ຫານຠາຄິຍຈຕຸກ຺ກນິທ຺ເທສວຓ຺ຓນາ
໓໐. ອິທານິ ຍສ຺ມາ ຫານຠາຄິຍາທິຕາ ເອເກກສ຺ເສວ ສມາຘິສ຺ສ ອວຕ຺ຖາເຠເທນ ໂຫຕິ, ຕສ຺ມາ ຫານຠາຄິຍຈຕຸກ຺ກໍ ເອກໂຕເຍວ ນິທ຺ທິຏ຺ຐໍ. ຕຕ຺ຖ ປຐມສ຺ສ ຌານສ຺ສ ລາຠິນ຺ຕິ ປຐມສ຺ສ ຌານສ຺ສ ລາຠິໂນ. ສາມິອຕ຺ເຖ ອຸປໂຍຄວຈນໍ. ລາໂຠ ສຈ຺ຉິກິຣິຍາ ອສ຺ສ ອຕ຺ຖີຕິ ລາຠີຕິ ວຸຈ຺ຈຕິ. ກາມສຫຄຕາຕິ ເອຕ຺ຖ ສຫຄຕສທ຺ທສ຺ສ ອາຣມ຺ມຓຕ຺ໂຖ ອຘິປ຺ເປໂຕ, ວຕ຺ຖຸກາມກິເລສກາມາຣມ຺ມຓາຕິ ອຕ຺ໂຖ. ສຎ຺ຎາມນສິກາຣາຕິ ຊວນສຎ຺ຎາ ຈ ຕທາວຊ຺ຊນມນສິກາໂຣ ຈ, ສຎ຺ຎາສມ຺ປຍຸຕ຺ຕມນສິກາໂຣປິ ວຏ຺ຏຕິ. ສມຸທາຈຣນ຺ຕີຕິ ປວຕ຺ຕນ຺ຕິ. ຘມ຺ໂມຕິ ປຐມຊ຺ຌານຘມ຺ໂມ. ຌານາ ປຣິຫາຍນ຺ໂຕ ຕີຫິ ກາຣເຓຫິ ປຣິຫາຍຕິ ກິເລສສມຸທາຈາເຣນ ວາ ອສປ຺ປາຍກິຣິຍາຍ ວາ ອນນຸໂຍເຄນ ວາ. ກິເລສສມຸທາຈາເຣນ ປຣິຫາຍນ຺ໂຕ ສີຆໍ ປຣິຫາຍຕິ, ກມ຺ມາຣາມຕາຠສ຺ສາຣາມຕານິທ຺ທາຣາມຕາສງ຺ຄຓິກາຣາມຕານຸໂຍຄວເສນ ອສປ຺ປາຍກິຣິຍາຍ ປຣິຫາຍນ຺ໂຕ ທນ຺ຘໍ ປຣິຫາຍຕິ, ເຄລຎ຺ຎປຈ຺ຈຍເວກລ຺ລາທິນາ ປລິໂພເຘນ ອຠິກ຺ຂຓໍ ອສມາປຊ຺ຊນ຺ໂຕ ອນນຸໂຍເຄນ ປຣິຫາຍນ຺ໂຕປິ ທນ຺ຘໍ ປຣິຫາຍຕິ. ອິຘ ປນ ພລວກາຣຓເມວ ທສ຺ເສນ຺ໂຕ ກິເລສສມຸທາຈາຣເມວາຫ. ທຸຕິຍຊ຺ຌານາທີຫິ ປນ ປຣິຫາຍນ຺ໂຕ ເຫຏ຺ຐິມເຫຏ຺ຐິມຊ຺ຌານນິກນ຺ຕິສມຸທາຈາເຣນປິ ປຣິຫາຍຕິ. ກິຕ຺ຕາວຕາ ປຣິຫີໂນ ໂຫຕີຕິ? ຍທາ ນ ສກ຺ໂກຕິ ສມາປຊ຺ຊິຕຸໍ, ເອຕ຺ຕາວຕາ ປຣິຫີໂນ ໂຫຕີຕິ. ຕທນຸຘມ຺ມຕາຕິ ອນຸປວຕ຺ໂຕ ຘມ຺ໂມ ອນຸຘມ຺ໂມ, ຌານໍ ອຘິກໍ ກຕ຺ວາ ປວຕ຺ຕສ຺ສ ນິກນ຺ຕິຘມ຺ມສ຺ເສຕໍ ອຘິວຈນໍ. ອນຸຘມ຺ໂມ ເອວ ອນຸຘມ຺ມຕາ, ຕສ຺ສ ຌານສ຺ສ ອນຸຘມ຺ມຕາ ຕທນຸຘມ຺ມຕາ. ສຕີຕິ ນິກນ຺ຕິ. ສນ຺ຕິຏ຺ຐຕີຕິ ປຕິຏ຺ຐາຕິ. ຕໍ ປຐມຊ຺ຌານໍ ອນຸວຕ຺ຕມານາ ນິກນ຺ຕິ ປວຕ຺ຕຕີຕິ ວຸຕ຺ຕໍ ໂຫຕິ. ອວິຕກ຺ກສຫຄຕາຕິ ທຸຕິຍຊ຺ຌານາຣມ຺ມຓາ. ຕຎ຺ຫິ ນຕ຺ເຖຕ຺ຖ ວິຕກ຺ໂກຕິ ອວິຕກ຺ກນ຺ຕິ ວຸຈ຺ຈຕິ. ນິພ຺ພິທາສຫຄຕາຕິ ວິປສ຺ສນາຣມ຺ມຓາ. ສາ ຫິ ສງ຺ຂາເຣສຸ ນິພ຺ພິນ຺ທນໂຕ ນິພ຺ພິທາຕິ ວຸຈ຺ຈຕິ. ‘‘ນິພ຺ພິນ຺ທໍ ວິຣຊ຺ຊຕີ’’ຕິ (ມຫາວ. ໒໓; ສໍ. ນິ. ໓.໖໑) ຫິ ວຸຕ຺ຕໍ. ວິຣາຄູປສໍຫິຕາຕິ ອຣິຍມຄ຺ຄປຏິສຎ຺ຎຸຕ຺ຕາ ວິປສ຺ສນາ. ວິປສ຺ສນາ ຫິ ສິຂາປ຺ປຕ຺ຕາ ມຄ຺ຄວຸຏ຺ຐານໍ ປາເປຕິ. ຕສ຺ມາ ວິປສ຺ສນາຣມ຺ມຓາ ສຎ຺ຎາມນສິກາຣາ ‘‘ວິຣາຄູປສໍຫິຕາ’’ຕິ ວຸຈ຺ຈນ຺ຕິ, ‘‘ວິຣາຄາ ວິມຸຈ຺ຈຕີ’’ຕິ ຫິ ວຸຕ຺ຕໍ.
ວິຕກ຺ກສຫຄຕາຕິ ວິຕກ຺ກວເສນ ປຐມຊ຺ຌານາຣມ຺ມຓາ. ອຸເປກ຺ຂາສຸຂສຫຄຕາຕິ ຕຕ຺ຣມຊ຺ຌຕ຺ຕຸເປກ຺ຂາຍ ຈ ສຸຂເວທນາຍ ຈ ວເສນ ຕຕິຍຊ຺ຌານາຣມ຺ມຓາ. ປີຕິສຸຂສຫຄຕາຕິ ປີຕິຍາ ຈ ສຸຂເວທນາຍ ຈ ວເສນ ທຸຕິຍຊ຺ຌານາຣມ຺ມຓາ. ອທຸກ຺ຂມສຸຂສຫຄຕາຕິ ອຸເປກ຺ຂາເວທນາວເສນ ຈຕຸຕ຺ຖຊ຺ຌານາຣມ຺ມຓາ. ສາ ຫິ ເວທນາ ນ ທຸກ຺ຂາ ນ ສຸຂາຕິ ອທຸກ຺ຂມສຸຂາຕິ ວຸຈ຺ຈຕິ, ມ-ກາໂຣ ປເນຕ຺ຖ ປທສນ຺ຘິວເສນ ວຸຕ຺ໂຕ. ຣູປສຫຄຕາຕິ ຣູປຊ຺ຌານາຣມ຺ມຓາ. ເນວສຎ຺ຎານາສຎ຺ຎາຍຕເນ ຐິຕສ຺ສ ຫານຠາຄິຍຐິຕິຠາຄິຍນິພ຺ເພຘຠາຄິຍຕ຺ເຕສຸ ວິຊ຺ຊມາເນສຸປິ ວິເສສຠາຄິຍຕ຺ຕາຠາວາ ເນວສຎ຺ຎານາສຎ຺ຎາຍຕນໍ ນ ນິທ຺ທິຏ຺ຐໍ. ສພ຺ໂພປິ ເຈສ ໂລກິໂຍ ສມາຘິ ປມາທວິຫາຣິສ຺ສ ມຸທິນ຺ທ຺ຣິຍສ຺ສ ຫານຠາຄິໂຍ ໂຫຕິ, ອປ຺ປມາທວິຫາຣິສ຺ສ ມຸທິນ຺ທ຺ຣິຍສ຺ສ ຐິຕິຠາຄິໂຍ ໂຫຕິ, ຕຓ຺ຫາຈຣິຕສ຺ສ ຕິກ຺ຂິນ຺ທ຺ຣິຍສ຺ສ ວິເສສຠາຄິໂຍ ໂຫຕິ, ທິຏ຺ຐິຈຣິຕສ຺ສ ຕິກ຺ຂິນ຺ທ຺ຣິຍສ຺ສ ນິພ຺ເພຘຠາຄິໂຍ ໂຫຕີຕິ ວຸຈ຺ຈຕິ.
ຫານຠາຄິຍຈຕຸກ຺ກນິທ຺ເທສວຓ຺ຓນາ ນິຏ຺ຐິຕາ.