໘. ສລ຺ລສຸຕ຺ຕວຓ຺ຓນາ

໕໘໐. ອນິມິຕ຺ຕນ຺ຕິ ສລ຺ລສຸຕ຺ຕໍ. ກາ ອຸປ຺ປຕ຺ຕິ? ຠຄວໂຕ ກິຣ ອຸປຏ຺ຐາໂກ ເອໂກ ອຸປາສໂກ, ຕສ຺ສ ປຸຕ຺ໂຕ ກາລມກາສິ. ໂສ ປຸຕ຺ຕໂສກາຠິຠູໂຕ ສຕ຺ຕາຫໍ ນິຣາຫາໂຣ ອໂຫສິ. ຕໍ ອນຸກມ຺ປນ຺ໂຕ ຠຄວາ ຕສ຺ສ ຆຣໍ ຄນ຺ຕ຺ວາ ໂສກວິໂນທນຕ຺ຖໍ ອິມໍ ສຸຕ຺ຕມຠາສິ.

ຕຕ຺ຖ ອນິມຕ຺ຕນ຺ຕິ ກິຣິຍາກາຣນິມິຕ຺ຕວິຣຫິຕໍ. ຍຖາ ຫິ ‘‘ຍທາຫໍ ອກ຺ຂິໍ ວາ ນິຂຓິສ຺ສາມິ, ຠມຸກໍ ວາ ອຸກ຺ຂິປິສ຺ສາມິ, ເຕນ ນິມິຕ຺ເຕນ ຕໍ ຠຓ຺ຑໍ ອວຫຣາ’’ຕິອາທີສຸ ກິຣິຍາກາຣນິມິຕ຺ຕມຕ຺ຖິ, ນ ເອວໍ ຊີວິເຕ. ນ ຫິ ສກ຺ກາ ລທ຺ຘຸໍ ‘‘ຍາວາຫໍ ອິທໍ ວາ ອິທໍ ວາ ກໂຣມິ, ຕາວ ຕ຺ວໍ ຊີວ, ມາ ມີຍາ’’ຕິ. ອນຎ຺ຎາຕນ຺ຕິ ອໂຕ ເອວ ນ ສກ຺ກາ ເອກໍເສນ ອຎ຺ຎາຕຸໍ ‘‘ເອຕ຺ຕກໍ ວາ ເອຕ຺ຕກໍ ວາ ກາລໍ ອິມິນາ ຊີວິຕພ຺ພ’’ນ຺ຕິ ຄຕິຍາ ອາຍຸປຣິຍນ຺ຕວເສນ ວາ. ຍຖາ ຫິ ຈາຕຸມຫາຣາຊິກາທີນໍ ປຣິມິຕໍ ອາຍຸ, ນ ຕຖາ ມຈ຺ຈານໍ, ເອວມ຺ປິ ເອກໍເສນ ອນຎ຺ຎາຕໍ.

ກສິຣນ຺ຕິ ອເນກປຈ຺ຈຍປຏິພທ຺ຘວຸຕ຺ຕິຠາວໂຕ ກິຈ຺ຉໍ ນ ສຸຂຍາປນີຍໍ. ຕຖາ ຫິ ຕໍ ອສ຺ສາສປຏິພທ຺ຘຎ຺ຈ, ປສ຺ສາສປຏິພທ຺ຘຎ຺ຈ, ມຫາຠູຕປຏິພທ຺ຘຎ຺ຈ, ກພຬີກາຣາຫາຣປຏິພທ຺ຘຎ຺ຈ, ອຸສ຺ມາປຏິພທ຺ຘຎ຺ຈ, ວິຎ຺ຎາຓປຏິພທ຺ຘຎ຺ຈ. ອນສ຺ສສນ຺ໂຕປິ ຫິ ນ ຊີວຕິ ອປສ຺ສສນ຺ໂຕປິ. ຈຕູສຸ ຈ ຘາຕູສຸ ກຏ຺ຐມຸຂາທິອາສີວິສທຏ຺ໂຐ ວິຍ ກາໂຍ ປຖວີຘາຕຸປ຺ປໂກເປນ ຕາວ ຖທ຺ໂຘ ໂຫຕິ ກລິງ຺ຄຣສທິໂສ. ຍຖາຫ –

