໑໒. ທ຺ວຍຕານຸປສ຺ສນາສຸຕ຺ຕວຓ຺ຓນາ

ເອວໍ ເມ ສຸຕນ຺ຕິ ທ຺ວຍຕານຸປສ຺ສນາສຸຕ຺ຕໍ. ກາ ອຸປ຺ປຕ຺ຕິ? ອິມສ຺ສ ສຸຕ຺ຕສ຺ສ ອຕ຺ຕຊ຺ຌາສຍໂຕ ອຸປ຺ປຕ຺ຕິ. ອຕ຺ຕຊ຺ຌາສເຍນ ຫິ ຠຄວາ ອິມໍ ສຸຕ຺ຕໍ ເທເສສິ. ອຍເມຕ຺ຖ ສງ຺ເຂໂປ, ວິຕ຺ຖາໂຣ ປນສ຺ສ ອຕ຺ຖວຓ຺ຓນາຍເມວ ອາວິ ຠວິສ຺ສຕິ. ຕຕ຺ຖ ເອວໍ ເມ ສຸຕນ຺ຕິອາທີນິ ວຸຕ຺ຕນຍາເນວ. ປຸພ຺ພາຣາເມຕິ ສາວຕ຺ຖິນຄຣສ຺ສ ປຸຣຕ຺ຖິມທິສາຍໍ ອາຣາເມ. ມິຄາຣມາຕຸ ປາສາເທຕິ ເອຕ຺ຖ ວິສາຂາ ອຸປາສິກາ ອຕ຺ຕໂນ ສສຸເຣນ ມິຄາເຣນ ເສຏ຺ຐິນາ ມາຕຸຏ຺ຐາເນ ຐປິຕຕ຺ຕາ ‘‘ມິຄາຣມາຕາ’’ຕິ ວຸຈ຺ຈຕິ. ຕາຍ ມິຄາຣມາຕຸຍາ ນວໂກຏິອຄ຺ຆນກໍ ມຫາລຕາປິຬນ຺ຘນໍ ວິສ຺ສຊ຺ເຊຕ຺ວາ ກາຣາປິໂຕ ປາສາໂທ ເຫຏ຺ຐາ ຈ ອຸປຣິ ຈ ປຎ຺ຈ ປຎ຺ຈ ຄພ຺ຠສຕານິ ກຕ຺ວາ ສຫສ຺ສກູຏາຄາຣຄພ຺ໂຠ, ໂສ ‘‘ມິຄາຣມາຕຸປາສາໂທ’’ຕິ ວຸຈ຺ຈຕິ. ຕສ຺ມິໍ ມິຄາຣມາຕຸ ປາສາເທ.

ເຕນ ໂຂ ປນ ສມເຍນ ຠຄວາຕິ ຍໍ ສມຍໍ ຠຄວາ ສາວຕ຺ຖິໍ ນິສ຺ສາຍ ປຸພ຺ພາຣາເມ ມິຄາຣມາຕຸ ປາສາເທ ວິຫຣຕິ, ເຕນ ສມເຍນ. ຕທຫຸໂປສເຖຕິ ຕສ຺ມິໍ ອຫຸ ອຸໂປສເຖ, ອຸໂປສຖທິວເສຕິ ວຸຕ຺ຕໍ ໂຫຕິ. ປນ຺ນຣເສຕິ ອິທໍ ອຸໂປສຖຄ຺ຄຫເຓນ ສມ຺ປຕ຺ຕາວເສສຸໂປສຖປຏິກ຺ເຂປວຈນໍ. ປຸຓ຺ຓາຍ ປຸຓ຺ຓມາຍ ຣຕ຺ຕິຍາຕິ ປນ຺ນຣສທິວສຕ຺ຕາ ທິວສຄຓນາຍ ອພ຺ຠາທິອຸປກ຺ກິເລສວິຣຫຕ຺ຕາ ຣຕ຺ຕິຄຸຓສມ຺ປຕ຺ຕິຍາ ຈ ປຸຓ຺ຓຕ຺ຕາ ປຸຓ຺ຓາຍ, ປຣິປຸຓ຺ຓຈນ຺ທຕ຺ຕາ ປຸຓ຺ຓມາຍ ຈ ຣຕ຺ຕິຍາ. ຠິກ຺ຂຸສງ຺ຆປຣິວຸໂຕຕິ ຠິກ຺ຂຸສງ຺ເຆນ ປຣິວຸໂຕ. ອພ຺ໂຠກາເສ ນິສິນ຺ໂນ ໂຫຕີຕິ ມິຄາຣມາຕຸ ຣຕນປາສາທປຣິເວເຓ ອພ຺ໂຠກາເສ ອຸປຣິ ອປ຺ປຏິຈ຺ຉນ຺ເນ ໂອກາເສ ປຎ຺ຎຕ຺ຕວຣພຸທ຺ຘາສເນ ນິສິນ຺ໂນ ໂຫຕິ. ຕຸຓ຺ຫີຠູຕໍ ຕຸຓ຺ຫີຠູຕນ຺ຕິ ອຕີວ ຕຸຓ຺ຫີຠູຕໍ, ຍໂຕ ຍໂຕ ວາ ອນຸວິໂລເກຕິ, ຕໂຕ ຕໂຕ ຕຸຓ຺ຫີຠູຕໍ, ຕຸຓ຺ຫີຠູຕໍ ວາຈາຍ, ປຸນ ຕຸຓ຺ຫີຠູຕໍ ກາເຍນ. ຠິກ຺ຂຸສງ຺ຆໍ ອນຸວິໂລເກຕ຺ວາຕິ ຕໍ ປຣິວາເຣຕ຺ວາ ນິສິນ຺ນໍ ອເນກສຫສ຺ສຠິກ຺ຂຸປຣິມາຓໍ ຕຸຓ຺ຫີຠູຕໍ ຕຸຓ຺ຫີຠູຕໍ ຠິກ຺ຂຸສງ຺ຆໍ ‘‘ເອຕ຺ຕກາ ເອຕ຺ຖ ໂສຕາປນ຺ນາ, ເອຕ຺ຕກາ ສກທາຄາມິໂນ, ເອຕ຺ຕກາ ອນາຄາມິໂນ ເອຕ຺ຕກາ ອາຣທ຺ຘວິປສ຺ສກາ ກລ຺ຍາຓປຸຖຸຊ຺ຊນາ, ອິມສ຺ສ ຠິກ຺ຂຸສງ຺ຆສ຺ສ ກີທິສີ ຘມ຺ມເທສນາ ສປ຺ປາຍາ’’ຕິ ສປ຺ປາຍຘມ຺ມເທສນາປຣິຈ຺ເຉທນຕ຺ຖໍ ອິໂຕ ຈິໂຕ ຈ ວິໂລເກຕ຺ວາ.

