໘. ໂລກຸຕ຺ຕຣກຖາ

ໂລກຸຕ຺ຕຣກຖາວຓ຺ຓນາ

໔໓. ອິທານິ ໂລກຸຕ຺ຕຣຘມ຺ມວຕິຍາ ຘມ຺ມຈກ຺ກກຖາຍ ອນນ຺ຕຣໍ ກຖິຕາຍ ໂລກຸຕ຺ຕຣກຖາຍ ອປຸພ຺ພຕ຺ຖານຸວຓ຺ຓນາ. ຕຕ຺ຖ ໂລກຸຕ຺ຕຣປທສ຺ສ ອຕ຺ໂຖ ນິທ຺ເທສວາເຣ ອາວິ ຠວິສ຺ສຕິ. ຈຕ຺ຕາໂຣ ສຕິປຏ຺ຐານາຕິອາທໂຍ ສຕ຺ຕຕິໍສ ໂພຘິປກ຺ຂິຍຘມ຺ມາ ຍຖາໂຍຄໍ ມຄ຺ຄຜລສມ຺ປຍຸຕ຺ຕາ. ເຕ ພຸຊ຺ຌນຏ຺ເຐນ ໂພຘີຕິ ເອວໍລທ຺ຘນາມສ຺ສ ອຣິຍສ຺ສ ປກ຺ເຂ ຠວຕ຺ຕາ ໂພຘິປກ຺ຂິຍາ ນາມ. ປກ຺ເຂ ຠວຕ຺ຕາຕິ ອຸປກາຣຠາເວ ຐິຕຕ຺ຕາ. ເຕສຸ ອາຣມ຺ມເຓສຸ ໂອກ຺ກນ຺ຕິຕ຺ວາ ປກ຺ຂນ຺ທິຕ຺ວາ ອຸປຏ຺ຐານໂຕ ອຸປຏ຺ຐານໍ, ສຕິເຍວ ອຸປຏ຺ຐານໍ ສຕິປຏ຺ຐານໍ. ກາຍເວທນາຈິຕ຺ຕຘມ຺ເມສຸ ປນສ຺ສ ອສຸຠທຸກ຺ຂານິຈ຺ຈານຕ຺ຕາກາຣຄຫຓວເສນ ສຸຠສຸຂນິຈ຺ຈອຕ຺ຕສຎ຺ຎາປຫານກິຈ຺ຈສາຘນວເສນ ຈ ປວຕ຺ຕິໂຕ ຈຕຸຘາ ເຠໂທ ໂຫຕິ. ຕສ຺ມາ ຈຕ຺ຕາໂຣ ສຕິປຏ຺ຐານາຕິ ວຸຈ຺ຈຕິ. ປທຫນ຺ຕິ ເອເຕນາຕິ ປຘານໍ, ໂສຠນໍ ປຘານໍ ສມ຺ມປ຺ປຘານໍ, ສມ຺ມາ ວາ ປທຫນ຺ຕິ ເອເຕນາຕິ ສມ຺ມປ຺ປຘານໍ, ໂສຠນໍ ວາ ຕໍ ກິເລສວິຣູປປວຕ຺ຕວິຣຫິຕໂຕ ປຘານຎ຺ຈ ຫິຕສຸຂນິປ຺ຜາທກຏ຺ເຐນ ເສຏ຺ຐຠາວາວຫນໂຕ ປຘານຠາວກຣຓໂຕ ວາຕິ ສມ຺ມປ຺ປຘານໍ. ວີຣິຍສ຺ເສຕໍ ອຘິວຈນໍ. ຕຍິທໍ ອຸປ຺ປນ຺ນານຸປ຺ປນ຺ນານໍ ອກຸສລານໍ ປຫານານຸປ຺ປຕ຺ຕິກິຈ຺ຈໍ, ອນຸປ຺ປນ຺ນຸປ຺ປນ຺ນານຎ຺ຈ ກຸສລານໍ ອຸປ຺ປຕ຺ຕິຏ຺ຐິຕິກິຈ຺ຈໍ ສາຘຍຕີຕິ ຈຕຸພ຺ພິຘໍ ໂຫຕິ. ຕສ຺ມາ ຈຕ຺ຕາໂຣ ສມ຺ມປ຺ປຘານາຕິ ວຸຈ຺ຈຕິ. ນິປ຺ຜຕ຺ຕິປຣິຍາເຍນ ອິຊ຺ຌນຏ຺ເຐນ, ອິຊ຺ຌນ຺ຕິ ເອຕາຍ ສຕ຺ຕາ ອິທ຺ຘາ ວຸທ຺ຘາ ອຸກ຺ກໍສຄຕາ ໂຫນ຺ຕີຕິ ອິມິນາ ວາ ປຣິຍາເຍນ ອິທ຺ຘິ, ຕສ຺ສາ ສມ຺ປຍຸຕ຺ຕາຍ ປຸພ຺ພງ຺ຄມຏ຺ເຐນ ຜລຠູຕາຍ ປຸພ຺ພຠາຄກາຣຓຏ຺ເຐນ ຈ ອິທ຺ຘິຍາ ປາໂທຕິ ອິທ຺ຘິປາໂທ. ໂສ ຉນ຺ທວີຣິຍຈິຕ຺ຕວີມໍສາວເສນ ຈຕຸພ຺ພິໂຘວ ໂຫຕິ. ຕສ຺ມາ ຈຕ຺ຕາໂຣ ອິທ຺ຘິປາທາຕິ ວຸຈ຺ຈຕິ. ອສ຺ສທ຺ຘິຍໂກສຊ຺ຊປມາທວິກ຺ເຂປສມ຺ໂມຫານໍ ອຠິຠວນໂຕ ອຠິຠວນສງ຺ຂາເຕນ ອຘິປຕິຍຏ຺ເຐນ ອິນ຺ທ຺ຣິຍໍ. ອສ຺ສທ຺ຘິຍາທີຫິ ອນຠິຠວນີຍໂຕ ອກມ຺ປິຍຏ຺ເຐນ ພລໍ. ຕທຸຠຍມ຺ປິ ສທ຺ຘາວີຣິຍສຕິສມາຘິປຎ຺ຎາວເສນ ປຎ຺ຈວິຘໍ ໂຫຕິ. ຕສ຺ມາ ປຎ຺ຈິນ຺ທ຺ຣິຍານິ ປຎ຺ຈ ພລານີຕິ ວຸຈ຺ຈນ຺ຕິ. ພຸຊ຺ຌນກສຕ຺ຕສ຺ສ ປນ ອງ຺ຄຠາເວນ ສຕິອາທໂຍ ສຕ຺ຕ ຘມ຺ມາ ໂພຊ຺ຌງ຺ຄາ, ນິຍ຺ຍານຏ຺ເຐນ ຈ ສມ຺ມາທິຏ຺ຐິອາທໂຍ ອຏ຺ຐ ມຄ຺ຄງ຺ຄາ ໂຫນ຺ຕິ. ເຕນ ວຸຈ຺ຈຕິ ສຕ຺ຕ ໂພຊ຺ຌງ຺ຄາ ອຣິໂຍ ອຏ຺ຐງ຺ຄິໂກ ມຄ຺ໂຄຕິ.

ອິຕິ ອິເມ ສຕ຺ຕຕິໍສ ໂພຘິປກ຺ຂິຍາ ຘມ຺ມາ ປຸພ຺ພຠາເຄ ໂລກິຍວິປສ຺ສນາຍ ວຕ຺ຕມານາຍ ຈຸທ຺ທສວິເຘນ ກາຍໍ ປຣິຄ຺ຄຓ຺ຫໂຕ ຈ ກາຍານຸປສ຺ສນາສຕິປຏ຺ຐານໍ, ນວວິເຘນ ເວທນໍ ປຣິຄ຺ຄຓ຺ຫໂຕ ຈ ເວທນານຸປສ຺ສນາສຕິປຏ຺ຐານໍ, ໂສຬສວິເຘນ ຈິຕ຺ຕໍ ປຣິຄ຺ຄຓ຺ຫໂຕ ຈ ຈິຕ຺ຕານຸປສ຺ສນາສຕິປຏ຺ຐານໍ, ປຎ຺ຈວິເຘນ ຘມ຺ເມ ປຣິຄ຺ຄຓ຺ຫໂຕ ຈ ຘມ຺ມານຸປສ຺ສນາສຕິປຏ຺ຐານໍ. ອິຕິ ອິມສ຺ມິໍ ອຕ຺ຕຠາເວ ອນຸປ຺ປນ຺ນປຸພ຺ພໍ ປຣສ຺ສ ອຸປ຺ປນ຺ນໍ ອກຸສລໍ ທິສ຺ວາ ‘‘ຍຖາ ປຏິປນ຺ນສ຺ສ ຕສ຺ສ ຕໍ ອຸປ຺ປນ຺ນໍ, ນ ຕຖາ ປຏິປຊ຺ຊິສ຺ສາມິ, ເອວໍ ເມ ເອຕໍ ນຸປ຺ປຊ຺ຊິສ຺ສຕີ’’ຕິ ຕສ຺ສ ອນຸປ຺ປາທາຍ ວາຍມນກາເລ ປຐມໍ ສມ຺ມປ຺ປຘານໍ, ອຕ຺ຕໂນ ສມຸທາຈາຣປ຺ປຕ຺ຕມກຸສລໍ ທິສ຺ວາ ຕສ຺ສ ປຫານາຍ ວາຍມນກາເລ ທຸຕິຍໍ, ອິມສ຺ມິໍ ອຕ຺ຕຠາເວ ອນຸປ຺ປນ຺ນປຸພ຺ພໍ ຌານໍ ວາ ວິປສ຺ສນໍ ວາ ອຸປ຺ປາເທຕຸໍ ວາຍມນ຺ຕສ຺ສ ຕຕິຍໍ, ອຸປ຺ປນ຺ນໍ ຍຖາ ນ ປຣິຫາຍຕິ, ເອວໍ ປຸນປ຺ປຸນໍ ອຸປ຺ປາເທນ຺ຕສ຺ສ ຈຕຸຕ຺ຖໍ ສມ຺ມປ຺ປຘານໍ. ຉນ຺ທໍ ຘຸຣໍ ກຕ຺ວາ ກຸສລຸປ຺ປາທນກາເລ ຉນ຺ທິທ຺ຘິປາໂທ, ວີຣິຍໍ, ຈິຕ຺ຕໍ, ວີມໍສໍ ຘຸຣໍ ກຕ຺ວາ ກຸສລຸປ຺ປາທນກາເລ ວີມໍສິທ຺ຘິປາໂທ. ມິຈ຺ຉາວາຈາຍ ວິຣມຓກາເລ ສມ຺ມາວາຈາ, ມິຈ຺ຉາກມ຺ມນ຺ຕາ, ມິຈ຺ຉາຊີວາ ວິຣມຓກາເລ ສມ຺ມາຊີໂວຕິ ເອວໍ ນານາຈິຕ຺ເຕສຸ ລພ຺ຠນ຺ຕິ. ຈຕຸມຄ຺ຄກ຺ຂເຓ ປນ ເອກຈິຕ຺ເຕ ລພ຺ຠນ຺ຕິ, ຜລກ຺ຂເຓ ຐເປຕ຺ວາ ຈຕ຺ຕາໂຣ ສມ຺ມປ຺ປຘາເນ ອວເສສາ ເຕຕ຺ຕິໍສ ລພ຺ຠນ຺ຕິ. ເອວໍ ເອກຈິຕ຺ເຕ ລພ຺ຠມາເນສຸ ເຈເຕສຸ ເອກາວ ນິພ຺ພານາຣມ຺ມຓາ ສຕິ ກາຍາທີສຸ ສຸຠສຎ຺ຎາທິປຫານກິຈ຺ຈສາຘນວເສນ ‘‘ຈຕ຺ຕາໂຣ ສຕິປຏ຺ຐານາ’’ຕິ ວຸຈ຺ຈຕິ. ເອກເມວ ຈ ວີຣິຍໍ ອນຸປ຺ປນ຺ນຸປ຺ປນ຺ນານໍ ອນຸປ຺ປາທາທິກິຈ຺ຈສາຘນວເສນ ‘‘ຈຕ຺ຕາໂຣ ສມ຺ມປ຺ປຘານາ’’ຕິ ວຸຈ຺ຈຕິ. ເສເສສຸ ຫາປນວຑ຺ຒນໍ ນຕ຺ຖິ.