‘‘ປຕ຺ຖທ຺ໂຘ ຠວຕີ ກາໂຍ, ທຏ຺ໂຐ ກຏ຺ຐມຸເຂນ ວາ;

ປຖວີຘາຕຸປ຺ປໂກເປນ, ໂຫຕິ ກຏ຺ຐມຸເຂວ ໂສ’’ຕິ. (ຘ. ສ. ອຏ຺ຐ. ໕໘໔);

ອາໂປຘາຕຸປ຺ປໂກເປນ ປູຕິຠາວໍ ອາປຊ຺ຊິຕ຺ວາ ປຄ຺ຆຣິຕປຸພ຺ພມໍສໂລຫິໂຕ ອຏ຺ຐິຈມ຺ມາວເສໂສ ໂຫຕິ. ຍຖາຫ –

‘‘ປູຕິໂກ ຠວຕີ ກາໂຍ, ທຏ຺ໂຐ ປູຕິມຸເຂນ ວາ;

ອາໂປຘາຕຸປ຺ປໂກເປນ, ໂຫຕິ ປູຕິມຸເຂວ ໂສ’’ຕິ. (ຘ. ສ. ອຏ຺ຐ. ໕໘໔);

ເຕໂຊຘາຕຸປ຺ປໂກເປນ ອງ຺ຄາຣກາສຸຍໍ ປກ຺ຂິຕ຺ໂຕ ວິຍ ສມນ຺ຕາ ປຣິຑຍ຺ຫຕິ. ຍຖາຫ –

‘‘ສນ຺ຕຕ຺ໂຕ ຠວຕີ ກາໂຍ, ທຏ຺ໂຐ ອຄ຺ຄິມຸເຂນ ວາ;

ເຕໂຊຘາຕຸປ຺ປໂກເປນ, ໂຫຕິ ອຄ຺ຄິມຸເຂວ ໂສ’’ຕິ. (ຘ. ສ. ອຏ຺ຐ. ໕໘໔);

ວາໂຍຘາຕຸປ຺ປໂກເປນ ສຎ຺ຉິຊ຺ຊມານສນ຺ຘິພນ຺ຘໂນ ປາສາເຓຫິ ໂກຏ຺ເຏຕ຺ວາ ສຎ຺ຈຸຓ຺ຓິຍມານຏ຺ຐິໂກ ວິຍ ຈ ໂຫຕິ. ຍຖາຫ –

‘‘ສຎ຺ຉິນ຺ໂນ ຠວຕີ ກາໂຍ, ທຏ຺ໂຐ ສຕ຺ຖມຸເຂນ ວາ;

ວາໂຍຘາຕຸປ຺ປໂກເປນ, ໂຫຕິ ສຕ຺ຖມຸເຂວ ໂສ’’ຕິ. (ຘ. ສ. ອຏ຺ຐ. ໕໘໔);

ຘາຕຸປ຺ປໂກປພ຺ຍາປນ຺ນກາໂຍປິ ຈ ນ ຊີວຕິ. ຍທາ ປນ ຕາ ຘາຕຸໂຍ ອຎ຺ຎມຎ຺ຎໍ ປຕິຏ຺ຐານາທິກິຈ຺ຈໍ ສາເຘນ຺ຕາປິ ສມໍ ວຫນ຺ຕິ, ຕທາ ຊີວິຕໍ ປວຕ຺ຕຕິ. ເອວໍ ມຫາຠູຕປຏິພທ຺ຘຎ຺ຈ ຊີວິຕໍ. ທຸພ຺ຠິກ຺ຂາທີສຸ ປນ ອາຫາຣຸປຈ຺ເຉເທນ ສຕ຺ຕານໍ ຊີວິຕກ຺ຂໂຍ ປາກໂຏ ເອວ. ເອວໍ ກພຬີກາຣາຫາຣປຏິພທ຺ຘຎ຺ຈ ຊີວິຕໍ. ຕຖາ ອສິຕປີຕາທິປຣິປາເກ ກມ຺ມຊເຕເຊ ຂີເຓ ສຕ຺ຕາ ຊີວິຕກ຺ຂຍໍ ປາປຸຓນ຺ຕາປິ ປາກຏາ ເອວ. ເອວໍ ອຸສ຺ມາປຏິພທ຺ຘຎ຺ຈ ຊີວິຕໍ. ວິຎ຺ຎາເຓ ປນ ນິຣຸທ຺ເຘ ນິຣຸທ຺ຘໂຕ ປຠຸຕິ ສຕ຺ຕານໍ ນ ໂຫຕິ ຊີວິຕນ຺ຕິ ເອວມ຺ປິ ໂລເກ ປາກຏເມວ. ເອວໍ ວິຎ຺ຎາຓປຏິພທ຺ຘຎ຺ຈ ຊີວິຕໍ. ເອວໍ ອເນກປຈ຺ຈຍປຏິພທ຺ຘວຸຕ຺ຕິຠາວໂຕ ກສິຣໍ ເວທິຕພ຺ພໍ.