ເຍ ເຕ, ຠິກ຺ຂເວ, ກຸສລາ ຘມ຺ມາຕິ ເຍ ເຕ ອາໂຣຄ຺ຍຏ຺ເຐນ ອນວຊ຺ຊຏ຺ເຐນ ອິຏ຺ຐຜລຏ຺ເຐນ ໂກສລ຺ລສມ຺ຠູຕຏ຺ເຐນ ຈ ກຸສລາ ສຕ຺ຕຕິໍສໂພຘິປກ຺ຂິຍຘມ຺ມາ, ຕຊ຺ໂຊຕກາ ວາ ປຣິຍຕ຺ຕິຘມ຺ມາ. ອຣິຍາ ນິຍ຺ຍານິກາ ສມ຺ໂພຘຄາມິໂນຕິ ອຸປຄນ຺ຕພ຺ພຏ຺ເຐນ ອຣິຍາ, ໂລກໂຕ ນິຍ຺ຍານຏ຺ເຐນ ນິຍ຺ຍານິກາ, ສມ຺ໂພຘສງ຺ຂາຕໍ ອຣຫຕ຺ຕໍ ຄມນຏ຺ເຐນ ສມ຺ໂພຘຄາມິໂນ. ເຕສໍ ໂວ ຠິກ຺ຂເວ…ເປ… ສວນາຍ, ເຕສໍ ຠິກ຺ຂເວ ກຸສລານໍ…ເປ… ສມ຺ໂພຘຄາມີນໍ ກາ ອຸປນິສາ, ກິໍ ກາຣຓໍ, ກິໍ ປໂຍຊນໍ ຕຸມ຺ຫາກໍ ສວນາຍ, ກິມຕ຺ຖໍ ຕຸມ຺ເຫ ເຕ ຘມ຺ເມ ສຸຓາຖາຕິ ວຸຕ຺ຕໍ ໂຫຕິ. ຍາວເທວ ທ຺ວຍຕານໍ ຘມ຺ມານໍ ຍຖາຠູຕໍ ຎາຓາຍາຕິ ເອຕ຺ຖ ຍາວເທວາຕິ ປຣິຈ຺ເຉທາວຘາຣຓວຈນໍ. ທ຺ເວ ອວຍວາ ເອເຕສນ຺ຕິ ທ຺ວຍາ, ທ຺ວຍາ ເອວ ທ຺ວຍຕາ, ເຕສໍ ທ຺ວຍຕານໍ. ‘‘ທ຺ວຍານ’’ນ຺ຕິປິ ປາໂຐ. ຍຖາຠູຕໍ ຎາຓາຍາຕິ ອວິປຣີຕຎາຓາຍ. ກິໍ ວຸຕ຺ຕໍ ໂຫຕິ? ຍເທຕໍ ໂລກິຍໂລກຸຕ຺ຕຣາທິເຠເທນ ທ຺ວິຘາ ວວຕ຺ຖິຕານໍ ຘມ຺ມານໍ ວິປສ຺ສນາສງ຺ຂາຕໍ ຍຖາຠູຕຎາຓໍ, ເອຕທຕ຺ຖາຍ ນ ອິໂຕ ຠິຍ຺ໂຍຕິ, ສວເນນ ຫິ ເອຕ຺ຕກໍ ໂຫຕິ, ຕທຸຕ຺ຕຣິ ວິເສສາຘິຄໂມ ຠາວນາຍາຕິ. ກິຎ຺ຈ ທ຺ວຍຕໍ ວເທຖາຕິ ເອຕ຺ຖ ປນ ສເຈ, ໂວ ຠິກ຺ຂເວ, ສິຍາ, ກິຎ຺ຈ ຕຸມ຺ເຫ, ຠນ຺ເຕ, ທ຺ວຍຕໍ ວເທຖາຕິ ອຍມຘິປ຺ປາໂຍ. ປທຕ຺ໂຖ ປນ ‘‘ກິຎ຺ຈ ທ຺ວຍຕາຠາວໍ ວເທຖາ’’ຕິ.

(໑) ຕໂຕ ຠຄວາ ທ຺ວຍຕໍ ທສ຺ເສນ຺ໂຕ ‘‘ອິທໍ ທຸກ຺ຂ’’ນ຺ຕິ ເອວມາທິມາຫ. ຕຕ຺ຖ ທ຺ວຍຕານໍ ຈຕຸສຈ຺ຈຘມ຺ມານໍ ‘‘ອິທໍ ທຸກ຺ຂໍ, ອຍໍ ທຸກ຺ຂສມຸທໂຍ’’ຕິ ເອວໍ ໂລກິຍສ຺ສ ເອກສ຺ສ ອວຍວສ຺ສ ສເຫຕຸກສ຺ສ ວາ ທຸກ຺ຂສ຺ສ ທສ຺ສເນນ ອຍໍ ເອການຸປສ຺ສນາ, ອິຕຣາ ໂລກຸຕ຺ຕຣສ຺ສ ທຸຕິຍສ຺ສ ອວຍວສ຺ສ ສອຸປາຍສ຺ສ ວາ ນິໂຣຘສ຺ສ ທສ຺ສເນນ ທຸຕິຍານຸປສ຺ສນາ. ປຐມາ ເຈຕ຺ຖ ຕຕິຍຈຕຸຕ຺ຖວິສຸທ຺ຘີຫິ ໂຫຕິ, ທຸຕິຍາ ປຎ຺ຈມວິສຸທ຺ຘິຍາ. ເອວໍ ສມ຺ມາ ທ຺ວຍຕານຸປສ຺ສິໂນຕິ ອິມິນາ ວຸຕ຺ຕນເຍນ ສມ຺ມາ ທ຺ວຍຘມ຺ເມ ອນຸປສ຺ສນ຺ຕສ຺ສ ສຕິຍາ ອວິປ຺ປວາເສນ ອປ຺ປມຕ຺ຕສ຺ສ, ກາຍິກເຈຕສິກວີຣິຍາຕາເປນ ອາຕາປິໂນ ກາເຍ ຈ ຊີວິເຕ ຈ ນິຣເປກ຺ຂຕ຺ຕາ, ປຫິຕຕ຺ຕສ຺ສ. ປາຏິກງ຺ຂນ຺ຕິ ອິຈ຺ຉິຕພ຺ພໍ. ທິຏ຺ເຐວ ຘມ຺ເມ ອຎ຺ຎາຕິ ອສ຺ມິໍເຍວ ອຕ຺ຕຠາເວ ອຣຫຕ຺ຕໍ. ສຕິ ວາ ອຸປາທິເສເສ ອນາຄາມິຕາຕິ ‘‘ອຸປາທິເສສ’’ນ຺ຕິ ປຸນພ຺ຠວວເສນ ອຸປາທາຕພ຺ພກ຺ຂນ຺ຘເສສໍ ວຸຈ຺ຈຕິ, ຕສ຺ມິໍ ວາ ສຕິ ອນາຄາມິຠາໂວ ປຏິກງ຺ໂຂຕິ ທສ຺ເສຕິ. ຕຕ຺ຖ ກິຎ຺ຈາປິ ເຫຏ຺ຐິມຜລານິປິ ເອວໍ ທ຺ວຍຕານຸປສ຺ສິໂນວ ໂຫນ຺ຕິ, ອຸປຣິມຜເລສຸ ປນ ອຸສ຺ສາຫໍ ຊເນນ຺ໂຕ ເອວມາຫ.

ອິທມໂວຈາຕິອາທິ ສງ຺ຄີຕິກາຣານໍ ວຈນໍ. ຕຕ຺ຖ ອິທນ຺ຕິ ‘‘ເຍ ເຕ, ຠິກ຺ຂເວ’’ຕິອາທິວຸຕ຺ຕນິທສ຺ສນໍ. ເອຕນ຺ຕິ ອິທານິ ‘‘ເຍ ທຸກ຺ຂ’’ນ຺ຕິ ເອວມາທິວຕ຺ຕພ຺ພຄາຖາພນ຺ຘນິທສ຺ສນໍ. ອິມາ ຈ ຄາຖາ ຈຕຸສຈ຺ຈທີປກຕ຺ຕາ ວຸຕ຺ຕຕ຺ຖທີປິກາ ເອວ, ເອວໍ ສນ຺ເຕປິ ຄາຖາຣຸຈິການໍ ປຈ຺ຉາ ອາຄຕານໍ ປຸພ຺ເພ ວຸຕ຺ຕໍ ອສມຕ຺ຖຕາຍ ອນຸຄ຺ຄເຫຕ຺ວາ ‘‘ອິທານິ ຍທິ ວເທຍ຺ຍ ສຸນ຺ທຣ’’ນ຺ຕິ ອາກງ຺ຂນ຺ຕານໍ ວິກ຺ຂິຕ຺ຕຈິຕ຺ຕານຎ຺ຈ ອຕ຺ຖາຍ ວຸຕ຺ຕາ. ວິເສສຕ຺ຖທີປິກາ ວາຕິ ອວິປສ຺ສເກ ວິປສ຺ສເກ ຈ ທສ຺ເສຕ຺ວາ ເຕສໍ ວຏ຺ຏວິວຏ຺ຏທສ຺ສນໂຕ, ຕສ຺ມາ ວິເສສຕ຺ຖທສ຺ສນຕ຺ຖເມວ ວຸຕ຺ຕາ. ເອສ ນໂຍ ອິໂຕ ປຣມ຺ປິ ຄາຖາວຈເນສຸ.

໗໓໐. ຕຕ຺ຖ ຍຕ຺ຖ ຈາຕິ ນິພ຺ພານໍ ທສ຺ເສຕິ. ນິພ຺ພາເນ ຫິ ທຸກ຺ຂໍ ສພ຺ພໂສ ອຸປຣຸຊ຺ຌຕິ, ສພ຺ພປ຺ປກາຣໍ ອຸປຣຸຊ຺ຌຕິ, ສເຫຕຸກໍ ອຸປຣຸຊ຺ຌຕິ, ອເສສຎ຺ຈ ອຸປຣຸຊ຺ຌຕິ. ຕຎ຺ຈ ມຄ຺ຄນ຺ຕິ ຕຎ຺ຈ ອຏ຺ຐງ຺ຄິກໍ ມຄ຺ຄໍ.

໗໓໑-໓. ເຈໂຕວິມຸຕ຺ຕິຫີນາ ເຕ, ອໂຖ ປຎ຺ຎາວິມຸຕ຺ຕິຍາຕິ ເອຕ຺ຖ ອຣຫຕ຺ຕຜລສມາຘິ ຣາຄວິຣາຄາ ເຈໂຕວິມຸຕ຺ຕິ, ອຣຫຕ຺ຕຜລປຎ຺ຎາ ອວິຊ຺ຊາວິຣາຄາ ປຎ຺ຎາວິມຸຕ຺ຕີຕິ ເວທິຕພ຺ພາ. ຕຓ຺ຫາຈຣິເຕນ ວາ ອປ຺ປນາຌານພເລນ ກິເລເສ ວິກ຺ຂມ຺ເຠຕ຺ວາ ອຘິຄຕໍ ອຣຫຕ຺ຕຜລໍ ຣາຄວິຣາຄາ ເຈໂຕວິມຸຕ຺ຕິ, ທິຏ຺ຐິຈຣິເຕນ ອຸປຈາຣຊ຺ຌານມຕ຺ຕໍ ນິພ຺ພຕ຺ເຕຕ຺ວາ ວິປສ຺ສິຕ຺ວາ ອຘິຄຕໍ ອຣຫຕ຺ຕຜລໍ ອວິຊ຺ຊາວິຣາຄາ ປຎ຺ຎາວິມຸຕ຺ຕິ. ອນາຄາມິຜລໍ ວາ ກາມຣາຄໍ ສນ຺ຘາຍ ຣາຄວິຣາຄາ ເຈໂຕວິມຸຕ຺ຕິ, ອຣຫຕ຺ຕຜລໍ ສພ຺ພປ຺ປກາຣໂຕ ອວິຊ຺ຊາວິຣາຄາ ປຎ຺ຎາວິມຸຕ຺ຕີຕິ. ອນ຺ຕກິຣິຍາຍາຕິ ວຏ຺ຏທຸກ຺ຂສ຺ສ ອນ຺ຕກຣຓຕ຺ຖາຍ. ຊາຕິຊຣູປຄາຕິ ຊາຕິຊຣໍ ອຸປຄຕາ, ຊາຕິຊຣາຍ ວາ ອຸປຄຕາ, ນ ປຣິມຸຈ຺ຈນ຺ຕິ ຊາຕິຊຣາຍາຕິ ເອວໍ ເວທິຕພ຺ພາ. ເສສເມຕ຺ຖ ອາທິໂຕ ປຠຸຕິ ປາກຏເມວ. ຄາຖາປຣິໂຍສາເນ ຈ ສຏ຺ຐິມຕ຺ຕາ ຠິກ຺ຂູ ຕໍ ເທສນໍ ອຸຄ຺ຄເຫຕ຺ວາ ວິປສ຺ສິຕ຺ວາ ຕສ຺ມິໍເຍວ ອາສເນ ອຣຫຕ຺ຕໍ ປາປຸຓິໍສຸ. ຍຖາ ເຈຕ຺ຖ, ເອວໍ ສພ຺ພວາເຣສຸ.

