໑໐. ປຸຣາເຠທສຸຕ຺ຕວຓ຺ຓນາ

໘໕໕. ກຖໍທສ຺ສີຕິ ປຸຣາເຠທສຸຕ຺ຕໍ. ກາ ອຸປ຺ປຕ຺ຕິ? ອິມສ຺ສ ສຸຕ຺ຕສ຺ສ ອິໂຕ ປເຣສຎ຺ຈ ປຎ຺ຈນ຺ນໍ ກລຫວິວາທຈູຬພ຺ຍູຫມຫາພ຺ຍູຫຕຸວຏກອຕ຺ຕທຓ຺ຑສຸຕ຺ຕານໍ ສມ຺ມາປຣິພ຺ພາຊນີຍສ຺ສ ອຸປ຺ປຕ຺ຕິຍໍ ວຸຕ຺ຕນເຍເນວ ສາມຎ຺ຎໂຕ ອຸປ຺ປຕ຺ຕິ ວຸຕ຺ຕາ. ວິເສສໂຕ ປນ ຍເຖວ ຕສ຺ມິໍ ມຫາສມເຍ ຣາຄຈຣິຕເທວຕານໍ ສປ຺ປາຍວເສນ ຘມ຺ມໍ ເທເສຕຸໍ ນິມ຺ມິຕພຸທ຺ເຘນ ອຕ຺ຕານໍ ປຸຈ຺ຉາເປຕ຺ວາ ສມ຺ມາປຣິພ຺ພາຊນີຍສຸຕ຺ຕມຠາສິ, ເອວໍ ຕສ຺ມິໍເຍວ ມຫາສມເຍ ‘‘ກິໍ ນຸ ໂຂ ປຸຣາ ສຣີຣເຠທາ ກຕ຺ຕພ຺ພ’’ນ຺ຕິ ອຸປ຺ປນ຺ນຈິຕ຺ຕານໍ ເທວຕານໍ ຈິຕ຺ຕໍ ຎຕ຺ວາ ຕາສໍ ອນຸຄ຺ຄຫຕ຺ຖໍ ອຑ຺ຒເຕຬສຠິກ຺ຂຸສຕປຣິວາຣໍ ນິມ຺ມິຕພຸທ຺ຘໍ ອາກາເສນ ອາເນຕ຺ວາ ເຕນ ອຕ຺ຕານໍ ປຸຈ຺ຉາເປຕ຺ວາ ອິມໍ ສຸຕ຺ຕມຠາສິ.

ຕຕ຺ຖ ປຸຈ຺ຉາຍ ຕາວ ໂສ ນິມ຺ມິໂຕ ກຖໍທສ຺ສີຕິ ອຘິປຎ຺ຎໍ ກຖໍສີໂລຕິ ອຘິສີລໍ, ອຸປສນ຺ໂຕຕິ ອຘິຈິຕ຺ຕໍ ປຸຈ຺ຉຕິ. ເສສໍ ປາກຏເມວ.

໘໕໖. ວິສ຺ສຊ຺ຊເນ ປນ ຠຄວາ ສຣູເປນ ອຘິປຎ຺ຎາທີນິ ອວິສ຺ສຊ຺ເຊຕ຺ວາວ ອຘິປຎ຺ຎາທິປ຺ປຠາເວນ ເຍສໍ ກິເລສານໍ ອຸປສມາ ‘‘ອຸປສນ຺ໂຕ’’ຕິ ວຸຈ຺ຈຕິ, ນານາເທວຕານໍ ອາສຍານຸໂລເມນ ເຕສໍ ອຸປສມເມວ ທີເປນ຺ໂຕ ‘‘ວີຕຕຓ຺ໂຫ’’ຕິອາທິກາ ຄາຖາໂຍ ອຠາສິ. ຕຕ຺ຖ ອາທິໂຕ ອຏ຺ຐນ຺ນໍ ຄາຖານໍ ‘‘ຕໍ ພ຺ຣູມິ ອຸປສນ຺ໂຕ’’ຕິ ອິມາຍ ຄາຖາຍ ສມ຺ພນ຺ໂຘ ເວທິຕພ຺ໂພ. ຕໂຕ ປຣາສໍ ‘‘ສ ເວ ສນ຺ໂຕຕິ ວຸຈ຺ຈຕີ’’ຕິ ອິມິນາ ສພ຺ພປຈ຺ຉິເມນ ປເທນ.