ປຣິຕ຺ຕຎ຺ຈາຕິ ອປ຺ປກໍ, ເທວານໍ ຊີວິຕໍ ອຸປນິຘາຍ ຕິຓຄ຺ເຄ ອຸສ຺ສາວພິນ຺ທຸສທິສໍ, ຈິຕ຺ຕກ຺ຂຓໂຕ ອຸທ຺ຘໍ ອຠາເວນ ວາ ປຣິຕ຺ຕໍ. ອຕິທີຆາຍຸໂກປິ ຫິ ສຕ຺ໂຕ ອຕີເຕນ ຈິຕ຺ເຕນ ຊີວິຕ຺ຖ ນ ຊີວຕິ ນ ຊີວິສ຺ສຕິ, ອນາຄເຕນ ຊີວິສ຺ສຕິ ນ ຊີວຕິ ນ ຊີວິຕ຺ຖ, ປຈ຺ຈຸປ຺ປນ຺ເນນ ຊີວຕິ ນ ຊີວິຕ຺ຖ ນ ຊີວິສ຺ສຕິ. ວຸຕ຺ຕຎ຺ເຈຕໍ –

‘‘ຊີວິຕໍ ອຕ຺ຕຠາໂວ ຈ, ສຸຂທຸກ຺ຂາ ຈ ເກວລາ;

ເອກຈິຕ຺ຕສມາຍຸຕ຺ຕາ, ລຫຸໂສ ວຕ຺ຕເຕ ຂໂຓ.

‘‘ຈຸລ຺ລາສີຕິສຫສ຺ສານິ, ກປ຺ປາ ຕິຏ຺ຐນ຺ຕິ ເຍ ມຣູ;

ນຕ຺ເວວ ເຕປິ ຊີວນ຺ຕິ, ທ຺ວີຫິ ຈິຕ຺ເຕຫິ ສໍຍຸຕາ’’ຕິ. (ມຫານິ. ໑໐);

ຕຎ຺ຈ ທຸກ຺ເຂນ ສໍຍຸຕນ຺ຕິ ຕຎ຺ຈ ຊີວິຕໍ ເອວໍ ອນິມິຕ຺ຕມນຎ຺ຎາຕໍ ກສິຣໍ ປຣິຕ຺ຕຎ຺ຈ ສມານມ຺ປິ ສີຕຸຓ຺ຫຑໍສມກສາທິສມ຺ຜສ຺ສຂຸປ຺ປິປາສາສງ຺ຂາຣທຸກ຺ຂວິປຣິຓາມທຸກ຺ຂທຸກ຺ຂທຸກ຺ເຂຫິ ສໍຍຸຕໍ. ກິໍ ວຸຕ຺ຕໍ ໂຫຕິ? ຍສ຺ມາ ອີທິສໍ ມຈ຺ຈານໍ ຊີວິຕໍ, ຕສ຺ມາ ຕ຺ວໍ ຍາວ ຕໍ ປຣິກ຺ຂຍໍ ນ ຄຈ຺ຉຕິ, ຕາວ ຘມ຺ມຈຣິຍເມວ ພ຺ຣູຫຍ, ມາ ປຸຕ຺ຕມນຸໂສຈາຕິ.