(໒) ອໂຕ ເອວ ຠຄວາ ‘‘ສິຍາ ອຎ຺ເຎນປິ ປຣິຍາເຍນາ’’ຕິອາທິນາ ນເຍນ ນານປ຺ປກາຣໂຕ ທ຺ວຍຕານຸປສ຺ສນໍ ອາຫ. ຕຕ຺ຖ ທຸຕິຍວາເຣ ອຸປຘິປຈ຺ຈຍາຕິ ສາສວກມ຺ມປຈ຺ຈຍາ. ສາສວກມ຺ມຎ຺ຫິ ອິຘ ‘‘ອຸປຘີ’’ຕິ ອຘິປ຺ເປຕໍ. ອເສສວິຣາຄນິໂຣຘາຕິ ອເສສໍ ວິຣາເຄນ ນິໂຣຘາ, ອເສສວິຣາຄສງ຺ຂາຕາ ວາ ນິໂຣຘາ.

໗໓໔. ອຸປຘິນິທານາຕິ ກມ຺ມປຈ຺ຈຍາ. ທຸກ຺ຂສ຺ສ ຊາຕິປ຺ປຠວານຸປສ຺ສີຕິ ວຏ຺ຏທຸກ຺ຂສ຺ສ ຊາຕິກາຣຓໍ ‘‘ອຸປຘີ’’ຕິ ອນຸປສ຺ສນ຺ໂຕ. ເສສເມຕ຺ຖ ປາກຏເມວ. ເອວໍ ອຍມ຺ປິ ວາໂຣ ຈຕ຺ຕາຣິ ສຈ຺ຈານິ ທີເປຕ຺ວາ ອຣຫຕ຺ຕນິກູເຏເນວ ວຸຕ຺ໂຕ. ຍຖາ ຈາຍໍ, ເອວໍ ສພ຺ພວາຣາ.

(໓) ຕຕ຺ຖ ຕຕິຍວາເຣ ອວິຊ຺ຊາປຈ຺ຈຍາຕິ ຠວຄາມິກມ຺ມສມ຺ຠາຣອວິຊ຺ຊາປຈ຺ຈຍາ. ທຸກ຺ຂໍ ປນ ສພ຺ພຕ຺ຖ ວຏ຺ຏທຸກ຺ຂເມວ.

໗໓໕. ຊາຕິມຣຓສໍສາຣນ຺ຕິ ຂນ຺ຘນິພ຺ພຕ຺ຕິໍ ຊາຕິໍ ຂນ຺ຘເຠທໍ ມຣຓໍ ຂນ຺ຘປຏິປາຏິໍ ສໍສາຣຎ຺ຈ. ວຊນ຺ຕີຕິ ຄຈ຺ຉນ຺ຕິ ອຸເປນ຺ຕິ. ອິຕ຺ຖຠາວຎ຺ຎຖາຠາວນ຺ຕິ ອິມໍ ມນຸສ຺ສຠາວໍ ອິໂຕ ອວເສສອຎ຺ຎນິກາຍຠາວຎ຺ຈ. ຄຕີຕິ ປຈ຺ຈຍຠາໂວ.

໗໓໖. ອວິຊ຺ຊາ ຫາຍນ຺ຕິ ອວິຊ຺ຊາ ຫິ ອຍໍ. ວິຊ຺ຊາຄຕາ ຈ ເຍ ສຕ຺ຕາຕິ ເຍ ຈ ອຣຫຕ຺ຕມຄ຺ຄວິຊ຺ຊາຍ ກິເລເສ ວິຊ຺ຌິຕ຺ວາ ຄຕາ ຂີຓາສວສຕ຺ຕາ. ເສສມຸຕ຺ຕານຕ຺ຖເມວ.

(໔) ຈຕຸຕ຺ຖວາເຣ ສງ຺ຂາຣປຈ຺ຈຍາຕິ ປຸຎ຺ຎາປຸຎ຺ຎາເນຎ຺ຊາຠິສງ຺ຂາຣປຈ຺ຈຍາ.

໗໓໘-໙. ເອຕມາທີນວໍ ຎຕ຺ວາຕິ ຍທິທໍ ທຸກ຺ຂໍ ສງ຺ຂາຣປຈ຺ຈຍາ, ເອຕໍ ອາທີນວນ຺ຕິ ຎຕ຺ວາ. ສພ຺ພສງ຺ຂາຣສມຖາຕິ ສພ຺ເພສໍ ວຸຕ຺ຕປ຺ປກາຣານໍ ສງ຺ຂາຣານໍ ມຄ຺ຄຎາເຓນ ສມຖາ, ອຸປຫຕຕາຍ ຜລສມຕ຺ຖຕາຍາຕິ ວຸຕ຺ຕໍ ໂຫຕິ. ສຎ຺ຎານນ຺ຕິ ກາມສຎ຺ຎາທີນໍ ມຄ຺ເຄເນວ ອຸປໂຣຘນາ. ເອຕໍ ຎຕ຺ວາ ຍຖາຕຖນ຺ຕິ ເອຕໍ ທຸກ຺ຂກ຺ຂຍໍ ອວິປຣີຕໍ ຎຕ຺ວາ. ສມ຺ມທ຺ທສາຕິ ສມ຺ມາທສ຺ສນາ. ສມ຺ມທຎ຺ຎາຍາຕິ ສງ຺ຂຕໍ ອນິຈ຺ຈາທິໂຕ, ອສງ຺ຂຕຎ຺ຈ ນິຈ຺ຈາທິໂຕ ຎຕ຺ວາ. ມາຣສໍໂຍຄນ຺ຕິ ເຕຠູມກວຏ຺ຏໍ. ເສສມຸຕ຺ຕານຕ຺ຖເມວ.

(໕) ປຎ຺ຈມວາເຣ ວິຎ຺ຎາຓປຈ຺ຈຍາຕິ ກມ຺ມສຫຊາຕອຠິສງ຺ຂາຣວິຎ຺ຎາຓປຈ຺ຈຍາ.

໗໔໑. ນິຈ຺ຉາໂຕຕິ ນິຕ຺ຕຓ຺ໂຫ. ປຣິນິພ຺ພຸໂຕຕິ ກິເລສປຣິນິພ຺ພາເນນ ປຣິນິພ຺ພຸໂຕ ໂຫຕິ. ເສສໍ ປາກຏເມວ.