ອປິຈ ເຕສຸ –

ນວ ເອກວິຘາ ເອໂກ, ທ຺ເວຘາຖ ຈຕຸປຎ຺ຈຘາ;

ອຏ຺ຐຘາ ນວຘາ ເຈວ, ອິຕິ ຉທ຺ຘາ ຠວນ຺ຕິ ເຕ.

ນວ ເອກວິຘາຕິ ຉນ຺ໂທ ຈິຕ຺ຕໍ ປີຕິ ປສ຺ສທ຺ຘິ ອຸເປກ຺ຂາ ສງ຺ກປ຺ໂປ ວາຈາ ກມ຺ມນ຺ໂຕ ອາຊີໂວຕິ ອິເມ ນວ ຉນ຺ທິທ຺ຘິປາທາທິວເສນ ເອກວິຘາວ ໂຫນ຺ຕິ, ອຎ຺ຎໂກຏ຺ຐາສໍ ນ ຠຊນ຺ຕິ. ເອໂກ ທ຺ເວຘາຕິ ສທ຺ຘາ ອິນ຺ທ຺ຣິຍພລວເສນ ທ຺ເວຘາ ຐິຕາ. ອຖ ຈຕຸປຎ຺ຈຘາຕິ ອຖຎ຺ໂຎ ເອໂກ ຈຕຸຘາ, ອຎ຺ໂຎ ປຎ຺ຈຘາ ຐິໂຕຕິ ອຕ຺ໂຖ. ຕຕ຺ຖ ສມາຘິ ເອໂກ ອິນ຺ທ຺ຣິຍພລໂພຊ຺ຌງ຺ຄມຄ຺ຄງ຺ຄວເສນ ຈຕຸຘາ ຐິໂຕ, ປຎ຺ຎາ ເຕສໍ ຈຕຸນ຺ນໍ ອິທ຺ຘິປາທໂກຏ຺ຐາສສ຺ສ ຈ ວເສນ ປຎ຺ຈຘາ. ອຏ຺ຐຘາ ນວຘາ ເຈວາຕິ ອປໂຣ ເອໂກ ອຏ຺ຐຘາ, ເອໂກ ນວຘາ ຐິໂຕຕິ ອຕ຺ໂຖ. ຈຕຸສຕິປຏ຺ຐານອິນ຺ທ຺ຣິຍພລໂພຊ຺ຌງ຺ຄມຄ຺ຄງ຺ຄວເສນ ສຕິ ອຏ຺ຐຘາ ຐິຕາ, ຈຕຸສມ຺ມປ຺ປຘານອິທ຺ຘິປາທອິນ຺ທ຺ຣິຍພລໂພຊ຺ຌງ຺ຄມຄ຺ຄງ຺ຄວເສນ ວີຣິຍໍ ນວຘາຕິ. ເອວໍ –

ຈຸທ຺ທເສວ ອສມ຺ຠິນ຺ນາ, ໂຫນ຺ເຕເຕ ໂພຘິປກ຺ຂິຍາ;

ໂກຏ຺ຐາສໂຕ ສຕ຺ຕວິຘາ, ສຕ຺ຕຕິໍສ ປເຠທໂຕ.

ສກິຈ຺ຈນິປ຺ຜາທນໂຕ, ສຣູເປນ ຈ ວຸຕ຺ຕິໂຕ;

ສພ຺ເພວ ອຣິຍມຄ຺ຄສ຺ສ, ສມ຺ຠເວ ສມ຺ຠວນ຺ຕິ ເຕ.

