໔. ເມຕ຺ຕາກຖາ

ເມຕ຺ຕາກຖາວຓ຺ຓນາ

໒໒. ອິທານິ ໂພຊ຺ຌງ຺ຄກຖານນ຺ຕຣໍ ກຖິຕາຍ ໂພຊ຺ຌງ຺ຄກຖາຄຕິຍາ ສຸຕ຺ຕນ຺ຕປຸພ຺ພງ຺ຄມາຍ ເມຕ຺ຕາກຖາຍ ອປຸພ຺ພຕ຺ຖານຸວຓ຺ຓນາ. ຕຕ຺ຖ ສຸຕ຺ຕນ຺ເຕ ຕາວ ອາເສວິຕາຍາຕິ ອາທເຣນ ເສວິຕາຍ. ຠາວິຕາຍາຕິ ວຑ຺ຒິຕາຍ. ພຫຸລີກຕາຍາຕິ ປຸນປ຺ປຸນໍ ກຕາຍ. ຍານີກຕາຍາຕິ ຍຸຕ຺ຕຍານສທິສາຍ ກຕາຍ. ວຕ຺ຖຸກຕາຍາຕິ ປຕິຏ຺ຐານຏ຺ເຐນ ວຕ຺ຖຸ ວິຍ ກຕາຍ. ອນຸຏ຺ຐິຕາຍາຕິ ປຈ຺ຈຸປຏ຺ຐິຕາຍ. ປຣິຈິຕາຍາຕິ ສມນ຺ຕໂຕ ຈິຕາຍ ອຸປຈິຕາຍ. ສຸສມາຣທ຺ຘາຍາຕິ ສຸຏ຺ຐຸ ສມາຣທ຺ຘາຍ ສຸກຕາຍ. ອານິສໍສາຕິ ຄຸຓາ. ປາຏິກງ຺ຂາຕິ ປຏິກງ຺ຂິຕພ຺ພາ ອິຈ຺ຉິຕພ຺ພາ. ສຸຂໍ ສຸປຕີຕິ ຍຖາ ເສສຊນາ ສມ຺ປຣິວຕ຺ຕມານາ ກາກຈ຺ຉມານາ ທຸກ຺ຂໍ ສຸປນ຺ຕິ, ເອວໍ ອສຸປິຕ຺ວາ ສຸຂໍ ສຸປຕິ. ນິທ຺ທໍ ໂອກ຺ກນ຺ໂຕປິ ສມາປຕ຺ຕິໍ ສມາປນ຺ໂນ ວິຍ ໂຫຕິ. ສຸຂໍ ປຏິພຸຊ຺ຌຕີຕິ ຍຖາ ອຎ຺ເຎ ນິຕ຺ຖຸນນ຺ຕາ ວິຊມ຺ຠນ຺ຕາ ສມ຺ປຣິວຕ຺ຕນ຺ຕາ ທຸກ຺ຂໍ ປຏິພຸຊ຺ຌນ຺ຕິ, ເອວໍ ອປຏິພຸຊ຺ຌິຕ຺ວາ ວິກສມານມິວ ປທຸມໍ ສຸຂໍ ນິພ຺ພິກາຣໍ ປຏິພຸຊ຺ຌຕິ. ນ ປາປກໍ ສຸປິນໍ ປສ຺ສຕີຕິ ສຸປິນໍ ປສ຺ສນ຺ໂຕປິ ຠທ຺ທກເມວ ສຸປິນໍ ປສ຺ສຕິ. ເຈຕິຍໍ ວນ຺ທນ຺ໂຕ ວິຍ ປູຊໍ ກໂຣນ຺ໂຕ ວິຍ ຘມ຺ມໍ ສຸຓນ຺ໂຕ ວິຍ ຈ ໂຫຕິ. ຍຖາ ປນຎ຺ເຎ ອຕ຺ຕານໍ ໂຈເຣຫິ ປຣິວາຣິຕໍ ວິຍ ວາເຬຫິ ອຸປທ຺ທຸຕໍ ວິຍ ປປາເຕ ປຕນ຺ຕໍ ວິຍ ຈ ປສ຺ສນ຺ຕິ, ນ ເອວໍ ປາປກໍ ສຸປິນໍ ປສ຺ສຕິ. ມນຸສ຺ສານໍ ປິໂຍ ໂຫຕີຕິ ອຸເຣ ອາມຸຕ຺ຕມຸຕ຺ຕາຫາໂຣ ວິຍ ສີເສ ປິຬນ຺ຘມາລາ ວິຍ ຈ ມນຸສ຺ສານໍ ປິໂຍ ໂຫຕິ ມນາໂປ. ອມນຸສ຺ສານໍ ປິໂຍ ໂຫຕີຕິ ຍເຖວ ຈ ມນຸສ຺ສານໍ, ເອວໍ ອມນຸສ຺ສານມ຺ປິ ປິໂຍ ໂຫຕິ. ເທວຕາ ຣກ຺ຂນ຺ຕີຕິ ປຸຕ຺ຕມິວ ມາຕາປິຕໂຣ ເທວຕາ ຣກ຺ຂນ຺ຕິ. ນາສ຺ສ ອຄ຺ຄິ ວາ ວິສໍ ວາ ສຕ຺ຖໍ ວາ ກມຕີຕິ ເມຕ຺ຕາວິຫາຣິສ຺ສ ກາເຍ ອຄ຺ຄິ ວາ ວິສໍ ວາ ສຕ຺ຖໍ ວາ ນ ກມຕິ ນ ປວິສຕິ, ນາສ຺ສ ກາຍໍ ວິໂກເປຕີຕິ ວຸຕ຺ຕໍ ໂຫຕິ. ຕຸວຏໍ ຈິຕ຺ຕໍ ສມາຘິຍຕີຕິ ເມຕ຺ຕາວິຫາຣິໂນ ຂິປ຺ປເມວ ຈິຕ຺ຕໍ ສມາຘິຍຕິ, ນຕ຺ຖິ ຕສ຺ສ ທນ຺ຘາຍິຕຕ຺ຕໍ. ມຸຂວຓ຺ໂຓ ວິປ຺ປສີທຕີຕິ ພນ຺ຘນາ ປມຸຕ຺ຕຕາລປກ຺ກໍ ວິຍ ຈສ຺ສ ວິປ຺ປສນ຺ນວຓ຺ຓໍ ມຸຂໍ ໂຫຕິ. ອສມ຺ມູຬ຺ໂຫ ກາລໍ ກໂຣຕີຕິ ເມຕ຺ຕາວິຫາຣິໂນ ສມ຺ໂມຫມຣຓໍ ນາມ ນຕ຺ຖິ, ອສມ຺ມູຬ຺ໂຫ ນິທ຺ທໍ ໂອກ຺ກມນ຺ໂຕ ວິຍ ກາລໍ ກໂຣຕິ. ອຸຕ຺ຕຣິ ອປ຺ປຏິວິຊ຺ຌນ຺ໂຕຕິ ເມຕ຺ຕາສມາປຕ຺ຕິໂຕ ອຸຕ຺ຕຣິໍ ອຣຫຕ຺ຕໍ ອຘິຄນ຺ຕຸໍ ອສກ຺ໂກນ຺ໂຕ ອິໂຕ ຈວິຕ຺ວາ ສຸຕ຺ຕປ຺ປພຸທ຺ໂຘ ວິຍ ພ຺ຣຫ຺ມໂລກູປໂຄ ໂຫຕີຕິ ພ຺ຣຫ຺ມໂລກໍ ອຸປປຊ຺ຊຕີຕິ ອຕ຺ໂຖ.