(໖) ຉຏ຺ຐວາເຣ ຜສ຺ສປຈ຺ຈຍາຕິ ອຠິສງ຺ຂາຣວິຎ຺ຎາຓສມ຺ປຍຸຕ຺ຕຜສ຺ສປຈ຺ຈຍາຕິ ອຕ຺ໂຖ. ເອວໍ ເອຕ຺ຖ ປທປຏິປາຏິຍາ ວຕ຺ຕພ຺ພານິ ນາມຣູປສຬາຍຕນານິ ອວຕ຺ວາ ຜສ຺ໂສ ວຸຕ຺ໂຕ. ຕານິ ຫິ ຣູປມິສ຺ສກຕ຺ຕາ ກມ຺ມສມ຺ປຍຸຕ຺ຕາເນວ ນ ໂຫນ຺ຕິ, ອິທຎ຺ຈ ວຏ຺ຏທຸກ຺ຂໍ ກມ຺ມໂຕ ວາ ສມ຺ຠເວຍ຺ຍ ກມ຺ມສມ຺ປຍຸຕ຺ຕຘມ຺ມໂຕ ວາຕິ.

໗໔໒-໓. ຠວໂສຕານຸສາຣິນນ຺ຕິ ຕຓ຺ຫານຸສາຣິນໍ. ປຣິຎ຺ຎາຍາຕິ ຕີຫິ ປຣິຎ຺ຎາຫິ ປຣິຊານິຕ຺ວາ. ອຎ຺ຎາຍາຕິ ອຣຫຕ຺ຕມຄ຺ຄປຎ຺ຎາຍ ຎຕ຺ວາ. ອຸປສເມ ຣຕາຕິ ຜລສມາປຕ຺ຕິວເສນ ນິພ຺ພາເນ ຣຕາ. ຜສ຺ສາຠິສມຍາຕິ ຜສ຺ສນິໂຣຘາ. ເສສໍ ປາກຏເມວ.

(໗) ສຕ຺ຕມວາເຣ ເວທນາປຈ຺ຈຍາຕິ ກມ຺ມສມ຺ປຍຸຕ຺ຕເວທນາປຈ຺ຈຍາ.

໗໔໔-໕. ອທຸກ຺ຂມສຸຂໍ ສຫາຕິ ອທຸກ຺ຂມສຸເຂນ ສຫ. ເອຕໍ ທຸກ຺ຂນ຺ຕິ ຎຕ຺ວານາຕິ ເອຕໍ ສພ຺ພໍ ເວທຍິຕໍ ‘‘ທຸກ຺ຂກາຣຓ’’ນ຺ຕິ ຎຕ຺ວາ, ວິປຣິຓາມຏ຺ຐິຕິອຎ຺ຎາຓທຸກ຺ຂຕາຫິ ວາ ທຸກ຺ຂໍ ຎຕ຺ວາ. ໂມສຘມ຺ມນ຺ຕິ ນສ຺ສນຘມ຺ມໍ. ປໂລກິນນ຺ຕິ ຊຣາມຣເຓຫິ ປລຸຊ຺ຊນຘມ຺ມໍ. ຜຸສ຺ສ ຜຸສ຺ສາຕິ ອຸທຍພ຺ພຍຎາເຓນ ຜຸສິຕ຺ວາ ຜຸສິຕ຺ວາ. ວຍໍ ປສ຺ສນ຺ຕິ ອນ຺ເຕ ຠງ຺ຄເມວ ປສ຺ສນ຺ໂຕ. ເອວໍ ຕຕ຺ຖ ວິຊານຕີຕິ ເອວໍ ຕາ ເວທນາ ວິຊານາຕິ, ຕຕ຺ຖ ວາ ທຸກ຺ຂຠາວໍ ວິຊານາຕິ. ເວທນານໍ ຂຍາຕິ ຕໂຕ ປຣໍ ມຄ຺ຄຎາເຓນ ກມ຺ມສມ຺ປຍຸຕ຺ຕານໍ ເວທນານໍ ຂຍາ. ເສສມຸຕ຺ຕານເມວ.

(໘) ອຏ຺ຐມວາເຣ ຕຓ຺ຫາປຈ຺ຈຍາຕິ ກມ຺ມສມ຺ຠາຣຕຓ຺ຫາປຈ຺ຈຍາ.

໗໔໗. ເອຕມາທີນວໍ ຎຕ຺ວາ, ຕຓ຺ຫໍ ທຸກ຺ຂສ຺ສ ສມ຺ຠວນ຺ຕິ ເອຕໍ ທຸກ຺ຂສ຺ສ ສມ຺ຠວໍ ຕຓ຺ຫາຍ ອາທີນວໍ ຎຕ຺ວາ. ເສສມຸຕ຺ຕານເມວ.

(໙) ນວມວາເຣ ອຸປາທານປຈ຺ຈຍາຕິ ກມ຺ມສມ຺ຠາຣອຸປາທານປຈ຺ຈຍາ.

໗໔໘-໙. ຠໂວຕິ ວິປາກຠໂວ ຂນ຺ຘປາຕຸຠາໂວ. ຠູໂຕ ທຸກ຺ຂນ຺ຕິ ຠູໂຕ ສມ຺ຠູໂຕ ວຏ຺ຏທຸກ຺ຂໍ ນິຄຈ຺ຉຕິ. ຊາຕສ຺ສ ມຣຓນ຺ຕິ ຍຕ຺ຣາປິ ‘‘ຠູໂຕ ສຸຂໍ ນິຄຈ຺ຉຕີ’’ຕິ ພາລາ ມຎ຺ຎນ຺ຕິ, ຕຕ຺ຣາປິ ທຸກ຺ຂເມວ ທສ຺ເສນ຺ໂຕ ອາຫ – ‘‘ຊາຕສ຺ສ ມຣຓໍ ໂຫຕີ’’ຕິ. ທຸຕິຍຄາຖາຍ ໂຍຊນາ – ອນິຈ຺ຈາທີຫິ ສມ຺ມທຎ຺ຎາຍ ປຓ຺ຑິຕາ ອຸປາທານກ຺ຂຍາ ຊາຕິກ຺ຂຍໍ ນິພ຺ພານໍ ອຠິຎ຺ຎາຍ ນ ຄຈ຺ຉນ຺ຕິ ປຸນພ຺ຠວນ຺ຕິ.

(໑໐) ທສມວາເຣ ອາຣມ຺ຠປຈ຺ຈຍາຕິ ກມ຺ມສມ຺ປຍຸຕ຺ຕວີຣິຍປຈ຺ຈຍາ.

໗໕໑. ອນາຣມ຺ເຠ ວິມຸຕ຺ຕິໂນຕິ ອນາຣມ຺ເຠ ນິພ຺ພາເນ ວິມຸຕ຺ຕສ຺ສ. ເສສມຸຕ຺ຕານເມວ.

(໑໑) ເອກາທສມວາເຣ ອາຫາຣປຈ຺ຈຍາຕິ ກມ຺ມສມ຺ປຍຸຕ຺ຕາຫາຣປຈ຺ຈຍາ. ອປໂຣ ນໂຍ – ຈຕຸພ຺ພິຘາ ສຕ຺ຕາ ຣູປູປຄາ, ເວທນູປຄາ, ສຎ຺ຎູປຄາ, ສງ຺ຂາຣູປຄາຕິ. ຕຕ຺ຖ ເອກາທສວິຘາຍ ກາມຘາຕຸຍາ ສຕ຺ຕາ ຣູປູປຄາ ກພຬີກາຣາຫາຣເສວນໂຕ. ຣູປຘາຕຸຍາ ສຕ຺ຕາ ອຎ຺ຎຕ຺ຣ ອສຎ຺ເຎຫິ ເວທນູປຄາ ຜສ຺ສາຫາຣເສວນໂຕ. ເຫຏ຺ຐາ ຕິວິຘາຍ ອຣູປຘາຕຸຍາ ສຕ຺ຕາ ສຎ຺ຎູປຄາ ສຎ຺ຎາຠິນິພ຺ພຕ຺ຕມໂນສຎ຺ເຈຕນາຫາຣເສວນໂຕ. ຠວຄ຺ເຄ ສຕ຺ຕາ ສງ຺ຂາຣູປຄາ ສງ຺ຂາຣາຠິນິພ຺ພຕ຺ຕວິຎ຺ຎາຓາຫາຣເສວນໂຕຕິ. ເອວມ຺ປິ ຍໍ ກິຎ຺ຈິ ທຸກ຺ຂໍ ສມ຺ໂຠຕິ, ສພ຺ພໍ ອາຫາຣປຈ຺ຈຍາຕິ ເວທິຕພ຺ພໍ.

໗໕໕. ອາໂຣຄ຺ຍນ຺ຕິ ນິພ຺ພານໍ. ສງ຺ຂາຍ ເສວີຕິ ຈຕ຺ຕາໂຣ ປຈ຺ຈເຍ ປຈ຺ຈເວກ຺ຂິຕ຺ວາ ເສວມາໂນ, ‘‘ປຎ຺ຈກ຺ຂນ຺ຘາ ທ຺ວາທສາຍຕນານິ ອຏ຺ຐາຣສຘາຕຸໂຍ’’ຕິ ເອວໍ ວາ ໂລກໍ ສງ຺ຂາຍ ‘‘ອນິຈ຺ຈໍ ທຸກ຺ຂໍ ອນຕ຺ຕາ’’ຕິ ຎາເຓນ ເສວມາໂນ. ຘມ຺ມຏ຺ໂຐຕິ ຈຕຸສຈ຺ຈຘມ຺ເມ ຐິໂຕ. ສງ຺ຂ຺ຍໍ ໂນເປຕີຕິ ‘‘ເທໂວ’’ຕິ ວາ ‘‘ມນຸສ຺ໂສ’’ຕິ ວາ ອາທິກໍ ສງ຺ຂ຺ຍໍ ນ ຄຈ຺ຉຕິ. ເສສມຸຕ຺ຕານເມວ.

(໑໒) ທ຺ວາທສມວາເຣ ອິຎ຺ຊິຕປຈ຺ຈຍາຕິ ຕຓ຺ຫາມານທິຏ຺ຐິກມ຺ມກິເລສອິຎ຺ຊິເຕສຸ ຍໂຕ ກຸໂຕຈິ ກມ຺ມສມ຺ຠາຣິຎ຺ຊິຕປຈ຺ຈຍາ.

໗໕໗. ເອຊໍ ໂວສ຺ສຊ຺ຊາຕິ ຕຓ຺ຫໍ ຈຊິຕ຺ວາ. ສງ຺ຂາເຣ ອຸປຣຸນ຺ຘິຍາຕິ ກມ຺ມໍ ກມ຺ມສມ຺ປຍຸຕ຺ເຕ ຈ ສງ຺ຂາເຣ ນິໂຣເຘຕ຺ວາ. ເສສມຸຕ຺ຕານເມວ.

(໑໓) ເຕຣສມວາເຣ ນິສ຺ສິຕສ຺ສ ຈລິຕນ຺ຕິ ຕຓ຺ຫາຍ ຕຓ຺ຫາທິຏ຺ຐິມາເນຫິ ວາ ຂນ຺ເຘ ນິສ຺ສິຕສ຺ສ ສີຫສຸຕ຺ເຕ (ສໍ. ນິ. ໓.໗໘) ເທວານໍ ວິຍ ຠຍຈລນໍ ໂຫຕິ. ເສສມຸຕ຺ຕານເມວ.

(໑໔) ຈຸທ຺ທສມວາເຣ ຣູເປຫີຕິ ຣູປຠເວຫິ ຣູປສມາປຕ຺ຕີຫິ ວາ. ອຣູປາຕິ ອຣູປຠວາ ອຣູປສມາປຕ຺ຕິໂຍ ວາ. ນິໂຣໂຘຕິ ນິພ຺ພານໍ.

໗໖໑. ມຈ຺ຈຸຫາຍິໂນຕິ ມຣຓມຈ຺ຈຸ ກິເລສມຈ຺ຈຸ ເທວປຸຕ຺ຕມຈ຺ຈຸຫາຍິໂນ, ຕິວິຘມ຺ປິ ຕໍ ມຈ຺ຈຸໍ ຫິຕ຺ວາ ຄາມິໂນຕິ ວຸຕ຺ຕໍ ໂຫຕິ. ເສສມຸຕ຺ຕານເມວ.

(໑໕) ປນ຺ນຣສມວາເຣ ຍນ຺ຕິ ນາມຣູປໍ ສນ຺ຘາຍາຫ. ຕຎ຺ຫິ ໂລເກນ ຘຸວສຸຠສຸຂຕ຺ຕວເສນ ‘‘ອິທໍ ສຈ຺ຈ’’ນ຺ຕິ ອຸປນິຊ຺ຌາຍິຕໍ ທິຏ຺ຐມາໂລກິຕໍ. ຕທມຣິຍານນ຺ຕິ ອິທໍ ອຣິຍານໍ, ອນຸນາສິກອິກາຣໂລປໍ ກຕ຺ວາ ວຸຕ຺ຕໍ. ເອຕໍ ມຸສາຕິ ເອຕໍ ຘຸວາທິວເສນ ຄຫິຕມ຺ປິ ມຸສາ, ນ ຕາທິສໍ ໂຫຕີຕິ. ປຸນ ຍນ຺ຕິ ນິພ຺ພານໍ ສນ຺ຘາຍາຫ. ຕຎ຺ຫິ ໂລເກນ ຣູປເວທນາທີນມຠາວໂຕ ‘‘ອິທໍ ມຸສາ ນຕ຺ຖິ ກິຎ຺ຈີ’’ຕິ ອຸປນິຊ຺ຌາຍິຕໍ. ຕທມຣິຍານໍ ເອຕໍ ສຈ຺ຈນ຺ຕິ ຕໍ ອິທໍ ອຣິຍານໍ ເອຕໍ ນິກ຺ກິເລສສງ຺ຂາຕາ ສຸຠຠາວາ, ປວຕ຺ຕິທຸກ຺ຂປຏິປກ຺ຂສງ຺ຂາຕາ ສຸຂຠາວາ, ອຈ຺ຈນ຺ຕສນ຺ຕິສງ຺ຂາຕາ ນິຈ຺ຈຠາວາ ຈ ອນປຄມເນນ ປຣມຕ຺ຖໂຕ ‘‘ສຈ຺ຈ’’ນ຺ຕິ ຍຖາຠູຕໍ ສມ຺ມປ຺ປຎ຺ຎາຍ ສຸທິຏ຺ຐໍ.