ເອວໍ ມຄ຺ຄຜລສມ຺ປຍຸຕ຺ເຕ ສຕ຺ຕຕິໍສ ໂພຘິປກ຺ຂິຍຘມ຺ເມ ທສ຺ເສຕ຺ວາ ປຸນ ເຕ ມຄ຺ຄຜເລສຸ ສງ຺ຂິປິຕ຺ວາ ຈຕ຺ຕາໂຣ ອຣິຍມຄ຺ຄາ ຈຕ຺ຕາຣິ ຈ ສາມຎ຺ຎຜລານີຕິ ອາຫ. ສມຓຠາໂວ ສາມຎ຺ຎໍ, ຈຕຸນ຺ນໍ ອຣິຍມຄ຺ຄານເມຕໍ ນາມໍ. ສາມຎ຺ຎານໍ ຜລານິ ສາມຎ຺ຎຜລານິ. ນິພ຺ພານໍ ປນ ສພ຺ເພຫິ ອສມ຺ມິສ຺ສເມວ. ອິຕິ ວິຕ຺ຖາຣໂຕ ສຕ຺ຕຕິໍສໂພຘິປກ຺ຂິຍຈຕຸມຄ຺ຄຈຕຸຜລນິພ຺ພານານໍ ວເສນ ຉຈຕ຺ຕາລີສ ໂລກຸຕ຺ຕຣຘມ຺ມາ, ຕໂຕ ສງ຺ເຂເປນ ຈຕຸມຄ຺ຄຈຕຸຜລນິພ຺ພານານໍ ວເສນ ນວ ໂລກຸຕ຺ຕຣຘມ຺ມາ, ຕໂຕປິ ສງ຺ເຂເປນ ມຄ຺ຄຜລນິພ຺ພານານໍ ວເສນ ຕໂຍ ໂລກຸຕ຺ຕຣຘມ຺ມາຕິ ເວທິຕພ຺ພໍ. ສຕິປຏ຺ຐານາທີນໍ ມຄ຺ຄຜລານຎ຺ຈ ໂລກຸຕ຺ຕຣຕ຺ເຕ ວຸຕ຺ເຕ ຕໍສມ຺ປຍຸຕ຺ຕານໍ ຜສ຺ສາທີນມ຺ປິ ໂລກຸຕ຺ຕຣຕ຺ຕໍ ວຸຕ຺ຕເມວ ໂຫຕິ. ປຘານຘມ຺ມວເສນ ປນ ສຕິປຏ຺ຐານາທໂຍວ ວຸຕ຺ຕາ. ອຠິຘມ຺ເມ (ຘ. ສ. ໒໗໗ ອາທໂຍ, ໕໐໕ ອາທໂຍ) ຈ ໂລກຸຕ຺ຕຣຘມ຺ມນິທ຺ເທເສ ມຄ຺ຄຜລສມ຺ປຍຸຕ຺ຕານໍ ຜສ຺ສາທີນໍ ໂລກຸຕ຺ຕຣຕ຺ຕໍ ວຸຕ຺ຕເມວາຕິ.