໕໘໑. ອຖາປິ ມຎ຺ເຎຍ຺ຍາສິ ‘‘ສພ຺ພູປກຣເຓຫິ ປຸຕ຺ຕໍ ອນຸຣກ຺ຂນ຺ຕສ຺ສາປິ ເມ ໂສ ມໂຕ, ເຕນ ໂສຈາມີ’’ຕິ, ເອວມ຺ປິ ມາ ໂສຈິ. ນ ຫິ ໂສ ອຸປກ຺ກໂມ ອຕ຺ຖິ, ເຍນ ຊາຕາ ນ ມິຍ຺ຍເຣ, ນ ຫິ ສກ຺ກາ ເກນຈິ ອຸປກ຺ກເມນ ຊາຕາ ສຕ຺ຕາ ມາ ມຣນ຺ຕູຕິ ຣກ຺ຂິຕຸນ຺ຕິ ວຸຕ຺ຕໍ ໂຫຕິ. ຕໂຕ ຍສ຺ມາ ໂສ ‘‘ຊຣໍ ປຕ຺ວາ ນາມ, ຠນ຺ເຕ, ມຣຓໍ ອນຸຣູປໍ, ອຕິທຫໂຣ ເມ ປຸຕ຺ໂຕ ມໂຕ’’ຕິ ຈິນ຺ເຕສິ, ຕສ຺ມາ ອາຫ ‘‘ຊຣມ຺ປິ ປຕ຺ວາ ມຣຓໍ, ເອວໍຘມ຺ມາ ຫິ ປາຓິໂນ’’ຕິ, ຊຣໍ ປຕ຺ວາປິ ອປ຺ປຕ຺ວາປິ ມຣຓໍ, ນຕ຺ຖິ ເອຕ຺ຖ ນິຍໂມຕິ ວຸຕ຺ຕໍ ໂຫຕິ.

໕໘໒. ອິທານິ ຕມຕ຺ຖໍ ນິທສ຺ສເນນ ສາເຘນ຺ໂຕ ‘‘ຜລານມິວ ປກ຺ການ’’ນ຺ຕິອາທິມາຫ. ຕສ຺ສຕ຺ໂຖ – ຍຖາ ຜລານໍ ປກ຺ການໍ ຍສ຺ມາ ສູຣິຍຸຄ຺ຄມນໂຕ ປຠຸຕິ ສູຣິຍາຕເປນ ສນ຺ຕປ຺ປມາເນ ຣຸກ຺ເຂ ປຖວິຣໂສ ຈ ອາໂປຣໂສ ຈ ປຕ຺ຕໂຕ ສາຂໍ ສາຂໂຕ ຂນ຺ຘໍ ຂນ຺ຘໂຕ ມູລນ຺ຕິ ເອວໍ ອນຸກ຺ກເມນ ມູລໂຕ ປຖວິເມວ ປວິສຕິ, ໂອຄມນໂຕ ປຠຸຕິ ປນ ປຖວິໂຕ ມູລໍ ມູລໂຕ ຂນ຺ຘນ຺ຕິ ເອວໍ ອນຸກ຺ກເມນ ສາຂາປຕ຺ຕປລ຺ລວາທີນິ ປຸນ ອາໂຣຫຕິ, ເອວໍ ອາໂຣຫນ຺ໂຕ ຈ ປຣິປາກຄເຕ ຜເລ ວຓ຺ຏມູລໍ ນ ປວິສຕິ. ອຖ ສູຣິຍາຕເປນ ຕປ຺ປມາເນ ວຓ຺ຏມູເລ ປຣິຬາໂຫ ອຸປ຺ປຊ຺ຊຕິ. ເຕນ ຕານິ ຜລານິ ປາໂຕ ປາໂຕ ນິຈ຺ຈກາລໍ ປຕນ຺ຕິ, ເນສໍ ປາໂຕ ປຕນໂຕ ຠຍໍ ໂຫຕິ, ປຕນາ ຠຍໍ ໂຫຕີຕິ ອຕ຺ໂຖ. ເອວໍ ຊາຕານໍ ມຈ຺ຈານໍ ນິຈ຺ຈໍ ມຣຓໂຕ ຠຍໍ. ປກ຺ກຜລສທິສາ ຫິ ສຕ຺ຕາຕິ.

