ລກ຺ຂຓຕ຺ຕິກນິທ຺ເທສວຓ຺ຓນາ

໓໑. ອິທານິ ຍສ຺ມາ ເອເກໂກປິ ໂລກິຍຘມ຺ໂມ ຕິລກ຺ຂຓພ຺ຠາຫໂຕ, ຕສ຺ມາ ລກ຺ຂຓຕ຺ຕິກໍ ເອກໂຕ ນິທ຺ທິຏ຺ຐໍ. ຕຕ຺ຖ ອນິຈ຺ຈໍ ຂຍຏ຺ເຐນາຕິ ຕຕ຺ຖ ຕຕ຺ເຖວ ຂີຍນຠາເວນ ອນິຈ຺ຈໍ. ‘‘ຂຍຘມ຺ມຕ຺ຕາ, ວຍຘມ຺ມຕ຺ຕາ, ວິຣາຄຘມ຺ມຕ຺ຕາ, ນິໂຣຘຘມ຺ມຕ຺ຕາ ອນິຈ຺ຈ’’ນ຺ຕິ ເອເກ. ທຸກ຺ຂໍ ຠຍຏ຺ເຐນາຕິ ສປ຺ປຏິຠຍຕາຍ ທຸກ຺ຂໍ. ຍຎ຺ຫິ ອນິຈ຺ຈໍ, ຕໍ ຠຍາວຫໍ ໂຫຕິ ສີໂຫປມສຸຕ຺ເຕ (ສໍ. ນິ. ໓.໗໘) ເທວານໍ ວິຍ. ‘‘ຊາຕິຊຣາພ຺ຍາຘິມຣຓຠຍຏ຺ເຐນ ທຸກ຺ຂ’’ນ຺ຕິ ເອເກ. ອນຕ຺ຕາ ອສາຣກຏ຺ເຐນາຕິ ‘‘ອຕ຺ຕາ ນິວາສີ ກາຣໂກ ເວທໂກ ສຍໍວສີ’’ຕິ ເອວໍ ປຣິກປ຺ປິຕສ຺ສ ອຕ຺ຕສາຣສ຺ສ ອຠາເວນ ອນຕ຺ຕາ. ຍຎ຺ຫິ ອນິຈ຺ຈໍ ທຸກ຺ຂໍ, ຕໍ ອຕ຺ຕໂນປິ ອນິຈ຺ຈຕໍ ວາ ອຸທຍພ຺ພຍປີຬນໍ ວາ ຘາເຣຕຸໍ ນ ສກ຺ໂກຕິ, ກຸໂຕ ຕສ຺ສ ກາຣກາທິຠາໂວ. ວຸຕ຺ຕຎ຺ຈ ‘‘ຣູປຎ຺ຈ ຫິທໍ, ຠິກ຺ຂເວ, ອຕ຺ຕາ ອຠວິສ຺ສ, ນຍິທໍ ຣູປໍ ອາພາຘາຍ ສໍວຕ຺ເຕຍ຺ຍາ’’ຕິອາທິ (ມຫາວ. ໒໐). ‘‘ອຕ຺ຕສາຣນິຈ຺ຈສາຣວິຣຫິຕຕ຺ຕາ ອນຕ຺ຕາ’’ຕິ ເອເກ.

ລກ຺ຂຓຕ຺ຕິກນິທ຺ເທສວຓ຺ຓນາ ນິຏ຺ຐິຕາ.