໒. ທຸຕິຍສຸຕ຺ຕນ຺ຕປາຬິວຓ຺ຓນາ

໑໓. ປຸນ ອຎ຺ຎສ຺ສ ສຸຕ຺ຕນ຺ຕສ຺ສ ອຕ຺ຖວເສນ ສຈ຺ຈປ຺ປຏິເວຘໍ ນິທ຺ທິສິຕຸກາໂມ ປຸພ຺ເພ ເມ, ຠິກ຺ຂເວຕິອາທິກໍ ສຸຕ຺ຕນ຺ຕໍ ອາຫຣິຕ຺ວາ ທສ຺ເສສິ. ຕຕ຺ຖ ປຸພ຺ເພ ເມ, ຠິກ຺ຂເວ, ສມ຺ໂພຘາຕິ ຠິກ຺ຂເວ, ມມ ສມ຺ໂພຘິໂຕ ສພ຺ພຎ຺ຎຸຕຎ຺ຎາຓໂຕ ປຸພ຺ເພ. ອນຠິສມ຺ພຸທ຺ຘສ຺ສາຕິ ສພ຺ພຘມ຺ເມ ອປ຺ປຏິວິທ຺ຘສ຺ສ. ໂພຘິສຕ຺ຕສ຺ເສວ ສໂຕຕິ ໂພຘິສຕ຺ຕຠູຕສ຺ເສວ. ເອຕທໂຫສີຕິ ໂພຘິປລ຺ລງ຺ເກ ນິສິນ຺ນສ຺ສ ເອຕໍ ປຣິວິຕກ຺ກິຕໍ ອໂຫສິ. ອສ຺ສາໂທຕິ ອສ຺ສາທີຍຕີຕິ ອສ຺ສາໂທ. ອາທີນໂວຕິ ໂທໂສ. ນິສ຺ສຣຓນ຺ຕິ ອປຄມນໍ. ສຸຂນ຺ຕິ ສຸຂຍຕີຕິ ສຸຂໍ, ຍສ຺ສຸປ຺ປຊ຺ຊຕິ, ຕໍ ສຸຂິຕໍ ກໂຣຕີຕິ ອຕ຺ໂຖ. ໂສມນສ຺ສນ຺ຕິ ປີຕິໂສມນສ຺ສໂຍຄໂຕ ໂສຠນໍ ມໂນ ອສ຺ສາຕິ ສຸມໂນ, ສຸມນສ຺ສ ຠາໂວ ໂສມນສ຺ສໍ, ສຸຂເມວ ປີຕິໂຍຄໂຕ ວິເສສິຕໍ. ອນິຈ຺ຈນ຺ຕິ ອທ຺ຘຸວໍ. ທຸກ຺ຂນ຺ຕິ ທຸກ຺ຂວຕ຺ຖຸຕ຺ຕາ ສງ຺ຂາຣທຸກ຺ຂຕ຺ຕາ ຈ ທຸກ຺ຂໍ. ວິປຣິຓາມຘມ຺ມນ຺ຕິ ອວສີ ຫຸຕ຺ວາ ຊຣາຠງ຺ຄວເສນ ປຣິວຕ຺ຕນປກຕິກໍ. ເອເຕນ ອນຕ຺ຕຠາໂວ ວຸຕ຺ໂຕ ໂຫຕິ. ຉນ຺ທຣາຄວິນໂຍຕິ ຉນ຺ທສງ຺ຂາຕສ຺ສ ຣາຄສ຺ສ ສໍວຣຓໍ, ນ ວຓ຺ຓຣາຄສ຺ສ. ຉນ຺ທຣາຄປ຺ປຫານນ຺ຕິ ຕສ຺ເສວ ຉນ຺ທຣາຄສ຺ສ ປຊຫນໍ.

ຍາວກີວຎ຺ຈາຕິອາທີສຸ ຍາວ ອິເມສໍ ປຎ຺ຈນ຺ນໍ ອຸປາທານກ຺ຂນ຺ຘານໍ…ເປ… ຍຖາຠູຕໍ ນາພ຺ຠຎ຺ຎາສິໍ ນ ອຘິເກນ ຎາເຓນ ປຏິວິຊ຺ຌິໍ, ຕາວ ອນຸຕ຺ຕຣໍ ສມ຺ມາສມ຺ໂພຘິໍ ອນຸຕ຺ຕຣໍ ສພ຺ພຎ຺ຎຸຠາວໍ ອຠິສມ຺ພຸທ຺ໂຘ ອຠິສເມຕາວີ ອຣຫນ຺ຕິ ເນວາຫໍ ປຈ຺ຈຎ຺ຎາສິໍ ເນວ ປຏິຎ຺ຎໍ ອກາສິນ຺ຕິ ສມ຺ພນ຺ຘໂຕ ອຕ຺ໂຖ. ກີວຎ຺ຈາຕິ ນິປາຕມຕ຺ຕໍ. ຍໂຕຕິ ຍສ຺ມາ, ຍທາ ວາ. ອຖາຕິ ອນນ຺ຕຣໍ. ຎາຓຎ຺ຈ ປນ ເມ ທສ຺ສນໍ ອຸທປາທີຕິ ທສ຺ສນກິຈ຺ຈກຣເຓນ ທສ຺ສນສງ຺ຂາຕໍ ປຈ຺ຈເວກ຺ຂຓຎາຓຎ຺ຈ ເມ ອຸປ຺ປຊ຺ຊິ. ອກຸປ຺ປາຕິ ໂກເປຕຸໍ ຈາເລຕຸໍ ອສກ຺ກຸເຓຍ຺ຍາ. ວິມຸຕ຺ຕີຕິ ອຣຫຕ຺ຕຜລວິມຸຕ຺ຕິ. ເອຕາຍ ເອວ ຜລປຈ຺ຈເວກ຺ຂຓາຍ ມຄ຺ຄນິພ຺ພານປຈ຺ຈເວກ຺ຂຓາປິ ວຸຕ຺ຕາວ ໂຫນ຺ຕິ. ອຍມນ຺ຕິມາ ຊາຕີຕິ ອຍໍ ປຈ຺ຉິມາ ຂນ຺ຘປ຺ປວຕ຺ຕິ. ນຕ຺ຖິທານິ ປຸນພ຺ຠໂວຕິ ອິທານິ ປຸນ ອຸປ຺ປຕ຺ຕິ ນຕ຺ຖິ. ເອເຕນ ປຫີນກິເລສປຈ຺ຈເວກ຺ຂຓາ ວຸຕ຺ຕາ. ອຣຫໂຕ ຫິ ອວສິຏ຺ຐກິເລສປຈ຺ຈເວກ຺ຂຓາ ນ ໂຫຕິ.