ອນຸປທວຓ຺ຓນານເຍນ ຈ – ວີຕຕຓ຺ໂຫ ປຸຣາ ເຠທາຕິ ໂຍ ສຣີຣເຠທາ ປຸພ຺ພເມວ ປຫີນຕຓ຺ໂຫ. ປຸພ຺ພມນ຺ຕມນິສ຺ສິໂຕຕິ ອຕີຕທ຺ຘາທິເຠທໍ ປຸພ຺ພນ຺ຕມນິສ຺ສິໂຕ. ເວມຊ຺ເຌນຸປສງ຺ເຂຍ຺ໂຍຕິ ປຈ຺ຈຸປ຺ປນ຺ເນປິ ອທ຺ຘນິ ‘‘ຣຕ຺ໂຕ’’ຕິອາທິນາ ນເຍນ ນ ອຸປສງ຺ຂາຕພ຺ໂພ. ຕສ຺ສ ນຕ຺ຖິ ປຸຣກ຺ຂຕນ຺ຕິ ຕສ຺ສ ອຣຫໂຕ ທ຺ວິນ຺ນໍ ປຸເຣກ຺ຂາຣານໍ ອຠາວາ ອນາຄເຕ ອທ຺ຘນິ ປຸຣກ຺ຂຕມ຺ປິ ນຕ຺ຖິ, ຕໍ ພ຺ຣູມິ ອຸປສນ຺ໂຕຕິ ເອວເມຕ຺ຖ ໂຍຊນາ ເວທິຕພ຺ພາ. ເອສ ນໂຍ ສພ຺ພຕ຺ຖ. ອິໂຕ ປຣໍ ປນ ໂຍຊນໍ ອທສ຺ເສຕ຺ວາ ອນຸຕ຺ຕານປທວຓ຺ຓນໍເຍວ ກຣິສ຺ສາມ.

໘໕໗. ອສນ຺ຕາສີຕິ ເຕນ ເຕນ ອລາຠເກນ ອສນ຺ຕສນ຺ໂຕ. ອວິກຕ຺ຖີຕິ ສີລາທີຫິ ອວິກຕ຺ຖນສີໂລ. ອກຸກ຺ກຸໂຈຕິ ຫຕ຺ຖກຸກ຺ກຸຈາທິວິຣຫິໂຕ. ມນ຺ຕຠາຓີຕິ ມນ຺ຕາຍ ປຣິຄ຺ຄເຫຕ຺ວາ ວາຈໍ ຠາສິຕາ. ອນຸທ຺ຘໂຕຕິ ອຸທ຺ຘຈ຺ຈວິຣຫິໂຕ. ສ ເວ ວາຈາຍໂຕຕິ ໂສ ວາຈາຍ ຍໂຕ ສໍຍໂຕ ຈຕຸໂທສວິຣຫິຕໍ ວາຈໍ ຠາສິຕາ ໂຫຕິ.

໘໕໘. ນິຣາສຕ຺ຕີຕິ ນິຕ຺ຕຓ຺ໂຫ. ວິເວກທສ຺ສີ ຜສ຺ເສສູຕິ ປຈ຺ຈຸປ຺ປນ຺ເນສຸ ຈກ຺ຂຸສມ຺ຜສ຺ສາທີສຸ ອຕ຺ຕາທິຠາວວິເວກໍ ປສ຺ສຕິ. ທິຏ຺ຐີສຸ ຈ ນ ນີຍຕີຕິ ທ຺ວາສຏ຺ຐິທິຏ຺ຐີສຸ ກາຍຈິ ທິຏ຺ຐິຍາ ນ ນີຍຕິ.

໘໕໙. ປຕິລີໂນຕິ ຣາຄາທີນໍ ປຫີນຕ຺ຕາ ຕໂຕ ອປຄໂຕ. ອກຸຫໂກຕິ ອວິມ຺ຫາປໂກ ຕີຫິ ກຸຫນວຕ຺ຖູຫິ. ອປິຫາລູຕິ ອປິຫນສີໂລ, ປຕ຺ຖນາຕຓ຺ຫາຍ ຣຫິໂຕຕິ ວຸຕ຺ຕໍ ໂຫຕິ. ອມຈ຺ຉຣີຕິ ປຎ຺ຈມຈ຺ເຉຣວິຣຫິໂຕ. ອປ຺ປຄພ຺ໂຠຕິ ກາຍປາຄພ຺ຠິຍາທິວິຣຫິໂຕ. ອເຊຄຸຈ຺ໂຉຕິ ສມ຺ປນ຺ນສີລາທິຕາຍ ອເຊຄຸຈ຺ຉນີໂຍ ອເສຈນໂກ ມນາໂປ. ເປສຸເຓຍ຺ເຍ ຈ ໂນ ຍຸໂຕຕິ ທ຺ວີຫິ ອາກາເຣຫິ ອຸປສໍຫຣິຕພ຺ເພ ປິສຸຓກມ຺ເມ ອຍຸຕ຺ໂຕ.

