖສ຺ສ ເອວຣູເປນ ທສ຺ສເນນ ນ ຫິ ເຕນ ສຸທ຺ຘິໍ ກຸສລາ ວທນ຺ຕີຕິ.

໙໑໗. ນິວິສ຺ສວາທີຕິ ຄາຖາຍ ສມ຺ພນ຺ໂຘ ອຕ຺ໂຖ ຈ – ເຕນ ຈ ທສ຺ສເນນ ສຸທ຺ຘິຍາ ອສຕິຍາປິ ໂຍ ‘‘ຊານາມິ ປສ຺ສາມິ ຕເຖວ ເອຕ’’ນ຺ຕິ ເອວໍ ນິວິສ຺ສວາທີ, ເອຕໍ ວາ ທສ຺ສນໍ ປຏິຈ຺ຈ ທິຏ຺ຐິຍາ ສຸທ຺ຘິໍ ປຈ຺ເຈນ຺ໂຕ ‘‘ອິທເມວ ສຈ຺ຈ’’ນ຺ຕິ ເອວໍ ນິວິສ຺ສວາທີ, ໂສ ສຸພ຺ພິນໂຍ ນ ໂຫຕິ ຕໍ ຕຖາ ປກປ຺ປິຕໍ ອຠິສງ຺ຂຕໍ ທິຏ຺ຐິໍ ປຸເຣກ຺ຂຣາໂນ. ໂສ ຫິ ຍໍ ສຕ຺ຖາຣາທິໍ ນິສ຺ສິໂຕ, ຕຕ຺ເຖວ ສຸຠໍ ວທາໂນ ສຸທ຺ຘິໍ ວໂທ, ‘‘ປຣິສຸທ຺ຘວາໂທ ປຣິສຸທ຺ຘທສ຺ສໂນ ວາ ອຫ’’ນ຺ຕິ ອຕ຺ຕານໍ ມຎ຺ຎມາໂນ ຕຕ຺ຖ ຕຖທ຺ທສາ ໂສ, ຕຕ຺ຖ ສກາຍ ທິຏ຺ຐິຍາ ອວິປຣີຕເມວ ໂສ ອທ຺ທສ. ຍຖາ ສາ ທິຏ຺ຐິ ປວຕ຺ຕຕິ, ຕເຖວ ນໍ ອທ຺ທສ, ນ ອຎ຺ຎຖາ ປສ຺ສິຕຸໍ ອິຈ຺ຉຕີຕິ ອຘິປ຺ປາໂຍ.

໙໑໘. ເອວໍ ປກປ຺ປິຕໍ ທິຏ຺ຐິໍ ປຸເຣກ຺ຂຣາເນສຸ ຕິຕ຺ຖິເຍສຸ – ນ ພ຺ຣາຫ຺ມໂຓ ກປ຺ປມຸເປຕິ ສງ຺ຂາຕິ ຄາຖາ. ຕຕ຺ຖ ສງ຺ຂາຕິ ສງ຺ຂາຍ, ຊານິຕ຺ວາຕິ ອຕ຺ໂຖ. ນປິ ຎາຓພນ຺ຘູຕິ ສມາປຕ຺ຕິຎາຓາທິນາ ອກຕຕຓ຺ຫາທິຏ຺ຐິພນ຺ຘຸ. ຕຕ຺ຖ ວິຄ຺ຄໂຫ – ນາປິ ອສ຺ສ ຎາເຓນ ກໂຕ ພນ຺ຘຸ ອຕ຺ຖີຕິ ນປິ ຎາຓພນ຺ຘຸ. ສມ຺ມຸຕິໂຍຕິ ທິຏ຺ຐິສມ຺ມຸຕິໂຍ. ປຸຖຸຊ຺ຊາຕິ ປຸຖຸຊ຺ຊນສມ຺ຠວາ. ອຸຄ຺ຄຫຓນ຺ຕິ ມຎ຺ເຎຕິ ອຸຄ຺ຄຫຓນ຺ຕິ ອຎ຺ເຎ, ອຎ຺ເຎ ຕາ ສມ຺ມຸຕິໂຍ ອຸຄ຺ຄຓ຺ຫນ຺ຕີຕິ ວຸຕ຺ຕໍ ໂຫຕິ.

໙໑໙. ກິຎ຺ຈ ຠິຍ຺ໂຍ – ວິສ຺ສຊ຺ຊ ຄນ຺ຖານີຕິ ຄາຖາ. ຕຕ຺ຖ ອນຸຄ຺ຄໂຫຕິ ອຸຄ຺ຄຫຓວິຣຫິໂຕ, ໂສປິ ນາສ຺ສ ອຸຄ຺ຄໂຫຕິ ອນຸຄ຺ຄໂຫ, ນ ວາ ອຸຄ຺ຄຓ຺ຫາຕີຕິ ອນຸຄ຺ຄໂຫ.

໙໒໐. ກິຎ຺ຈ ຠິຍ຺ໂຍ – ໂສ ເອວຣູໂປ – ປຸພ຺ພາສເວຕິ ຄາຖາ. ຕຕ຺ຖ ປຸພ຺ພາສເວຕິ ອຕີຕຣູປາທີນິ ອາຣພ຺ຠ ອຸປ຺ປຊ຺ຊມານຘມ຺ເມ ກິເລເສ. ນເວຕິ ປຈ຺ຈຸປ຺ປນ຺ນຣູປາທີນິ ອາຣພ຺ຠ ອຸປ຺ປຊ຺ຊມານຘມ຺ເມ. ນ ຉນ຺ທຄູຕິ ຉນ຺ທາທິວເສນ ນ ຄຈ຺ຉຕິ. ອນຕ຺ຕຄຣຫີຕິ ກຕາກຕວເສນ ອຕ຺ຕານໍ ອຄຣຫນ຺ໂຕ.

໙໒໑. ເອວໍ ອນຕ຺ຕຄຣຫີ ຈ – ສ ສພ຺ພຘມ຺ເມສູຕິ ຄາຖາ. ຕຕ຺ຖ ສພ຺ພຘມ຺ເມສູຕິ ທ຺ວາສຏ຺ຐິທິຏ຺ຐິຘມ຺ເມສຸ ‘‘ຍໍ ກິຎ຺ຈິ ທິຏ຺ຐໍ ວາ’’ຕິ ເອວໍປເຠເທສຸ. ປນ຺ນຠາໂຣຕິ ປຕິຕຠາໂຣ. ນ ກປ຺ເປຕີຕິ ນ ກປ຺ປິໂຍ, ທຸວິຘມ຺ປິ ກປ຺ປໍ ນ ກໂຣຕີຕິ ອຕ຺ໂຖ. ນູປຣໂຕຕິ ປຸຖຸຊ຺ຊນກລ຺ຍາຓກເສກ຺ຂາ ວິຍ ອຸປຣຕິສມງ຺ຄີປິ ນ ໂຫຕິ. ນ ປຕ຺ຖິໂຍຕິ ນິຕ຺ຕຓ຺ໂຫ. ຕຓ຺ຫາ ຫິ ປຕ຺ຖິຍຕີຕິ ປຕ຺ຖິຍາ, ນາສ຺ສ ປຕ຺ຖິຍາຕິ ນ ປຕ຺ຖິໂຍຕິ. ເສສໍ ຕຕ຺ຖ ຕຕ຺ຖ ປາກຏເມວາຕິ ນ ວຸຕ຺ຕໍ. ເອວໍ ອຣຫຕ຺ຕນິກູເຏນ ເທສນໍ ນິຏ຺ຐາເປສິ, ເທສນາປຣິໂຍສາເນ ປຸຣາເຠທສຸຕ຺ເຕ ວຸຕ຺ຕສທິໂສ ເອວາຠິສມໂຍ ອໂຫສີຕິ.

ປຣມຕ຺ຖໂຊຕິກາຍ ຂຸທ຺ທກ-ອຏ຺ຐກຖາຍ

ສຸຕ຺ຕນິປາຕ-ອຏ຺ຐກຖາຍ ມຫາພ຺ຍູຫສຸຕ຺ຕວຓ຺ຓນາ ນິຏ຺ຐິຕາ.