໕໘໓-໖. ກິຎ຺ຈ ຠິຍ຺ໂຍ ‘‘ຍຖາປິ ກຸມ຺ຠກາຣສ຺ສ…ເປ… ຊີວິຕ’’ນ຺ຕິ. ຕສ຺ມາ ‘‘ທຫຣາ ຈ…ເປ… ປຣາຍຓາ’’ຕິ ເອວໍ ຄຓ຺ຫ, ເອວຎ຺ຈ ຄເຫຕ຺ວາ ‘‘ເຕສໍ ມຈ຺ຈຸ…ເປ… ຎາຕີ ວາ ປນ ຎາຕເກ’’ຕິ ເອວມ຺ປິ ຄຓ຺ຫ. ຍສ຺ມາ ຈ ນ ປິຕາ ຕາຍເຕ ປຸຕ຺ຕໍ, ຎາຕີ ວາ ປນ ຎາຕເກ, ຕສ຺ມາ ເປກ຺ຂຕໍເຍວ…ເປ… ນີຍຕິ.

ຕຕ຺ຖ ອຍໍ ໂຍຊນາ – ປສ຺ສມານານໍເຍວ ຎາຕີນໍ ‘‘ອມ຺ມ, ຕາຕາ’’ຕິອາທິນາ ນເຍນ ປຸຖຸ ອເນກປ຺ປກາຣກໍ ລາລປຕໍເຍວ ມຈ຺ຈານໍ ເອກເມໂກ ມຈ຺ໂຈ ຍຖາ ໂຄ ວຊ຺ໂຌ ເອວໍ ນີຍຕິ, ເອວໍ ປສ຺ສ, ອຸປາສກ, ຍາວ ອຕາໂຓ ໂລໂກຕິ.

໕໘໗. ຕຕ຺ຖ ເຍ ພຸທ຺ຘປຈ຺ເຈກພຸທ຺ຘາທໂຍ ຘິຕິສມ຺ປນ຺ນາ, ເຕ ‘‘ເອວມພ຺ຠາຫໂຕ ໂລໂກ ມຈ຺ຈຸນາ ຈ ຊຣາຍ ຈ, ໂສ ນ ສກ຺ກາ ເກນຈິ ປຣິຕ຺ຕາຓໍ ກາຕຸ’’ນ຺ຕິ ຍສ຺ມາ ຊານນ຺ຕິ, ຕສ຺ມາ ຘີຣາ ນ ໂສຈນ຺ຕິ ວິທິຕ຺ວາ ໂລກປຣິຍາຍໍ. ອິມໍ ໂລກສຠາວໍ ຎຕ຺ວາ ນ ໂສຈນ຺ຕີຕິ ວຸຕ຺ຕໍ ໂຫຕິ.

໕໘໘. ຕ຺ວໍ ປນ ຍສ຺ສ ມຄ຺ຄໍ…ເປ… ປຣິເທວສິ. ກິໍ ວຸຕ຺ຕໍ ໂຫຕິ? ຍສ຺ສ ມາຕຸກຸຈ຺ຉິໍ ອາຄຕສ຺ສ ອາຄຕມຄ຺ຄໍ ວາ ອິໂຕ ຈວິຕ຺ວາ ອຎ຺ຎຕ຺ຖ ຄຕສ຺ສ ຄຕມຄ຺ຄໍ ວາ ນ ຊານາສິ, ຕສ຺ສ ອິເມ ອຸໂຠ ອນ຺ເຕ ອສມ຺ປສ຺ສໍ ນິຣຕ຺ຖໍ ປຣິເທວສິ. ຘີຣາ ປນ ເຕ ປສ຺ສນ຺ຕາ ວິທິຕ຺ວາ ໂລກປຣິຍາຍໍ ນ ໂສຈນ຺ຕີຕິ.

໕໘໙. ອິທານິ ‘‘ນິຣຕ຺ຖໍ ປຣິເທວສີ’’ຕິ ເອຕ຺ຖ ວຸຕ຺ຕປຣິເທວນາຍ ນິຣຕ຺ຖກຠາວໍ ສາເຘນ຺ໂຕ ‘‘ປຣິເທວຍມາໂນ ເຈ’’ຕິອາທິມາຫ. ຕຕ຺ຖ ອຸທພ຺ພເຫຕິ ອຸພ຺ພເຫຍ຺ຍ ຘາເຣຍ຺ຍ, ອຕ຺ຕນິ ສຎ຺ຊເນຍ຺ຍາຕິ ອຕ຺ໂຖ. ສມ຺ມູຬ຺ໂຫ ຫິໍສມຕ຺ຕານນ຺ຕິ ສມ຺ມູຬ຺ໂຫ ຫຸຕ຺ວາ ອຕ຺ຕານໍ ພາເຘນ຺ໂຕ. ກຍິຣາ ເຈ ນໍ ວິຈກ຺ຂໂຓຕິ ຍທິ ຕາທິໂສ ກຎ຺ຈິ ອຕ຺ຖໍ ອຸທພ຺ພເຫ, ວິຈກ຺ຂໂຓປິ ນໍ ປຣິເທວໍ ກເຣຍ຺ຍ.

໕໙໐. ນ ຫິ ຣຸຓ຺ເຓນາຕິ ເອຕ຺ຖາຍໍ ໂຍຊນາ – ນ ປນ ໂກຈິ ຣຸຓ຺ເຓນ ວາ ໂສເກນ ວາ ເຈຕໂສ ສນ຺ຕິໍ ປປ຺ໂປຕິ, ອປິຈ ໂຂ ປນ ໂຣທໂຕ ໂສຈໂຕ ຈ ຠິຍ຺ໂຍ ອສ຺ສ ອຸປ຺ປຊ຺ຊເຕ ທຸກ຺ຂໍ, ສຣີຣຎ຺ຈ ທຸພ຺ພຓ຺ຓິຍາທີຫິ ອຸປຫຎ຺ຎຕີຕິ.

໕໙໑. ນ ເຕນ ເປຕາຕິ ເຕນ ປຣິເທວເນນ ກາລກຕາ ນ ປາເລນ຺ຕິ ນ ຍາເປນ຺ຕິ, ນ ຕໍ ເຕສໍ ອຸປກາຣາຍ ໂຫຕິ. ຕສ຺ມາ ນິຣຕ຺ຖາ ປຣິເທວນາຕິ.

໕໙໒. ນ ເກວລຎ຺ຈ ນິຣຕ຺ຖາ, ອນຕ຺ຖມ຺ປິ ອາວຫຕິ. ກສ຺ມາ? ຍສ຺ມາ ໂສກມປ຺ປຊຫໍ …ເປ… ວສມນ຺ວຄູ. ຕຕ຺ຖ ອນຸຕ຺ຖຸນນ຺ໂຕຕິ ອນຸໂສຈນ຺ໂຕ. ວສມນ຺ວຄູຕິ ວສໍ ຄໂຕ.

໕໙໓. ເອວມ຺ປິ ນິຣຕ຺ຖກຕ຺ຕໍ ອນຕ຺ຖາວຫຕ຺ຕຎ຺ຈ ໂສກສ຺ສ ທສ຺ເສຕ຺ວາ ອິທານິ ໂສກວິນຍຕ຺ຖໍ ໂອວທນ຺ໂຕ ‘‘ອຎ຺ເຎປິ ປສ຺ສາ’’ຕິອາທິມາຫ. ຕຕ຺ຖ ຄມິເນຕິ ຄມິເກ, ປຣໂລກຄມນສຊ຺ເຊ ຐິເຕຕິ ວຸຕ຺ຕໍ ໂຫຕິ. ຜນ຺ທນ຺ເຕວິຘ ປາຓິໂນຕິ ມຣຓຠເຍນ ຜນ຺ທມາເນເຍວ ອິຘ ສຕ຺ເຕ.

໕໙໔. ເຍນ ເຍນາຕິ ເຍນາກາເຣນ ມຎ຺ຎນ຺ຕິ ‘‘ທີຆາຍຸໂກ ຠວິສ຺ສຕິ, ອໂຣໂຄ ຠວິສ຺ສຕີ’’ຕິ. ຕໂຕ ຕໍ ອຎ຺ຎຖາເຍວ ໂຫຕິ, ໂສ ເອວໍ ມຎ຺ຎິໂຕ ມຣຕິປິ, ໂຣຄີປິ ໂຫຕິ. ເອຕາທິໂສ ອຍໍ ວິນາຠາໂວ ມຎ຺ຎິຕປ຺ປຈ຺ຈນີເກນ ໂຫຕິ, ປສ຺ສ, ອຸປາສກ, ໂລກສຠາວນ຺ຕິ ເອວເມຕ຺ຖ ອຘິປ຺ປາຍໂຍຊນາ ເວທິຕພ຺ພາ.