໘໖໐. ສາຕິເຍສຸ ອນສ຺ສາວີຕິ ສາຕວຕ຺ຖູສຸ ກາມຄຸເຓສຸ ຕຓ຺ຫາສນ຺ຖວວິຣຫິໂຕ. ສຓ຺ໂຫຕິ ສຓ຺ເຫຫິ ກາຍກມ຺ມາທີຫິ ສມນ຺ນາຄໂຕ. ປຏິຠານວາຕິ ປຣິຍຕ຺ຕິປຣິປຸຈ຺ຉາຘິຄມປຏິຠາເນຫິ ສມນ຺ນາຄໂຕ. ນ ສທ຺ໂຘຕິ ສາມໍ ອຘິຄຕຘມ຺ມໍ ນ ກສ຺ສຈິ ສທ຺ທຫຕິ. ນ ວິຣຊ຺ຊຕີຕິ ຂຍາ ຣາຄສ຺ສ ວິຣຕ຺ຕຕ຺ຕາ ອິທານິ ນ ວິຣຊ຺ຊຕິ.

໘໖໑. ລາຠກມ຺ຍາ ນ ສິກ຺ຂຕີຕິ ນ ລາຠປຕ຺ຖນາຍ ສຸຕ຺ຕນ຺ຕາທີນິ ສິກ຺ຂຕິ. ອວິຣຸທ຺ໂຘ ຈ ຕຓ຺ຫາຍ, ຣເສສຸ ນານຸຄິຊ຺ຌຕີຕິ ວິໂຣຘາຠາເວນ ຈ ອວິຣຸທ຺ໂຘ ຫຸຕ຺ວາ ຕຓ຺ຫາຍ ມູລຣສາທີສຸ ເຄຘໍ ນາປຊ຺ຊຕິ.

໘໖໒. ອຸເປກ຺ຂໂກຕິ ຉຬງ຺ຄຸເປກ຺ຂາຍ ສມນ຺ນາຄໂຕ. ສໂຕຕິ ກາຍານຸປສ຺ສນາທິສຕິຍຸຕ຺ໂຕ.

໘໖໓. ນິສ຺ສຍນາຕິ ຕຓ຺ຫາທິຏ຺ຐິນິສ຺ສຍາ. ຎຕ຺ວາ ຘມ຺ມນ຺ຕິ ອນິຈ຺ຈາທີຫິ ອາກາເຣຫິ ຘມ຺ມໍ ຊານິຕ຺ວາ. ອນິສ຺ສິໂຕຕິ ເອວໍ ເຕຫິ ນິສ຺ສເຍຫິ ອນິສ຺ສິໂຕ. ເຕນ ອຎ຺ຎຕ຺ຣ ຘມ຺ມຎາຓາ ນຕ຺ຖິ ນິສ຺ສຍານໍ ອຠາໂວຕິ ທີເປຕິ ຠວາຍ ວິຠວາຍ ວາຕິ ສສ຺ສຕາຍ ອຸຈ຺ເຉທາຍ ວາ.

໘໖໔. ຕໍ ພ຺ຣູມິ ອຸປສນ຺ໂຕຕິ ຕໍ ເອວຣູປໍ ເອເກກຄາຖາຍ ວຸຕ຺ຕໍ ອຸປສນ຺ໂຕຕິ ກເຖມິ. ອຕຣີ ໂສ ວິສຕ຺ຕິກນ຺ຕິ ໂສ ອິມໍ ວິສຕາທິຠາເວນ ວິສຕ຺ຕິກາສງ຺ຂາຕໍ ມຫາຕຓ຺ຫໍ ອຕຣິ.