ເມຕ຺ຕານິທ຺ເທເສ ອໂນຘິໂສ ຜຣຓາຕິ ໂອຘິ ມຣິຍາທາ, ນ ໂອຘິ ອໂນຘິ. ຕໂຕ ອໂນຘິໂສ, ອໂນຘິໂຕຕິ ອຕ຺ໂຖ, ນິປ຺ປເທສໂຕ ຜຸສນາຕິ ວຸຕ຺ຕໍ ໂຫຕິ. ໂອຘິໂສຕິ ປເທສວເສນ. ທິສາຜຣຓາຕິ ທິສາສຸ ຜຣຓາ. ສພ຺ເພຕິ ອນວເສສປຣິຍາທານໍ. ສຕ຺ຕາຕິປທສ຺ສ ອຕ຺ໂຖ ຎາຓກຖາມາຕິກາວຓ຺ຓນາຍໍ ວຸຕ຺ໂຕ, ຣຸຬ຺ຫີສທ຺ເທນ ປນ ວີຕຣາເຄສຸປິ ອຍໍ ໂວຫາໂຣ ວຕ຺ຕຕິ ວິລີວມເຍປິ ພີຊນິວິເສເສ ຕາລວຓ຺ຏໂວຫາໂຣ ວິຍ. ອເວຣາຕິ ເວຣຣຫິຕາ. ອພ຺ຍາປຊ຺ຊາຕິ ພ຺ຍາປາທຣຫິຕາ. ອນີຆາຕິ ນິທ຺ທຸກ຺ຂາ. ອນິຄ຺ຆາຕິປິ ປາໂຐ. ສຸຂີ ອຕ຺ຕານໍປຣິຫຣນ຺ຕູຕິ ສຸຂິຕາ ຫຸຕ຺ວາ ອຕ຺ຕຠາວໍ ວຕ຺ຕຍນ຺ຕຸ. ‘‘ອເວຣາ’’ຕິ ຈ ສກສນ຺ຕາເນ ຈ ປເຣ ປຏິຈ຺ຈ, ປຣສນ຺ຕາເນ ຈ ອິຕເຣ ປຏິຈ຺ຈ ເວຣາຠາໂວ ທສ຺ສິໂຕ, ‘‘ອພ຺ຍາປຊ຺ຊາ’’ຕິອາທີສຸ ເວຣາຠາວາ ຕມ຺ມູລກພ຺ຍາປາທາຠາໂວ, ‘‘ອນີຆາ’’ຕິ ພ຺ຍາປາທາຠາວາ ຕມ຺ມູລກທຸກ຺ຂາຠາໂວ, ‘‘ສຸຂີ ອຕ຺ຕານໍ ປຣິຫຣນ຺ຕູ’’ຕິ ທຸກ຺ຂາຠາວາສຸເຂນ ອຕ຺ຕຠາວປຣິຫຣຓໍ ທສ຺ສິຕນ຺ຕິ ເອວເມຕ຺ຖ ວຈນສມ຺ພນ຺ໂຘ ເວທິຕພ຺ໂພຕິ. ອິເມສຸ ຈ ‘‘ອເວຣາ ໂຫນ຺ຕູ’’ຕິອາທີສຸ ຈຕູສຸປິ ວຈເນສຸ ຍໍ ຍໍ ປາກຏໍ ໂຫຕິ, ຕສ຺ສ ຕສ຺ສ ວເສນ ເມຕ຺ຕາຍ ຜຣຕິ.

ປາຓາຕິອາທີສຸ ປາຓນຕາຍ ປາຓາ, ອສ຺ສາສປສ຺ສາສາຍຕ຺ຕວຸຕ຺ຕິຕາຍາຕິ ອຕ຺ໂຖ. ຠູຕຕ຺ຕາ ຠູຕາ, ອຠິນິພ຺ພຕ຺ຕາຕິ ອຕ຺ໂຖ. ປຸໍ ວຸຈ຺ຈຕິ ນິຣໂຍ, ຕໍ ປຸໍ ຄລນ຺ຕິ ຄຈ຺ຉນ຺ຕີຕິ ປຸຄ຺ຄລາ. ອຕ຺ຕຠາໂວ ວຸຈ຺ຈຕິ ສຣີຣໍ, ຂນ຺ຘປຎ຺ຈກເມວ ວາ, ຕໍ ອຸປາທາຍ ປຎ຺ຎຕ຺ຕິມຕ຺ຕສພ຺ຠາວໂຕ, ຕສ຺ມິໍ ອຕ຺ຕຠາເວ ປຣິຍາປນ຺ນາ ປຣິຈ຺ຉິນ຺ນາ ອນ຺ໂຕຄຘາຕິ ອຕ຺ຕຠາວປຣິຍາປນ຺ນາ. ຍຖາ ຈ ສຕ຺ຕາຕິ ວຈນໍ, ເອວໍ ເສສານິປິ ຣຸຬ຺ຫີວເສນ ອາໂຣເປຕ຺ວາ ສພ຺ພາເນຕານິ ສພ຺ພສຕ຺ຕເວວຈນານີຕິ ເວທິຕພ຺ພານິ. ກາມຎ຺ຈ ອຎ຺ຎານິປິ ‘‘ສພ຺ເພ ຊນ຺ຕູ ສພ຺ເພ ຊີວາ’’ຕິອາທີນິ ສພ຺ພສຕ຺ຕເວວຈນານິ ອຕ຺ຖິ, ປາກຏວເສນ ປນ ອິມາເນວ ປຎ຺ຈ ຄເຫຕ຺ວາ ‘‘ປຎ຺ຈຫາກາເຣຫິ ອໂນຘິໂສ ຜຣຓາ ເມຕ຺ຕາເຈໂຕວິມຸຕ຺ຕີ’’ຕິ ວຸຈ຺ຈຕິ. ເຍ ປນ ‘‘ສຕ຺ຕາ ປາຓາ’’ຕິອາທີນໍ ນ ເກວລໍ ວຈນມຕ຺ຕໂຕວ, ອຖ ໂຂ ອຕ຺ຖໂຕປິ ນານຕ຺ຕເມວ ອິຈ຺ເຉຍ຺ຍຸໍ, ເຕສໍ ອໂນຘິໂສ ຜຣຓາ ວິຣຸຊ຺ຌຕິ. ຕສ຺ມາ ຕຖາ ອຕ຺ຖໍ ອຄ຺ຄເຫຕ຺ວາ ອິເມສຸ ປຎ຺ຈສຸ ອາກາເຣສຸ ອຎ຺ຎຕຣວເສນ ອໂນຘິໂສ ເມຕ຺ຕາຍ ຜຣຕິ.