ໂລກໍ ຕຣນ຺ຕີຕິ ໂລກໍ ອຕິກ຺ກມນ຺ຕິ. ສພ຺ພມິຘ ອີທິສໍ ວຕ຺ຕມານກາລວຈນໍ ຈຕ຺ຕາໂຣ ອຣິຍມຄ຺ເຄ ສນ຺ຘາຍ ວຸຕ຺ຕໍ. ໂສຕາປຕ຺ຕິມຄ຺ໂຄ ຫິ ອປາຍໂລກໍ ຕຣຕິ, ສກທາຄາມິມຄ຺ໂຄ ກາມາວຈຣໂລເກກເທສໍ ຕຣຕິ, ອນາຄາມິມຄ຺ໂຄ ກາມາວຈຣໂລກໍ ຕຣຕິ, ອຣຫຕ຺ຕມຄ຺ໂຄ ຣູປາຣູປາວຈຣໂລກໍ ຕຣຕິ. ໂລກາ ອຸຕ຺ຕຣນ຺ຕີຕິ ໂລກາ ອຸຄ຺ຄຈ຺ຉນ຺ຕິ. ໂລກໂຕຕິ ຈ ໂລກມ຺ຫາຕິ ຈ ຕເທວ ນິສ຺ສກ຺ກວຈນໍ ວິເສເສຕ຺ວາ ທສ຺ສິຕໍ. ໂລກໍ ສມຕິກ຺ກມນ຺ຕີຕິ ປຐມໍ ວຸຕ຺ຕຕ຺ຖເມວ. ຕຕ຺ຖ ອຸປສຄ຺ຄຕ຺ຖໍ ອນເປກ຺ຂິຕ຺ວາ ວຸຕ຺ຕໍ, ອິຘ ສຫ ອຸປສຄ຺ຄຕ຺ເຖນ ວຸຕ຺ຕໍ. ໂລກໍ ສມຕິກ຺ກນ຺ຕາຕິ ຍຖາວຸຕ຺ຕໍ ໂລກໍ ສມ຺ມາ ອຕິກ຺ກນ຺ຕາ. ສພ຺ພມິຘ ອີທິສໍ ອຕີຕກາລວຈນໍ ຜລນິພ຺ພານານິ ສນ຺ຘາຍ ວຸຕ຺ຕໍ, ໂສຕາປຕ຺ຕິຜລາທີນິ ຫິ ຍຖາວຸຕ຺ຕໍ ໂລກໍ ອຕິກ຺ກມິຕ຺ວາ ຐິຕານິ, ສທາ ນິພ຺ພານໍ ສພ຺ພໂລກໍ ອຕິກ຺ກມິຕ຺ວາ ຐິຕໍ. ໂລເກນ ອຕິເຣກາຕິ ໂລກໂຕ ອຘິກຠູຕາ. ອິທໍ ສພ຺ເພປິ ໂລກຸຕ຺ຕຣຘມ຺ເມ ສນ຺ຘາຍ ວຸຕ຺ຕໍ. ນິສ຺ສຣນ຺ຕີຕິ ນິຄ຺ຄຈ຺ຉນ຺ຕິ. ນິສ຺ສຏາຕິ ນິຄ຺ຄຕາ. ໂລເກ ນ ຕິຏ຺ຐນ຺ຕີຕິອາທີນິ ອຏ຺ຐາຣສ ວຈນານິ ສພ຺ພໂລກຸຕ຺ຕເຣສຸປິ ຍຸຊ຺ຊນ຺ຕິ. ນ ຕິຏ຺ຐນ຺ຕີຕິ ໂລເກ ອປຣິຍາປນ຺ນຕ຺ຕາ ວຸຕ຺ຕໍ. ໂລເກ ນ ລິມ຺ປນ຺ຕີຕິ ຂນ຺ຘສນ຺ຕາເນ ວຕ຺ຕມານາປິ ຕສ຺ມິໍ ນ ລິມ຺ປນ຺ຕີຕິ ອຕ຺ໂຖ. ໂລເກນ ນ ລິມ຺ປນ຺ຕີຕິ ອກຕປຏິເວຘານໍ ເກນຈິ ຈິຕ຺ເຕນ, ກຕປຏິເວຘານໍ ອກຸສເລນ ອປ຺ປມຕ຺ເຕນປິ ຈິຕ຺ເຕນ ນ ລິມ຺ປນ຺ຕີຕິ ອຕ຺ໂຖ. ອສໍລິຕ຺ຕາ ອນຸປລິຕ຺ຕາຕິ ອຸປສຄ຺ເຄນ ວິເສສິຕໍ.