໘໖໕. ອິທານິ ຕເມວ ອຸປສນ຺ຕໍ ປສໍສນ຺ໂຕ ອາຫ ‘‘ນ ຕສ຺ສ ປຸຕ຺ຕາ’’ຕິ ເອວມາທິ. ຕຕ຺ຖ ປຸຕ຺ຕາ ອຕ຺ຣຊາທໂຍ ຈຕ຺ຕາໂຣ. ເອຕ຺ຖ ຈ ປຸຕ຺ຕປຣິຄ຺ຄຫາທໂຍ ປຸຕ຺ຕາທິນາເມນ ວຸຕ຺ຕາຕິ ເວທິຕພ຺ພາ. ເຕ ຫິສ຺ສ ນ ວິຊ຺ຊນ຺ຕິ, ເຕສໍ ວາ ອຠາເວນ ປຸຕ຺ຕາທໂຍ ນ ວິຊ຺ຊນ຺ຕີຕິ.

໘໖໖. ເຍນ ນໍ ວຊ຺ຊຸໍ ປຸຖຸຊ຺ຊນາ, ອໂຖ ສມຓພ຺ຣາຫ຺ມຓາຕິ ເຍນ ຕໍ ຣາຄາທິນາ ວຊ຺ເຊນ ປຸຖຸຊ຺ຊນາ ສພ຺ເພປິ ເທວມນຸສ຺ສາ ອິໂຕ ພຫິທ຺ຘາ ສມຓພ຺ຣາຫ຺ມຓາ ຈ ຣຕ຺ໂຕ ວາ ທຸຏ຺ໂຐ ວາຕິ, ວເທຍ຺ຍຸໍ. ຕໍ ຕສ຺ສ ອປຸຣກ຺ຂຕນ຺ຕິ ຕໍ ຣາຄາທິວຊ຺ຊໍ ຕສ຺ສ ອຣຫໂຕ ອປຸຣກ຺ຂຕໍ ຕສ຺ມາ ວາເທສຸ ເນຊຕີຕິ ຕໍ ກາຣຓາ ນິນ຺ທາວຈເນສຸ ນ ກມ຺ປຕິ.

໘໖໗. ນ ອຸສ຺ເສສຸ ວທເຕຕິ ວິສິຏ຺ເຐສຸ ອຕ຺ຕານໍ ອນ຺ໂຕກຕ຺ວາ ‘‘ອຫໍ ວິສິຏ຺ໂຐ’’ຕິ ອຕິມານວເສນ ນ ວທຕິ. ເອສ ນໂຍ ອິຕເຣສຸ ທ຺ວີສຸ. ກປ຺ປໍ ເນຕິ ອກປ຺ປິໂຍຕິ ໂສ ເອວຣູໂປ ທຸວິຘມ຺ປິ ກປ຺ປໍ ນ ເອຕິ. ກສ຺ມາ? ຍສ຺ມາ ອກປ຺ປິໂຍ, ປຫີນກປ຺ໂປຕິ ວຸຕ຺ຕໍ ໂຫຕິ.

໘໖໘. ສກນ຺ຕິ ມຍ຺ຫນ຺ຕິ ປຣິຄ຺ຄຫິຕໍ. ອສຕາ ຈ ນ ໂສຈຕີຕິ ອວິຊ຺ຊມານາທິນາ ອສຕາ ຈ ນ ໂສຈຕິ. ຘມ຺ເມສຸ ຈ ນ ຄຈ຺ຉຕີຕິ ສພ຺ເພສຸ ຘມ຺ເມສຸ ຉນ຺ທາທິວເສນ ນ ຄຈ຺ຉຕິ. ສ ເວ ສນ຺ໂຕຕິ ວຸຈ຺ຈຕີຕິ ໂສ ເອວຣູໂປ ນຣຸຕ຺ຕໂມ ‘‘ສນ຺ໂຕ’’ຕິ ວຸຈ຺ຈຕີຕິ ອຣຫຕ຺ຕນິກູເຏນ ເທສນໍ ນິຏ຺ຐາເປສິ. ເທສນາປຣິໂຍສາເນ ໂກຏິສຕສຫສ຺ສເທວຕານໍ ອຣຫຕ຺ຕປ຺ປຕ຺ຕິ ອໂຫສິ, ໂສຕາປນ຺ນາທີນໍ ຄຓນາ ນຕ຺ຖີຕິ.

ປຣມຕ຺ຖໂຊຕິກາຍ ຂຸທ຺ທກ-ອຏ຺ຐກຖາຍ

ສຸຕ຺ຕນິປາຕ-ອຏ຺ຐກຖາຍ ປຸຣາເຠທສຸຕ຺ຕວຓ຺ຓນາ ນິຏ຺ຐິຕາ.