ໂອຘິໂສ ຜຣເຓ ປນ ອິຕ຺ຖິໂຍ ປຸຣິສາຕິ ລິງ຺ຄວເສນ ວຸຕ຺ຕໍ, ອຣິຍາ ອນຣິຍາຕິ ອຣິຍປຸຖຸຊ຺ຊນວເສນ, ເທວາມນຸສ຺ສາ ວິນິປາຕິກາຕິ ອຸປປຕ຺ຕິວເສນ. ທິສາຜຣເຓປິ ທິສາວິຠາຄໍ ອກຕ຺ວາ ສພ຺ພທິສາສຸ ‘‘ສພ຺ເພ ສຕ຺ຕາ’’ຕິອາທິນາ ນເຍນ ຜຣຓໂຕ ອໂນຘິໂສ ຜຣຓາ ໂຫຕິ, ສພ຺ພທິສາສຸ ‘‘ສພ຺ພາ ອິຕ຺ຖິໂຍ’’ຕິອາທິນາ ນເຍນ ຜຣຓໂຕ ໂອຘິໂສ ຜຣຓາ.

ຍສ຺ມາ ປນ ອຍໍ ຕິວິຘາປິ ເມຕ຺ຕາຜຣຓາ ອປ຺ປນາປຕ຺ຕຈິຕ຺ຕສ຺ສ ວເສນ ວຸຕ຺ຕາ, ຕສ຺ມາ ຕີສຸ ວາເຣສຸ ອປ຺ປນາ ຄເຫຕພ຺ພາ. ອໂນຘິໂສ ຜຣເຓ ຕາວ ‘‘ສພ຺ເພ ສຕ຺ຕາ ອເວຣາ ໂຫນ຺ຕູ’’ຕິ ເອກາ, ‘‘ອພ຺ຍາປຊ຺ຊາ ໂຫນ຺ຕູ’’ຕິ ເອກາ ‘‘ອນີຆາ ໂຫນ຺ຕູ’’ຕິ ເອກາ, ‘‘ສຸຂີ ອຕ຺ຕານໍ ປຣິຫຣນ຺ຕູ’’ຕິ ເອກາ. ຕານິປິ ຫິ ຈຕ຺ຕາຣິ ຫິໂຕປສໍຫາຣວເສເນວ ວຸຕ຺ຕານິ. ຫິໂຕປສໍຫາຣລກ຺ຂຓາ ຫິ ເມຕ຺ຕາ. ອິຕິ ‘‘ສຕ຺ຕາ’’ຕິອາທີສຸ ປຎ຺ຈສຸ ອາກາເຣສຸ ຈຕສ຺ສນ຺ນໍ ຈຕສ຺ສນ຺ນໍ ອປ຺ປນານໍ ວເສນ ວີສຕິ ອປ຺ປນາ ໂຫນ຺ຕິ, ໂອຘິໂສ ຜຣເຓ ‘‘ສພ຺ພາ ອິຕ຺ຖິໂຍ’’ຕິອາທີສຸ ສຕ຺ຕສຸ ອາກາເຣສຸ ຈຕສ຺ສນ຺ນໍ ຈຕສ຺ສນ຺ນໍ ວເສນ ອຏ຺ຐວີສຕິ ອປ຺ປນາ. ທິສາຜຣເຓ ປນ ‘‘ສພ຺ເພ ປຸຣຕ຺ຖິມາຍ ທິສາຍ ສຕ຺ຕາ’’ຕິອາທິນາ ນເຍນ ເອກເມກິສ຺ສາ ທິສາຍ ວີສຕິ ວີສຕິ ກຕ຺ວາ ທ຺ເວ ສຕານິ, ‘‘ສພ຺ພາ ປຸຣຕ຺ຖິມາຍ ທິສາຍ ອິຕ຺ຖິໂຍ’’ຕິອາທິນາ ນເຍນ ເອກເມກິສ຺ສາ ທິສາຍ ອຏ຺ຐວີສຕິ ອຏ຺ຐວີສຕິ ກຕ຺ວາ ອສີຕິ ທ຺ເວ ສຕານີຕິ ຈຕ຺ຕາຣິ ສຕານິ ອສີຕິ ຈ ອປ຺ປນາ. ອິຕິ ສພ຺ພານິປິ ອິຘ ວຸຕ຺ຕານິ ອຏ຺ຐວີສາຘິການິ ປຎ຺ຈ ອປ຺ປນາສຕານິ ໂຫນ຺ຕິ. ຍຖາ ຈ ເມຕ຺ຕາຍ ຕິວິເຘນ ຜຣຓາ ວຸຕ຺ຕາ, ຕຖາ ກຣຸຓາມຸທິຕາອຸເປກ຺ຂານມ຺ປິ ວຸຕ຺ຕາວ ໂຫຕີຕິ ເວທິຕພ຺ພໍ.

໑. ອິນ຺ທ຺ຣິຍວາຣວຓ຺ຓນາ

໒໓. ອຖ ເມຕ຺ຕູປສໍຫາຣາກາຣໍ ອິນ຺ທ຺ຣິຍາທິປຣິຠາວນຎ຺ຈ ທສ຺ເສຕຸໍ ສພ຺ເພສໍ ສຕ຺ຕານໍ ປີຬນໍ ວຊ຺ເຊຕ຺ວາຕິອາທິມາຫ. ຕຕ຺ຖ ປີຬນນ຺ຕິ ອພ຺ຠນ຺ຕຣໂຕ ສຣີຣປີຬນໍ. ອຸປຆາຕນ຺ຕິ ພາຫິຣໂຕ ສຣີໂຣປຆາຕໍ. ສນ຺ຕາປນ຺ຕິ ຍຖາ ຕຖາ ວາ ຈິຕ຺ຕສນ຺ຕາປນໍ. ປຣິຍາທານນ຺ຕິ ປກຕິຍາ ຊີວິຕາທິປຣິກ຺ຂຍໍ. ວິເຫສນ຺ຕິ ປຣໂຕ ຊີວິຕວິເຫຐນໍ. ວຊ຺ເຊຕ຺ວາຕິ ປີຬນາທີສຸ ເອເກກໍ ອຕ຺ຕໂນ ຈິຕ຺ເຕເນວ ອປເນຕ຺ວາ. ອິມານິ ປີຬນາທີນິ ປຎ຺ຈ ປທານິ ເມຕ຺ໂຕປສໍຫາຣສ຺ສ ປຏິປກ຺ຂວິວຊ຺ຊນວເສນ ວຸຕ຺ຕານິ, ອປີຬນາຍາຕິອາທີນິ ເມຕ຺ໂຕປສໍຫາຣວເສນ. ອປີຬນາຍາຕິ ອປີຬນາກາເຣນ, ສພ຺ເພ ສຕ຺ເຕ ເມຕ຺ຕາຍຕີຕິ ສມ຺ພນ຺ໂຘ. ເອວໍ ເສເສສຸປິ. ມາ ເວຣິໂນ ມາ ທຸກ຺ຂິໂນ ມາ ທຸກ຺ຂິຕຕ຺ຕາຕິ ອິມານິປິ ຕີຓິ ເມຕ຺ໂຕປສໍຫາຣສ຺ສ ປຏິປກ຺ຂປຏິກ຺ເຂປວຈນານິ. ມາ-ວຈນສ຺ສ ມາ ໂຫນ຺ຕູຕິ ອຕ຺ໂຖ. ອເວຣິໂນ ສຸຂິໂນ ສຸຂິຕຕ຺ຕາຕິ ອິມານິ ຕີຓິ ເມຕ຺ໂຕປສໍຫາຣວຈນານິ. ‘‘ອພ຺ຍາປຊ຺ຊາ ອນີຆາ’’ຕິ ອິທໍ ທ຺ວຍໍ ‘‘ສຸຂິໂນ’’ຕິ ວຈເນນ ສງ຺ຄຫິຕນ຺ຕິ ເວທິຕພ຺ພໍ. ສຸຂິຕຕ຺ຕາຕິ ຕສ຺ເສວ ສຸຂສ຺ສ ນິຈ຺ຈປ຺ປວຕ຺ຕິທສ຺ສນໍ. ‘‘ສຸຂິຕຕ຺ຕາ’’ຕິ ຈ ‘‘ສຸຂີ ອຕ຺ຕານໍ ປຣິຫຣນ຺ຕູ’’ຕິ ຈ ອຕ຺ຖໂຕ ເອກໍ. ‘‘ອປີຬນາຍາ’’ຕິອາທີຫິ ວາ ອພ຺ຍາປຊ຺ຊານີຆວຈນານິ ສງ຺ຄຫິຕານິ. ອຏ຺ຐຫາກາເຣຫີຕິ ‘‘ອປີຬນາຍາ’’ຕິອາທໂຍ ປຎ຺ຈ ເມຕ຺ໂຕປສໍຫາຣາກາຣາ ‘‘ອເວຣິໂນ ໂຫນ຺ຕູ’’ຕິອາທໂຍ ຕໂຍ ເມຕ຺ໂຕປສໍຫາຣາກາຣາຕິ ອິເມຫິ ອຏ຺ຐຫາກາເຣຫິ. ເມຕ຺ຕາຍຕີຕິ ສິນິຍ຺ຫຕິ. ຕໍ ຘມ຺ມໍ ເຈຕຍຕີຕິ ຕໍ ຫິໂຕປສໍຫາຣໍ ເຈຕຍຕິ ອຠິສນ຺ທຫຕິ, ປວຕ຺ເຕຕີຕິ ອຕ຺ໂຖ. ສພ຺ພພ຺ຍາປາທປຣິຍຸຏ຺ຐາເນຫິ ວິມຸຈ຺ຈຕີຕິ ເມຕ຺ຕາຍ ປຏິປກ຺ຂຠູເຕຫິ ສພ຺ເພຫິ ພ຺ຍາປາທສມຸທາຈາເຣຫິ ວິກ຺ຂມ຺ຠນໂຕ ວິມຸຈ຺ຈຕິ. ເມຕ຺ຕາ ຈ ເຈໂຕ ຈ ວິມຸຕ຺ຕິ ຈາຕິ ເອກາເຍວ ເມຕ຺ຕາ ຕິຘາ ວຓ຺ຓິຕາ.

ອເວຣິໂນ ເຂມິໂນ ສຸຂິໂນຕິ ອິມານິ ຕີຓິ ປທານິ ປຸພ຺ເພ ວຸຕ຺ເຕ ອາກາເຣ ສງ຺ເຂເປນ ສງ຺ຄເຫຕ຺ວາ ວຸຕ຺ຕານິ. ສທ຺ຘາຍ ອຘິມຸຈ຺ຈຕີຕິອາທິນາ ນເຍນ ວຸຕ຺ຕານິ ປຎ຺ຈິນ຺ທ຺ຣິຍານິ ເມຕ຺ຕາຍ ສມ຺ປຍຸຕ຺ຕານິເຍວ. ອາເສວນາຕິອາທີສຸ ຉສຸ ວາເຣສຸ ອາເສວີຍຕິ ເອເຕຫິ ເມຕ຺ຕາຕິ ອາເສວນາ. ຕຖາ ຠາວນາ ພຫຸລີກມ຺ມໍ. ອລງ຺ກາຣາຕິ ວິຠູສນາ. ສ຺ວາລງ຺ກຕາຕິ ສຸຏ຺ຐຸ ອລງ຺ກຕາ ຠູສິຕາ. ປຣິກ຺ຂາຣາຕິ ສມ຺ຠາຣາ. ສຸປຣິກ຺ຂຕາຕິ ສຸຏ຺ຐຸ ສມ຺ຠຕາ. ປຣິວາຣາຕິ ຣກ຺ຂນຏ຺ເຐນ. ປຸນ ອາເສວນາທີນິ ອຏ຺ຐວີສຕິ ປທານິ ເມຕ຺ຕາຍ ວຓ຺ຓຠຓນຕ຺ຖໍ ວຸຕ຺ຕານິ. ຕຕ຺ຖ ປາຣິປູຣີຕິ ປຣິປຸຓ຺ຓຠາວາ. ສຫຄຕາຕິ ເມຕ຺ຕາຍ ສຫຄຕາ. ຕຖາ ສຫຊາຕາທໂຍ. ປກ຺ຂນ຺ທນາຕິ ເມຕ຺ຕາຍ ປວິສນາ, ປກ຺ຂນ຺ທຕິ ເອເຕຫິ ເມຕ຺ຕາຕິ ວາ ປກ຺ຂນ຺ທນາ. ຕຖາ ສໍສີທນາທໂຍ. ເອຕໍ ສນ຺ຕນ຺ຕິ ຜສ຺ສນາຕິ ເອສາ ເມຕ຺ຕາ ສນ຺ຕາຕິ ເອເຕຫິ ຜສ຺ສນາ ໂຫຕີຕິ ເອຕໍ ສນ຺ຕນ຺ຕິ ຜສ຺ສນາ ‘‘ເອຕທຄ຺ຄ’’ນ຺ຕິອາທີສຸ (ອ. ນິ. ໑.໑໘໘ ອາທໂຍ) ວິຍ ນປຸໍສກວຈນໍ. ສ຺ວາຘິຏ຺ຐິຕາຕິ ສຸຏ຺ຐຸ ປຕິຏ຺ຐິຕາ. ສຸສມຸຄ຺ຄຕາຕິ ສຸຏ຺ຐຸ ສມຸສ຺ສິຕາ. ສຸວິມຸຕ຺ຕາຕິ ອຕ຺ຕໂນ ອຕ຺ຕໂນ ປຈ຺ຈນີເກຫິ ສຸຏ຺ຐຸ ວິມຸຕ຺ຕາ. ນິພ຺ພຕ຺ເຕນ຺ຕີຕິ ເມຕ຺ຕາສມ຺ປຍຸຕ຺ຕາ ຫຸຕ຺ວາ ເມຕ຺ຕໍ ນິພ຺ພຕ຺ເຕນ຺ຕິ. ໂຊເຕນ຺ຕີຕິ ປາກຏໍ ກໂຣນ຺ຕິ. ປຕາເປນ຺ຕີຕິ ວິໂຣເຈນ຺ຕິ.

໒-໔. ພລາທິວາຣຕ຺ຕຍວຓ຺ຓນາ

໒໔-໒໗. ອິນ຺ທ຺ຣິຍວາເຣ ວຸຕ຺ຕນເຍເນວ ພລວາໂຣປິ ເວທິຕພ຺ໂພ. ໂພຊ຺ຌງ຺ຄມຄ຺ຄງ຺ຄວາຣາ ປຣິຍາເຍນ ວຸຕ຺ຕາ, ນ ຍຖາລກ຺ຂຓວເສນ. ມຄ຺ຄງ຺ຄວາເຣ ສມ຺ມາວາຈາກມ຺ມນ຺ຕາຊີວາ ເມຕ຺ຕາຍ ປຸພ຺ພຠາຄວເສນ ວຸຕ຺ຕາ, ນ ອປ຺ປນາວເສນ. ນ ຫິ ເອເຕ ເມຕ຺ຕາຍ ສຫ ຠວນ຺ຕິ. ສພ຺ເພສໍ ປາຓານນ຺ຕິອາທີນໍ ເສສວາຣານມ຺ປິ ສຕ຺ຕວາເຣ ວຸຕ຺ຕນເຍເນວ ອຕ຺ໂຖ ເວທິຕພ຺ໂພ. ເມຕ຺ຕາຠາວນາວິຘານໍ ປນ ວິສຸທ຺ຘິມຄ຺ຄໂຕ (ວິສຸທ຺ຘິ. ໑.໒໔໐ ອາທໂຍ) ຄເຫຕພ຺ພນ຺ຕິ.

ເມຕ຺ຕາກຖາວຓ຺ຓນາ ນິຏ຺ຐິຕາ.