໗. ອນ຺ຕຄ຺ຄາຫິກາທິຏ຺ຐິນິທ຺ເທສວຓ຺ຓນາ

໑໔໐. ອນ຺ຕຄ຺ຄາຫິກາຍ ທິຏ຺ຐິຍາ ປຐມວາເຣ ອາກາຣປຸຈ຺ຉາ. ທຸຕິເຍ ອາກາຣຄຫຓໍ. ຕຕິເຍ ອາກາຣວິສ຺ສຊ຺ຊນໍ. ຕຕ຺ຖ ໂລໂກຕິ ອຕ຺ຕາ. ໂສ ອນ຺ໂຕຕິ ອຎ຺ຎມຎ຺ຎປຏິປກ຺ເຂສຸ ສສ຺ສຕຸຈ຺ເຉທນ຺ເຕສຸ ສສ຺ສຕຄ຺ຄາເຫ ສສ຺ສຕນ຺ໂຕ, ອສສ຺ສຕຄ຺ຄາເຫ ອຸຈ຺ເຉທນ຺ໂຕ. ປຣິຕ຺ຕໍ ໂອກາສນ຺ຕິ ສຸປ຺ປມຕ຺ຕໍ ວາ ສຣາວມຕ຺ຕໍ ວາ ຂຸທ຺ທກໍ ຐານໍ. ນີລກໂຕ ຜຣຕີຕິ ນີລນ຺ຕິ ອາຣມ຺ມຓໍ ກໂຣຕິ. ອຍໍ ໂລໂກຕິ ອຕ຺ຕານໍ ສນ຺ຘາຍ ວຸຕ຺ຕໍ. ປຣິວຏຸໂມຕິ ສມນ຺ຕໂຕ ປຣິຈ຺ເຉທວາ. ອນ຺ຕສຎ຺ຎີຕິ ອນ຺ຕວາຕິສຎ຺ຎີ. ອນ຺ໂຕ ອສ຺ສ ອຕ຺ຖີຕິ ອນ຺ໂຕຕິ ຄເຫຕພ຺ພໍ. ຍໍ ຜຣຕີຕິ ຍໍ ກສິຓຣູປໍ ຜຣຕິ. ຕໍ ວຕ຺ຖຸ ເຈວ ໂລໂກ ຈາຕິ ຕໍ ກສິຓຣູປໍ ອາຣມ຺ມຓຎ຺ເຈວ ອາໂລກິຍຏ຺ເຐນ ໂລໂກ ຈ. ເຍນ ຜຣຕີຕິ ເຍນ ຈິຕ຺ເຕນ ຜຣຕິ. ໂສ ອຕ຺ຕາ ເຈວ ໂລໂກ ຈາຕິ ອຕ຺ຕານມເປກ຺ຂິຕ຺ວາ ປຸລ຺ລິງ຺ຄໍ ກຕໍ, ຕໍ ຈິຕ຺ຕໍ ອຕ຺ຕາ ເຈວ ອາໂລກນຏ຺ເຐນ ໂລໂກ ຈາຕິ ວຸຕ຺ຕໍ ໂຫຕິ. ອນ຺ຕວາຕິ ອນ຺ໂຕ. ໂອກາສກໂຕ ຜຣຕີຕິ ອາໂລກກສິຓວເສນ ເຕໂຊກສິຓວເສນ ໂອທາຕກສິຓວເສນ ວາ ໂອຠາໂສຕິ ຜຣຕິ. ນີລາທີນໍ ປຎ຺ຈນ຺ນໍ ປຠສ຺ສຣກສິຓານໍເຍວ ຄຫິຕຕ຺ຕາ ປຖວີອາໂປວາໂຍກສິຓວເສນ ອຕ຺ຕາຠິນິເວໂສ ນ ໂຫຕີຕິ ຄເຫຕພ຺ພໍ.