໗໖໒-໓. ອນຕ຺ຕນິ ອຕ຺ຕມານິນ຺ຕິ ອນຕ຺ຕນິ ນາມຣູເປ ອຕ຺ຕມານິໍ. ອິທໍ ສຈ຺ຈນ຺ຕິ ມຎ຺ຎຕີຕິ ອິທໍ ນາມຣູປໍ ຘຸວາທິວເສນ ‘‘ສຈ຺ຈ’’ນ຺ຕິ ມຎ຺ຎຕິ. ເຍນ ເຍນ ຫີຕິ ເຍນ ເຍນ ຣູເປ ວາ ເວທນາຍ ວາ ‘‘ມມ ຣູປໍ, ມມ ເວທນາ’’ຕິອາທິນາ ນເຍນ ມຎ຺ຎນ຺ຕິ. ຕໂຕ ຕນ຺ຕິ ຕໂຕ ມຎ຺ຎິຕາກາຣາ ຕໍ ນາມຣູປໍ ໂຫຕິ ອຎ຺ຎຖາ. ກິໍ ກາຣຓໍ? ຕຎ຺ຫິ ຕສ຺ສ ມຸສາ ໂຫຕິ, ຍສ຺ມາ ຕໍ ຍຖາມຎ຺ຎິຕາກາຣາ ມຸສາ ໂຫຕິ, ຕສ຺ມາ ອຎ຺ຎຖາ ໂຫຕີຕິ ອຕ຺ໂຖ. ກສ຺ມາ ປນ ມຸສາ ໂຫຕີຕິ? ໂມສຘມ຺ມຎ຺ຫິ ອິຕ຺ຕຣໍ, ຍສ຺ມາ ຍໍ ອິຕ຺ຕຣໍ ປຣິຕ຺ຕປຈ຺ຈຸປຏ຺ຐານໍ, ຕໍ ໂມສຘມ຺ມໍ ນສ຺ສນຘມ຺ມໍ ໂຫຕິ, ຕຖາຣູປຎ຺ຈ ນາມຣູປນ຺ຕິ. ສຈ຺ຈາຠິສມຍາຕິ ສຈ຺ຈາວໂພຘາ. ເສສມຸຕ຺ຕານເມວ.

(໑໖) ໂສຬສມວາເຣ ຍນ຺ຕິ ຉພ຺ພິຘມິຏ຺ຐາຣມ຺ມຓໍ ສນ຺ຘາຍາຫ. ຕຎ຺ຫິ ໂລເກນ ສລຠມຈ຺ຉມກ຺ກຏາທີຫິ ປທີປພຬິສເລປາທໂຍ ວິຍ ‘‘ອິທໍ ສຸຂ’’ນ຺ຕິ ອຸປນິຊ຺ຌາຍິຕໍ. ຕທມຣິຍານໍ ເອຕໍ ທຸກ຺ຂນ຺ຕິ ຕໍ ອິທໍ ອຣິຍານໍ ‘‘ກາມາ ຫິ ຈິຕ຺ຣາ ມຘຸຣາ ມໂນຣມາ, ວິຣູປຣູເປນ ມເຖນ຺ຕິ ຈິຕ຺ຕ’’ນ຺ຕິອາທິນາ (ສຸ. ນິ. ໕໐; ຈູຬນິ. ຂຄ຺ຄວິສາຓສຸຕ຺ຕນິທ຺ເທສ ໑໓໖) ນເຍນ ‘‘ເອຕໍ ທຸກ຺ຂ’’ນ຺ຕິ ຍຖາຠູຕໍ ສມ຺ມປ຺ປຎ຺ຎາຍ ສຸທິຏ຺ຐໍ. ປຸນ ຍນ຺ຕິ ນິພ຺ພານເມວ ສນ຺ຘາຍາຫ. ຕຎ຺ຫິ ໂລເກນ ກາມຄຸຓາຠາວາ ‘‘ທຸກ຺ຂ’’ນ຺ຕິ ອຸປນິຊ຺ຌາຍິຕໍ. ຕທມຣິຍານນ຺ຕິ ຕໍ ອິທໍ ອຣິຍານໍ ປຣມຕ຺ຖສຸຂໂຕ ‘‘ເອຕໍ ສຸຂ’’ນ຺ຕິ ຍຖາຠູຕໍ ສມ຺ມປ຺ປຎ຺ຎາຍ ສຸທິຏ຺ຐໍ.

໗໖໕-໖. ເກວລາຕິ ອນວເສສາ. ອິຏ຺ຐາຕິ ອິຈ຺ຉິຕາ ປຕ຺ຖິຕາ. ກນ຺ຕາຕິ ປິຍາ. ມນາປາຕິ ມນວຸຑ຺ຒິກຣາ. ຍາວຕຕ຺ຖີຕິ ວຸຈ຺ຈຕີຕິ ຍາວຕາ ເອເຕ ຉ ອາຣມ຺ມຓາ ອຕ຺ຖີຕິ ວຸຈ຺ຈນ຺ຕິ. ວຈນພ຺ຍຕ຺ຕໂຍ ເວທິຕພ຺ໂພ. ເອເຕ ໂວຕິ ເອຕ຺ຖ ໂວຕິ ນິປາຕມຕ຺ຕໍ.

໗໖໗-໘. ສຸຂນ຺ຕິ ທິຏ຺ຐມຣິເຍຫິ, ສກ຺ກາຍສ຺ສຸປໂຣຘນນ຺ຕິ ‘‘ສຸຂ’’ມິຕິ ອຣິເຍຫິ ປຎ຺ຈກ຺ຂນ຺ຘນິໂຣໂຘ ທິຏ຺ໂຐ, ນິພ຺ພານນ຺ຕິ ວຸຕ຺ຕໍ ໂຫຕິ. ປຈ຺ຈນີກມິທໍ ໂຫຕີຕິ ປຏິໂລມມິທໍ ທສ຺ສນໍ ໂຫຕິ. ປສ຺ສຕນ຺ຕິ ປສ຺ສນ຺ຕານໍ, ປຓ຺ຑິຕານນ຺ຕິ ວຸຕ຺ຕໍ ໂຫຕິ. ຍໍ ປເຣຕິ ເອຕ຺ຖ ຍນ຺ຕິ ວຕ຺ຖຸກາເມ ສນ຺ຘາຍາຫ. ປຸນ ຍໍ ປເຣຕິ ເອຕ຺ຖ ນິພ຺ພານໍ.