ວິປ຺ປມຸຕ຺ຕາຕິ ອລິຕ຺ຕຕ຺ຕເມວ ນານາພ຺ຍຎ຺ຊເນນ ວິເສສິຕໍ. ເຍ ເກຈິ ຫິ ຍຕ຺ຖ ເຍນ ວາ ອລິຕ຺ຕາ, ເຕ ຕຕ຺ຖ ເຕນ ວາ ວິປ຺ປມຸຕ຺ຕາ ໂຫນ຺ຕິ. ໂລກາ ວິປ຺ປມຸຕ຺ຕາຕິອາທີນິ ຕີຓິ ນິສ຺ສກ຺ກວເສນ ວຸຕ຺ຕານິ. ວິສຎ຺ຎຸຕ຺ຕາຕິ ວິປ຺ປມຸຕ຺ຕຕ຺ຕວິເສສນໍ. ເຍ ເກຈິ ຫິ ຍຕ຺ຖ ເຍນ ຍໂຕ ວິປ຺ປມຸຕ຺ຕາ, ເຕ ຕຕ຺ຖ ເຕນ ຕໂຕ ວິສຎ຺ຎຸຕ຺ຕາ ນາມ ໂຫນ຺ຕິ. ໂລກາ ສຸຊ຺ຌນ຺ຕີຕິ ໂລກມລໍ ໂຘວິຕ຺ວາ ໂລກາ ສຸຊ຺ຌນ຺ຕິ. ວິສຸຊ຺ຌນ຺ຕີຕິ ຕເທວ ອຸປສຄ຺ເຄນ ວິເສສິຕໍ. ວຸຏ຺ຐຫນ຺ຕີຕິ ອຸຏ຺ຐິຕາ ໂຫນ຺ຕິ. ວິວຏ຺ຏນ຺ຕີຕິ ນິວຏ຺ຏນ຺ຕິ. ນ ສຊ຺ຊນ຺ຕີຕິ ນ ລຄ຺ຄນ຺ຕິ. ນ ຄຍ຺ຫນ຺ຕີຕິ ນ ຄຓ຺ຫີຍນ຺ຕິ. ນ ພຊ຺ຌນ຺ຕີຕິ ນ ພາຘີຍນ຺ຕິ. ສມຸຈ຺ຉິນ຺ທນ຺ຕີຕິ ອປ຺ປວຕ຺ຕິໍ ກໂຣນ຺ຕິ. ຍຖາ ຈ ໂລກໍ ສມຸຈ຺ຉິນ຺ນຕ຺ຕາຕິ, ຕເຖວ ‘‘ໂລກາ ວິສຸທ຺ຘຕ຺ຕາ’’ຕິອາທິ ວຸຕ຺ຕເມວ ໂຫຕິ. ປຏິປ຺ປສ຺ສມ຺ເຠນ຺ຕີຕິ ນິໂຣເຘນ຺ຕິ. ອປຖາຕິອາທີນິ ຈຕ຺ຕາຣິ ສພ຺ເພສຸປິ ໂລກຸຕ຺ຕເຣສຸ ຍຸຊ຺ຊນ຺ຕິ. ອປຖາຕິ ອມຄ຺ຄາ. ອຄຕີຕິ ອປ຺ປຕິຏ຺ຐາ. ອວິສຍາຕິ ອນາຍຕ຺ຕາ. ອສາຘາຣຓາຕິ ອສມານາ. ວມນ຺ຕີຕິ ອຸຄ຺ຄິລນ຺ຕິ. ນ ປຈ຺ຈາວມນ຺ຕີຕິ ວຸຕ຺ຕປຏິປກ຺ຂນເຍນ ວຸຕ຺ຕໍ, ວນ຺ຕໍ ປຸນ ນ ອທນ຺ຕີຕິ ອຕ຺ໂຖ. ເອເຕນ ວນ຺ຕສ຺ສ ສຸວນ຺ຕຠາໂວ ວຸຕ຺ໂຕ ໂຫຕິ. ອນນ຺ຕຣທຸກຕ຺ຕເຍປິ ເອເສວ ນໂຍ. ວິສີເນນ຺ຕີຕິ ວິກິຣນ຺ຕິ ວິມຸຈ຺ຈນ຺ຕິ, ນ ພນ຺ຘນ຺ຕີຕິ ອຕ຺ໂຖ. ນ ອຸສ຺ສີເນນ຺ຕີຕິ ນ ວິກິຣນ຺ຕິ ນ ວິມຸຈ຺ຈນ຺ຕິ. ‘‘ວິສິເນນ຺ຕີ’’ຕິ ‘‘ນ ອຸສ຺ສິເນນ຺ຕີ’’ຕິ ຣສ຺ສໍ ກຕ຺ວາ ປາໂຐ ສຸນ຺ທໂຣ. ວິຘູເປນ຺ຕີຕິ ນິພ຺ພາເປນ຺ຕິ. ນ ສໍຘູເປນ຺ຕີຕິ ນ ອຸຊ຺ຊລນ຺ຕິ. ໂລກໍ ສມຕິກ຺ກມ຺ມ ອຠິຠຸຍ຺ຍ ຕິຏ຺ຐນ຺ຕີຕິ ສພ຺ເພປິ ໂລກຸຕ຺ຕຣາ ຘມ຺ມາ ໂລກໍ ສມ຺ມາ ອຕິກ຺ກມິຕ຺ວາ ອຠິຠວິຕ຺ວາ ຈ ຕິຏ຺ຐນ຺ຕີຕິ ໂລກຸຕ຺ຕຣາ. ສພ຺ເພຫິປິ ອິເມຫິ ຍຖາວຸຕ຺ເຕຫິ ປກາເຣຫິ ໂລກຸຕ຺ຕຣານໍ ໂລກໂຕ ອຸຕ຺ຕຣຠາໂວ ອຘິກຠາໂວ ຈ ວຸຕ຺ໂຕ ໂຫຕີຕິ.

ໂລກຸຕ຺ຕຣກຖາວຓ຺ຓນາ ນິຏ຺ຐິຕາ.