໕໙໖. ອຣຫໂຕ ສຸຕ຺ວາຕິ ອິມໍ ເອວຣູປໍ ອຣຫໂຕ ຘມ຺ມເທສນໍ ສຸຕ຺ວາ. ເນໂສ ລພ຺ຠາ ມຍາ ອິຕີຕິ ໂສ ເປໂຕ ‘‘ອິທານິ ມຍາ ປຸນ ຊີວຕູ’’ຕິ ນ ລພ຺ຠາ ອິຕິ ປຣິຊານນ຺ໂຕ, ວິເນຍ຺ຍ ປຣິເທວິຕນ຺ຕິ ວຸຕ຺ຕໍ ໂຫຕິ.

໕໙໗. ກິຎ຺ຈ ຠິຍ຺ໂຍ – ‘‘ຍຖາ ສຣຓມາທິຕ຺ຕໍ…ເປ… ຘໍສເຍ’’ຕິ. ຕຕ຺ຖ ຘີໂຣ ຘິຕິສມ຺ປທາຍ, ສປຎ຺ໂຎ ສາຠາວິກປຎ຺ຎາຍ, ປຓ຺ຑິໂຕ ພາຫຸສຈ຺ຈປຎ຺ຎາຍ, ກຸສໂລ ຈິນ຺ຕກຊາຕິກຕາຍ ເວທິຕພ຺ໂພ. ຈິນ຺ຕາມຍສຸຕມຍຠາວນາມຍປຎ຺ຎາຫິ ວາ ໂຍເຊຕພ຺ພໍ.

໕໙໘-໙. ນ ເກວລຎ຺ຈ ໂສກເມວ, ປຣິເທວໍ…ເປ… ສລ຺ລມຕ຺ຕໂນ. ຕຕ຺ຖ ປຊປ຺ປນ຺ຕິ ຕຓ຺ຫໍ. ໂທມນສ຺ສນ຺ຕິ ເຈຕສິກທຸກ຺ຂໍ. ອພ຺ພເຫຕິ ອຸທ຺ຘເຣ. ສລ຺ລນ຺ຕິ ເອຕເມວ ຕິປ຺ປກາຣໍ ທຸນ຺ນີຫຣຓຏ຺ເຐນ ອນ຺ໂຕວິຊ຺ຌນຏ຺ເຐນ ຈ ສລ຺ລໍ. ປຸພ຺ເພ ວຸຕ຺ຕໍ ສຕ຺ຕວິຘໍ ຣາຄາທິສລ຺ລໍ ວາ. ເອຕສ຺ມິຎ຺ຫິ ອພ຺ພູຬ຺ເຫ ສລ຺ເລ ອພ຺ພູຬ຺ຫສລ຺ໂລ…ເປ… ນິພ຺ພຸໂຕຕິ ອຣຫຕ຺ຕນິກູເຏນ ເທສນໍ ນິຏ຺ຐາເປສິ. ຕຕ຺ຖ ອສິໂຕຕິ ຕຓ຺ຫາທິຏ຺ຐີຫິ ອນິສ຺ສິໂຕ. ປປ຺ປຸຍ຺ຍາຕິ ປາປຸຓິຕ຺ວາ. ເສສໍ ອິຘ ອິໂຕ ປຸພ຺ເພ ວຸຕ຺ຕຕ຺ຕາ ອຸຕ຺ຕານຕ຺ຖເມວ, ຕສ຺ມາ ນ ວຓ຺ຓິຕໍ.

ປຣມຕ຺ຖໂຊຕິກາຍ ຂຸທ຺ທກ-ອຏ຺ຐກຖາຍ

ສຸຕ຺ຕນິປາຕ-ອຏ຺ຐກຖາຍ ສລ຺ລສຸຕ຺ຕວຓ຺ຓນາ ນິຏ຺ຐິຕາ.