໗໖໙-໗໑. ປສ຺ສາຕິ ໂສຕາຣໍ ອາລປຕິ. ຘມ຺ມນ຺ຕິ ນິພ຺ພານຘມ຺ມໍ. ສມ຺ປມູຬ຺ເຫຕ຺ຖວິທ຺ທສູຕິ ສມ຺ປມູຬ຺ຫາ ເອຕ຺ຖ ອວິທ຺ທສູ ພາລາ. ກິໍກາຣຓໍ ສມ຺ປມູຬ຺ຫາ? ນິວຸຕານໍ ຕໂມ ໂຫຕິ , ອນ຺ຘກາໂຣ ອປສ຺ສຕໍ, ພາລານໍ ອວິຊ຺ຊາຍ ນິວຸຕານໍ ໂອຕ຺ຖຏານໍ ອນ຺ຘຠາວກຣໂຓ ຕໂມ ໂຫຕິ, ເຍນ ນິພ຺ພານຘມ຺ມໍ ທຏ຺ຐຸໍ ນ ສກ຺ໂກນ຺ຕິ. ສຕຎ຺ຈ ວິວຏໍ ໂຫຕິ, ອາໂລໂກ ປສ຺ສຕາມິວາຕິ ສຕຎ຺ຈ ສປ຺ປຸຣິສານໍ ປຎ຺ຎາທສ຺ສເນນ ປສ຺ສຕໍ ອາໂລໂກວ ວິວຏໍ ໂຫຕິ ນິພ຺ພານໍ. ສນ຺ຕິເກ ນ ວິຊານນ຺ຕິ, ມຄາ ຘມ຺ມສ຺ສໂກວິທາຕິ ຍໍ ອຕ຺ຕໂນ ສຣີເຣ ຕຈປຎ຺ຈກມຕ຺ຕໍ ປຣິຈ຺ຉິນ຺ທິຕ຺ວາ ອນນ຺ຕຣເມວ ອຘິຄນ຺ຕພ຺ພໂຕ, ອຕ຺ຕໂນ ຂນ຺ຘານໍ ວາ ນິໂຣຘມຕ຺ຕໂຕ ສນ຺ຕິເກ ນິພ຺ພານໍ, ຕໍ ເອວໍ ສນ຺ຕິເກ ສນ຺ຕມ຺ປິ ນ ວິຊານນ຺ຕິ ມຄຠູຕາ ຊນາ ມຄ຺ຄາມຄ຺ຄຘມ຺ມສ຺ສ ສຈ຺ຈຘມ຺ມສ຺ສ ວາ ອໂກວິທາ, ສພ຺ພຖາ ຠວຣາຄ…ເປ… ສຸສມ຺ພຸໂຘ. ຕຕ຺ຖ ມາຣເຘຍ຺ຍານຸປນ຺ເນຫີຕິ ເຕຠູມກວຏ຺ຏໍ ອນຸປນ຺ເນຫິ.

໗໗໒. ປຈ຺ຉິມຄາຖາຍ ສມ຺ພນ຺ໂຘ ‘‘ເອວໍ ອສຸສມ຺ພຸຘໍ ໂກ ນຸ ອຎ຺ຎຕ຺ຣ ມຣິເຍຫີ’’ຕິ. ຕສ຺ສຕ຺ໂຖ – ຐເປຕ຺ວາ ອຣິເຍ ໂກ ນຸ ອຎ຺ໂຎ ນິພ຺ພານປທໍ ຊານິຕຸໍ ອຣຫຕິ, ຍໍ ປທໍ ຈຕຸຕ຺ເຖນ ອຣິຍມຄ຺ເຄນ ສມ຺ມທຎ຺ຎາຍ ອນນ຺ຕຣເມວ ອນາສວາ ຫຸຕ຺ວາ ກິເລສປຣິນິພ຺ພາເນນ ປຣິນິພ຺ພນ຺ຕິ, ສມ຺ມທຎ຺ຎາຍ ວາ ອນາສວາ ຫຸຕ຺ວາ ອນ຺ເຕ ອນຸປາທິເສສາຍ ນິພ຺ພານຘາຕຸຍາ ປຣິນິພ຺ພນ຺ຕີຕິ ອຣຫຕ຺ຕນິກູເຏນ ເທສນໍ ນິຏ຺ຐາເປສິ.

ອຕ຺ຕມນາຕິ ຕຸຏ຺ຐມນາ. ອຠິນນ຺ທຸນ຺ຕິ ອຠິນນ຺ທິໍສຸ. ອິມສ຺ມິຎ຺ຈ ປນ ເວຍ຺ຍາກຣຓສ຺ມິນ຺ຕິ ອິມສ຺ມິໍ ໂສຬສເມ ເວຍ຺ຍາກຣເຓ. ຠຎ຺ຎມາເນຕິ ຠຓິຍມາເນ. ເສສໍ ປາກຏເມວ.

ເອວໍ ສພ຺ເພສຸປິ ໂສຬສສຸ ເວຍ຺ຍາກຣເຓສຸ ສຏ຺ຐິມຕ຺ເຕ ສຏ຺ຐິມຕ຺ເຕ ກຕ຺ວາ ສຏ຺ຐິອຘິການໍ ນວນ຺ນໍ ຠິກ຺ຂຸສຕານໍ ອນຸປາທາຍ ອາສເວຫິ ຈິຕ຺ຕານິ ວິມຸຈ຺ຈິໍສຸ, ໂສຬສກ຺ຂຕ຺ຕຸໍ ຈຕ຺ຕາຣິ ຈຕ຺ຕາຣິ ກຕ຺ວາ ຈຕຸສຏ຺ຐິ ສຈ຺ຈາເນຕ຺ຖ ເວເນຍ຺ຍວເສນ ນານປ຺ປກາຣໂຕ ເທສິຕານີຕິ.

ປຣມຕ຺ຖໂຊຕິກາຍ ຂຸທ຺ທກ-ອຏ຺ຐກຖາຍ

ສຸຕ຺ຕນິປາຕ-ອຏ຺ຐກຖາຍ ທ຺ວຍຕານຸປສ຺ສນາສຸຕ຺ຕວຓ຺ຓນາ

ນິຏ຺ຐິຕ຺ຕາ.

ນິຏ຺ຐິໂຕ ຈ ຕຕິໂຍ ວຄ຺ໂຄ ອຕ຺ຖວຓ຺ຓນານຍໂຕ, ນາເມນ

ມຫາວຄ຺ໂຄຕິ.