໘. ປຸພ຺ພນ຺ຕານຸທິຏ຺ຐິນິທ຺ເທສວຓ຺ຓນາ

໑໔໑. ປຸພ຺ພນ຺ຕາປຣນ຺ຕານຸທິຏ຺ຐີສຸ ສສ຺ສຕໍ ວທນ຺ຕີຕິ ສສ຺ສຕວາທາ. ອຖ ວາ ວທນ຺ຕິ ເອເຕນາຕິ ວາໂທ, ທິຏ຺ຐິຄຕສ຺ເສຕໍ ອຘິວຈນໍ. ສສ຺ສຕນ຺ຕິ ວາໂທປິ ສສ຺ສຕໂຍເຄນ ສສ຺ສໂຕ, ສສ຺ສໂຕ ວາໂທ ເອເຕສນ຺ຕິ ສສ຺ສຕວາທາ. ຕຖາ ເອກຈ຺ຈໍ ສສ຺ສຕນ຺ຕິ ວາໂທ ເອກຈ຺ຈສສ຺ສໂຕ, ໂສ ເອເຕສໍ ອຕ຺ຖີຕິ ເອກຈ຺ຈສສ຺ສຕິກາ. ຕຖາ ອນ຺ຕວາ, ອນນ຺ຕວາ, ອນ຺ຕວາ ຈ ອນນ຺ຕວາ ຈ, ເນວນ຺ຕວາ ນານນ຺ຕວາຕິ ປວຕ຺ໂຕ ວາໂທ ອນ຺ຕານນ຺ໂຕ, ໂສ ເອເຕສໍ ອຕ຺ຖີຕິ ອນ຺ຕານນ຺ຕິກາ. ນ ມຣຕີຕິ ອມຣາ. ກາ ສາ? ‘‘ເອວມ຺ປິ ເມ ໂນ’’ຕິອາທິນາ (ທີ. ນິ. ໑.໖໒-໖໓) ນເຍນ ປຣິຍນ຺ຕຣຫິຕສ຺ສ ທິຏ຺ຐິຄຕິກສ຺ສ ທິຏ຺ຐິ ເຈວ ວາຈາ ຈ. ວິວິໂຘ ເຂໂປ ວິກ຺ເຂໂປ, ອມຣາຍ ທິຏ຺ຐິຍາ, ວາຈາຍ ວາ ວິກ຺ເຂໂປ ອມຣາວິກ຺ເຂໂປ, ໂສ ເອເຕສໍ ອຕ຺ຖີຕິ ອມຣາວິກ຺ເຂປິກາ. ອປໂຣ ນໂຍ – ອມຣາ ນາມ ມຈ຺ຉຊາຕິ, ສາ ອຸມ຺ມຸຊ຺ຊນນິມຸຊ຺ຊນາທິວເສນ ອຸທເກ ສນ຺ຘາວມານາ ຄເຫຕຸໍ ນ ສກ຺ກາ ໂຫຕິ, ເອວເມວໍ ອຍມ຺ປິ ວາໂທ ອິໂຕ ຈິໂຕ ຈ ສນ຺ຘາວຕິ, ຄາຫໍ ນ ອຸປຄຈ຺ຉຕີຕິ ອມຣາວິກ຺ເຂໂປຕິ ວຸຈ຺ຈຕິ, ໂສ ເອເຕສໍ ອຕ຺ຖີຕິ ອມຣາວິກ຺ເຂປິກາ. ອຘິຈ຺ຈສມຸປ຺ປນ຺ໂນຕິ ອກາຣຓສມຸປ຺ປນ຺ໂນ ອຕ຺ຕາ ຈ ໂລໂກ ຈາຕິ ທສ຺ສນໍ ອຘິຈ຺ຈສມຸປ຺ປນ຺ນໍ, ຕໍ ເອເຕສໍ ອຕ຺ຖີຕິ ອຘິຈ຺ຈສມຸປ຺ປນ຺ນິກາ.

ປຸພ຺ພນ຺ຕານຸທິຏ຺ຐິນິທ຺ເທສວຓ຺ຓນາ ນິຏ຺ຐິຕາ.