ວິປຸລໍ ໂອກາສນ຺ຕິ ຂລມຓ຺ຑລມຕ຺ຕາທິວເສນ ມຫນ຺ຕໍ ຐານໍ. ອນນ຺ຕວາຕິ ວຸທ຺ຘອນນ຺ຕວາ. ອປຣິຍນ຺ໂຕຕິ ວຸທ຺ຘອປຣິຍນ຺ໂຕ. ອນນ຺ຕສຎ຺ຎີຕິ ອນນ຺ໂຕຕິສຎ຺ຎີ. ຕໍ ຊີວນ຺ຕິ ໂສ ຊີໂວ. ລິງ຺ຄວິປລ຺ລາໂສ ກໂຕ. ຊີໂວຕິ ຈ ອຕ຺ຕາ ເອວ. ຣູປາທີນິ ປຎ຺ຈປິ ປຣິວຏຸມຏ຺ເຐນ ສຣີຣໍ. ຊີວໍ ນ ສຣີຣນ຺ຕິ ອຕ຺ຕສງ຺ຂາໂຕ ຊີໂວ ຣູປສງ຺ຂາຕໍ ສຣີຣໍ ນ ໂຫຕິ. ເອສ ນໂຍ ເວທນາທີສຸ. ຕຖາຄໂຕຕິ ສຕ຺ໂຕ. ອຣຫນ຺ຕິ ເອເກ. ປຣໍ ມຣຓາຕິ ມຣຓໂຕ ອຸທ຺ຘໍ, ປຣໂລເກຕິ ອຕ຺ໂຖ. ຣູປໍ ອິເຘວ ມຣຓຘມ຺ມນ຺ຕິ ອຕ຺ຕໂນ ປາກຏກ຺ຂນ຺ຘສີເສນ ປຎ຺ຈກ຺ຂນ຺ຘຄ຺ຄຫຓໍ, ຕໍ ອິມສ຺ມິໍເຍວ ໂລເກ ນສ຺ສນປກຕິກນ຺ຕິ ອຕ຺ໂຖ. ເສສກ຺ຂນ຺ເຘສຸປິ ເອເສວ ນໂຍ. ກາຍສ຺ສ ເຠທາຕິ ຂນ຺ຘປຎ຺ຈກສງ຺ຂາຕສ຺ສ ກາຍສ຺ສ ເຠທໂຕ ປຣໍ. ອິມິນາ ວຈເນນ ‘‘ປຣໍ ມຣຓາ’’ຕິ ເອຕສ຺ສ ອຸທ຺ເທສສ຺ສ ອຕ຺ໂຖ ວຸຕ຺ໂຕ. ໂຫຕິປີຕິອາທີສຸ ໂຫຕີຕິ ມູລປທໍ. ຈຕູສຸປິ ອປິ-ສທ຺ໂທ ສມຸຈ຺ຈຍຕ຺ໂຖ. ຕິຏ຺ຐຕີຕິ ສສ຺ສຕຕ຺ຕາ ຕິຏ຺ຐຕິ, ນ ຈວຕີຕິ ອຕ຺ໂຖ. ‘‘ໂຫຕີ’’ຕິ ປທສ຺ສ ວາ ອຕ຺ຖວິເສສນຕ຺ຖໍ ‘‘ຕິຏ຺ຐຕີ’’ຕິ ປທໍ ວຸຕ຺ຕນ຺ຕິ ເວທິຕພ຺ພໍ. ອຸປ຺ປຊ຺ຊຕີຕິ ອຓ຺ຑຊຊລາພຸຊໂຍນິປເວສວເສນ ອຸປ຺ປຊ຺ຊຕິ ນາມ, ນິພ຺ພຕ຺ຕຕີຕິ ສໍເສທຊໂອປປາຕິກໂຍນິປເວສວເສນ ນິພ຺ພຕ຺ຕຕິ ນາມາຕິ ອຕ຺ຖໂຍຊນາ ເວທິຕພ຺ພາ. ອຸຈ຺ຉິຊ຺ຊຕີຕິ ປພນ຺ຘາຠາວວເສນ. ວິນສ຺ສຕີຕິ ຠງ຺ຄວເສນ. ນ ໂຫຕິ ປຣໍ ມຣຓາຕິ ປຸຣິມປທານໍ ອຕ຺ຖວິວຣຓໍ, ຈຸຕິໂຕ ອຸທ຺ຘໍ ນ ວິຊ຺ຊຕີຕິ ອຕ຺ໂຖ. ໂຫຕິ ຈ ນ ຈ ໂຫຕີຕິ ເອກຈ຺ຈສສ຺ສຕິການໍ ທິຏ຺ຐິ, ເອເກນ ປຣິຍາເຍນ ໂຫຕິ, ເອເກນ ປຣິຍາເຍນ ນ ໂຫຕີຕິ ອຕ຺ໂຖ. ຊີວຠາເວນ ໂຫຕິ, ປຸພ຺ພຊີວສ຺ສ ອຠາເວນ ນ ໂຫຕີຕິ ວຸຕ຺ຕໍ ໂຫຕິ. ເນວ ໂຫຕິ ນ ນ ໂຫຕີຕິ ອມຣາວິກ຺ເຂປິການໍ ທິຏ຺ຐິ, ໂຫຕີຕິ ຈ ເນວ ໂຫຕິ, ນ ໂຫຕີຕິ ຈ ນ ໂຫຕີຕິ ອຕ຺ໂຖ. ອນຸວາທຠຍາ ມຸສາວາທຠຍາ ຈ ມນ຺ທຕ຺ຕາ ໂມມູຫຕ຺ຕາ ຈ ປຸພ຺ພວຸຕ຺ຕນຍສ຺ສ ປຏິກ຺ເຂປມຕ຺ຕໍ ກໂຣຕິ. ອິເມຫິ ປຎ຺ຎາສາຍ ອາກາເຣຫີຕິ ຍຖາວຸຕ຺ຕານໍ ທສນ຺ນໍ ປຎ຺ຈການໍ ວເສນ ປຎ຺ຎາສາຍ ອາກາເຣຫີຕິ.

ອນ຺ຕຄ຺ຄາຫິກາທິຏ຺ຐິນິທ຺ເທສວຓ຺ຓນາ ນິຏ຺ຐິຕາ.